Yɩɩ twi ʋ bɩrɩ ʋ tɩ̀àn Moyizə nə
3
1 Moyizə dàń yà nə yɩ̀rɩ̀ ʋ tɩnbɛɛ Zwetəro, ʋ nə yɩ Madɩan tɩ̀án joŋwanʋ, vàná tə. Moyizə yɩ̀rɩ̀ vàná tə, ʋ ja twá kasɔɔ lanworu tə wa, ʋ va ʋ yí Yɩɩ paan tə, ba nə boŋə Orɛbə. 2 Yá Ba-Yígúrə́-Jə-Tiu malɩka tə* twi ka nan Moyizə nə, mənvuə wa, tə nə jə tuni wa. Moyizə nɩ də tuni tə jə mə̀ń, kʋ ga ba də́. 3 Moyizə dàń swɩ̀n ʋ waa con, ʋ wʋ́: «À wá kwɛn à zɩgɩ, sə à wànɩ́ à na yomɩlʋ kʋ tə zəni. Bɛ̀ɛ̀ nə pɩn, mən tə ma ba tuni tə də́?» 4 Ba-Yígúrə́-Jə-Tiu nə nɩ də, Moyizə kwɛn ʋ zɩga, sə ʋ ywàń, ʋ zɩgɩ tuni tə wa, ʋ bon wá, ʋ wʋ́: «Moyizə! Moyizə!» Moyizə ma le, ʋ wʋ́: «À sɛ̀ mʋ́!» 5 Ba-Yígúrə́-Jə-Tiu swɩ̀n, ʋ wʋ́: «Dàn ká bólí yəbə! Lɩ n natɩra tə, n nɛɛ nə. Cɩ́gá, bwálɩ́ tə n nə zɩga kʋ wa, yɩ parɩ.» 6 Ʋ tə swɩ̀n, ʋ súrí lá, ʋ wʋ́: «À mʋ̀ nə yɩ n nyɩna-ba Yɩɩ tə. À yɩ Abərahamə, də Yɩzakə, də Zwakɔbə Yɩɩ.» Moyizə dàń púə́ ʋ yáá nə, fən yà nə jə wá, sə ʋ ywàń Yɩɩ yɩrɩ.7 Ba-Yígúrə́-Jə-Tiu swɩ̀n, ʋ wʋ́: «À cɩ́gá nɩ yinəgə tə, à lɩ̀à tə nə wulə ka wa, Ezwipətə nə. À nì ba bubwiə tə, ba tʋtʋncaran yáá tɩ̀án tə nə pɩn, ba bubwi. Cɩ́gá, à yə̀ə́ də ba wulə càn wa. 8 Yá à dàń cúə́, sə à jon ba, Ezwipətə tɩ̀án jɩɩn wa. À wá lɩ ba lʋʋ nii kʋ tə wa, à ja va lʋʋ nii nəzəŋu wa, kʋ nə dáá, nayɩla də tʋ̀ràn ga sú lá, tə pàlɩ̀. Kʋ lʋʋ nii təntə yɩ Kanaan tɩ̀án, də Ɛtə dwíí, də Amɔrə dwíí, də Perizi dwíí, də Evi dwíí, də Yebusə tɩ̀án nə wulə kʋ wa. 9 Sɩ́ʋ́n kʋ tə, Yɩzərayɛlə dwíí tə bubwiə dɩ̀gà ka yí à con. À nɩ nətʋ tə, Ezwipətə tɩ̀án nə kəni ba càn wa. 10 Yá sɩ́ʋ́n nə, à dàń tʋŋa mʋ́ Farawon* con. Vəli n lɩ à lɩ̀à tə, ba nə yɩ Yɩzərayɛlə dwíí, Ezwipətə lʋʋ nii tə wa.»
