8
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Swɩ̀n Aron con, sə ʋ zɩ̀n ʋ daduu tə ʋ jɩɩn wa, ʋ te nacoŋi tə yuu con, də Nilə mʋnaa tə bunɛɛ tə yuu con, də bun tə yuu con, sə kuywənə nan lá, tə sú Ezwipətə lʋʋ nii tə wa.» 2 Aron zɩ̀n ʋ jɩɩn, ʋ te Ezwipətə lʋʋ nii nɩ́á bwálá tə con, yá kuywənə dàń nan, tə pú Ezwipətə lʋʋ nii tə mama nə. 3 Yá vʋra tə də kʋ́ʋ̀ tʋn kʋ yoo təntə, də ba tankwənə tə. Ba də pɩn kuywənə nan, tə sú Ezwipətə lʋʋ nii tə wa.4 Farawon* bon Moyizə də Aron, ʋ swɩ̀n ba con, ʋ wʋ́: «Á lòrə́ Ba-Yígúrə́-Jə-Tiu, sə ʋ pa kuywənə tə va yiŋʋnɩ, tə yá à də à lʋʋ lɩ̀à tə. Yá à dàń wá yá ʋ lɩ̀à tə, à pa ba va ba fwa jwəŋə, ba pa wá.» 5 Moyizə swɩ̀n Farawon con, ʋ wʋ́: «À nyɩna pɩ̀ʋ́, n tətə pa nə máŋá tə, n nə pɩ̀à, sə à lòrì Ba-Yígúrə́-Jə-Tiu, n də n tʋ̀tʋ̀nán yun tɩ̀án tə, də n lʋʋ lɩ̀à tə yuu yɩrɩ, sə ʋ pa kuywənə tə nan á dìì tə wa, tə yá aba. Yá tə dàń wá ya Nilə mʋnaa tə cɩcɩ wa.» 6 Farawon le, ʋ wʋ́: «Tʋn kʋ nətʋ tə, jwɩan nə.» Moyizə swɩ̀n, ʋ wʋ́: «À wá tʋn kʋ, ndə n nə swɩ̀n nətʋ, sə kʋ pa n lwarɩ də, Ba-Yígúrə́-Jə-Tiu, ʋ nə yɩ nə Yɩɩ, ba kamandon jə. 7 Kuywənə tə wá nan n dìì tə wa, tə yá n də n tʋ̀tʋ̀nán yun tɩ̀án tə, də n lʋʋ lɩ̀à tə. Yá tə dàń wá ya Nilə mʋnaa tə cɩcɩ wa.»
8 Moyizə də Aron nan Farawon con, ba vìí. Moyizə bon ʋ kə Ba-Yígúrə́-Jə-Tiu nə, kuywənə tə yɩrɩ, ʋ nə ken Farawon nə. 9 Ba-Yígúrə́-Jə-Tiu fwa kʋ tə, Moyizə nə lòrì. Yá kuywənə tə dàń tɩga dìì tə wa, də dəworən wa, də kárɩ́ wa. 10 Ba pɛ̀ tə ba tún púlə́ púlə́, yá tə lwán dàń súə́ lʋʋ nii tə mama.
11 Farawon nə nɩ də yoo təntə zwɛ̀, ʋ zɩbaniu tə kʋ́ʋ̀ kwɛn kʋ súrí, ʋ ga vɩ, sə ʋ cʋgʋ Moyizə də Aron sʋgʋ, ndə Ba-Yígúrə́-Jə-Tiu nə dí yáá ʋ swɩ̀n kʋ nətʋ.
Batwa nii càn tə yɩ bʋnbʋnɩ
12 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Swɩ̀n Aron con, sə ʋ zɩ̀n ʋ daduu tə, ʋ mà tɩa pùrú tə wa. Pùrú tə wá jì bʋnbʋnɩ, tə sú Ezwipətə lʋʋ nii tə mama.» 13 Moyizə də Aron tʋn kʋ nətʋ tə. Aron zɩ̀n ʋ daduu tə, ʋ mà tɩa pùrú tə wa. Yá Ezwipətə lʋʋ nii pùrú tə mama jìgə̀ bʋnbʋnɩ, tə pú lɩ̀à tə, də vàná tə yuu nə. 14 Vʋra tə fwa ba tankwənə tə, sə ba də pa bʋnbʋnɩ ya Ezwipətə lʋʋ nii tə wa, yá ba wà wànɩ́. Bʋnbʋnɩ tə yà púə́ lɩ̀à tə, də vàná tə yuu nə. 15 Vʋra tə dàń ma swɩ̀n Farawon* con, ba wʋ́: «Kʋ yɩ Yɩɩ jɩɩn tʋtʋŋɩ.» Yá Farawon zɩbaniu tə kwɛn kʋ súrí, ʋ ga vɩ, sə ʋ cʋgʋ Moyizə də Aron sʋgʋ, ndə Ba-Yígúrə́-Jə-Tiu nə dí yáá ʋ swɩ̀n kʋ nətʋ.
