4
1 Ba-Yígúrə́-Jə-Tiu nə swɩ̀n nətʋ kwa nə, Moyizə le, ʋ wʋ́: «Yɩzərayɛlə dwíí tə bá pa nə cɩ́gá, ba ga bá cʋgʋ à sʋgʋ tə. Yá ba wá swɩ̀n à con də, Ba-Yígúrə́-Jə-Tiu wà nə ʋ tɩ̀àn bɩrɩ.» 2 Ba-Yígúrə́-Jə-Tiu ma bwe wá, ʋ wʋ́: «Bɛ̀ɛ̀ nə wulə n jɩɩn wa?» Ʋ ma le, ʋ wʋ́: «Kʋ yɩ daduu.» 3 Ba-Yígúrə́-Jə-Tiu ma swɩ̀n, ʋ wʋ́: «Dɩ kʋ tɩa.» Moyizə dɩga daduu tə tɩa, yá kʋ jìgə̀ dən. Moyizə dàń yà wulə ʋ dəri kʋ yáá nə. 4 Ba-Yígúrə́-Jə-Tiu ma kʋ́ʋ̀ swɩ̀n ʋ con, ʋ wʋ́: «Te n jɩɩn, n ja kʋ dəbili nə, n tì.» Moyizə ma te ʋ jɩɩn, ʋ ja dən tə dəbili nə, ʋ tì kʋ, yá kʋ kʋ́ʋ̀ pìí kʋ jì daduu, ʋ jɩɩn wa.5 Ba-Yígúrə́-Jə-Tiu dàń swɩ̀n ʋ con, ʋ wʋ́: «Kʋ nətʋ wá pa, ba pa cɩ́gá də, à mʋ̀ Ba-Yígúrə́-Jə-Tiu, à nə yɩ ba nyɩna-ba Yɩɩ, à nə yɩ Abərahamə, də Yɩzakə, də Zwakɔbə Yɩɩ, cɩ́gá bɩrɩ à tɩ̀àn mʋ́.» 6 Ba-Yígúrə́-Jə-Tiu tə swɩ̀n, ʋ con, ʋ súrí lá, ʋ wʋ́: «Kə n jɩɩn tə, n nyʋnɩ yuu, n gànʋ̀ tə də̀ń nə.» Moyizə ma kə ʋ jɩɩn, ʋ nyʋnɩ yuu. Ʋ pìí ʋ lɩ da, də da mama pɩ̀rɩ̀ də dayan, ndə gunmuən nə. 7 Ba-Yígúrə́-Jə-Tiu kʋ́ʋ̀ swɩ̀n ʋ con, ʋ wʋ́: «Pìí n kə n jɩɩn tə, n nyʋnɩ yuu, n gànʋ̀ tə də̀ń nə.» Moyizə ma pìí, ʋ kə ʋ jɩɩn tə, ʋ nyʋnɩ yuu. Ʋ pìí ʋ lɩ da, də dayaan tə jɛ́n, ʋ jɩɩn tə ga pìí da jì ndə ʋ yɩra tə nə. 8 Yá Ba-Yígúrə́-Jə-Tiu swɩ̀n, ʋ wʋ́: «Də ba nə wà mʋ́ cɩ́gá pɩn, ba ga wà n con tan, təntən mɩmɩnʋ tə yuu wa, ba wá pa mʋ́ cɩ́gá, bələ nii nyiən kʋ tə mʋ̀ yuu wa. 9 Yá ba dàń nə wà mʋ́ cɩ́gá pɩn, ba ga wà n con tan, tə mɩmɩnan bələ tə mɛ yuu wa, sə n kwan nɩ́á Nilə mʋnaa tə wa, ʋ lwà tɩa, yá nɩ́á təntə wá jì jana.»
10 Yá Moyizə swɩ̀n Ba-Yígúrə́-Jə-Tiu con, ʋ wʋ́: «Aaa! Yuu-Tiu, à tà lìù tə, à nə wàá à swɩ̀n mwalɩ mwalɩ. Yá kʋ nətʋ tə tà diən, nə à yə̀ə́, kanyan yoo. Kʋ ma tà kʋ zɩgɩ máŋá tə nə, n nə sinti n swɩ̀n à mʋ̀, n tʋtʋnʋ tə con. Cɩ́gá, à nii wà pʋrɩ.» 11 Ba-Yígúrə́-Jə-Tiu ma bwe Moyizə, ʋ wʋ́: «Wàà nə fwa nii, ʋ kə ləzwənə yɩra? Wàà nə pɩn ləzwənə jì bəru, nə à yə̀ə́, zɩbʋŋʋ? Wàà nə pɩn ləzwənə yɩ́á na lá, nə à yə̀ə́, ʋ jì ləliu? Kʋ tà à mʋ̀ Ba-Yígúrə́-Jə-Tiu naaa? 12 Sɩ́ʋ́n nə, n dàń vəli. À mʋ̀ tətə nə wá ya də n nii tə, yá à wá bɩrɩ mʋ́ kʋ tə, n nə mɛ, sə n swɩ̀n.»