11 Yá Moyizə le, ʋ wʋ́: «À mʋ̀ nə yɩ wà, à ma vəli Farawon con, à lɩ Yɩzərayɛlə dwíí tə, Ezwipətə lʋʋ nii tə wa?» 12 Yɩɩ ma swɩ̀n, ʋ wʋ́: «À wá ya də mʋ́. Nə̀ń mɩmɩnʋ tə, kʋ nə wá pa n lwarɩ, də à mʋ̀ nə tʋn mʋ́. Máŋá tə, n nə wá lɩ Yɩzərayɛlə dwíí tə, Ezwipətə lʋʋ nii tə wa, á wá bà, á pa nə dun, paan ka tə yuu wa.» 13 Yá Moyizə dàń swɩ̀n Yɩɩ con, ʋ wʋ́: «Kʋ ziən, à wá va à swɩ̀n Yɩzərayɛlə dwíí tə con, də ba nyɩna-ba Yɩɩ tə nə tʋn nə, ba con. Sə ba dàń nə bwe n yɩrɩ nə, bɛ̀ɛ̀ nə à wá le ba?» 14 Yɩɩ ma swɩ̀n Moyizə con, ʋ wʋ́: «À YƖ KƲ TƏ À NƏ YƖ. Mə nətʋ nə, n wá swɩ̀n Yɩzərayɛlə dwíí tə con də, À YƖ nə tʋn mʋ́ ba con.» 15 Yɩɩ tə swɩ̀n Moyizə con, ʋ wʋ́: «N wá swɩ̀n Yɩzərayɛlə dwíí tə con də, Yɩɩ tə, ʋ nə tʋn mʋ́ ba con tə, yɩrɩ nə yɩ Ba-Yígúrə́-Jə-Tiu. À yɩ ba nyɩna-ba Yɩɩ. À yɩ Abərahamə, də Yizakə, də Zwakɔbə Yɩɩ. Mə à yɩrɩ nə nətʋ, máŋá mama wuuu. Mə yɩrɩ təntə nə, ba wá ma bon ba kə à nə, máŋá də máŋá mama wuuu. 16 N dàń vəli, n kə Yɩzərayɛlə nəkwɩna tə duən yáá, n swɩ̀n ba con də, Ba-Yígúrə́-Jə-Tiu, à nə yɩ ba nyɩna-ba Yɩɩ, twi à bɩrɩ à tɩ̀àn mʋ́. À yɩ Abərahamə, də Yɩzakə, də Zwakɔbə Yɩɩ. Swɩ̀n ba con də, à nɩ càn tə, ba nə kəni ba nə, Ezwipətə nə, yá à cɩ́gá wá jon ba, tə wa. 17 Yá à swɩ̀n də, à wá lɩ ba yinəgə tə wa, Ezwipətə nə, à ja va Kanaan tɩ̀án, də Ɛtə dwíí, də Amɔrə dwíí, də Perizi dwíí, də Evi dwíí, də Yebusə tɩ̀án lʋʋ nii wa. Kʋ yɩ lʋʋ nii tə, nayɩla də tʋ̀ràn nə súə́ lá, tə pàlɩ̀. 18 Yɩzərayɛlə nəkwɩna tə wá cʋgʋ n sʋgʋ. Yá n də ba dàń wá va á yí Ezwipətə pɩ̀ʋ́ tə, á swɩ̀n ʋ con də, Ba-Yígúrə́-Jə-Tiu, ʋ nə yɩ Ebərə-ba Yɩɩ, twi ʋ bɩrɩ ʋ tɩ̀àn aba. Sɩ́ʋ́n nə, ʋ dàń pa aba cwəŋə, sə á va dɩan batwa vəli, kasɔɔ lanworu tə wa, á fwa jwəŋə á pa à mʋ̀ Ba-Yígúrə́-Jə-Tiu nə, à nə yɩ á Yɩɩ. 19 À yə̀ə́ zəni, də Ezwipətə pɩ̀ʋ́ tə bá pa aba cwəŋə, sə á vìí, də kʋ nə tà kʋ twá də à jɩɩn dɩ̀àn. 20 Kʋ mʋ̀ nə pɩn, à wá te à jɩɩn, à mà Ezwipətə tɩ̀án, à ga pa yomɩlan yirə yirə tʋn ba titəŋi wa. Yá tə yìə̀n təntə kwa nə, ʋ dàń wá yá aba, sə á vìí. 21 Á viru máŋá wa, à wá pa Ezwipətə tɩ̀án fwa pubwanʋ á yɩra, sə á dàn ká vìí də jɩkʋrɩkɛ. 22 Yɩzərayɛlə dwíí kan mama wá lòrì wárʋ́ wiən, də sɩ́án wiən, də gànàn, Ezwipətə tɩ̀án kana tə con, ba də ba nə wulə dìə̀ nədʋ, nə à yə̀ə́, ba nə yɩ jənduən. Á wá pa tə á bɩ̀á, də á bwɩ̀ɩ́ nə, ba zɩn. Mə kʋ wá twá nətʋ, á ma jon Ezwipətə tɩ̀án jɩjə wiən tə.»