Lʋʋ Dəkuu 43

Zwakɔbə sɛ̀, sə bɛnzwamɛn twá ʋ va Ezwipətə

1 Niən tə yà kwɛn tə súrí zənzən, lʋʋ nii tə wa. 2 Máŋá tə, Zwakɔbə də ʋ dìə̀ lɩ̀à tə nə dí mɩna tə, ʋ bɩ̀á tə nə ja nan Ezwipətə tə, ba zwɛ̀, ʋ swɩ̀n ba con, ʋ wʋ́: «Á pìrə́ á va, á yə̀ mɩna mancɩn, á ja bà.» 3 Yá Zwida le wá, ʋ wʋ́: «Ezwipətə lʋʋ nii tə yáá tíú tə swɩ̀n nə con nəpon nəpon, də ʋ ba pɩ̀à, sə ʋ pìí, ʋ na nəba ʋ yáá con, də nə nyánʋ́ tə nə wà nə nə twá, ʋ bà. 4 Də n nə wá sɛ̀, sə nə nyánʋ́ tə twá nə nə, ʋ va, nə wá va nə yə̀ mɩna tə, nə ja bà. 5 Yá n dàń nə bá sɛ̀, sə ʋ twá nə nə, ʋ va, nə də bá pìí, nə va lá. Cɩ́gá, bɛɛ təntə swɩ̀n nə con, də ʋ ba pɩ̀à, sə ʋ pìí, ʋ na nəba ʋ yáá con, də nə nyánʋ́ tə nə wà twá, ʋ bà.» 6 Zwakɔbə, ʋ yɩrɩ don nə yɩ Yɩzərayɛlə, dàń ma bwe ba, ʋ wʋ́: «Á wà zəni fwa à yɩra. Bɛ̀ɛ̀ nə pɩn, á ma swɩ̀n bɛɛ tə con, də á tə jə nyánʋ́ don?» 7 Ba le ba wʋ́: «Bɛɛ tə tətə nə bwe nəba yìə̀n, nɛɛ kapʋpʋ, nə tətə yuu wa, də nə dwíí tə yuu wa. Ʋ bwe nəba, sə ʋ jə́n, nə nyɩna tə wulə lʋʋ naaa? Nə jə nubiu don naaa? Yá mə bwiə təntə nə, nə dàń le. Nə yà wàrɩ̀ nə lwarɩ, də ʋ wá swɩ̀n, ʋ wʋ́, nə jana nə nyánʋ́ tə, nə ja bà.»

8 Zwida swɩ̀n ʋ nyɩna Yɩzərayɛlə con, ʋ súrí lá, ʋ wʋ́: «Yá Bɛnzwamɛn, sə ʋ twá à nə, ʋ va. N nə sɛ̀ kʋ nətʋ tə, nə wá zàn nə va, nə yə̀ wodiu tə, nə ja bà. Yá nə wá wànɩ́ nə nan niən tə wa, nə də mʋ́, də nə bɩ̀á tə mɛ, dàn ká tɩ. 9 À kàŋà nii, də à wá ywàń Bɛnzwamɛn yuu. À mʋ̀ con nə, n wá bwe ʋ yoo, də à nə wà wá ja pìí à bà, à pa mʋ́. À nə wà Bɛnzwamɛn ja pìí à bà, à pa mʋ́, sə kʋ yolwan tə ya à yuu wa, máŋá mama, wuuu. 10 Kʋ nə tà nə dán zənzən tə tətə yɩrɩ, də sɩ́ʋ́n nə, nə pìí nə nan lá, nə bà, kʋ yí nɛɛ bələ.»

