Yɩɩ kàn nii ʋ pa Moyizə nə, də ʋ wá jon Yɩzərayɛlə dwíí tə
6
1 Ba-Yígúrə́-Jə-Tiu swɩ̀n Moyizə con, ʋ wʋ́: «Sɩ́ʋ́n nə, n dàń wá na kʋ tə, à nə wá tʋn Farawon* yɩra.Kʋ wá twá də à jɩɩn dɩ̀àn,
ʋ ma yá Yɩzərayɛlə dwíí tə,
ʋ pa ba vìí.
Kʋ wá twá də à jɩɩn dɩ̀àn,
ʋ ma dɩŋa ba,
ʋ lɩ ʋ lʋʋ nii tə wa.»
2 Yɩɩ kʋ́ʋ̀ swɩ̀n Moyizə con, ʋ wʋ́: «À mʋ̀ nə yɩ Ba-Yígúrə́-Jə-Tiu! 3 À bɩrɩ à tɩ̀àn Abərahamə, də Yɩzakə, də Zwakɔbə nə, də à yɩ Yɩɩ tə, à nə wulə tə mɛ yuu wa*. Yá à dàń nə wà pɩn ba yəni də, à yɩrɩ don nə yɩ Ba-Yígúrə́-Jə-Tiu. 4 Kʋ kwa nə, à tún à nimarʋ* də ba, à ga kàn nii də, à wá pa ba Kanaan lʋʋ nii tə, ba yà nə twá ba jə̀ə́ kʋ wa. 5 À nì Yɩzərayɛlə dwíí tə nɩ́ʋ́n tə, Ezwipətə tɩ̀án nə pɩn ba jì ywə́ŋə́ tə yɩrɩ. Yá à dàń pìí à bʋ́n à nimarʋ tə yoo. 6 Kʋ mʋ̀ yɩrɩ, swɩ̀n Yɩzərayɛlə dwíí tə con də,
à mʋ̀ nə yɩ Ba-Yígúrə́-Jə-Tiu.
À wá lɩ aba tʋtʋncaran tə wa,
Ezwipətə tɩ̀án nə pɩn á tʋŋa.
À wá jon aba ywə́n tʋ̀tʋ̀nán tə wa,
ba nə ken aba.
Kʋ wá twá də à vàn dɩ̀àn, də càn zənzən nə,
à nə wá kə Ezwipətə tɩ̀án nə,
à ma jon aba,
à pa á tɩnɩ á tɩ̀àn.
7 À wá jon aba,
sə á ya à mʋ̀ lɩ̀à.
À wá ya á Yɩɩ,
yá á wá lwarɩ də, à mʋ̀ Ba-Yígúrə́-Jə-Tiu,
à nə yɩ á Yɩɩ,
nə lɩ aba tʋtʋncaran tə wa,
Ezwipətə tɩ̀án nə pɩn á tʋŋa.
8 À wá ja aba à va lʋʋ nii tə wa,
à nə dùə̀ də,
à wá pa Abərahamə, də Yɩzakə, də Zwakɔbə nə.
À wá pa kʋ aba,
sə á tɩnɩ kʋ.
Cɩ́gá, à mʋ̀ nə yɩ Ba-Yígúrə́-Jə-Tiu.»
9 Moyizə swɩ̀n yìə̀n təntə mama, ʋ bɩrɩ Yɩzərayɛlə dwíí tə nə. Yá ba wà ʋ sʋgʋ tə cʋgʋ. Cɩ́gá, ba ywə́n tʋtʋncaran tə pɩn, ba yà kʋ́ʋ̀ ba pɩ́nʋ́ jə.
10 Ba-Yígúrə́-Jə-Tiu ma swɩ̀n Moyizə con, ʋ wʋ́: 11 «Vəli n swɩ̀n Ezwipətə pɩ̀ʋ́ Farawon con, sə ʋ yá Yɩzərayɛlə dwíí tə, ʋ pa ba nan ʋ lʋʋ nii tə wa, ba vìí.»
12 Yá Moyizə le Ba-Yígúrə́-Jə-Tiu, ʋ wʋ́: «Yɩzərayɛlə dwíí tə tətə dàń nə wà à sʋgʋ cʋgʋ, mə Farawon dàń nə wá cʋgʋ à sʋgʋ naaa? À mʋ̀ lìù tə, à nii nə wà pʋrɩ!»
