ZWAKƆBƏ BIU ZƲZƐFƏ YOO
Zwakɔbə swə ʋ bìú Zʋzɛfə, ʋ doni ʋ bɩ̀á tə mama
37
1 Zwakɔbə jə̀ə́ Kanaan lʋʋ nii tə wa, bwálɩ́ tə nə, ʋ nyɩna tə yà nə dí yáá, ʋ jə̀ń. 2 Nə̀ń yìə̀n tə, tə nə twi tə tʋn Zwakɔbə dwíí tə wa. Máŋá tə Zʋzɛfə yà nə jə bɩna fugə də barpɛ, ʋ yà twá ʋ nubɩa tə nə, ʋ cɩ vanmɩnɩ nə. Zʋzɛfə yà yɩ bacɩbiə. Ʋ də ʋ nyɩna kana Bila də Ziləpa bɩ̀á tə, yà nə twá duən. Yá Zʋzɛfə dàń yàá twi, ʋ də́ tɩjaŋa, ʋ nubɩa tə də̀ń nə, ba nyɩna tə con. 3 Yɩzərayɛlə lɩrɩ Zʋzɛfə máŋá tə wa, də ʋ dàń yɩ bazʋnʋ. Kʋ nətʋ tə pɩn, ʋ swə Zʋzɛfə, ʋ doni ʋ bɩ̀á tə duən tə mama. Ʋ yà nyan pàbɩ̀á ganzwɩdarʋ, kʋ pʋ̀pʋ̀nà nə dáá, ʋ pa wá. 4 Yá Zʋzɛfə nubɩa tə dàń nɩ də, ba nyɩna tə swə wá, ʋ doni ba mama. Kʋ nətʋ tə dàń pɩn, ba tì dʋŋɩ də wá. Ba yà kʋ́ʋ̀ wàrɩ̀ sʋgʋ ba swɩ̀n ʋ con, də sonu.Zʋzɛfə pandwɩa tə yoo
5 Dɩɩn don nə, Zʋzɛfə dwɛ̀ pandwɩa. Ʋ man pandwɩa tə, ʋ bɩrɩ ʋ nubɩa tə nə, yá kʋ dàń pɩn, ʋ nubɩa tə kwɛn ba dʋŋa wá zənzən. 6 Ʋ swɩ̀n ba con, ʋ wʋ́: «Á cʋga pandwɩa tə, à nə dwɛ̀! 7 À dwɛ̀ də, nə yà wulə kárá titəŋi wa, nə dèrì mɩna, nə vwe mɩgugunə. Yá à mɩguguni tə nyɩ́n kʋ zàn, kʋ zɩga yɩɩ nə, á mɩgugunə tə ga bà, tə tʋ kʋ yáá con, tə kɩkarɩ kʋ, tə pɩn kʋ dun.» 8 Ʋ nubɩa tə bwe wá, ba wʋ́: «N bʋŋa də, n wá jì pɩ̀ʋ́, n də́ pàrɩ̀ nə yuu wa naaa?» Yá ʋ pandwɩa tə, də ʋ sʋ̀ràn tə dàń pɩn, ʋ nubɩa tə kwɛn ba dʋŋa wá zənzən.
9 Kʋ kwa nə, Zʋzɛfə tə dwɛ̀ pandwɩa duən, ʋ ga man tə də, ʋ bɩrɩ ʋ nubɩa tə nə. Ʋ swɩ̀n ba con, ʋ wʋ́: «Á nəŋə, à kʋ́ʋ̀ dwɛ̀ pandwɩa duən! À dwɛ̀ də Yɩcaʋ tə, də cànà tə, də kacɩlacɛɛ fugə də nədʋ, twi tə tʋ à yáá con, tə pa nə dun.» 10 Ʋ man tə, ʋ bɩrɩ ʋ nyɩna tə də nə, ndə ʋ nə man tə, ʋ bɩrɩ ʋ nubɩa tə nə, nətʋ. Yá ʋ nyɩna tə caga ʋ nii nə, ʋ ga swɩ̀n ʋ con, ʋ wʋ́: «Pandwɩa təntə n nə dwɛ̀, də̀ń nə yɩ bɛ̀? N bʋŋa də à mʋ̀, də n nuu tə, də n nubɩa tə wá bà, nə tʋ nə nadwana yuu, n yáá con, nə pa mʋ́ dun, naaa?» 11 Zʋzɛfə yimən dàń yà jə ʋ nubɩa tə. Yá ʋ nyɩna tə yàá bʋŋa ʋ sʋ̀ràn tə yoo, máŋá mama.
