Moyizə də Aron wulə Ezwipətə pɩ̀ʋ́ tə yáá con
5
1 Kʋ kwa nə, Moyizə də Aron vəli, ba swɩ̀n Farawon* con, ba wʋ́: «Ba-Yígúrə́-Jə-Tiu, ʋ nə yɩ Yɩzərayɛlə dwíí tə Yɩɩ, nə swɩ̀n yoo kʋ tə, n con. Ʋ wʋ́ yá ʋ lɩ̀à tə, sə ba va ba də́ cànà, ba ma pa wá dun, kasɔɔ lanworu tə wa.» 2 Farawon ma le, ʋ wʋ́: «Ba-Yígúrə́-Jə-Tiu nə yɩ wàà, à ma sɛ̀ ʋ nii, à ga yá Yɩzərayɛlə dwíí tə, sə ba vìrí? À yəri Ba-Yígúrə́-Jə-Tiu, à ga bá yá Yɩzərayɛlə dwíí tə də, à pa ba vìí.» 3 Moyizə də Aron kʋ́ʋ̀ swɩ̀n, ba wʋ́: «Ebərə-ba Yɩɩ tə twi, ʋ bɩrɩ ʋ tɩ̀àn nəba. Pa nəba cwəŋə, sə nə va dɩan batwa vəli, kasɔɔ lanworu tə wa, nə fwa jwəŋə nə pa Ba-Yígúrə́-Jə-Tiu nə, ʋ nə yɩ nə Yɩɩ. Kʋ nə tà nətʋ, ʋ wá pa yayɩpwaran gʋ nəba, nə à yə̀ə́, ʋ pa ba gʋ nəba kʋ̀ʋ̀ wa.» 4 Ezwipətə pɩ̀ʋ́ tə bwe ba, ʋ wʋ́: «Moyizə də Aron, bɛ̀ɛ̀ nə pɩn, á ma pɩ̀à á cʋ̀gʋ̀ Yɩzərayɛlə dwíí tə tʋ̀tʋ̀nán tə? Á pìrə́ á va, á tʋn á tʋ̀tʋ̀nán tə!»5 Ʋ tə swɩ̀n ʋ súrí lá, ʋ wʋ́: «Kʋ yɩ sɩ́ʋ́n kʋ tə, ba mʋ̀ dwíí təntə, ba nə lɩrɩ lʋʋ nii kʋ tə wa, nə pùlì zənzən nətən nə, á dàń wá pa, ba yá tʋtʋncaran tʋŋʋ nə naaa?»
6 Kʋ dɩɩn təntə tətə nə, Farawon pɩn nii Ezwipətə tɩ̀án tə nə, ba nə yɩ lalʋʋ tə tʋ̀tʋ̀nán yáá tɩ̀án tə, də Yɩzərayɛlə tʋ̀tʋ̀nà yáá tɩ̀án tə nə, ʋ wʋ́: 7 «Á kʋ́ʋ̀ dànà ká pa gaʋ Yɩzərayɛlə dwíí tə nə, ndə fuən tə nə, sə ba ma mà wárá tə. Ba tətə dàń vələ ba pɩ̀à gaʋ tə. 8 Yá də kʋ mɛ, á tə pɩan ba mà wárá tə, tə cé tə nii nə, ndə fuən tə nə. Á dànà ká pwàrɩ̀ wárɩ́ nədʋ tətə, á ga tə nii nə. Cɩ́gá, ba yɩ yayɩnyɩna! Kʋ mʋ̀ nə pɩn, ba bubwi, sə ba va ba fwa jwəŋə, ba pa ba Yɩɩ nə! 9 Á pɩan ba tʋn zənzən, sə ba yɩra cɛ̀. Kʋ mʋ̀, ba kʋ́ʋ̀ bá ja máŋá, ba ma cʋgʋ kʋ̀nkʋ̀n yìə̀n.»
