Lʋʋ Dəkuu 44

Zʋzɛfə ken ŋwɩ̀ràn ʋ nubɩa tə nii nə

1 Kʋ kwa nə, Zʋzɛfə bon ʋ tʋ̀tʋ̀nà yáá tíú tə, ʋ pa wá nii kʋ tə, ʋ wʋ́: «Kə wodiu, n sú lɩ̀à ba tə ganlwaran tə nii, kʋ mɛ nətʋ tə, ganlɔɔ mama nə wàá kʋ tì. Pìí n dà ba lìù mama səbiu, ʋ wodiu tə yuu, ʋ ganlɔɔ wa. 2 N wá tì à wárʋ́ wùrú zʋŋa tə də, n dà ba nyánʋ́ tə wodiu tə yuu, ʋ ganlɔɔ tə wa, n súrí ʋ mɩna tə səbiu tə nə. Tʋtʋnʋ tə tʋn kʋ, ndə Zʋzɛfə nə swɩ̀n ʋ con, nətʋ.

3 Kʋ tɩpʋrɩ jɩjʋ nə, ba ken Zʋzɛfə nubɩa tə, də ba bɩnɛ cwəŋə nə, sə ba vìí. 4 Máŋá tə, ba nə nan tɩʋ tə wa, yá ba yà ga tə wà yiŋʋnɩ vəli, Zʋzɛfə swɩ̀n ʋ tʋ̀tʋ̀nà yáá tíú tə con, ʋ wʋ́: «Zàn n dɩŋɩ lɩ̀à ba tə kwa, n ja. N wá bwe ba n jə́n, bɛ̀ɛ̀ nə pɩn, ba ja lwanɩ, ba ma ŋwɩ́n zəni? 5 Bɛ̀ɛ̀ nə pɩn, ba ma ŋʋ wùrú zʋŋa tə, n yuu-tiu tə, nə nywɩn ka wa, yá ʋ ma pwárɩ́, ʋ lwarɩ jwɩan yoo? Swɩ̀n ba con də, yoo təntə ba na tʋn, yɩ lwanɩ nə ba tʋn.»

6 Zʋzɛfə tʋ̀tʋ̀nà yáá tíú tə dàń nan, ʋ dɩŋɩ Zʋzɛə nubɩa tə kwa, ʋ ja. Yá ʋ bwe ba, ndə Zʋzɛfə nə swɩ̀n ʋ con nətʋ. 7 Ba le wá, ba wʋ́: «Yuu-tiu, bɛ̀ɛ̀ nə pɩn, n ma swɩ̀n sʋ̀ràn tə tə yiri, nə con? Nə mʋ̀, n tʋ̀tʋ̀nà tə bá sɛ̀, nə tʋn yoo kʋ tə yiri. 8 N tətə yə̀ə́ də, nə nə nɩ səbiu tə nə ganlwaran tə wa, nə wà kʋ səgə. Nə pìí nə ja kʋ, nə nan Kanaan lʋʋ nii, nə bà, sə nə pa mʋ́. Nə kʋ́ʋ̀ wá fwa nətə, nə ma ŋwɩ̀n səbiu, nə à yə̀ə́ sɩ́án, n yuu-tiu tə dìə̀ wa? 9 Nə sɛ̀, sə ba gʋ nə wa lìù tə, n nə wá na wùrú zʋŋa tə ʋ con. Yá nə gɩganɩ tə də dàń wá jì, nə yuu-tiu tə ywə́ŋə́.» 10 Zʋzɛfə tʋ̀tʋ̀nà yáá tíú tə le ba, ʋ wʋ́: «Kʋ ziən! À wá twá á níə́ sʋ̀ràn tə nə, à ma ja aba. Á wa lìù tə con, à nə wá na wùrú zʋŋa tə ʋ con tə, kʋ tíú nə wá jì à yoŋu. Yá à wá dʋgʋ á gɩganɩ tə mʋ̀, sə á vìí. 11 Ba lìù mama dàń bɩbarɩ, ʋ cú ʋ ganlɔɔ, ʋ tún tɩa, ʋ kʋ̀rɩ̀ kʋ nii nə. 12 Zʋzɛfə tʋ̀tʋ̀nà yáá tíú tə dàń zɩgɩ, ba nəkwɩa tíú tə ganlɔɔ nə, ʋ gwìń ba ganlwaran tə mama, ʋ va ʋ yí ba nəmaa tíú tə ganlɔɔ. Yá ʋ dàń nɩ wùrú zʋŋa tə, Bɛnzwamɛn ganlɔɔ wa. 13 Ba nə nɩ kʋ nətʋ tə, pucʋnɩ zʋa ba zənzən, ba ga van ba gànàn ba kàrɩ́. Ba lìù mama pìí ʋ tì ʋ ganlɔɔ, ʋ kə ʋ bɩna yuu, ba mɛ ga pìí ba pɛ̀ duən, ba va tɩʋ tə wa.