Zʋzɛfə nubɩa tə jɩn wá, ba yoli ba də́
12 Dɩɩn don nə, Zʋzɛfə nubɩa tə vəli Siswɛmə, sə ba yɩ̀rɩ̀ ba nyɩna tə vanmɩnɩ tə. 13 Yɩzərayɛlə dàń swɩ̀n Zʋzɛfə con, ʋ wʋ́: «N nubɩa tə wulə ba yɩ̀rɩ̀ vàná tə Siswɛmə nə. Bà, sə à tʋn mʋ́, ba con.» Ʋ le, ʋ wʋ́: «hʋnhʋn, Nə̀ń nə!»
14 Yɩzərayɛlə swɩ̀n ʋ con, ʋ wʋ́: «Vəli n jə́n n nubɩa tə yɩra zurə naaa. N ga jə́n vanmɩnɩ tə də yɩra zurə naaa. N dàń wá pìí n bà, n pa nə ŋwɛn.» Mə nətʋ nə, Yɩzərayɛlə zɩgɩ Ebəron vara tə wa, ʋ tʋn Zʋzɛfə Siswɛmə nə.
15 Ʋ nə vəli ʋ yí Siswɛmə, bɛɛ don nɩ wá, də ʋ twá gaʋ tə wa, ʋ ywaŋa. Bɛɛ tə ma bwe wá, ʋ wʋ́: «Bɛ̀ɛ̀ nə n twá lá, n pɩ̀à?» 16 Ʋ le, ʋ wʋ́: «À nubɩa nə, à twá lá, à pɩ̀à. À lòrì mʋ́, sə n bɩrɩ nə, bwálɩ́ tə, ba nə wulə, ba yɩ̀rɩ̀ ba vàná tə.» 17 Bɛɛ tə ma swɩ̀n, ʋ wʋ́: «Ba nan yəbə, ba vìí. Cɩ́gá, à yà nì də, ba swɩ̀n, ba wʋ́, ba vələ Dotan.» Zʋzɛfə dàń tì ʋ nubɩa tə nɛɛ, ʋ va ʋ yì ba Dotan nə.
18 Ʋ nubɩa tə nɩ wá yiŋʋnɩ, də ʋ ma bɩ̀àn. Yá ba dàń ken nii nədʋ, də ʋ tə wà ba yɩra yí, ʋ nə yí lá, sə ba gʋ wá. 19 Ba dàń swɩ̀n duən con, ba wʋ́: «Nə yuu tíú tə, ʋ nə pə̀ní pandwɩa tə nə, ʋ bɩ̀àn. 20 Á bɩ̀àn nə gʋ wá, nə dɩ nɩ́á gwàlʋ́* tə don wa, kʋ də̀ń nə lu, nə ga swɩ̀n də, wojandiu nə jɩn wá, kʋ də́. Kʋ kwa nə, nə dàń wá na kʋ tə, ʋ pandwɩa tə nə wá jì.» 21 Ribɛn nə nì kʋ yoo təntə, ʋ bʋ́n, sə ʋ jon Zʋzɛfə, ba jɩɩn wa. Yá ʋ dàń swɩ̀n, ʋ wʋ́: «Nə dànà ká lɩ ʋ mɩɩ. 22 Á dànà ká lwá jana. Á dɩa wá nɩ́á gwàlʋ́ kʋ tə wa, kʋ də̀ń nə lu, kʋ nə wulə kasɔɔ lanworu tə wa. Á nə dànà ká gʋ wá.» Ribɛn yà yɩ, ʋ swɩ̀n nətʋ, sə ʋ ma jon Zʋzɛfə, ba jɩɩn wa, ʋ ja pìí ʋ va, ʋ pa ba nyɩna nə.
