Zʋzɛfə nubɩa tə təntən túrí, Ezwipətə nə, niən tə máŋá wa
42
1 Zwakɔbə nì də mɩna wulə Ezwipətə nə. Ʋ dàń ma swɩ̀n ʋ bɩ̀á tə con, ʋ wʋ́: «Bɛ̀ɛ̀ nə pɩn á ma jə̀ə́, á ywàŋá duən? 2 À nì də mɩna wulə Ezwipətə nə. Á zaŋa, á va lá, á yə̀ tə, á ja bà, sə nə də́, sə nə də wànɩ́ nə nan niən tə wa, nə dàn ká tɩ.» 3 Zʋzɛfə nubɩa fugə ma zàn, ba va Ezwipətə, sə ba yə̀ mɩna tə. 4 Yá Zwakɔbə wà pɩn, Zʋzɛfə nyánʋ́ Bɛnzwamɛn mʋ̀ twá ba nə. Cɩ́gá, ʋ yà swɩ̀n ʋ waa con, ʋ wʋ́: «Yoo wàá Bɛnzwamɛn kʋ yí lá nə.» 5 Lɩ̀à duən də yà nan Kanaan lʋʋ nii, ba bà Ezwipətə, sə ba yə̀ mɩna tə. Zwakɔbə, ʋ yɩrɩ don nə yɩ Yɩzərayɛlə, bɩ̀á tə də yà wulə, lɩ̀à təntə wa. Cɩ́gá, niən tə yà kwɛn tə súrí, Kanaan lʋʋ nii tə mama wa.Zʋzɛfə də ʋ nubɩa tə jəri duən
6 Zʋzɛfə dàń yà nə yɩ Ezwipətə lʋʋ nii tə tʋ̀tʋ̀nà yáá tíú. Ʋ mʋ̀ yà nə pɩn nii, ba ma yoli mɩna tə, lʋʋ nii tə lɩ̀à tə mama yuu wa. Zʋzɛfə nubɩa tə twi, ba tʋ ʋ yáá con, ba pa wá dun. 7 Zʋzɛfə nə nɩ ʋ nubɩa tə, ʋ lwarɩ ba, ʋ ga ja ʋ tɩ̀àn, ʋ ma fwa ndə lìù tə nə, ʋ nə yəri ba. Ʋ bwe ba də nicɔɔ, ʋ wʋ́: «Yə̀n nə á nan?» Ba le wá, ba wʋ́: «Nə nan Kanaan lʋʋ nii. Nə twi sə nə yə̀ wodiu.»
8 Zʋzɛfə lwarɩ ʋ nubɩa tə, yá ba mʋ̀ ga wà wá lwarɩ. 9 Zʋzɛfə dàń lìí pandwɩa tə yoo, ʋ nə dwɛ̀ ba yuu wa. Yá ʋ dàń swɩ̀n ba con, ʋ wʋ́: «Á yɩ mɩla lɩ̀à. Á yɩ á twi, sə á mɩ̀àn lʋʋ nii tə, á lwarɩ, kʋ bwálá tə, tə nə ba dɩ̀àn jə.» 10 Ba pìí ba le wá, ba wʋ́: «Ɔn ɔn, nə yuu-tiu! Nə mʋ̀, n tʋ̀tʋ̀nà tə yɩ nə twi, sə nə yə̀ wodiu. 11 Nə mama yɩ bɛɛ nədʋ bɩ̀á. Kʋ yɩ cɩ́gá nə, nə swɩ̀n n con. Nə mʋ̀, n tʋ̀tʋ̀nà tə, tà mɩla lɩ̀à. 12 Zʋzɛfə pìí ʋ swɩ̀n ba con, ʋ wʋ́: «Kʋ yɩ kʋ̀nkʋ̀n! Á yɩ á twi, sə á mɩ̀àn lʋʋ nii tə, á lwarɩ kʋ bwálá tə, tə nə ba dɩ̀àn jə.» 13 Ba kʋ́ʋ̀ le, ba wʋ́: «Nə mʋ̀, n tʋ̀tʋ̀nà tə, yà yɩ nubɩa fugə də bələ. Bɛɛ nədʋ nə lɩrɩ nəba, Kanaan lʋʋ nii tə wa. Yá nə wa nəmaa tíú tə wulə nə nyɩna con, sàń nə. Nə nubiu don də yɩn lá, ʋ mʋ̀ kʋ́ʋ̀ tə̀lə́.» 14 Zʋzɛfə ma kʋ́ʋ̀ swɩ̀n ba con, ʋ wʋ́: «Mə kʋ nə, à nə dí yáá, à swɩ̀n á con. Á yɩ mɩla lɩ̀à. 15 Á nəŋə yoo tə, à nə wá ma dídə́n aba. À dùə̀ də pɩ̀ʋ́ Farawon pàrɩ̀ tə, á bá nan yəbə á vìí, də á nyánʋ́ tə nə wà yəbə twi. 16 Á tʋŋa á wa lìù don, sə ʋ va, ʋ ja wá, ʋ ja bà. À wá pa á gɩganɩ tə mʋ̀ zʋ bandiə. À dàń wá twá á sʋ̀ràn tə nə, à ma dídə́n aba, à jə́n də, á nə swɩ̀n cɩ́gá. Kʋ nə tà nətʋ mʋ̀, à dùə̀ də pɩ̀ʋ́ Farawon pàrɩ̀ tə, á cɩ́gá yɩ mɩla lɩ̀à.» 17 Yá Zʋzɛfə dàń pɩn, ba ja ba mɛ, ba sun bandiə, dɩan batwa.
