Moyizə lɩrʋ yoo
2
1 Levi dwíí tə wa bɛɛ don, vəli ʋ swe Levi dwíí tə tətə wa bʋ̀á. 2 Kan təntə jɩn pùə́, ʋ lɩra bibɛɛ. Ʋ nɩ də bisɩmaa tə ziən zənzən, yá ʋ dàń səgə wá, cànɩ̀ batwa. 3 Máŋá don twi ka yí, ʋ yà nə kʋ́ʋ̀ wàrɩ̀ bisɩmaa tə ʋ səgə. Yá ʋ dàń pɩ̀à gʋnmʋʋ fɩyaʋ, ʋ mwàlɩ̀ kʋ yɩra də gudəron, ʋ tì bisɩmaa tə, ʋ kə kʋ wa, ʋ ja va, ʋ tún mɩncanɩ wa, Nilə mʋnaa tə wa. 4 Yá bisɩmaa tə nakʋa zɩga yiŋʋnɩ, ʋ ywàŋá, sə ʋ jə̀ń, kʋ tə nə wá yí ʋ nabʋa tə.5 Kʋ fwa mancɩn, də Farawon* bʋ̀á twi Nilə mʋnaa tə nii nə, sə ʋ pugu nɩ́á. Yá ʋ tʋtʋnbwɩɩ tə mʋ̀ yà twá buu tə nii nə, ba jírí. Farawon bʋ̀á tə nɩ fɩyaʋ tə, mɩncanɩ tə wa, ʋ ma tʋn ʋ tʋtʋnbʋa, ʋ pa ʋ tì kʋ, ʋ ja bà. 6 Farawon bʋ̀á tə súrí fɩyaʋ tə nii, ʋ na bisɩmaa tə. Kʋ yɩ bisɩmabara, ʋ yà nə wulə ʋ kwi. Bɩsɩma tə yinəgə zʋa wá, ʋ ga swɩ̀n, ʋ wʋ́: «Kʋ yɩ Ebərə-ba bisɩmaa don!» 7 Bisɩmaa tə nakʋa tə ma bólí lá, ʋ bwe Farawon bʋ̀á tə, ʋ wʋ́: «N pɩ̀à, sə à va, à bon kan, Ebərə-ba kana tə wa, sə ʋ jon bisɩmaa tə, ʋ kʋna, ʋ pa mʋ́ naaa?» 8 Farawon bʋ̀á tə ma le, ʋ wʋ́: «Awo, vəli!» Bisɩmakana tə dàń vəli, ʋ bon bisɩmaa tə nuu. 9 Farawon bʋ̀á tə swɩ̀n kan tə con, ʋ wʋ́: «Jon bisɩmaa wa tə, n ja va, n kʋna, n pa nə. À wá ŋwɩ́n mʋ́ kʋ yɩrɩ.» Kan tə ma jon bisɩmaa tə, ʋ ja va, ʋ kʋ̀nɩ̀.
10 Máŋá tə bisɩmaa tə nə bori, ʋ nuu tə jɩn wá, ʋ va, ʋ pa Farawon bʋ̀á tə nə. Yá Farawon bʋ̀á tə dàń jon wá, ʋ ma fwa ʋ bìú. Ʋ dɩga ʋ yɩrɩ, Moyizə. Ʋ pɩ̀à, sə twá kʋ nətʋ nə, ʋ ma swɩ̀n də, bisɩmaa tə yɩ ʋ lɩ nɩ́á wa.
