Yɩɩ bwɛ́ ʋ nikanɩ tə, ʋ nə pɩn Moyizə nə
7
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «À tún mʋ́, sə n ya ndə Farawon* yɩɩ nə, yá n nubiu Aron dàń wá ya n nii sʋ̀sʋ̀nʋ̀. 2 N mʋ̀ nə wá swɩ̀n yìə̀n tə mama, à nə wá pa mʋ́ nii, sə n swɩ̀n, n bɩrɩ n nubiu Aron nə. Yá Aron dàń wá pìí ʋ swɩ̀n sʋ̀ràn təntə, Farawon con, sə ʋ yá Yɩzərayɛlə dwíí tə, ʋ pa ba nan ʋ lʋʋ nii tə wa, ba vìí. 3 Yá à mʋ̀ dàń wá pa Farawon jì zɩbanənyɩn. À wá tʋn dɩ̀àn mɩmɩnan kapʋpʋ, də yomɩlan kapʋpʋ, Ezwipətə lʋʋ nii tə wa. 4 Yá də kʋ nətʋ mɛ, Farawon bá cʋgʋ á sʋ̀ràn tə. Yá à dàń wá tʋn dɩ̀àn yìə̀n nəfaran, à zɩgɩ Ezwipətə tɩ̀án nə, à ma lɩ Yɩzərayɛlə dwíí tə, ba nə yɩ à mʋ̀ lɩ̀à, ndə à kwatara púlə́ nə. 5 Máŋá tə wa, à nə wá tʋn dɩ̀àn yìə̀n təntə, à zɩgɩ Ezwipətə tɩ̀án nə, à ma lɩ Yɩzərayɛlə dwíí tə, Ezwipətə lʋʋ nii tə wa, Ezwipətə tɩ̀án dàń wá lwarɩ də, à mʋ̀ nə yɩ Ba-Yígúrə́-Jə-Tiu.» 6 Moyizə də Aron tʋn yoo mama, kʋ twá ndə nətʋ tətə nə, Ba-Yígúrə́-Jə-Tiu yà nə pɩn ba nii, sə ba tʋn. 7 Moyizə də Aron vəli ba swɩ̀n Farawon con, máŋá tə wa, də Moyizə yà jə bɩna sapwɩnɩa, Aron ga jə bɩna sapwɩnɩa də batwa.8 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 9 «Farawon nə swɩ̀n á con, sə á tʋn dɩ̀àn mɩmɩnʋ, n wá swɩ̀n Aron con, sə ʋ tì ʋ daduu tə, ʋ dɩ tɩa, Farawon yáá con. Yá daduu tə wá jì dən.» 10 Moyizə də Aron vəli ba yí Farawon, ba tʋn ndə Ba-Yígúrə́-Jə-Tiu yà nə pɩn ba nii, sə ba tʋn nətʋ. Aron dɩga ʋ daduu tə tɩa, Farawon də ʋ tʋ̀tʋ̀nà yun tìán tə yáá con, yá kʋ jìgə̀ dən. 11 Yá Farawon də bon Ezwipətə yənu tɩ̀án, də ba cɩra, ʋ pa vʋra təntə də ja ba tankwənə, ba ma tʋn kʋ dɩ̀àn mɩmɩnʋ təntə. 12 Ba də mama dɩga ba dadurən tɩa, yá tə jìgə̀ dəŋa. Yá Aron daduu tə liri Farawon vʋra tə dadurən tə. 13 Də kʋ mɛ, Farawon zɩbaniu tə kwɛn kʋ súrí, ʋ ga vɩ, sə ʋ cʋgʋ Moyizə də Aron sʋgʋ, ndə Ba-Yígúrə́-Jə-Tiu nə dí yáá ʋ swɩ̀n kʋ nətʋ.
