Lʋʋ Dəkuu 41

Pɩ̀ʋ́ Farawon pandwɩa tə yoo

1 Bɩna bələ nə lɛ kwa nə, pɩ̀ʋ́ Farawon dwɛ̀ pandwɩa. Ʋ pandwɩa tə wa, ʋ nɩ də ʋ yà zɩga mʋnaa tə, ba nə boŋə Nilə tə, nii nə. 2 Yá ʋ dàń nɩ nanii barpɛ, tə yɩra nə zurə, tə ga jə fɩra, də tə naŋa mʋnaa tə wa. Tə twi tə wulə tə də́ mʋnaa tə nii gaʋ tə. 3 Yá kʋ kwa nə, nanii barpɛ duən də, tə nə yɩ nakwaran, tə ga ba fɩra jə, nan mʋnaa tə wa. Tə də twi tə zɩga təntən nyiən tə səpuni nə, mʋnaa tə nii nə. 4 Yá nakwaran tə, tə nə ba fɩra jə tə, dàń dí nanii barpɛ tə, tə yɩra nə zurə, tə ga jə fɩra tə. Kʋ máŋá tə wa, pɩ̀ʋ́ Farawon súrí ʋ yɩ́á, dwiən nə.

5 Kʋ kwa nə, pɩ̀ʋ́ Farawon kʋ́ʋ̀ pìí ʋ dwɛ̀. Yá ʋ kʋ́ʋ̀ dwɛ̀ pandwɩa tə duən. Ʋ dwɛ̀ ʋ na mɩna yun barpɛ, tə nə bɩga zəni, tə ga jə fɩra, də tə naŋa mɩnɩ sɩsɩʋ nədʋ yuu wa. 6 Yá kʋ kwa nə, mɩna yun barpɛ duən, tə nə yɩ mɩfulən, yɩɩ yipɩan con vʋʋ nə pɩn tə kʋ̀, də púə́ təntən nyiən tə kwa, tə nan. 7 Yá mɩfulən tə zàn, tə pú mɩna yun tə nə bɩga zəni, tə ga jə fɩra tə, yuu nə. Kʋ máŋá tə wa, pɩ̀ʋ́ Farawon kʋ́ʋ̀ súrí ʋ yɩ́á, dwiən nə.

8 Kʋ jɩjʋ nə, pɩ̀ʋ́ Farawon pùə́ cʋ̀gʋ̀ zənzən. Yá ʋ dàń pɩn ba bon vʋra tə mama, də yənu tɩ̀àn tə mama, ba nə wulə Ezwipətə lʋʋ nii tə wa, ʋ pa ba bà. Ʋ man ʋ pandwɩa tə, ʋ bɩrɩ ba, yá ba lìù mama wà wànɩ́, ʋ gwìń tə də̀ń, ʋ bɩrɩ wá.

9 Lìù tə, ʋ nə kúrí pɩ̀ʋ́ divɛn* tə dàń ma swɩ̀n pɩ̀ʋ́ Farawon con, ʋ wʋ́: «Á nyɩna pɩ̀ʋ́, zə̀n kʋ tə, à lìí à tɩ̀àn də à tʋn yolwan. 10 Dɩɩn don nə, n lɩŋa zàn á də lìù tə, ʋ nə wùè n dipɛn* tə yuu wa. Yá n pɩn ba ja nəba, ba sun bandiə tə wa, pɩ̀ʋ́ sàń kwatara yuu tíú tə kàrá wa. 11 À mʋ̀ də lìù tə, ʋ nə wùè n dipɛn tə, twá duən nə dwɛ̀ pandwɩa, tɩtɩn nədʋ wa. Nə lìù mama pandwɩa tə yà jə də̀ń. 12 Kʋ máŋá tə wa, də Ebərə-ba bìú don yà wulə də nəba, bandiə tə wa. Ʋ yà yɩ pɩ̀ʋ́ sàń kwatara yuu tíú tə yoŋu. Nə dàń man nə pandwɩa tə nə bɩrɩ wá, yá ʋ gwìń tə də̀ń ʋ bɩrɩ nəba. Ʋ gwìń nə lìù mama pandwɩa tə də̀ń, ʋ bɩrɩ wá. 13 Yìə̀n tə mama cɩ́gá tʋn, kʋ twá ndə nətʋ tə nə, ʋ nə gwìń nə pandwɩa tə də̀ń, ʋ bɩrɩ nəba. N cɩ́gá pɩn, à pìí à zʋ à tʋtʋŋɩ tə wa, yá n ga pa, ba kùrí lìù tə, ʋ nə wùè n dipɛn tə, də ŋwənə.»

