Lʋʋ Dəkuu 45

Zʋzɛfə pɩn ʋ nubɩa tə lwarɩ wá

1 Zwida nə tún ʋ nii tə ʋ zwɛ̀, Zʋzɛfə yà kʋ́ʋ̀ wàrɩ̀ ʋ yinɩa ʋ janɩ, lɩ̀à tə mama yáá con, ba yà nə wulə də wá. Yá ʋ dàń baa, ʋ wʋ́: «Á mama naŋa kàrá, á ga yá à də bara ba tə.» Lìù don mama wà twá ʋ ya lá, máŋá tə wa, Zʋzɛfə nə pɩn, ʋ nubɩa tə lwarɩ wá. 2 Kʋ máŋá tə wa, Zʋzɛfə dàń lwə kori, ʋ wulə ʋ kwi. Ʋ kori nan zənzən, kʋ pa Ezwipətə tɩ̀án nì ʋ kwirə tə. Pɩ̀ʋ́ Farawon dìə̀ lɩ̀à də nì ʋ kwirə tə yoo. 3 Yá Zʋzɛfə dàń swɩ̀n ʋ nubɩa tə con, ʋ wʋ́: «À mʋ̀ nə yɩ Zʋzɛfə! Cɩ́gá mama, à nyɩna tə wulə lʋʋ wa?» Yá ʋ nubɩa tə yà kʋ́ʋ̀ wàrɩ̀ wá ba le. Cɩ́gá, fən yà zʋa ba zənzən, ba nə lwarɩ də, Zʋzɛfə yáá con nə, ba zɩga yɩrɩ.

4 Zʋzɛfə kʋ́ʋ̀ swɩ̀n ʋ nubɩa tə con, ʋ wʋ́: «À lòrì aba, sə á bà, á yí à yɩra.» Ba ma va, ba yí ʋ yɩra. Yá ʋ dàń swɩ̀n ba con, ʋ wʋ́: «À mʋ̀ nə yɩ á nubiu Zʋzɛfə, á nə yoli baywələ tə yuu wa, ba ja bà Ezwipətə lʋʋ nii wa, yəbə. 5 Sɩ́ʋ́n nə, á dànà ká pa kʋ yɩ̀ aba. Á dànà ká pa á lɩŋa də zàn, á tɩ̀àn yuu wa, á nə yoli nə, á pa, ba ja bà yəbə yɩrɩ. Cɩ́gá, kʋ yɩ Yɩɩ nə pɩn, à dí á yáá, à bà yəbə, sə à jon á mɩɩ, à kə lʋʋ. 6 Bɩna bələ nə nətən, niən tə nə wulə lʋʋ nii tə wa. Yá bɩna bonu tə bɩ̀àn, kárɩ́ vanan, nə à yə̀ə́, woceri nə bá ya lá. 7 Yá Yɩɩ dàń tʋn nə, sə à dí á yáá, à bà lʋʋ nii kʋ tə wa, sə á wànɩ́, á ja nubiu lá. Yá kʋ dàń yɩ sáŋʋ́ nəfarʋ, kʋ nə wá pa, á wànɩ́ á nan niən tə wa, á dàn ká tɩ, á zwɛ̀. 8 Sɩ́ʋ́n nə, kʋ dàń yɩ Yɩɩ nə pɩn, à bà yəbə, kʋ kʋ́ʋ̀ tà á mʋ̀. Yɩɩ tún nə, sə à ya pɩ̀ʋ́ Farawon tʋ̀tʋ̀nà tə yáá tíú, sə à ga ywàń pɩ̀ʋ́ Farawon dìə̀ tə, də Ezwipətə lʋʋ nii tə mama yuu.»

9 Yá Zʋzɛfə dàń swɩ̀n ʋ nubɩa tə con, ʋ wʋ́: «Sɩ́ʋ́n nə, á dàń pìrə́, á va à nyɩna con, lala. Á pɩan ʋ lwarɩ də, ʋ bìú Zʋzɛfə nə tʋn aba, sə á swɩ̀n ʋ con, də Yɩɩ pɩn, à jì Ezwipətə lʋʋ nii tə mama yáá tíú. Yá à boŋə wá, sə ʋ bà à con, ʋ dàn ká dɩ́án. 10 Ʋ nə twi, à wá pa wá bwálɩ́ Goswɛn nagwanaa tə wa, sə ʋ jə̀ń lá, n mʋ́ də ʋ bɩ̀á, də ʋ nɩ̀án, də ʋ vanmɩnɩ, də ʋ vanfaran, də wiən tə mama, tə nə yɩ ʋ mʋ̀ nyiən. Kʋ nətʋ dàń wá pa, ʋ bólí à nii. 11 Ʋ nə twi, ʋ jə̀ə́ Goswɛn nagwanaa tə wa, à dàń wá wànɩ́ à san wá, də won tə mama, ʋ nə pɩ̀à. Yá won mama kʋ́ʋ̀ bá mùrì ʋ də ʋ dìə̀ lɩ̀à tə, də ʋ vàná tə mama. Cɩ́gá, bɩna bonu tə bɩ̀àn, niən tə nə wá ya lá.»

