Zʋzɛfə wulə Ezwipətə nə, Potifarə con
39
1 Yɩsəmayɛlə dwíí lɩ̀à tə nə ja Zʋzɛfə ba yí Ezwipətə, ba yoli wá ba də́ Ezwipətə tíú don yuu wa, ʋ yɩrɩ nə yɩ Potifarə. Potifarə yà yɩ pɩ̀ʋ́ Farawon kàrá tʋ̀tʋ̀nà yuu tíú, ʋ ga yɩ kwatara tə də, ba nə cɩ̀ pɩ̀ʋ́ sàń nə yuu tíú. 2 Zʋzɛfə yà yɩ ʋ wulə ʋ yuu tíú, Ezwipətə tíú tə dìə̀ wa. Ba-Yígúrə́-Jə-Tiu yɩn də Zʋzɛfə, kʋ pa, ʋ nə tʋn won mama, kʋ yàá jə fɩra. 3 Zʋzɛfə yuu tíú tə nɩ də, Ba-Yígúrə́-Jə-Tiu wulə də wá. Ʋ nɩ də, Ba-Yígúrə́-Jə-Tiu yàá pa won tə mama, Zʋzɛfə nə tʋŋa ʋ jɩɩn wa, jə fɩra. 4 Kʋ nətʋ tə dàń pɩn, Zʋzɛfə na yuywaŋʋ, ʋ yuu tíú tə yáá con. Ʋ yuu tíú tə lɩ wá ʋ tún, sə ʋ ywàń ʋ tʋ̀tʋ̀nán tə mama yuu. Ʋ tún wá, sə ʋ ywàń ʋ dìə̀ tə, də ʋ wiən tə mama, ʋ nə jə tə yuu. 5 Máŋá tə Potifarə nə lɩ Zʋzɛfə ʋ tún, sə ʋ ywàń ʋ dìə̀ tə, də ʋ wiən tə mama, ʋ nə jə tə yuu, Ba-Yígúrə́-Jə-Tiu, fwa zəni Potifarə də ʋ dìə̀ lɩ̀à yɩra, Zʋzɛfə yɩrɩ. Yá kʋ zəni təntə yɩn wiən tə də mama yuu, Potifarə nə jə, ʋ dìə̀ wa, də ʋ kárɩ́ wa. 6 Ʋ dàń yá wiən tə mama, ʋ nə tɩ, Zʋzɛfə jɩɩn wa. Won mama yuu ywàŋʋ́ yoo yà kʋ́ʋ̀ ba Potifarə wʋwalɩ, də kʋ nə tà ʋ wodiu tə, ʋ nə də́ cɩcɩ yoo.Zʋzɛfə də Potifarə kan tə yoo
Zʋzɛfə yà yɩ nanʋn.
7 Yá máŋá don twi kʋ yí, Zʋzɛfə fɩra nə zʋa ʋ yuu tíú tə kan tə. Kan tə swɩ̀n Zʋzɛfə con, ʋ wʋ́: «Bà n pə̀ń də nə!» 8-9 Yá Zʋzɛfə vɩga. Ʋ swɩ̀n ʋ yuu tíú tə kan tə con, ʋ wʋ́: «À wàrɩ̀ cʋna nəfarʋ təntə à tʋŋa, sə kʋ pa à tʋn lwanɩ, à zɩgɩ Yɩɩ nə. Ywàń, à yəbə yanʋ tə pɩn, won mama yuu ywàŋʋ́ kʋ́ʋ̀ ba à yuu tíú tə wʋwalɩ. Ʋ ken wiən tə mama, ʋ nə tɩ, à jɩɩn wa. Yá lìù don kʋ́ʋ̀ tə̀lə́, ʋ nə dwə nə, dìə̀ ka tə wa. Ʋ wà won mama nə cɩ̀ à con, də kʋ nə tà n mʋ̀, n nə yɩ ʋ kan tə yɩrɩ.» 10 Dɩɩn mama, kan tə, tə yàá jə Zʋzɛfə bɩan nə, sə ʋ pə̀ń də wá. Yá Zʋzɛfə