Zʋzɛfə gwìń pɩ̀ʋ́ Farawon pandwɩa tə də̀ń

14 Pɩ̀ʋ́ Farawon dàń pɩn, lɩ̀à va ba bon Zʋzɛfə. Ba dəri ba va, ba lɩ wá bandiə tə wa, ba pàrɩ́ ʋ yuu, ʋ lwàń ʋ gànàn, ba ga ja wá, ba bà pɩ̀ʋ́ Farawon yáá con. 15 Pɩ̀ʋ́ Farawon ma swɩ̀n Zʋzɛfə con, ʋ wʋ́: «À dwɛ̀ pandwɩa, yá lìù mama wà wànɩ́, ʋ gwìń tə də̀ń, ʋ bɩrɩ nə. Yá à dàń nì də, ba nə man pandwɩa ba bɩrɩ mʋ́, n yàá wàá tə də̀ń n gwìń.» 16 Zʋzɛfə ma le, ʋ wʋ́: «Pɩ̀ʋ́ Farawon, kʋ tà à mʋ́! Kʋ yɩ Yɩɩ nə wá gwìń pandwɩa tə də̀ń, ʋ pa kʋ twá pɩ̀ʋ́ Farawon fɩra nə.»

17 Pɩ̀ʋ́ Farawon dàń swɩ̀n Zʋzɛfə con, ʋ wʋ́: «À pandwɩa tə wa, à nɩ də, à yà zɩga Nilə mʋnaa tə nii nə. 18 Yá à nɩ nanii barpɛ, tə yɩra nə zurə, tə ga jə fɩra, də tə naŋa mʋnaa tə wa. Tə twi tə wulə tə də́ mʋnaa tə nii gaʋ tə. 19 Kʋ kwa nə, nanii barpɛ duən də, tə nə yɩ nakwaran, tə ga ba fɩra jə mɩ́ámɩ́án, nan mʋnaa tə wa. À tə wà nakwaran təntə yiri nɩ mɩ́ámɩ́án, Ezwipətə lʋʋ nii tə mama wa. 20 Yá nakwaran tə, tə nə ba fɩra jə tə, dí təntən nanii tə, tə yɩra nə zurə, tə ga jə fɩra tə. 21 Nakwaran tə dí nanii tə, tə yɩra nə zurə tə, yá tə wà lwàń. Tə tə ba fɩra jə. Tə tə yɩ ndə dí yáá nə. Kʋ máŋá tə wa, à súrí à yɩ́á dwiən nə. 22 Yá pandwɩa təntə kwa nə, à kʋ́ʋ̀ pìí à dwɛ̀ pandwɩa duən. À dwɛ̀ à na mɩna yun barpɛ, tə nə bɩga zəni, tə ga jə fɩra, də tə naŋa mɩnɩ sɩsɩʋ nədʋ yuu wa. 23 Yá kʋ kwa nə, mɩna yun barpɛ duən, tə nə yɩ mɩfulən, yɩɩ yipɩan con vʋʋ nə pɩn tə kʋ̀, də púə́ təntən nyiən tə kwa, tə nan. 24 Yá mɩfulən tə zàn, tə pú mɩna yun barpɛ tə nə jə fɩra tə, yuu nə. À man pandwɩa təntə, à bɩrɩ vʋra tə nə, yá ba lìù mama wà wànɩ́, ʋ gwìń tə də̀ń, ʋ bɩrɩ nə.»