11 Ba nyɩna Yɩzərayɛlə ma swɩ̀n ba con, ʋ wʋ́: «Kʋ nə yɩ nətʋ, á nəŋə kʋ tə, á nə wá fwa. Á tíə́ lʋʋ nii kʋ tə wa wiən, tə nə jə funə, á kə á zɩla wa, á ja va, à ma də́ zìlə́, bɛɛ təntə yuu wa. Á tíə́ nʋturə mancɩn, ka lwán nə ywán, də tʋran mancɩn, də wusinə, də tɩralɩ. Á tíə́ bɩlalʋrʋ* lənə, də pisətaswə tɩ̀án lənə, á súrí lá. 12 Á tíə́ səbiu don, á ja á yɩra. Á tíə́ səbiu tə də, ba nə pìí ba kə á ganlwaran tə wa tə, á súrí lá, á ja va, á pa. Kʋ wàá də, kʋ yɩ ba ken kʋ lá, də ba yəri. 13 Sɩ́ʋ́n nə, á dàń zaŋa, á ja á nyánʋ́ tə, á ja pìí á va bɛɛ təntə con. 14 Yɩɩ tə ʋ nə wulə tə mɛ yuu wa, nə wá pa, bɛɛ təntə dəri á yinəgə, ʋ ga yá, sə á nubiu Simeyon də Bɛnzwamɛn mɛ, pìí ba twá á nə, ba bà. Yá kʋ dàń nə mɛ, sə à kwɩ̀n à bɩ̀á tə nə də, à sɛ̀, sə à kwɩ̀n ba nə.

Zʋzɛfə də ʋ nubɩa tə pìí ba jəri duən, nɛɛ bələ nii nə

15 Zʋzɛfə nubɩa tə dàń tì zìlə́ wiən tə, də səbiu don, ba súrí dí yáá səbiu tə nə. Yá ba dàń jɩn Bɛnzwamɛn ba kə lá, ba ja va Ezwipətə. Ba vəli ba nan Zʋzɛfə yáá con. 16 Máŋá tə, Zʋzɛfə nə nɩ ba də Bɛnzwamɛn, ʋ swɩ̀n ʋ dìə̀ tʋ̀tʋ̀nà yáá tíú tə con, ʋ wʋ́: «Ja bara ba tə, n va à sàń, n ga gʋ nàŋʋ́ n ma fwa wodiu, sə à də ba də́ yɩcaʋ wa.» 17 Zʋzɛfə tʋ̀tʋ̀nà yáá tíú tə twá ʋ nii nə, ʋ ja bara tə, ʋ va Zʋzɛfə sàń. 18 Kʋ máŋá tə wa, fən zʋa ba, ba nə ja ba, ba vələ Zʋzɛfə sàń tə yɩrɩ. Ba dàń swɩ̀n duən con, ba wʋ́: «Kʋ yɩ səbiu tə, ba nə pìí ba kə nə ganlwaran tə wa, nə təntən túrí tə nə yɩrɩ nə, ba ja nəba, ba vələ sàń. Nə yɩ ba ja vələ, sə ba pú ba kə lá, ba fɩfɩn. Ba wá jon nə bɩnɛ tə, ba ga ja nəba ba fwa ywə́ŋə́.» 19 Máŋá tə, ba nə vəli ba yí sàń tə mimii, ba yí Zʋzɛfə tʋ̀tʋ̀nà yáá tíú tə yɩra, ba swɩ̀n ʋ con, ba wʋ́: 20 «Yuu-tiu, nə lwɛ̀ n nə! Nə təntən nə bà yəbə, nə yə̀ wodiu. 21 Yá máŋá tə, nə nə pìí nə vìrí, nə jʋa cwəŋə wa. Kʋ máŋá tə wa, nə kʋ̀rɩ̀ nə ganlwaran tə nii nə. Yá nə dàń nɩ də, nə lìù mama səbiu, yà dà ʋ mɩna yuu, ʋ ganlɔɔ wa. Darsɩ mama yà wà kʋ nii nə nan. Mə kʋ nə, nə ja pìí nə bà, sə nə pa. 22 Yá nə dàń nə yəri lìù tə, ʋ nə pìí ʋ kə kʋ, nə ganlwaran tə wa. Nə tə jɩn səbiu don də, nə ja bà, sə nə ma kʋ́ʋ̀ yə̀ wodiu tə.» 23 Zʋzɛfə tʋ̀tʋ̀nà yáá tíú tə ma le ba, ʋ wʋ́: «Á dànà ká pa fən ja aba. Á jana bɩcan sìə́. Kʋ yɩ á Yɩɩ tə, ʋ nə yɩ á nyɩna tə Yɩɩ, nə ken səbiu təntə, á ganlwaran tə wa. Ba yà ŋwɩ́n à səbiu tə, á nə ma yə̀ wodiu tə mʋ̀, ba pa nə.» Yá ʋ dàń lɩ Simeyon, ʋ ja bà ba con.