Moyizə dəri ʋ va Madɩan lʋʋ nii
11 Máŋá tə Moyizə nə jìgə̀ bɛɛ, ʋ vəli ʋ dwíí tɩ̀án tə con, yá ʋ nɩ ba tʋtʋncaran tə, ba nə tʋŋa. Ʋ nɩ Ezwipətə tíú don, də ʋ wulə ʋ mà ʋ dwíí tɩ̀án, Ebərə-ba wa lìù don. 12 Moyizə nə ywàń tɩa mama, ʋ na də lìù mama ba lá bwələ, ʋ mà Ezwipətə tíú tə, ʋ gʋ, ʋ ga səgə ʋ tɩgɩ tə, kasɩlʋ wa. 13 Kʋ tɩpʋrɩ nə, ʋ kʋ́ʋ̀ vəli, də nə̀ń Ebərə-ba lɩ̀à bələ nə, ba jə duən. Ʋ ma bwe ba wa lìù tə, ʋ nə ba cɩ́gá jə tə, ʋ wʋ́: «Bɛ̀ɛ̀ nə pɩn, n mà n nubiu tə?» 14 Bɛɛ təntə ma pìí ʋ le Moyizə, ʋ wʋ́: «Wàà nə tún mʋ́, sə n ya nə pɩ̀ʋ́, n bʋ̀rɩ̀ nə bʋra? N yɩ n bʋŋa, sə n gʋ à də, ndə n nə gʋa Ezwipətə tíú tə nətʋ naaa?» Yá fən dàń zʋa Moyizə, ʋ ga swɩ̀n ʋ waa con, ʋ wʋ́: «Cɩ́gá mama, lɩ̀à lwarɩ yoo təntə, à nə tʋn!» 15 Farawon* nì kʋ, yá ʋ dàń yà pɩ̀à Moyizə, sə ʋ gʋ. Yá Moyizə dàń dəri Farawon yáá nə, ʋ va ʋ wulə Madɩan lʋʋ nii wa. Dɩɩn don nə, ʋ yà vəli, ʋ jə̀ə́ vɩlɩ don nii nə.
16 Kʋ máŋá tə wa, də nə̀ń Madɩan tɩ̀án joŋwanʋ bwɩ̀ɩ́ barpɛ duən nə, ba twi, sə ba tan nɩ́á, ba sú gwàlán tə, vàná nə nywɩn tə wa, sə ba nyɩna vàná nyʋn. 17 Yá vàná nəcɩra duən twi, ba dɩŋa ba. Moyizə ma zàn ʋ san bwɩ̀ɩ́ tə nə, ʋ pa ba vàná tə nyʋn nɩ́á tə. 18 Máŋá tə, bwɩ̀ɩ́ tə nə pìí ba va ba nyɩna Rewuwɛləa con, ʋ bwe ba, ʋ wʋ́: «Bɛ̀ɛ̀ nə pɩn, á ma pìí á bà fuən zə̀n?» 19 Yá ba le, ba wʋ́: «Ezwipətə tíú don nə jon nəba vàná nəcɩra tə jɩɩn wa. Ʋ mʋ̀ tətə nə tan nɩ́á tə, ʋ pa nə vàná tə nyʋn.» 20 Yá ʋ pìí ʋ bwe ʋ bwɩ̀ɩ́ tə, ʋ wʋ́: «Bɛɛ təntə wulə yə̀n nə? Bɛ̀ɛ̀ nə pɩn, á ma yá wá lá? Á vələ, á bon wá, sə ʋ bà, ʋ də́ wodiu.»
21 Moyizə sɛ̀, ʋ bà, ʋ jə̀ə́ bɛɛ təntə con, yá bɛɛ tə dàń pɩn wá ʋ bʋ̀á Sefora, ʋ ma fwa ʋ kan. 22 Sefora lɩrɩ bibɛɛ, Moyizə dɩ ʋ yɩrɩ Gɛrəswomə. Cɩ́gá, ʋ pɩ̀à sə ʋ twá kʋ nətʋ nə, ʋ swɩ̀n də, ʋ yɩ vee, ʋ twá ʋ jə̀ə́ lʋʋ nii don wa.
23 Bɩna kapʋpʋ kwa nə, Ezwipətə pɩ̀ʋ́ tə tɩga. Yá Yɩzərayɛlə dwíí tə mʋ̀ yɩ ba tə wulə ba ywə́n tʋ̀tʋ̀nán tə wa, ba kwi, də ba sisigə. Yá ba bubwiə tə dɩga ka yí Yɩɩ con. 24 Yɩɩ nì ba nɩ́ʋ́n tə, ʋ ga pìí ʋ bʋ́n ʋ nimarʋ tə yoo, ʋ nə tún də Abərahamə, də Yɩzakə, də Zwakɔbə. 25 Yɩɩ ywàń Yɩzərayɛlə dwíí tə, yá ʋ nɩ kʋ tə nə jə ba.