18 Batwa nii dɩɩn tə nə, Zʋzɛfə swɩ̀n ba con, ʋ wʋ́: «Á nəŋə kʋ tə, á nə wá fwa, sə à dàń ká pa, ba gʋ aba. Cɩ́gá, à mʋ̀ dəri Yɩɩ fən! 19 Də á sʋgʋ tə nə yɩ cɩ́gá, sə á wa lìù don mɛ bandiə tə wa, ba nə ken aba. Á gɩganɩ tə mʋ̀ dàń wá nan, á zɩn wodiu, á ja va, á pa á dìə̀ lɩ̀à nə, niən tə yɩrɩ. 20 Kʋ kwa nə, á nə pìí á bɩ̀àn, sə á dàń kə lá, á ja á nyánʋ́ tə, á bà. Kʋ mʋ̀ nə wá bɩrɩ də, á sʋ̀ràn tə yɩ cɩ́gá. Yá à kʋ́ʋ̀ bá pa, ba gʋ aba.»
21 Zʋzɛfə nubɩa tə sɛ̀ ʋ sʋgʋ təntə, ba dàń ga swɩ̀n duən pwə́rə́ wa, ba wʋ́: «Haya! Yoo twi. Nə tʋn lwanɩ nə nyánʋ́ tə yɩra, ʋ nə tə̀lə́. Cɩ́gá, nə dɩɩn nɩ ʋ yinəgə nə yɩn nətʋ. Ʋ lòrì nəba, sə nə dəri ʋ yinigə, nə yá wá, yá nə ga wà ʋ con tan. Kʋ mʋ̀ nə ja yolwan kʋ tə, kʋ bà nə yuu wa.» 22 Yá Ribɛn swɩ̀n ba con, ʋ súrí lá, ʋ wʋ́: «À yà wà á con swɩ̀n kʋ dɩɩn tə nə, à wʋ́, á dànà ká gʋ bisɩmaa tə! Yá á wà à con tan. Zə̀n kʋ tə, ʋ mɩɩ tə yoo dàń pìí kʋ bwe nəba.»
23 Lìù yà wulə Zʋzɛfə, də ʋ nubɩa tə pwə́rə́ wa, ʋ joŋə ba sʋ̀ràn tə, ʋ swɩ̀n ʋ bɩrɩ Zʋzɛfə nə. Kʋ mʋ̀ nə pɩn, ba yà bʋŋa də, Zʋzɛfə ba Kanaan lʋʋ sʋgʋ tə nə̀ń. 24 Ʋ vəli ʋ pɩ̀à bwálɩ́, ʋ zɩgɩ lá, ʋ kwi. Kʋ kwa nə, ʋ pìí ʋ bà, ʋ də ba swɩ̀n duən nə. Yá Zʋzɛfə dàń pɩn, ba vwa Simeyon də banzala, ʋ nubɩa tə yɩ́á yuu, ba kə bandiə.
Zʋzɛfə nubɩa tə pìí ba va Kanaan lʋʋ nii
25 Kʋ kwa nə, Zʋzɛfə pɩn nii ʋ tʋ̀tʋ̀nà nə, sə ba kə wodiu, ba sú ʋ nubɩa tə ganlwaran nii. Ʋ pɩn ba pìí, ba kə ba lìù mama səbiu, ʋ ganlɔɔ wa. Ʋ pɩn ba pa ba wodiu, ba nə wá də́ cwəŋə wa. Mə nətʋ nə, Zʋzɛfə tʋn ba yɩra.
