Lʋʋ Dəkuu 38

Zwida də Tamarə yoo

1 Tə mʋ̀ yìə̀n təntə kwa nə, máŋá don twi ka ya là, Zwida nə pwɛ̀ də ʋ nubɩa tə. Ʋ yà vəli ʋ wulə Adulamə nə, bɛɛ don con, ʋ yɩrɩ nə yɩ Hɩra. 2 Kʋ tɩʋ təntə nə, Zwida nɩ Kanaan tɩ̀án bʋ̀á, ʋ swe, ʋ ma fwa ʋ kan. Bʋ̀á tə nyɩna yɩrɩ nə yɩ Swua. Zwida də ʋ kan tə yəni duən, 3 yá ʋ jɩn pùə́, ʋ lɩrɩ bìú. Zwida dɩga bìú tə yɩrɩ, Ɛrə. 4 Kan tə kʋ́ʋ̀ pìí ʋ ja pùə́, ʋ lɩrɩ bìú don, ʋ dɩ ʋ yɩrɩ, Onan. 5 Ʋ tə pìí ʋ ja pùə́, ʋ lɩrɩ bìú don, ʋ dɩ ʋ yɩrɩ Swela. Ba lɩrɩ Swela máŋá tə wa, də Zwida wulə Kezibə nə.

6 Ɛrə, ʋ nə yɩ Zwida bikwɩa nə bori, ʋ nyɩna swe kan, ʋ pa wá, ʋ yɩrɩ nə yɩ Tamarə. 7 Ɛrə yà yɩ wʋlwanyiən, Ba-Yígúrə́-Jə-Tiu yáá con. Yá kʋ nətʋ tə dàń pɩn, Ba-Yígúrə́-Jə-Tiu pa ʋ tɩ.

8 Ɛrə tɩan kwa nə, Zwida swɩ̀n Onan con, ʋ wʋ́: «Tì n zʋnʋ tə kan kadənu tə, n ma fwa n kan, n nə yɩ ʋ nyánʋ́ tə yɩrɩ. Yá n dàń wá tún dwíí, n pa n zʋnʋ tə nə. 9 Onan yà yə̀ə́ də, ʋ nə tún dwíí də kadənu tə, dwíí təntə bá ya ʋ mʋ̀ nyiən. Kʋ mʋ̀ nə pɩn, máŋá mama, ʋ nə pə̀ń də kadənu tə, ʋ yàá tʋn yʋa, ʋ fɩ ʋ lwá tɩa, sə ʋ dàn ká tún dwíí, ʋ pa ʋ zʋnʋ tə nə. 10 Kʋ tə, ʋ nə tʋŋa tə, yà lwara Ba-Yígúrə́-Jə-Tiu yáá con. Yá Ba-Yígúrə́-Jə-Tiu dàń pɩn ʋ də tɩ.

11 Onan tɩan kwa nə, Zwida dàń swɩ̀n ʋ bikɩnɩ Tamarə con, ʋ wʋ́: «Vəli n jə̀ń kadənu, n nyɩna sàń nə, kʋ ja vələ máŋá tə, à bìú Swela nə wá bori.» Cɩ́gá, fən yà jə Zwida. Ʋ yà bʋŋa də, Swela də wá tɩ, ndə ʋ zʋna tə nə. Tamarə dàń nan, ʋ va ʋ jə̀ə́ ʋ nyɩna sàń nə.

12 Bɩna kapʋpʋ nə kɛ̀ń kwa nə, Swua bʋ̀á tə, ʋ nə yɩ Zwida kan tə, tɩga. Máŋá tə, Zwida bɩcan nə zuri, ʋ də ʋ dabɛɛ Yira, ʋ nə yɩ Adulamə tíú, vəli Timəna. Ʋ yà vəli, sə ʋ na ʋ lɩ̀à tə, ba nə fɩnɩ ʋ vanmɩnɩ bɔɔ. 13 Yá Lìù don dí yáá, ʋ va ʋ swɩ̀n Tamarə con, də ʋ barɩ nyɩna tə vələ Timəna, sə ʋ fɩnɩ ʋ vanmɩnɩ bɔɔ. 14 Kʋ máŋá tə wa, Tamarə yà na də Swela bori, yá Zwida ga ba cwəŋə pɩn, sə ʋ tì wá, ʋ ma fwa ʋ kan. Tamarə dàń zàn, ʋ kʋ̀rɩ̀ ʋ kadənganan tə, ʋ ga tì gànàn duən ʋ zʋ. Ʋ tì gànkɩkala ʋ pú ʋ yáá nə, ʋ ga va ʋ jə̀ə́ Enayimə tɩʋ tə nii nə, Timəna cwəŋə tə nii nə. 15 Zwida nə twi, ʋ na kan tə, ʋ bʋ́n də kʋ yɩ kacwarʋ, gànkɩkala tə yà nə púə́, ʋ yáá tə nə yɩrɩ. 16 Ʋ yà wà lwarɩ də, kʋ yɩ ʋ bikɩnɩ tə. Yá Zwida dàń vəli, ʋ yí kan tə yɩra, cwəŋə tə nii nə, ʋ swɩ̀n ʋ con, ʋ wʋ́: «À swə, sə à pə̀ń mʋ́!» Tamarə ma bwe wá, ʋ wʋ́: «Bɛ̀ɛ̀ nə n wá pa nə, sə n ga pə̀ń nə?» 17 Ʋ le, ʋ wʋ́: «À wá pa lìù ja bʋbiə à vàná tə wa, ʋ ja bà, ʋ pa mʋ́.» Yá Tamarə swɩ̀n, ʋ wʋ́: «À sɛ̀! N dàń nə dí yáá, n pa nə won, kʋ yoo nə cà n con, sə à ma dàn bʋbiə tə túrí.» 18 Zwida ma le, ʋ wʋ́: «Bɛ̀ɛ̀ won nə, à wá pa mʋ́, kʋ yoo nə cà à con?» Tamarə le, ʋ wʋ́: «N wá pa nə n jɩfɩlɩ tə, n yɩrɩ nə pʋ́pʋ́nɩ́ kʋ yuu wa tə, də kʋ ŋwənə tə, də n daduu tə, n nə jə n jɩɩn wa.» Zwida ma sɛ̀, ʋ tì tə, ʋ pa Tamarə nə, ʋ ga pə̀ń wá. Yá Tamarə dàń tì pùə́ də wá. 19 Kʋ kwa nə, Tamarə zàn, ʋ va sàń. Ʋ vəli, ʋ lɩ ʋ gànkɩkala tə, ʋ yà nə púə́ ʋ yáá nə, ʋ ga pìí ʋ tì ʋ kadənganan tə, ʋ zʋ.