13 Yá Ba-Yígúrə́-Jə-Tiu kʋ́ʋ̀ tʋn Moyizə də Aron Yɩzərayɛlə dwíí tə, də Ezwipətə pɩ̀ʋ́ Farawon con, sə Yɩzərayɛlə dwíí tə wànɩ́ ba nan Ezwipətə lʋʋ nii tə wa.
Moyizə də Aron dwíí dəkuu
14 Nə̀ń ba nɩbara-ba dìì tɩ̀án tə yɩra. Ribɛn nə yɩ Yɩzərayɛlə bikwɩa. Ribɛn bɩ̀á nə yɩ Enɔkə, də Palu, də Ɛsəron, də Karəmi. Mə ba mʋ̀ nə yɩ Ribɛn sànɩ́ tɩ̀án tə.
15 Simeyon bɩ̀á nə yɩ Yemuwɛlə, də Yamɛn, də Ohadə, də Yakɛn, də Soharə, də Sayulə. Sayulə nuu yɩ Kanaan tɩ̀án bʋ̀á. Mə ba mʋ̀ nə yɩ Simeyon sànɩ́ tɩ̀án tə.
16 Nə̀ń Levi bɩ̀á tə yɩra, də ba dwíí dəkuu. Kʋ yɩ Gɛrəswon, də Kehatə, də Merari. Levi fwa bɩna bíí də fɩtwa də barpɛ lʋʋ wa. 17 Gɛrəswon bɩ̀á tə, ba nə yɩ sànɩ́ tɩ̀án, nə yɩ Libəni, də Swimeyi. 18 Kehatə bɩ̀á nə yɩ Aməramə, də Yɩsarə, də Ebəron, də Uziyɛlə. Kehatə fwa bɩna bíí də fɩtwa də batwa lʋʋ wa. 19 Merari bɩ̀á nə yɩ Mali, də Muswi. Mə Levi sànɩ́ tɩ̀án tə, də ba dwíí dəkuu nə nətʋ.
20 Aməramə tì ʋ nəkɩnɩ Yɔkebɛdə, ʋ ma fwa ʋ kan, yá Yokəbɛdə lɩrɩ Aron də Moyizə, ʋ pa Aməramə nə. Aməramə fwa bɩna bíí də fɩtwa də barpɛ lʋʋ wa. 21 Yɩsarə bɩ̀á nə yɩ Kore, də Nefɛgə, də Zikəri. 22 Uziyɛlə bɩ̀á nə yɩ Mikayɛlə, də Ɛləsafan, də Sitəri.
23 Aron swe Aminadabə bʋ̀á Elisweba, ʋ ma fwa ʋ kan. Elisweba yɩ Naswon nakʋa. Yá Elisweba lɩrɩ Nadabə, də Abihu, də Eleyazarə, də Yɩtamarə, ʋ pa Aron nə.
24 Kore bɩ̀à nə yɩ Asirə, də Ɛləkana, də Abɩyasafə. Mə Kore sànɩ́ tɩ̀án tə nə nətʋ.
25 Aron bìú Eleyazarə swe Putiyɛlə bʋ̀á tə don, ʋ ma fwa ʋ kan. Yá ʋ kan tə lɩrɩ Fineyasə, ʋ pa wá. Mə Levi dwíí tə dìì tɩ̀án nə nətʋ, ba də ba sànɩ́. 26 Mə ba mʋ̀ Aron də Moyizə təntə con nə, Ba-Yígúrə́-Jə-Tiu swɩ̀n, ʋ wʋ́: «Á pɩan Yɩzərayɛlə dwíí tə nan Ezwipətə lʋʋ nii tə wa, ndə kwatara púlə́ nə.» 27 Mə ba mʋ̀ Moyizə də Aron təntə nə swɩ̀n Ezwipətə pɩ̀ʋ́ Farawon con, sə ʋ yá, sə Yɩzərayɛlə dwíí tə nan Ezwipətə lʋʋ tə wa.
28 Máŋá tə wa, Ba-Yígúrə́-Jə-Tiu nə swɩ̀n Moyizə con, Ezwipətə lʋʋ nii tə wa, 29 ʋ swɩ̀n ʋ con, ʋ wʋ́: «À mʋ̀ nə yɩ Ba-Yígúrə́-Jə-Tiu! Swɩ̀n kʋ tə mama, à nə swɩ̀n n con, n bɩrɩ Ezwipətə pɩ̀ʋ́ Farawon nə.» 30 Yá Moyizə le Ba-Yígúrə́-Jə-Tiu, ʋ wʋ́: «Nə̀ń à nə, à yɩ lìù tə, à nii nə wà pʋrɩ! Nətə nə Farawon wá cʋgʋ à sʋgʋ?»