25 Zʋzɛfə swɩ̀n, ʋ wʋ́: «Pɩ̀ʋ́ Farawon, n pandwɩa bələ tə mɛ yɩ yoo nədʋ nə, tə bɩrɩ. Yɩɩ yɩ ʋ bɩrɩ mʋ́, kʋ tə, ʋ nə wá fwa. 26 Nanii barpɛ tə nə jə fɩra tə, də̀ń nə yɩ bɩna barpɛ. Yá mɩna yun barpɛ tə nə jə fɩra tə də, də̀ń nə yɩ bɩna barpɛ. Kʋ nətʋ bɩrɩ də, pandwɩa bələ tə mɛ yɩ won nədʋ. 27 Nakwaran barpɛ tə nə ba fɩra jə tə, də mɩfulən barpɛ tə nə ba fɩra jə, yɩɩ yipɩan con vʋʋ nə pɩn tə kʋ̀ tə, yɩ bɩna barpɛ nə, tə bɩrɩ. Kʋ nətʋ tə pɩ̀à kʋ bɩrɩ də, niən wá ya lá, bɩna barpɛ. 28 Kʋ yɩ ndə, à nə dí yáá, à swɩ̀n kʋ n con nətʋ. Yɩɩ yɩ ʋ bɩrɩ mʋ́, kʋ tə, ʋ nə wá fwa. 29 Bɩna barpɛ tə nə bɩ̀àn, wodirən wá bɩ, tə bʋ́rɩ́, Ezwipətə lʋʋ nii tə mama wa. 30 Yá bɩna barpɛ duən wá pú tə kwa, tə nə wá ya niən bɩna. Niən təntə wá pa, lʋʋ nii tə jì tʋtʋ. Yá ba wá swɛ̀ɛ́ də, máŋá yɩn lá, wodirən yà nə bʋ́rɩ́, Ezwipətə lʋʋ nii tə wa. 31 Niən tə wá ya càn zənzən, kʋ pa, ba kʋ́ʋ̀ bá yəni də, won wàá kʋ bʋ́rɩ́ lʋʋ nii tə wa. 32 Də n pandwɩa tə nə bwɛ́ nɛɛ bələ, kʋ pɩ̀à kʋ bɩrɩ də, kʋ yɩ yoo tə, Yɩɩ nə ken sírí, ʋ zwɛ̀, sə ʋ tʋn. Yá ʋ kʋ́ʋ̀ bá dán, ʋ ma tʋn kʋ, ʋ pa kʋ nii sú. 33 Sɩ́ʋ́n nə, pɩ̀ʋ́ Farawon dàń mɛ, sə ʋ pɩ̀à lìù, kʋ tíú nə yə̀ə́ yoo də̀ń, ʋ ga jə wʋbʋŋa, ʋ tún Ezwipətə lʋʋ nii tə yuu wa. 34 Pɩ̀ʋ́ Farawon mɛ, sə ʋ kúrí tʋ̀tʋ̀nán yun tɩ̀án də, ʋ tún lʋʋ nii tə wa. Bɩna barpɛ tə wa, wodirən tə nə wá bʋ́rɩ́ tə, bɩnɩ mama, ba wá pwɛ̀ Ezwipətə lʋʋ nii wodirən tə púlə́ bonu. Yá ba dàń wá lɩ púlí nədʋ, ba tún. 35 Pɩ̀ʋ́ Farawon wá pa ba nii, bɩna tə wa, wodirən tə nə wá bʋ́rɩ́ tə, sə ba lá tə duən, ba tún tɩan tə wa, ba ywàń tə yuu. 36 Tə wodirən təntə yɩ, ba wá kə, ba tún. Tə mʋ̀ nə wá pa, bɩna barpɛ niən tə nə bɩ̀àn Ezwipətə lʋʋ nii tə wa, fufuli. Yá niən tə kʋ́ʋ̀ bá wànɩ́ lʋʋ nii tə, tə cʋ̀gʋ̀.»