26 Zʋzɛfə nubɩa tə dàń nan, ba tì ba mɩna ganlwaran tə, ba kə ba bɩnɛ yuu, ba ja vìí. 27 Ba vəli ba yí bwálɩ́ don, də tɩa yìì, ba ma zʋrɩ lá, sə ba sìí. Ba wa lìù don kʋ̀rɩ̀ ʋ ganlɔɔ nii nə, sə ʋ lɩ gaʋ, ʋ pa ʋ bɩna nə. Yá ʋ dàń nɩ ʋ səbiu tə, də kʋ dà ʋ wodiu tə yuu wa, ʋ ganlɔɔ tə nii nə. 28 Ʋ ma swɩ̀n ʋ nubɩa tə con, ʋ wʋ́: «Ba pìí ba pa nə, à səbiu tə. Á nəŋə kʋ nə, à ganlɔɔ tə wa.» Ba nɩ kʋ, kʋ ga gwárɩ́ ba zənzən, fən də ga zʋ ba. Yá ba dàń swɩ̀n duən con, ba wʋ́: «Kʋ tə yɩ bɛ̀ɛ̀ nə, Yɩɩ fwa nə yɩra nətən?»
Zʋzɛfə nubɩa tə tún ba nii ba nyɩna con
29 Ba nə vəli, ba yí ba nyɩna Zwakɔbə con, Kanaan lʋʋ nii tə wa, ba man yoo tə mama, kʋ nə yí ba, ba bɩrɩ wá. 30 Ba swɩ̀n, ba wʋ́: «Bɛɛ tə, ʋ nə yɩ lʋʋ nii tə yáá tíú tə swɩ̀n nə con də nicɔɔ. Ʋ swɩ̀n də, kʋ yɩ nə twi, sə nə mɩ̀àn lʋʋ nii tə. 31 Nə ma swɩ̀n ʋ con, də nə yɩ cɩ́gá lɩ̀à, nə tà mɩla lɩ̀à. 32 Nə swɩ̀n də, nə yà yɩ nubɩa fugə də bələ, nə nyɩna nə lʋrɩ. Yá nə nubiu don də yɩn lá, ʋ mʋ̀ kʋ́ʋ̀ tə̀lə́. Yá nə wa nəmaa tíú tə wulə nə nyɩna con, Kanaan lʋʋ nii tə wa. 33 Yá bɛɛ tə dàń swɩ̀n, nə con, ʋ wʋ́, nə nəŋə nətʋ tə, ʋ nə wá twá, ʋ ma lwarɩ, də nə sʋ̀ràn tə nə yɩ cɩ́gá. Ʋ wʋ́ nə yágá nə nubiu tə don, ʋ con, sə nə gɩganɩ tə ga zɩn wodiu, nə ja bà, nə pa nə dìə̀ lɩ̀à nə, niən tə yɩrɩ. 34 Ʋ wʋ́ nə nə twi, sə nə dàń pìí nə ja nə nyánʋ́ tə, nə ja bà, nə bɩrɩ wá. Ʋ wʋ́ kʋ mʋ̀ nə wá bɩrɩ də, nə tà mɩla lɩ̀à, yá nə sʋ̀ràn tə yɩ cɩ́gá. Yá ʋ dàń wá pa nəba, nə nubiu tə don tə, ʋ nə mɛ ʋ con. Kʋ kwa nə, ʋ dàń wá yá nəba, sə nə də nə twi, nə yə̀ wiən, lʋʋ nii tə wa.»
35 Kʋ kwa nə, ba nə lwá ba ganlwaran tə wa mɩna tə, ba lìù mama nɩ ʋ səbiu tə, ʋ ganlɔɔ wa. Yá máŋá tə, ba nə nɩ səbiu tə, fən zʋa ba də ba nyɩna tə mɛ. 36 Ba nyɩna Zwakɔbə ma swɩ̀n ba con, ʋ wʋ́: «Á pɩn à kwɩ̀n à bɩ̀á tə nə. Zʋzɛfə dí yáá ʋ tə̀lə́. Simeyon də kʋ́ʋ̀ tə̀lə́. Yá á kʋ́ʋ̀ zɩga, sə á jon Bɛnzwamɛn də! Yìə̀n təntə mama yɩ à mʋ̀ yuu wa nə, tə pìí tə twɩ.» 37 Yá Ribɛn dàń swɩ̀n ʋ nyɩna tə con, ʋ wʋ́: «À nə wà Bɛnzwamɛn ja pìí à bà, à pa mʋ́, sə n gʋ à bɩ̀á bələ tə. Kə wá à jɩɩn wa, yá à wá ja wá, à pìí à bà, à pa mʋ́.» 38 Yá Zwakɔbə le, ʋ wʋ́: «À bìú tə bá twá á nə, ʋ va lá. Cɩ́gá, ʋ zʋnʋ tə fwa mɩɩ, yá kʋ dàń ga ʋ cɩcɩ. Yoo wàá wá, kʋ yí cwəŋə tə wa, á nə wá va. Yá á wá pa, à ja à yukʋponə tə, à va ciru*, də pucʋnɩ.