Zwida lòrì, sə Zʋzɛfə fwa pubwanʋ Bɛnzwamɛn yɩra

14 Zwida də ʋ nubɩa tə pìí ba va, ba yí Zʋzɛfə sàń, də ʋ tə wulə dìə̀. Ba tʋa ʋ yáá con, ba ma lwɛ̀ ʋ nə. 15 Yá Zʋzɛfə bwe ba, ʋ wʋ́: «Bɛ̀ɛ̀ yoo nə, á tʋn nətən? Á yəri də lìù, ʋ nə yɩ yuu-tiu ndə à nə, wàá ʋ pwárɩ́, ʋ lwarɩ jwɩan yoo naaa?» 16 Zwida le ʋ wʋ́: «Bɛ̀ɛ̀ nə, nə kʋ́ʋ̀ wàá nə swɩ̀n n con, yuu-tiu? Sʋgʋ kʋ́ʋ̀ tə̀lə́ nə nə wàá nə swɩ̀n, nə ma bɩrɩ də, nə yɩ cɩ́gá lɩ̀à. Yɩɩ nɩ də nə mʋ̀, n tʋ̀tʋ̀nà tə tʋn lwanɩ. Yuu-tiu, sɩ́ʋ́n nə, nə də lìù tə mɛ, ba nə nɩ wùrú zʋŋa tə ʋ con, dàń jìgə̀ n ywə́ŋə́.» 17 Yá Zʋzɛfə dàń swɩ̀n, ʋ wʋ́: «À bá sɛ̀, à tʋn yoo təntə yiri. Lìù tə, ba nə nɩ wùrú zʋŋa tə ʋ con cɩcɩ, nə wá ya à yoŋu. Yá á mʋ́ pìrə́, á va á nyɩna tə con, də yazurə.»