Zʋzɛfə jìgə̀ pɩ̀ʋ́ Farawon tʋ̀tʋ̀nà yuu tíú

37 Zʋzɛfə sʋgʋ tə yɩn ywánɩ́, kʋ pa pɩ̀ʋ́ Farawon də ʋ tʋ̀tʋ̀nà tə mama nə. 38 Yá pɩ̀ʋ́ Farawon dàń swɩ̀n ba con, ʋ wʋ́: «Nə kʋ́ʋ̀ wàá lìù nə nɩ, Yɩɩ Siŋu* tə nə wulə də wá, ndə bɛɛ wà tə nə naaa?» 39 Yá pɩ̀ʋ́ Farawon dàń swɩ̀n Zʋzɛfə con, ʋ wʋ́: «Yɩɩ nə pɩn, n yəni yìə̀n tə tə mama yɩrɩ, lìù don kʋ́ʋ̀ tə̀lə́, ʋ nə jə yənu, ʋ ga jə wʋbʋŋa, ndə n nə. 40 N mʋ̀ dàń nə wá ya, à lʋʋ lɩ̀à tə mama yuu wa. Yá à lʋʋ nii lɩ̀à tə mama, wá twá kʋ tə nə, n nə wá pa nii, sə kʋ tʋn. À padaʋ tə cɩcɩ nə wá pa, à doni mʋ́.» 41 Pɩ̀ʋ́ Farawon tə swɩ̀n Zʋzɛfə con, ʋ súrí lá, ʋ wʋ́: «Cʋgʋ zəni! Sɩ́ʋ́n nə, à pɩn mʋ́ nii, sə n tɩnɩ Ezwipətə lʋʋ nii tə mama.» 42 Pɩ̀ʋ́ Farawon dàń lɩ jɩtuŋu jɩfɩlɩ ʋ jɩɩn nə, ʋ kə Zʋzɛfə jɩɩn nə. Ʋ lɩ ganmʋlɩ, ʋ ma zʋ wá, ʋ ga kə sɩ́án zàŋʋ́, ʋ bɩan nə. 43 Kʋ kwa nə, pɩ̀ʋ́ Farawon pɩn, Zʋzɛfə zʋ kwatara səsen kòrù tə wa, kʋ nə yàá danɩ ʋ tətə nyiən tə nə. Yá ʋ ga kə lɩ̀à Zʋzɛfə yáá, ba cə̀rí, ba wʋ́: «Á yágá cwəŋə!» Mə kʋ zɩgɩ nətʋ, pɩ̀ʋ́ Farawon ma pa nii Zʋzɛfə nə, sə ʋ tɩnɩ Ezwipətə lʋʋ nii tə mama.

44 Kʋ kwa nə, Pɩ̀ʋ́ Farawon kʋ́ʋ̀ swɩ̀n Zʋzɛfə con, ʋ wʋ́: «À mʋ̀ nə yɩ Farawon, Ezwipətə lʋʋ nii tə pɩ̀ʋ́! Yá də kʋ mɛ, lìù mama wà mɛ, sə ʋ fwa won, Ezwipətə lʋʋ nii tə mama wa, də kʋ nə tà n mʋ̀ nə pɩn nii, sə kʋ tʋn.»

45-46 Zʋzɛfə yà jə bɩna fɩtwa, máŋá tə wa, ba nə jɩn wá, ba bà Farawon yáá con, ʋ nə yɩ Ezwipətə pɩ̀ʋ́. Pɩ̀ʋ́ Farawon pɩn yɩrɩ Zʋzɛfə nə, ʋ boŋə wá Safənatə-Paneya. Pɩ̀ʋ́ Farawon pɩn wá Potifera bʋ̀á Asənatə, sə ʋ ma fwa ʋ kan. Potifera yɩ tɩʋ tə, ba nə boŋə Onə, joŋwanʋ. Tə mʋ̀ yìə̀n təntə kwa nə, Zʋzɛfə dàń nan, ʋ yá pɩ̀ʋ́ Farawon, ʋ ga va, sə ʋ jírí Ezwipətə lʋʋ nii tə mama wa, ʋ yəni kʋ.