23 Máŋá tə Zʋzɛfə nə twi ʋ yí ʋ nubɩa tə yɩra, ba jɩn ʋ gànʋ̀ ba kʋ̀rɩ̀. Ʋ pàbɩ̀á ganzwɩdarʋ tə, kʋ pʋ̀pʋ̀nà nə dáá tə nə, ʋ yà zʋa. 24 Ba jɩn wá, ba dɩ nɩ́á gwàlʋ́ tə wa, kʋ də̀ń nə lu. gwàlʋ́ təntə wa yà ba nɩ́á jə. 25 Kʋ kwa nə, ba dàń vəli ba jə̀ə́, sə ba də́ wodiu. Ba nə zɩ̀n ba yáá yɩɩ nə, ba nɩ Yɩsəmayɛlə dwíí lɩ̀à, ba twɩn duən nə də nyʋgʋma, ba naŋa Galadə ba bɩ̀àn. Ba nyʋgʋma tə yà zɩŋa wusinə, də nʋturə, ka lwán nə ywán, də tɩralɩ, ba ja vələ Ezwipətə. 26 Zwida dàń ma swɩ̀n ʋ nubɩa tə con, ʋ wʋ́: «Nə nə gʋa nə nyánʋ́ tə, nə ga səgə kʋ, bɛ̀ɛ̀ nywarɩ nə kʋ jə, kʋ pa nəba? 27 Ʋ yɩ nə nyánʋ́, nə də wá mɛ yɩ won nədʋ. Kʋ mʋ̀ yɩrɩ, nə dànà ká gʋ wá. Á bɩ̀àn nə lɩ wá, nə yoli Yɩsəmayɛlə dwíí lɩ̀à tə yuu wa. Yá Zwida nubɩa tə dàń sɛ̀ kʋ nətʋ tə. 28 Yá máŋá tə baywələa tə nə twi, sə ba kɛ̀ń, Zʋzɛfə nubɩa tə pìí ba van wá, ba lɩ nɩ́á gwàlʋ́ tə wa. Ba yoli wá, wárʋ́ səbilurən sapʋa, Yɩsəmayɛlə dwíí lɩ̀à tə yuu wa. Yá Yɩsəmayɛlə dwíí lɩ̀à tə dàń jɩn Zʋzɛfə, ba ja va Ezwipətə.
29 Kʋ kwa nə, Ribɛn pìí ʋ kɩkarɩ, ʋ bà nɩ́á gwàlʋ́ tə nii nə, də Zʋzɛfə kʋ́ʋ̀ tə̀lə́ lá. Kʋ gwárɩ́ wá, yá ʋ ga van ʋ gànàn ʋ kàrɩ́.b 30 Ʋ pìí ʋ dəri ʋ va, ʋ swɩ̀n ʋ nubɩa tə con, ʋ wʋ́: «Bisɩmaa tə kʋ́ʋ̀ tə̀lə́ nɩ́á gwàlʋ́ tə wa. À dàń yɩ á wá ja kʋ, à twá yə̀n nə?»
31 Ba dàń jɩn bʋtʋlʋ, ba gʋ, ba tì Zʋzɛfə pàbɩ̀á ganzwɩdarʋ tə, kʋ pʋ̀pʋ̀nà nə dáá tə, ba li kʋ jana tə wa. 32 Yá kʋ kwa nə, ba dàń tì kʋ, ba ja va, ba bɩrɩ ba nyɩna tə nə. Ba swɩ̀n ʋ con, ba wʋ́: «Gànʋ̀ kʋ tə yɩ, nə nɩ kʋ gaʋ tə wa. Jon kʋ, n ywàń n jə́n, kʋ yɩ n bìú tə gànʋ̀ tə, nə à yə̀ə́, kʋ tà kʋ mʋ̀.» 33 Zwakɔbə lwarɩ gànʋ̀ tə, ʋ ga lwa kori, ʋ wʋ́: «Kʋ yɩ à bìú tə gànʋ̀ tə nə! Kʋ ba tʋ́tʋ̀ná jə, Zʋzɛfə yɩ wojandiu nə van wá, kʋ cɩrɩ, kɩkaran kɩkaran, kʋ də́! 34 Zwakɔbə van ʋ gànàn, ʋ kàrɩ́, ʋ ga vwa ganlɔɔ ʋ tàŋá nə.c Ʋ zʋa pucʋnɩ wa, dɩan kapʋpʋ, ʋ bìú tə yɩrɩ. 35 Ʋ bɩ̀á tə, də ʋ bwɩ̀ɩ́ tə mama dídə́n sə ba kòrì wá, yá ʋ vɩga kwìə̀ yiri mama. Ʋ kwi ʋ bìú tə nə, ʋ ga swɩ̀n, ʋ wʋ́: «Kʋ yɩ pucʋnɩ wa nə, à wá tɩ, à va à bìú tə con, ciru* nə.
36 Baywələ tə nə ja Zʋzɛfə, ba yí Ezwipətə, ba yoli wá ba də́ bɛɛ don yuu wa, ba nə boŋə Potifarə. Potifarə yà yɩ pɩ̀ʋ́ Farawon kàrá tʋ̀tʋ̀nà yuu tíú, ʋ ga yɩ kwatara tə də, ba nə cɩ̀ pɩ̀ʋ́ sàń nə yuu tíú.