20 Zwida vəli, ʋ ja bʋbiə tə, ʋ ma tʋn ʋ dabɛɛ Adulamə tíú tə, sə ʋ ja va, ʋ pa kan tə nə, ʋ ga jon ʋ wiən tə, kan tə con, ʋ ja bà, ʋ pa wá. Yá ʋ dabɛɛ tə vəli, ʋ wà kan tə nɩ. 21 Ʋ bwe Enayimə tɩ̀án duən, ʋ wʋ́: «Kacwarʋ tə, ʋ yà nə jəni cwəŋə tə nii nə, yəbə tə, wa yə̀n nə?» Ba le wá, ba wʋ́: «Kacwarʋ wà yəbə yɩn mɩ́ámɩ́án.» 22 Ʋ pìí ʋ va Zwida con, ʋ swɩ̀n, ʋ wʋ́: «À wà kan tə nɩ. Yá Enayimə tɩ̀án tə də tətə swɩ̀n də, kacwarʋ wà lá nə yɩn mɩ́ámɩ́án.» 23 Zwida ma swɩ̀n, ʋ wʋ́: «Mə ʋ ja wiən təntə, tə nə wulə ʋ con! Nə dànà ká ja nə tɩ̀àn nə nan, nə pa ba mʋn nəba. Nə mʋ̀ fwa kʋ tə, nə nə swɩ̀n də, nə wá fwa, nə pa wá. À pɩn mʋ́ bʋbiə tə, n ja va, yá n dàń nə wà wá nɩ.»

24 Kʋ nə yí ndə cànɩ̀ batwa kwa nə, lìù don twi ʋ swɩ̀n Zwida con, ʋ wʋ́: «N bikɩnɩ Tamarə nan ʋ cwàrɩ̀, ʋ tì pùə́.» Zwida dàń swɩ̀n, ʋ wʋ́: «Á pɩan ba lɩ wá tɩʋ tə wa, ba sʋ̀rɩ́ də mən.» 25 Yá ba cɩ́gá dàń vəli ba ja Tamarə, ba ja naŋa tɩʋ tə nii nə, sə ba sʋ̀rɩ́. Kʋ máŋá təntə wa, ʋ tʋn lɩ̀à ʋ barɩ nyɩna tə con, də jɩfɩlɩ tə, də kʋ ŋwənə tə, də daduu tə, ʋ ga swɩ̀n, ʋ wʋ́: «Kʋ yɩ wiən tə tə tíú, nə ken nə pùə́ tə. À lòrì mʋ́, sə n ywàń jɩfɩlɩ kʋ tə, də kʋ ŋwənə tə, də daduu kʋ tə, n jə̀ń, wàà nə tɩ tə.» 26 Zwida jon wiən tə, ʋ ywàń, ʋ ga lwarɩ də, tə yɩ ʋ mʋ̀ nyiən. Yá ʋ dàń swɩ̀n ʋ wʋ́: «Kan tə yɩ cɩ́gá tíú yoo kʋ tə wa, ʋ doni nə. À mʋ̀ nə vɩga, sə à pa wá à bìú Swela nə. Kʋ mʋ̀ nə pɩn, ʋ ma tʋn kʋ yoo təntə, à yɩra.» Yá kʋ kwa nə, Zwida kʋ́ʋ̀ wà pìí ʋ pə̀ń də Tamarə.

27 Ʋ lɩrɩ máŋá nə yí, ba nɩ də, yɩywɛ nə wulə ʋ pùə́ tə wa. 28 Ʋ lɩrɩ tə máŋá wa, bìú don dí yáá, ʋ lɩ ʋ jɩɩn poni nə. Kalonu tə ma ja jɩɩn tə, ʋ vwə gànŋwənə nəsɩan kʋ nə, ʋ ga swɩ̀n, ʋ wʋ́: «Ʋ tə nə pɩ̀à, ʋ təntən ʋ nan vʋʋ nə.» 29 Yá bìú tə pìí ʋ van ʋ jɩɩn tə, ʋ kə lá, ʋ don tə ga nan. Kalonu tə ma swɩ̀n, ʋ wʋ́: «N tún cwəŋə n ma nan!» Kan tə dɩga ʋ yɩrɩ Perɛsə. 30 Kʋ kwa nə, ʋ nubiu tə, gànŋwənə nəsɩan tə, nə vwə ʋ jɩɩn nə tə, dàń twi ʋ nan. Yá ba dɩga ʋ yɩrɩ, Zera.