47 Bɩna barpɛ tə wa, wodirən nə wá bɩ tə bʋ́rɩ́ tə, tə cɩ́gá bɩga zənzən, tə gwárɩ́ ba. 48 Zʋzɛfə ken bɩna barpɛ təntə, wodirən tə mama duən nə, Ezwipətə lʋʋ nii tə wa. Ʋ lwə̀ tikələ tɩfaran tə wa, ʋ dàń ga lá wodirən tə, ba nə vàrɩ̀ tə tɩan təntə, də tə tɩbii tə mama wa, ʋ kə tikələ tə wa. 49 Zʋzɛfə lá wodirən, ʋ tún, tə dánɩ́ yí ndə mʋʋ nii kasɩlʋ nə. Tə yà dáá zənzən, tə ja lɛ tɩa nə, kʋ pa, ʋ yá tə galʋ nə. Ʋ yà kʋ́ʋ̀ wàrɩ̀ tə ʋ gàlɩ̀.

Zʋzɛfə bɩ̀á

50 Zʋzɛfə də ʋ kan Asənatə, ʋ nə yɩ Onə joŋwanʋ Potifera bʋ̀á, lɩrɩ bɩ̀á bələ, də niən tə təntən bɩnɩ tə, tə wà yí. 51 Zʋzɛfə nə lɩrɩ ʋ bikwɩa tə, ʋ dɩga ʋ yɩrɩ, Manase. Cɩ́gá, ʋ yà pɩ̀à, ʋ twá yɩrɩ təntən nə, ʋ swɩ̀n də, Yɩɩ pɩn ʋ swɛ̀ɛ́ ʋ nyɩna dìə̀ tə, də ʋ càn tə mama yoo. 52 Ʋ dɩga bələ nii bìú tə yɩrɩ, Efərayimə. Cɩ́gá, ʋ yà pɩ̀à, ʋ twá yɩrɩ təntə də nə, ʋ swɩ̀n də, Yɩɩ pɩn wá dwíí, lʋʋ nii tə wa, ʋ nə dí càn.

53 Bɩna barpɛ tə, wodirən nə bɩga, tə bʋ́rɩ́, Ezwipətə lʋʋ nii tə wa, twi tə kɛ̀ń. 54 Yá niən bɩna barpɛ tə də dàń sinti, ndə Zʋzɛfə nə swɩ̀n tə yoo nətʋ. Niən yà wulə lʋʋ níə́ tə duən mama wa, yá wodiu yà wulə, Ezwipətə lʋʋ nii tə mʋ̀ wa. 55 Niən tə twi, tə zʋ Ezwipətə lʋʋ nii tə də mama wa. Yá kʋ máŋá təntə wa, Ezwipətə tɩ̀án dàń bubwi ba kə pɩ̀ʋ́ Farawon nə, sə ʋ pa ba wodiu. Pɩ̀ʋ́ Farawon ma swɩ̀n Ezwipətə tɩ̀án tə mama con, ʋ wʋ́: «Á vələ, á yí Zʋzɛfə, sə á ga tʋn kʋ tə, ʋ nə wá swɩ̀n á con.» 56 Niən tə yà zʋa lʋʋ nii tə mama wa zənzən. Zʋzɛfə dàń súrí tikələ tə mama nii, ʋ lɩ wodirən, ʋ yoli, Ezwipətə tɩ̀án yuu wa, niən tə yà nə kwɛn tə súrí, Ezwipətə lʋʋ nii tə wa yɩrɩ. 57 Niən tə yà kwɛn, tə súrí lʋʋ níə́ tə mama wa zənzən. Kʋ nətʋ tə pɩn, lɩ̀à yà naŋa lʋʋ níə́ tə mama wa, ba twi Ezwipətə, ba yə wodiu Zʋzɛfə con.