10 Lalʋʋ tə tʋ̀tʋ̀nán yáá tɩ̀án tə, də Yɩzərayɛlə tʋ̀tʋ̀nà yáá tɩ̀án tə vəli, ba tún Farawon kori tə, ba bɩrɩ Yɩzərayɛlə dwíí tə nə, ba wʋ́: «Farawon wʋ́ nə swɩ̀án á con, də lìù mama kʋ́ʋ̀ bá pa aba gaʋ. 11 Á tətə dàń nə wá va, á pɩ̀à gaʋ tə, á tɩ̀àn nə, bwálá tə nə, á nə wàá kʋ á nɩ. Yá won mama də ba pwàrɩ̀ kʋ gɛ, á tʋtʋŋɩ tə nii nə.» 12 Yɩzərayɛlə dwíí tə dàń laga, ba sú Ezwipətə lʋʋ nii tə mama, ba ganɩ gaʋ, ba nyʋnyʋga, sə ba ma mà wárá tə. 13 Tʋ̀tʋ̀nán yáá tɩ̀án tə yà bɩbaga ba, ba wʋ́: «Á tʋŋa á dɩɩn mama tʋtʋŋɩ tə, á pa kʋ nii sú, ndə á yà nə tʋŋa nətʋ, máŋá tə wa, ba yà nə pɩn aba gaʋ tə.» 14 Tʋ̀tʋ̀nán yáá tɩ̀án tə, Farawon nə lɩ ʋ tún, yà mà Yɩzərayɛlə tʋ̀tʋ̀nà yáá tɩ̀án tə də tətə, ba nə lɩ ba tún tʋ̀tʋ̀nà tə yuu wa. Ba yàá bwe Yɩzərayɛlə tʋ̀tʋ̀nà yáá tɩ̀án tə, ba wʋ́: «Bɛ̀ɛ̀ nə pɩn dɩan tə tə nə, á ba wárá tə mà, á pɩn tə cé, ndə á yà nə fwa nətʋ, fuən tə nə?»
15 Yá Yɩzərayɛlə tʋ̀tʋ̀nà yáá tɩ̀án tə dàń vəli, ba tún ba nii Farawon con, ba wʋ́: «Bɛ̀ɛ̀ nə pɩn, n ma fɩfɩn nəba nətən? Nə mʋ̀ lɩ̀à tə, nə nə yɩ n tʋ̀tʋ̀nà! 16 Ba kʋ́ʋ̀ ba nəba gaʋ pɩn, yá ba tə kalɩ nəba, sə nə mà wárá, də ba mà nəba! Kʋ nətʋ tə yɩ lwanɩ nə, n lɩ̀à tə tʋŋa.» 17 Farawon le, ʋ wʋ́: «Á yɩ yayɩnyɩna, cɩ́gá cɩ́gá yayɩnyɩna! Kʋ mʋ̀ nə pɩn, á ma wʋ́, á vələ, sə á fwa jwəŋə, á pa Ba-Yígúrə́-Jə-Tiu nə! 18 Sɩ́ʋ́n nə, á dàń pìrə́ á va, á tʋn á tʋ̀tʋ̀nán tə. Ba bá pa aba gaʋ, yá á tə wá mà wárá tə, á pa tə cé tə nii nə, ndə fuən tə nə.»
19 Yɩzərayɛlə tʋ̀tʋ̀nà yáá tɩ̀án tə nɩ də, ba wá də́ càn zənzən, Farawon nə vɩga, sə wárá tə ba nə mɛ, sə ba mà dɩɩn mama wa, nii pwàrɩ̀ tə ga yɩrɩ. 20 Ba nə nan Farawon con, ba vəli ba yí Moyizə də Aron. Moyizə də Aron də yà dànɩ̀ ba. 21 Ba swɩ̀n Moyizə də Aron con, ba wʋ́: «Ba-Yígúrə́-Jə-Tiu na kʋ tə, á nə tʋn, yá ʋ mʋ̀ nə wa bʋ̀rɩ̀ á bʋra! Á mʋ̀ nə pɩn Farawon də ʋ lɩ̀à tə waa nan nəba. Á ken kwatara sɩ̀ʋ́ ba jɩɩn wa, sə ba ma gʋ nəba.» 22 Moyizə dàń viviri ʋ yáá, ʋ kə Ba-Yígúrə́-Jə-Tiu con, ʋ ga swɩ̀n, ʋ wʋ́: «Yuu-Tiu, bɛ̀ɛ̀ nə pɩn, n ma tʋn yolwan lalʋʋ kʋ tə yɩra? Bɛ̀ɛ̀ nə pɩn, n ma tʋn nə yəbə? 23 Kʋ nə zɩgɩ dɩɩn tə nə, à nə vəli à swɩ̀n Farawon con, n yɩrɩ yuu wa, ʋ ken lalʋʋ kʋ tə càn wa, kʋ bà kʋ yí zə̀n. Yá n wà won mama fwa, sə n ma jon n lɩ̀à tə.»