YƖƖ KEN CAN FUGƏ EZWIPƏTƏ TƖA NƏ
Təntən càn tə yɩ nɩ́á nə lwàń, tə jì jana
14 Ba-Yígúrə́-Jə-Tiu swɩ̀n Moyizə con, ʋ wʋ́: «Farawon zɩɩn ba nə̀ń. Ʋ vɩ, sə ʋ yá, ʋ pa Yɩzərayɛlə dwíí tə vìí. 15 Kʋ mʋ̀ yɩrɩ, vəli n jəri wá, Nilə mʋnaa tə nii nə, jɩjʋ fuən fuən, máŋá tə, ʋ nə wá va nɩ́á tə nii nə. N wá tì daduu tə nə jìgə̀ dən tə, n ja n jɩɩn wa. 16 Yá n dàń wá swɩ̀n Farawon con, də à mʋ̀ Ba-Yígúrə́-Jə-Tiu, à nə yɩ Ebərə-ba Yɩɩ, nə tʋn mʋ́, sə n swɩ̀n ʋ con, sə ʋ yá à lɩ̀à tə, sə ba va, ba tʋn ba pa nə, kasɔɔ lanworu tə wa. Yá də zə̀n mama, ʋ wà à sʋgʋ cʋgʋ.» 17 Kʋ mʋ̀ yɩrɩ, n dàń nə̀ń kʋ tə Ba-Yígúrə́-Jə-Tiu nə wá tʋn, sə n ma lwarɩ də, ʋ mʋ̀ nə yɩ Ba-Yígúrə́-Jə-Tiu. À wá mà Nilə mʋnaa tə nɩ́á tə, də daduu kʋ tə nə wulə à jɩɩn wa, yá tə wá lwàń, tə jì jana. 18 Filə tə nə wulə Nilə mʋnaa tə wa, wá tɩ. Nɩ́á tə wá pʋ, yá Ezwipətə tɩ̀án kʋ́ʋ̀ bá wànɩ́ tə ba nyʋn.» 19 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Swɩ̀n Aron con, sə ʋ tì ʋ daduu tə, ʋ zɩ̀n ʋ jɩɩn, ʋ te Ezwipətə tɩ̀án nɩ́á tə yuu con, ba nacoŋi tə yuu con, də ba Nilə mʋnaa tə bunɛɛ tə yuu con, də ba bun tə yuu con, də ba nɩ́á bwálɩ́ mama yuu con. Nɩ́á tə wá jì jana, yá jana wá ya Ezwipətə lʋʋ nii tə mama wa. Jana wá ya daran zwɩɩn, də kapana zwɩɩn wa.»
20 Moyizə də Aron tʋn kʋ nətʋ, ndə Ba-Yígúrə́-Jə-Tiu yà nə pɩn nii, sə kʋ tʋn nətʋ. Aron zɩ̀n daduu tə, ʋ mà Nilə mʋnaa tə nɩ́á tə wa, Farawon də ʋ tʋ̀tʋ̀nán yun tɩ̀án tə yɩ́á wa. Yá Nilə mʋnaa tə nɩ́á tə mama lwàń tə jì jana. 21 Filə tə yà nə wulə Nilə mʋnaa tə wa tɩga. Yá mʋnaa tə nɩ́á tə dàń pʋa, Ezwipətə tɩ̀án yà kʋ́ʋ̀ wàrɩ̀ tə ba nywɩn. Yá jana dàń yɩn Ezwipətə lʋʋ nii tə mama wa. 22 Yá Ezwipətə tɩ̀án vʋra tə də fwa kʋ yoo təntə tətə, də ba tankwənə tə. Yá Farawon zɩbaniu tə kwɛn kʋ súrí, ʋ ga vɩ, sə ʋ cʋgʋ Moyizə də Aron sʋgʋ, ndə Ba-Yígúrə́-Jə-Tiu nə dí yáá ʋ swɩ̀n kʋ nətʋ. 23 Farawon viviri ʋ yá ba, ʋ va ʋ sàń, yá ʋ ta nə wà yoo təntə jələ, ndə yoo nə.
24 Ezwipətə tɩ̀án mama kʋa gwàlán, Nilə mʋnaa tə nii nə, ba ma pɩ̀à nazəŋə, sə ba nyʋn. Cɩ́gá, ba yà kʋ́ʋ̀ wàrɩ̀ Nilə mʋnaa tə nɩ́á tə ba nywɩn. 25 Ba-Yígúrə́-Jə-Tiu cʋ̀gʋ̀ Nilə mʋnaa tə, kʋ dánɩ́ dɩan barpɛ.
Bələ nii càn tə yɩ kuywənə
26 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Vəli n swɩ̀n Farawon* con də, à mʋ̀ Ba-Yígúrə́-Jə-Tiu nə swɩ̀n də, ʋ yá à lɩ̀à tə, sə ba va, ba tʋn ba pa nə. 27 Də ʋ nə vɩga, sə ʋ yá ba, ʋ pa ba vìí, à wá pa kuywənə sú ʋ lʋʋ nii tə mama. 28 Tə wá sú Nilə mʋnaa tə, tə palɩ tə nan, tə zʋ ʋ sàń tə wa, tə lɛ tə zʋ ʋ dipənə tə wa, tə dɩ̀ ʋ gədo yuu, tə zʋ ʋ tʋ̀tʋ̀nán yun tɩ̀án tə dìì wa, də ʋ lʋʋ lɩ̀à tə dìì wa, də ʋ dipɛn kúrí wa, də ʋ wiən tə wa, ba nə ma bwi dipɛn mun. 29 Kuywənə tə wá dɩ̀ ʋ tətə yuu wa, də ʋ lʋʋ lɩ̀à tə yuu wa, də ʋ tʋ̀tʋ̀nà tə yuu wa.»