Lʋʋ Dəkuu 40

Pɩ̀ʋ́ Farawon pɩn, ba sun ʋ tʋ̀tʋ̀nán yun tɩ̀án bələ bandiə

1 Tə mʋ̀ yìə̀n təntə nə tʋn, tə lɛ kwa nə, dɩɩn don nə, Ezwipətə pɩ̀ʋ́ Farawon tʋ̀tʋ̀nán yun tɩ̀án bələ tʋn yoo, ba ma zɩgɩ ʋ nə. Ba tʋ̀tʋ̀nán yun tɩ̀án bələ təntə yà yɩ lìù tə, ʋ nə kúrí pɩ̀ʋ́ divɛn*, ʋ pɩn wá, ʋ nywɩn, də wà tə, ʋ nə wùè ʋ dipɛn*. 2 Pɩ̀ʋ́ Farawon lɩŋa zàn ʋ tʋ̀tʋ̀nán yun tɩ̀án bələ təntə yuu wa. 3 Ʋ pɩn, ba ja ba, ba sun bandiə tə wa, ba yà nə sun Zʋzɛfə, pɩ̀ʋ́ sàń kwatara yuu tíú tə kàrá wa. 4 Pɩ̀ʋ́ sàń kwatara yuu tíú tə ken ba Zʋzɛfə jɩɩn wa, sə ʋ ywàń ba yuu. Ba yɩn bandiə tə wa, ba dɩ́án.

5 Tɩtɩn don nə, lìù tə, ʋ nə kúrí Ezwipətə pɩ̀ʋ́ divɛn tə, də wà tə, ʋ nə wùè ʋ dipɛn tə, mɛ bələ twá duən ba dwɛ̀ pandwɩa, bandiə tə wa. Ba lìù mama pandwɩa yà yɩ tə cɩcɩ. 6 Kʋ tɩa nə pʋrɩ jɩjʋ nə, Zʋzɛfə twi ʋ na ba. Yá ʋ nɩ də ba pwìí cʋ̀gʋ̀ zənzən. 7 Ʋ dàń ma bwe ba, ʋ wʋ́: «Kʋ yɩ nətə, á yɛ́ɛ́ ma cʋ̀gʋ̀ zə̀n kʋ tə?» 8 Ba le wá, ba wʋ́: «Nə lìù mama dwɛ̀ pandwɩa, yá lìù tə̀lə́ yəbə, ʋ nə wàá tə də̀ń ʋ gwìń, ʋ bɩrɩ nəba.» Zʋzɛfə ma swɩ̀n ba con, ʋ wʋ́: «Yɩɩ nə wàá pandwɩa də̀ń ʋ gwìń. Á maŋa á pandwɩa tə, á bɩrɩ nə, sə à jə́n.»

9 Lìù tə, ʋ nə kúrí pɩ̀ʋ́ divɛn tə, ma man ʋ pandwɩa tə, ʋ bɩrɩ Zʋzɛfə nə, ʋ wʋ́: «À pandwɩa tə wa, à nɩ divɛn tɩ̀ʋ́, à yáá con. 10 Divɛn tɩ̀ʋ́ təntə yà jə nɛɛ batwa. Máŋá tə kʋ nə twə vʋbwalan, kʋ pùnì lala, kʋ ga zɩn bɩ̀á, tə nə bɩga. 11 Pɩ̀ʋ́ Farawon wùrú zʋŋa tə yà wulə à jɩɩn wa. Yá à dàń kwə divɛn tɩ̀ʋ́ tə bɩ̀á, à kàŋà à kə pɩ̀ʋ́ Farawon wùrú zʋŋa tə wa, à ga tì wùrú zʋŋa tə, à kə ʋ jɩɩn wa.» 12 Zʋzɛfə dàń swɩ̀n ʋ con, ʋ wʋ́: «Nə̀ń n pandwɩa tə də̀ń nə. Tɩ̀ʋ́ nɛɛ batwa tə bɩrɩ dɩan batwa. 13 Kʋ pɩ̀à kʋ swɩ̀n də, yəbə də dɩan batwa, pɩ̀ʋ́ Farawon wá pa, ba lɩ mʋ́ bandiə tə wa. Ʋ wá pìí ʋ kə mʋ́ n tʋtʋŋɩ tə wa. N kʋ́ʋ̀ wá pìí n tì pɩ̀ʋ́ Farawon wùrú zʋŋa tə, n kə ʋ jɩɩn wa, ndə n dí yáá yà nə tʋŋa kʋ nətʋ. 14 Yá máŋá tə wa, n yìə̀n nə kwɛn tə pa mʋ́, sə n lìí à yoo. À lòrì mʋ́, sə n tʋn wʋywaŋʋ* à yɩra, n ga swɩ̀n à yoo pɩ̀ʋ́ Farawon con, sə ʋ pa, ba lɩ nə bandiə tə wa. 15 Cɩ́gá, à yɩ ba jɩn nə, ba ja nan Ebərə-ba lʋʋ. Yá yəbə də tətə, à wà won mama fwa, kʋ nə mɛ, sə ba kə nə bandiə kʋ yɩrɩ.»

