Zaŋʋ
YƖZƏRAYƐLƏ DWII TƏ WULƏ EZWIPƏTƏ NƏ
Yɩzərayɛlə dwíí tə jìgə̀ ywə́ŋə́ Ezwipətə nə
1
1 Nəŋə Yɩzərayɛlə, ʋ yɩrɩ don nə yɩ Zwakɔbə, bɩ̀á tə yɩra, ba nə twá ʋ nə, ba bà Ezwipətə. Ba lìù mama twi də ʋ dìə̀ lɩ̀à. 2 Kʋ yɩ Ribɛn, də Simeyon, də Levi, də Zwida, 3 də Yɩsakarə, də Zabulon, də Bɛnzwamɛn, 4 də Dan, də Nɛfətali, də Gadə, də Aswɛrə. 5 Zwakɔbə dwíí tə mama yà yɩ sapwɩtwa də fugə. Ʋ bìú Zʋzɛfə mʋ̀ yà dí yáá ʋ wulə Ezwipətə nə. 6 Bɩna kapʋpʋ kwa nə, Zʋzɛfə tɩga. Ʋ nubɩa tə də mama tɩga, yá ba suruduən tə də mama tɩga ba zwɛ̀. 7 Kʋ kwa nə, Yɩzərayɛlə dwíí tə gɩganɩ tə lɩrɩ bɩ̀á kapʋpʋ, ba dwíí tə ga pùlì zənzən. Ba yà súə́ lʋʋ nii tə mama wa, ba dɩ̀àn də ga súrí wuuu.8 Kʋ kwa nə, pɩ̀ʋ́ nədʋn dɩ̀gà Ezwipətə padaʋ tə yuu, ʋ mʋ̀ nə wà Zʋzɛfə yəni. 9 Yá ʋ dàń swɩ̀n ʋ lʋʋ lɩ̀à tə con, ʋ wʋ́: «Á nəŋə Yɩzərayɛlə dwíí tə dáá zənzən, ba dɩ̀àn də ga dwə nəba. 10 Kʋ mʋ̀ yɩrɩ, á pɩan nə fwa swɩan, nə cɩ̀ ba nə, ba kʋ́ʋ̀ dàn ká pùlì, ba súrí lá. Cɩ́gá, kʋ̀ʋ̀ nə twi, ba wàá nə dʋŋa nə, ba saŋa ba tɛ nəba, ba ga nan ba yá lʋʋ nii tə.» 11 Ezwipətə tɩ̀án dàń tún tʋ̀tʋ̀nán yáá tɩ̀án, sə ba pa Yɩzərayɛlə dwíí tə tʋn tʋtʋncaran, tə nə wá kə bwànɩ̀ ba nə. Mə kʋ zɩgɩ nətʋ, Yɩzərayɛlə dwíí tə ma lwà Pitomə də Raməsɛsə tɩan tə, ba pa Farawon* nə, ʋ ma túŋə́ wodirən. 12 Yá də Ezwipətə tɩ̀án nə kəni ba càn wa zənzən tə mɛ, Yɩzərayɛlə dwíí tə, tə yà kwɛn ba pùlì zənzən, ba súrí. Kʋ nətʋ tə pɩn, ba fən yà jə Ezwipətə tɩ̀án. 13 Yá Ezwipətə tɩ̀án dàń kwɛn ba kə Yɩzərayɛlə dwíí tə ywə́n tʋ̀tʋ̀nán wa zənzən. 14 Ezwipətə tɩ̀án yà fɩfɩn Yɩzərayɛlə dwíí tə zənzən, ba pɩn ba tʋŋa ywə́n tʋtʋncaran. Ba pɩn ba mà tɩbʋa wárá, də ba tʋŋa kárɩ́ tʋ̀tʋ̀nán. Ba yà fɩfɩn ba, ba pɩn ba tʋŋa tʋtʋncaran yiri mama.
15 Ezwipətə pɩ̀ʋ́ tə swɩ̀n Swifəra də Puwa də con, ba nə yɩ Ebərə-ba kalwənə, ʋ wʋ́: 16 «Máŋá tə, á nə loni Ebərə-ba kana tə, á nə nɩ də kʋ yɩ bibɛɛ, sə á gʋ wá. Kʋ nə yɩ bʋ̀á mʋ̀, sə á yá wá.» 17 Yá kalwənə tə dəri Yɩɩ fən, kʋ pa, ba wà kʋ tə, Ezwipətə pɩ̀ʋ́ tə nə swɩ̀n, nii nə twá. Ba yàá yá bibara tə də. 18 Ezwipətə pɩ̀ʋ́ tə dàń bon kalwənə tə, ʋ bwe ba, ʋ wʋ́: «Bɛ̀ɛ̀ nə pɩn á ma tʋn nətʋ, á ga yá bibara tə, á wà ba gwɩ?» 19 Kalwənə tə ma le wá, ba wʋ́: «Ebərə-ba kana tə tà ndə Ezwipətə tɩ̀án kana tə nə. Ba dɩ̀àn dwə Ezwipətə tɩ̀án kana tə. Ba yàá lɩra, də kalonu tə, tə wà ba con yí.» 20 Yɩɩ fwa zəni kalwənə tə yɩra. Yá Yɩzərayɛlə dwíí tə pùlì zənzən, ba súrí, ba ga jə dɩ̀àn zənzən. 21 Kalwənə tə nə dəri Yɩɩ fən tə yɩrɩ, Yɩɩ fwa zəni ba yɩra, ʋ ga pa ba dwíí.
22 Farawon dàń pɩn nii kʋ tə, ʋ lʋʋ lɩ̀à tə nə, ʋ wʋ́: «Á joŋə Ebərə-ba bibara tə mama, ba nə wá lɩra, á dɩ Nilə mʋnaa tə wa. Yá á wá yá bwɩ̀ɩ́ tə mʋ̀ mama, sə ba ya lá.»