ba ʋ con taŋa. 11 Dɩɩn don nə, Zʋzɛfə zʋa dìə̀ tə wa, sə ʋ tʋn ʋ tʋ̀tʋ̀nán. Kʋ dɩɩn tə nə, də tʋtʋnbiu don mama yà tə̀lə́ dìə̀ tə wa. 12 Ʋ yuu tíú tə kan tə dàń pùrì ʋ gànʋ̀ nə, ʋ ga swɩ̀n, ʋ wʋ́: «Pə̀ń də nə!» Yá Zʋzɛfə kʋ̀rɩ̀ ʋ gànʋ̀ tə, ʋ yá kan tə jɩɩn wa, ʋ ga dəri ʋ nan kàrá. 13 Kan tə nə nɩ də, ʋ kʋ̀rɩ̀ ʋ gànʋ̀ tə, ʋ yá ʋ jɩɩn wa, ʋ ga dəri ʋ nan kàrá, 14 ʋ bubwi ʋ kə ʋ dìə̀ lɩ̀à nə, ʋ wʋ́: «Á dərə á bà á ywàń! Ebərə-ba bìú tə, à barɩ nə ja bà, pɩ̀à, sə ʋ bwan nəba. Ʋ zʋa, sə ʋ pú à nə, yá à dàń bubwi zənzən. 15 Ʋ nə nɩ də, à zɩ̀n à kori yɩɩ nə, à bubwi à kəni lɩ̀à nə, ʋ dəri ʋ nan kàrá, ʋ ga yá ʋ gànʋ̀, à səpuni nə.»
16 Kʋ kwa nə, ʋ tì Zʋzɛfə gànʋ̀ tə, ʋ tún ʋ səpuni nə, ʋ ma dànɩ̀ də ʋ barɩ bɩ̀àn. 17 Máŋá tə ʋ barɩ nə twi ʋ zʋ dìə̀, ʋ swɩ̀n sʋ̀ràn təntə tətə ʋ barɩ tə con, ʋ wʋ́: «Ebərə-ba bìú tə, ʋ mʋ̀ yoŋu təntə, n nə ja bà, n pa nəba, zʋa, sə ʋ pú à nə. 18 Yá à dàń nə zɩ̀n à kori yɩɩ nə, à bubwi à kə lɩ̀à nə tə pɩn, ʋ dəri ʋ nan kàrá, ʋ ga yá ʋ gànʋ̀, à səpuni nə.» 19 Zʋzɛfə yuu tíú tə nə nì yoo təntə, ʋ kan tə nə swɩ̀n, də Zʋzɛfə dídə́n sə ʋ tʋn ʋ yɩra, ʋ lɩŋa zàn zənzən. 20 Yá ʋ dàń pɩn ba ja Zʋzɛfə, ba sun bandiə tə wa, ba yà nə suŋə pɩ̀ʋ́ bandiə lɩ̀à. Mə kʋ zɩgɩ nətʋ, Zʋzɛfə ma zʋ bandiə.
Zʋzɛfə wulə bandiə wa
21 Yá Ba-Yígúrə́-Jə-Tiu yɩn də Zʋzɛfə, bandiə tə də wa, ʋ tʋn wʋywaŋʋ* ʋ yɩra. Ʋ pɩn Zʋzɛfə na yuywaŋʋ* bandiə yuu tíú tə yáá con. 22 Bandiə yuu tíú tə lɩ Zʋzɛfə ʋ tún, sə ʋ mʋ̀ nə ywàń lɩ̀à tə mama yuu, ba yà nə wulə bandiə tə wa. Yá Zʋzɛfə dàń yà nə ywàŋá tʋ̀tʋ̀nán tə mama yuu, bandiə lɩ̀à tə nə tʋŋa. 23 Ba-Yígúrə́-Jə-Tiu yà wulə də Zʋzɛfə, kʋ pa won tə mama, ʋ nə tʋŋa jə fɩra. Kʋ mʋ̀ nə pɩn, won tə mama bandiə yuu tíú tə nə ken Zʋzɛfə jɩɩn wa, yuu ywàŋʋ́ yoo yà kʋ́ʋ̀ ba wá wʋwalɩ.