12 Yá Zʋzɛfə tə swɩ̀n ʋ nubɩa tə con, ʋ súrí lá, ʋ wʋ́: «Á tətə na də kʋ yɩ à mʋ̀ Zʋzɛfə, à nyánʋ́ Bɛnzwamɛn də ga na, də kʋ cɩ́gá yɩ à mʋ̀ nə swɩ̀n á con. 13 Á dàń vələ, á man á bɩrɩ à nyɩna tə nə, sə ʋ yəni, à nə jə dun, Ezwipətə lʋʋ nii tə wa nətʋ. Á maŋa kʋ tə mama, á nə nɩ, á bɩrɩ wá. Kʋ kwa nə, sə á dàń kə dɩ̀àn, á ja wá, á bà yəbə, lala.» 14 Zʋzɛfə dàń pùrì ʋ nyánʋ́ Bɛnzwamɛn, ʋ kə ʋ nyʋnɩ nə, ʋ ga kwi. Yá Bɛnzwamɛn də twá ʋ kwi. 15 Ʋ pùrì ʋ nubɩa tə duən tə də mama, ʋ kə ʋ nyʋnɩ nə, ʋ ga kwi. Kʋ kwa nə, ʋ nubɩa tə dàń ve də wá.

16 Zʋzɛfə nubɩa tə túrí tə ŋwɛn vəli, kʋ yí pɩ̀ʋ́ Farawon sàń. Yá pɩ̀ʋ́ Farawon nə nì kʋ, kʋ yɩn ywánɩ́, kʋ pa ʋ də ʋ tʋ̀tʋ̀nà tə nə. 17 Yá pɩ̀ʋ́ Farawon dàń swɩ̀n Zʋzɛfə con, ʋ wʋ́: «Swɩ̀n n nubɩa tə con, sə ba kə ba zɩla ba bɩnɛ tə yuu, ba pìí ba va Kanaan lʋʋ nii. 18 Ba nə vəli, sə ba lɩ á nyɩna tə, də ba tətə dìə̀ lɩ̀à tə, ba ja pìí ba bà à con. À wá pa ba bwálɩ́ tə, kʋ nə ziən, kʋ doni bwálá tə mɛ, Ezwipətə lʋʋ tə wa, sə ba jə̀ń lá. Yá ba dàń wá də́ wodirən tə nə ziən, tə doni wodirən tə mɛ, lʋʋ nii tə wa.» 19 Pɩ̀ʋ́ Farawon tə swɩ̀n Zʋzɛfə con, ʋ súrí lá, ʋ wʋ́: «N tə wá pa nii n nubɩa tə nə, sə ba tì səsen kòrə̀n Ezwipətə lʋʋ nii tə wa, ba nə wá ma pɛ̀ ba bɩ̀á, də ba kana, də á nyɩna tə, ba ja bà. 20 Ba dànà ká pa, ba wiən duən yoo yɩ̀ ba. Cɩ́gá, won tə mama, kʋ nə ziən, Ezwipətə lʋʋ nii tə mama wa, wá ya ba mʋ̀ nyiən.»

21 Yɩzərayɛlə bɩ̀á tə tʋn yoo mama, kʋ twá ndə ba nə pɩn ba nii, sə ba tʋn nətʋ. Zʋzɛfə pɩn ba səsen korən, kʋ twá ndə pɩ̀ʋ́ Farawon nə pɩn nii, sə ʋ tʋn nətʋ. Ʋ tə pɩn ba, ba nii wodiu də, sə ba də́ cwəŋə wa. 22 Zʋzɛfə pɩn gàndʋra ʋ nubɩa tə mama nə. Yá ʋ dàń pɩn gàndʋra bonu, də wárʋ́ səbilurən biətwa, Bɛnzwamɛn mʋ̀ nə. 23 Kʋ nə súrí lá, Zʋzɛfə tə pɩn bɩnabara fugə zɩn wozəŋə yiri mama, tə nə wulə Ezwipətə lʋʋ nii tə wa, sə ʋ nubɩa tə ja va, ba pa ʋ nyɩna tə nə. Ʋ pɩn bɩnakana fugə də zɩn mɩna, də dipɛn, də wodirən duən, sə ba ja va, ba pa ʋ nyɩna tə nə. Ʋ pɩn wiən təntə ʋ nyɩna tə nə, sə ʋ ma san ʋ tɩ̀àn nə, cwəŋə wa, máŋá tə wa, ʋ nə bɩ̀àn. 24 Kʋ kwa nə, Zʋzɛfə swɩ̀n ʋ nubɩa tə con, sə ba dàn ká fwa jara cwəŋə wa. Yá ʋ dàń yá ba, ʋ pa ba vìí.

25 Zʋzɛfə nubɩa tə dàń pìí, ba nan Ezwipətə, ba bà Kanaan lʋʋ nii wa, ba nyɩna Zwakɔbə con. 26 Ba tún ba nii, ba bɩrɩ ba nyɩna tə nə, ba wʋ́: «Zʋzɛfə tə wulə lʋʋ wa! Ʋ mʋ̀ nə yɩ, Ezwipətə lʋʋ nii tə mama yáá tíú.» Yá Zwakɔbə bɩcan wà ʋ bɩ̀á tə sʋgʋ tə nə dɩŋɩ, ʋ yà nə ba bʋŋa də kʋ yɩ cɩ́gá yɩrɩ. 27 Yá ba dàń pìí ba tì Zʋzɛfə sʋ̀ràn tə mama, ʋ nə swɩ̀n ba con, ba tún ba bɩrɩ ba nyɩna tə nə. Zwakɔbə cɩ́gá nɩ səsen kòrə̀n tə, Zʋzɛfə nə pɩn tə bà, sə tə tì wá. Kʋ máŋá təntə wa, Zwakɔbə pubʋŋa dàń pìí ka bà. 28 Yá Yɩzərayɛlə dàń swɩ̀n, ʋ wʋ́: «Kʋ mɛ nətʋ! À sɛ̀, də à bìú Zʋzɛfə tə wulə lʋʋ wa! À wá va à na wá, də à tə wà tɩ.