16 Yá lìù tə, ʋ nə wùè pɩ̀ʋ́ dipɛn tə nɩ də, Zʋzɛfə gwìń pandwɩa tə də̀ń zəni, tə ga jə yuywaŋʋ. Ʋ də dàń swɩ̀n Zʋzɛfə con, ʋ wʋ́: «À mʋ̀ pandwɩa tə wa, à nɩ də, à yà zɩŋa kəpuri batwa, à yuu wa. Gàtó yà wulə tə wa. 17 Dipɛn də gàtə́rán yirə yirə, pɩ̀ʋ́ Farawon nə də́, yà nə wulə kəpurə tə wa, ka nə zílí tə mɛ yuu wa. Yá zuŋi dàń yà twi, tə də́ wodirən təntə, à yuu wa.» 18 Zʋzɛfə ma swɩ̀n ʋ də con, ʋ wʋ́: «Nə̀ń n pandwɩa tə də̀ń nə. Kəpuri batwa tə bɩrɩ dɩan batwa. 19 Kʋ pɩ̀à kʋ swɩ̀n də, yəbə də dɩan batwa, pɩ̀ʋ́ Farawon wá pa, ba lɩ mʋ́ bandiə tə wa. Ʋ wá pa, ba goŋə n yuu, ba ga goli n tɩgɩ tə tɩ̀ʋ́ nə. Yá dələn dàń wá bà, tə də́ mʋ́.»

20 Kʋ dɩan batwa tə dɩɩn nə, kʋ yɩn pɩ̀ʋ́ Farawon lɩrɩ bɩnɩ cànà dɩɩn. Ʋ pɩn ba fwa cànà wodiu, sə ʋ tʋ̀tʋ̀nà tə mama də́. Kʋ dɩɩn tə nə, pɩ̀ʋ́ Farawon pɩn, ba lɩ lìù tə, ʋ nə kúrí pɩ̀ʋ́ divɛn tə, də wà tə, ʋ nə wùè ʋ dipɛn tə, bandiə tə wa, ba ja bà ʋ tʋ̀tʋ̀nà tə titəŋi wa. 21 Ʋ pìí ʋ kə lìù tə, ʋ nə kúrí pɩ̀ʋ́ divɛn tə, ʋ tʋtʋŋɩ tə wa. Ʋ kʋ́ʋ̀ pìí ʋ tì pɩ̀ʋ́ Farawon wùrú zʋŋa tə, ʋ kəni pɩ̀ʋ́ Farawon jɩɩn wa. 22 Yá lìù tə mʋ̀, ʋ nə wùè pɩ̀ʋ́ dipɛn tə, pɩ̀ʋ́ Farawon pɩn, ba kùrí wá də ŋwənə, ba goli tɩ̀ʋ́ nə. Yìə̀n tə mama cɩ́gá tʋn, ndə Zʋzɛfə nə gwìń ba pandwɩa tə də̀ń, ʋ bɩrɩ ba nətʋ. 23 Yá lìù tə, ʋ nə kúrí pɩ̀ʋ́ divɛn tə wà pìí ʋ lìí Zʋzɛfə yoo. Ʋ swɛ̀ɛ́ ʋ yoo.