24 Kʋ kwa nə, Zʋzɛfə tʋ̀tʋ̀nà yáá tíú tə pɩn, ba zʋ Zʋzɛfə kàrá wa. Ʋ pɩn ba nɩ́á, ba ma sɩ̀n ba nɛɛ, ʋ ga lɩ gaʋ, ʋ pa ba bɩnɛ tə nə. 25 Ba dàń tanɩ ba zìlə́ wiən tə, ba ma dànɩ̀, də Zʋzɛfə bɩ̀àn yɩcaʋ wa. Cɩ́gá, ba yà nì də tɩa lá nə, ba wá də́ wodiu. 26 Máŋá tə, Zʋzɛfə nə twi, ʋ zʋ ʋ dìə̀, ʋ nubɩa tə tì ba zìlə́ wiən tə, ba ja zʋ, ba pa wá, ba ga tʋ ba nadwana yuu, ʋ yáá con, ba pa wá dun. 27 Yá Zʋzɛfə dàń bwe ba yazurə nə, ʋ ga swɩ̀n ʋ wʋ́: «Á nyɩna bazʋnʋ tə, á nə swɩ̀n ʋ yoo à con tə, yɩra zurə? Ʋ tə wulə lʋʋ? 28 Ba le wá, ba wʋ́: «N tʋtʋnʋ tə, ʋ nə yɩ nə nyɩna tə, tə wulə lʋʋ, ʋ yɩra də ga zurə.» Ba kʋ́ʋ̀ tʋa ba nadwana yuu, ʋ yáá con, ba pa wá dun. 29 Zʋzɛfə ywàń ba wa, ʋ na ʋ nyánʋ́ Bɛnzwamɛn, ʋ də wá nə yɩ nuu nədʋ, ʋ ga bwe ʋ nubɩa tə duən tə, ʋ wʋ́: «Mə wà tə nə yɩ á nyánʋ́ tə, á nə swɩ̀n ʋ yoo, à con tə?» Ʋ tə swɩ̀n, ʋ súrí lá, ʋ wʋ́: «Yɩɩ nə wá fwa pubwanʋ n yɩra, à bìú!»

30 Zʋzɛfə nə nɩ Bɛnzwamɛn, ʋ pùə́ poli zənzən, kʋ pa, ʋ yà pɩ̀à, sə ʋ kwi. Cɩ́gá, ʋ yà swə ʋ nyánʋ́ tə zənzən. Yá ʋ dàń goŋi ʋ sʋgʋ tə kukuə nətʋ, ʋ ga zàn, ʋ zʋ ʋ dibiu wa, ʋ kwi. 31 Kʋ kwa nə, ʋ pùlì ʋ yáá, ʋ ga pìí ʋ nan ba con. Ʋ dàń jɩn ʋ bɩcan, ʋ ga swɩ̀n ʋ tʋtʋna tə con, ʋ wʋ́: «Á tara wodiu tə, á pa lɩ̀à tə nə.» 32 Ba fwa Zʋzɛfə tori, ʋ cɩcɩ, ba fwa ʋ nubɩa tə də tori, ba cɩcɩ, ba ga fwa Ezwipətə tɩ̀án tə, ba nə də́ ʋ con tə də tori, ba cɩcɩ. Cɩ́gá, Ezwipətə tɩ̀án yà ba sɛ̀, ba də́ wodiu, də Ebərə-ba. Kʋ yà yɩ ba cúlú. 33 Zʋzɛfə nubɩa tə yà yɩ ba jə̀ə́ ʋ yáá con. Ʋ pɩn ba jə̀ń ba, ba danɩ duən nə, kʋ nə zɩgɩ ba wa nəkwɩa tíú, kʋ va kʋ yí ba nəmaa tíú. Yá kʋ dàń gwárɩ́ ba, ba jə̀ə́ ba ywàŋá duən. 34 Zʋzɛfə pɩn ba pwàrɩ̀ wodiu tə, kʋ yà nə wulə ʋ yáá con, ba pa ʋ nubɩa tə lìù mama nə. Yá wodiu tə, ʋ nə pɩn ba pa Bɛnzwamɛn mʋ̀ nə, yà yí ʋ zʋna tə nyiən tə, dəkurən bonu. Ba dí wodiu tə, ba də Zʋzɛfə mɛ dàń ga nyʋn sana ba sú.