18 Yá Zwida dàń fàrɩ́, ʋ yí Zʋzɛfə yɩra, ʋ swɩ̀n, ʋ wʋ́: «À yuu-tiu, à mʋ̀, n tʋtʋnʋ tə lòrì yuywaŋʋ, sə à swɩ̀n sʋgʋ n con. À lòrì mʋ́, dàń ka pa n lɩŋa zàn à yuu wa, à yɩ n tʋtʋnʋ! Cɩ́gá, n də pɩ̀ʋ́ Farawon mɛ yɩ won nədʋ. 19 Nə təntən túrí tə nə, n mʋ̀, à yuu-tiu bwe nə mʋ̀, n tʋ̀tʋ̀nà tə, sə n jə́n, nə nyɩna wulə lʋʋ naaa? N tə bwe nəba, sə n jə́n, nə jə nubiu don naaa? 20 Nə dɩɩn ma le mʋ́, də nə nyɩna bazʋnʋ, də nə nyánʋ́ wulə sàń nə. Nə nyánʋ́ təntə yɩ nə nyɩna tə bazʋnɩ tə wa nə, ʋ lɩrɩ wá. Nə nyánʋ́ tə jɩn zʋnʋ, ʋ də wá nə yɩ nuu nədʋ, yá ʋ zʋnʋ tə mʋ̀ fwa mɩɩ. Ʋ mʋ̀ cɩcɩ dàń nə yɩ ʋ nuu tə bìú, ʋ nə ga, yá nə nyɩna swə wá zənzən. 21 Yá n dàń swɩ̀n nə mʋ̀, n tʋ̀tʋ̀nà tə con, n wʋ́, nə jana wá, nə bà, sə n na wá. 22 Nə dɩɩn ma swɩ̀n n con, də nə nyɩna ba sɛ̀, ʋ pɩn bisɩmaa tə vəli bwálɩ́. Bisɩmaa tə nə vəli bwálɩ́, ʋ yá nə nyɩna, nə nyɩna wá tɩ. 23 Yá n swɩ̀n nə mʋ̀, n tʋ̀tʋ̀nà tə con, də n ba pɩ̀à, sə n pìí n na nəba n yáá con, də nə nyánʋ́ tə nə wà nə nə twá, ʋ bà. 24 Yá máŋá tə, nə nə pìí nə va nə yí, nə nyɩna tə con, ʋ nə yɩ n tʋtʋnʋ, nə tún n sʋ̀ràn tə, nə bɩrɩ wá. 25 Kʋ kwa nə, nə nyɩna tə kʋ́ʋ̀ tʋn nəba, sə nə pìí nə bà, nə yə̀ wodiu mancɩn. 26 Yá nə dàń swɩ̀n ʋ con, də nə wàrɩ̀ yəbə, nə pìí nə twi, də nə nyánʋ́ tə, nə wà nə nə twá. Cɩ́gá, n yà swɩ̀n də, n ba pɩ̀à, sə n pìí n na nəba n yáá con, də nə nyánʋ́ tə nə tə̀lə́ də nəba. 27 Yá n tʋtʋnʋ tə, ʋ nə yɩ nə nyɩna swɩ̀n nə con, ʋ wʋ́, nə yə̀ə́ də ʋ kan Raswɛlə yɩ bɩ̀á bələ cɩcɩ nə, ʋ lɩrɩ də wá. 28 Bìú tə don nan ʋ con, ʋ jɛ́n, yá ʋ wà pìí ʋ na wá, də zə̀n. Ʋ bʋŋa də, kʋ wá ya wojandiu nə jɩn wá, kʋ də́. 29 Yá nə nyɩna dàń swɩ̀n də, nə kʋ́ʋ̀ nə lɩ ʋ bìú wà tə də, ʋ jɩɩn wa, yoo wàá wá, kʋ yí. Yá yoo nə yí ʋ bìú wà tə mʋ̀, nə wá pa, ʋ ja ʋ yukʋponə tə, ʋ va ciru*, də pucʋnɩ. 30 Kʋ mʋ̀ nə pɩn, sɩ́ʋ́n nə, à wàrɩ̀ à pìí à vəli, n tʋtʋnʋ tə con, ʋ nə yɩ à nyɩna, də bisɩmaa tə nə tə̀lə́ nə con. Ʋ bìú tə yɩ ʋ mɩɩ. 31 Ʋ wá tɩ, də ʋ nə nɩ də, bisɩmaa tə wà pìí ʋ twá nə nə, ʋ bà. Yá kʋ cɩ́gá dàń wá ya, nə mʋ̀, n tʋ̀tʋ̀nà tə nə pɩn, n tʋtʋnʋ tə, ʋ nə yɩ nə nyɩna, ja ʋ yukʋponə tə, ʋ va ciru, də pucʋnɩ. 32 Kʋ tə, kʋ nə súrí lá, à mʋ̀, n tʋtʋnʋ tə kàn nii, də à wá ywàń bisɩmaa tə yuu. À swɩ̀n nə nyɩna con də, à mʋ̀ con nə, ʋ wá bwe bisɩmaa tə yoo. À swɩ̀n də, à nə wà bisɩmaa tə ja pìí à bà, à pa wá, sə kʋ yolwan tə ya à yuu wa, máŋá mama wuuu. 33 Sɩ́ʋ́n nə, à dàń lòrì mʋ́, sə à mʋ̀, n tʋtʋnʋ tə jon bisɩmaa tə yuu nə, à ya n yoŋu. À lòrì mʋ́, sə n yá bɩsɩmaa tə mʋ̀, sə ʋ pìí ʋ twá ʋ nubɩa tə duən tə nə, ʋ vìí. 34 Kʋ nə tà nətʋ, à wá fwa nətə, à ma pìí à va à nyɩna tə con, də bisɩmaa tə nə tə̀lə́ à con? Cɩ́gá mama, à ba swə sə à na pucʋnɩ tə, tə nə wá yí à nyɩna tə!»