13 Yá Moyizə swɩ̀n, ʋ wʋ́: «Aaa! Yuu-Tiu, à lòrì mʋ́, sə n tʋn lìù don.» 14 Ba-Yígúrə́-Jə-Tiu lɩŋa dàń zàn Moyizə yuu wa, ʋ ga swɩ̀n, ʋ wʋ́: «Kʋ ziən! N nubiu Aron, ʋ nə yɩ Levi dwíí tə wulə. À yə̀ə́ də ʋ mʋ̀ nii pʋrɩ. Ʋ tətə wulə cwəŋə wa, ʋ bɩ̀àn, sə ʋ jəri mʋ́. Máŋá tə, ʋ nə wá na mʋ́, ʋ pùə́ wá poli zənzən. 15 N wá swɩ̀n ʋ con, n pa ʋ yəni sʋ̀ràn tə, ʋ nə mɛ, sə ʋ swɩ̀n. Yá à tətə dàń wá ya də n nii tə, də ʋ də nii tə, à bɩrɩ aba kʋ tə, á nə mɛ, sə á fwa. 16 Aron wá swɩ̀n Yɩzərayɛlə dwíí tə con, ʋ pa mʋ́. Ʋ mʋ̀ nə wá ya n nii, yá n mʋ̀ dàń wá ya ndə Yɩɩ nə, n bɩrɩ wá kʋ tə, ʋ nə mɛ, sə ʋ swɩ̀n. 17 Tì daduu kʋ tə, n ja n jɩɩn. Kʋ mʋ̀ nə, n wá ma fwa mɩmɩnan tə.»
Moyizə pìí ʋ va Ezwipətə
18 Moyizə pìí ʋ va ʋ swɩ̀n ʋ tɩnbɛɛ Zwetəro con, ʋ wʋ́: «À lòrì cwəŋə, sə à pìí à va à nubɩa tə con, Ezwipətə nə, à jə́n, ba mɩɩ tə wulə lʋʋ naaa!» Zwetəro ma swɩ̀n Moyizə con, ʋ wʋ́: «Yɩɩ wá ja mʋ́ ʋ va də yazurə!»
19 Də Moyizə tə yà nə wulə Madɩan lʋʋ nii tə wa, Ba-Yígúrə́-Jə-Tiu yà swɩ̀n ʋ con, sə ʋ pìí ʋ va Ezwipətə, lɩ̀à tə mama ba yà nə pɩ̀à wá, sə ba gʋ tə, nə tɩga ba zwɛ̀ yɩrɩ. 20 Moyizə dàń lɩ ʋ kan Sefora, də ʋ bɩ̀á, ʋ pa ba dɩ bɩnɛ yuu, ʋ ja pìí ʋ vələ Ezwipətə lʋʋ nii wa. Ʋ tì daduu tə, Yɩɩ yà nə swɩ̀n ʋ con, sə ʋ tì, ʋ jə ʋ jɩɩn.
21 Ba-Yígúrə́-Jə-Tiu swɩ̀n Moyizə con, ʋ wʋ́: «Sɩ́ʋ́n nə, n dàń nə pìí n vələ Ezwipətə, ywàń yomɩlan tə mama yoo, à nə pɩn mʋ́ tə dɩ̀àn. N wá tʋn tə Farawon* yáá con. Yá à mʋ̀ dàń wá pa ʋ jì zɩbanənyɩn, ʋ ga vɩ, sə ʋ yá Yɩzərayɛlə dwíí tə, ʋ pa ba vìí. 22 N wá swɩ̀n Farawon con, də à mʋ̀ Ba-Yígúrə́-Jə-Tiu nə swɩ̀n, də Yɩzərayɛlə dwíí tə yɩ à bikwɩa. 23 À swɩ̀n Farawon con, à wʋ́ ʋ yá Yɩzərayɛlə dwíí tə, ʋ pa ba va, ba tʋn ba pa nə. Yá ʋ vɩga, sə ʋ yá ʋ pa ba vìí. Kʋ mʋ̀ yɩrɩ, à wá gʋ ʋ bikwɩa tə.»
24 Máŋá tə Moyizə nə wulə cwəŋə wa, ʋ ma vìrí, ʋ jʋa bwálɩ́ don wa, tɩtɩn nə. Yá Ba-Yígúrə́-Jə-Tiu dàń twi, ʋ jəri wá lá, ʋ pɩ̀à sə ʋ gʋ wá. 25 Yá Sefora dàń tì pɩ̀ʋ̀ kapan pɩpaa, ka nə jə nii, ndə sɩ̀ʋ́ nə, ʋ ma goŋə ʋ bìú tə pəntanʋ tə, ʋ ma dwen Moyizə nɛɛ nə, ʋ ga swɩ̀n, ʋ wʋ́: «N yɩ jana barɩ, n pa nə!» 26 Yá Ba-Yígúrə́-Jə-Tiu dàń yá Moyizə. Pəngwəŋə tə yɩrɩ nə, Sefora swɩ̀n də Moyizə yɩ «jana barɩ!»
27 Ba-Yígúrə́-Jə-Tiu swɩ̀n Aron con, ʋ wʋ́: «Vəli kasɔɔ lanworu tə wa, n jəri Moyizə.» Ʋ vəli ʋ jəri Moyizə Yɩɩ paan tə máŋá nə, ʋ pùrì wá, ʋ kə ʋ nyʋnɩ nə. 28 Moyizə swɩ̀n Ba-Yígúrə́-Jə-Tiu sʋ̀ràn tə mama, ʋ nə ma tʋn wá, də mɩmɩnan tə mama, ʋ nə pɩn wá tə dɩ̀àn, sə ʋ fwa, ʋ bɩrɩ Aron nə. 29 Yá Moyizə də Aron dàń vəli ba kə Yɩzərayɛlə dwíí nəkwɩna tə mama duən yáá. 30 Aron tún yìə̀n tə mama Ba-Yígúrə́-Jə-Tiu nə swɩ̀n Moyizə con, ʋ bɩrɩ ba, Moyizə ga fwa mɩmɩnan tə də, lalʋʋ tə yɩ́á yuu. 31 Yá lalʋʋ tə pɩn cɩ́gá kʋ nətʋ tə nə. Ba nə nì də, Ba-Yígúrə́-Jə-Tiu nɩ ba yinəgə tə, ʋ ga kə ʋ siri, sə ʋ jon ba, ba tʋa ba nadwana yuu, ba pa dun* Yɩɩ nə.