Banɩa nii càn tə yɩ nanjwɩ tə nə jə cwan
16 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Zàn jwɩan jɩjʋ fuən fuən, n va n yí Farawon*, máŋá tə wa, ʋ nə wá nan, sə ʋ va nɩ́á tə nii nə. N wá swɩ̀n ʋ con də, à mʋ̀ Ba-Yígúrə́-Jə-Tiu nə swɩ̀n də, ʋ yá à lɩ̀à tə, sə ba va, ba tʋn ba pa nə. 17 Ʋ nə vɩga, sə ʋ yá à lɩ̀à tə, ʋ pa ba vìí, à wá kə nanjwɩ, tə nə jə cwan, ʋ də ʋ tʋ̀tʋ̀nán yun tɩ̀án tə nə, də ʋ lʋʋ lɩ̀à tə nə, də ʋ dìì wa. Yá Ezwipətə tɩ̀án dìì, də lʋʋ nii tə, ba nə wulə kʋ wa, dàń wá sú də nanjwɩ, tə nə jə cwan. 18 Yá kʋ dɩɩn təntə nə, kʋ bá ya nətʋ Goswɛn nagwanaa tə mʋ̀ wa, à lɩ̀à tə nə wulə lá. Nanjwɩ tə nə jə cwan bá ya lá nə. Kʋ nətʋ wá pa ʋ lwarɩ də, à mʋ̀ Ba-Yígúrə́-Jə-Tiu wulə ʋ lʋʋ nii tə wa. 19 À wá pwɛ̀ à lɩ̀à tə, à kə vàn nə, ba dàn ká də́ càn tə, ʋ lʋʋ lɩ̀à tə nə wá də́. À dɩ̀àn mɩmɩnʋ təntə yɩ jwɩan nə, kʋ wá tʋn.»
20 Ba-Yígúrə́-Jə-Tiu cɩ́gá tʋn kʋ, ndə ʋ nə swɩ̀n nətʋ. Nanjwɩ tə nə jə cwan twi tə sú Farawon sàń tə, də ʋ tʋ̀tʋ̀nán yun tɩ̀án tə dìì, də Ezwipətə lʋʋ nii tə mama. Yá tə dàń tʋn cʋcʋran zənzən, lʋʋ nii tə wa.
21 Farawon bon Moyizə də Aron, ʋ swɩ̀n ba con, ʋ wʋ́: «Á vələ á fwa jwəŋə, á pa á Yɩɩ tə nə, lʋʋ nii tə wa.» 22 Moyizə le, ʋ wʋ́: «Kʋ wà mɛ, sə nə fwa kʋ nətʋ. Cɩ́gá, nə nə fwa kʋ nətʋ, nə wá fwa jwəŋə, tə nə yɩ Ezwipətə tɩ̀án culən, nə pa Ba-Yígúrə́-Jə-Tiu nə, ʋ nə yɩ nə Yɩɩ. Yá də nə dàń nə fwa kʋ nətʋ tə, Ezwipətə tɩ̀án yɩ́á yuu, ba bá dɩlɩ nəba də kapana naaa? 23 Nə wá va dɩan batwa vəli, kasɔɔ lanworu tə wa, nə ma fwa jwəŋə, nə pa Ba-Yígúrə́-Jə-Tiu nə, ʋ nə yɩ nə Yɩɩ, ndə ʋ nə wá swɩ̀n nə con nətʋ.» 24 Farawon ma swɩ̀n, ʋ wʋ́: «À mʋ̀ wá yá aba, sə á va, á fwa jwəŋə, á pa Ba-Yígúrə́-Jə-Tiu nə, ʋ nə yɩ á Yɩɩ, kasɔɔ lanworu tə wa. Á nə dànà ká va yiŋʋnɩ mʋ̀ʋ́! Á lòrə́ Yɩɩ á pa nə.» 25 Yá Moyizə le, ʋ wʋ́: «Nə̀ń à nə, à naŋa n con, à vìrí. À wá lòrì Ba-Yígúrə́-Jə-Tiu, à pa mʋ́. Jwɩan nə, nanjwɩ tə wá yá n də n tʋ̀tʋ̀nán yun tɩ̀án tə, də n lʋʋ lɩ̀à tə. Yá n mʋ̀ Farawon kʋ́ʋ̀ dàn ká gɩgarɩ nəba, n ga vɩ, sə n yá Yɩzərayɛlə dwíí tə, sə ba va ba fwa jwəŋə, ba pa Ba-Yígúrə́-Jə-Tiu nə.» 26 Moyizə nan Farawon con, ʋ vìí, yá ʋ ga lòrì Ba-Yígúrə́-Jə-Tiu, ʋ pa Farawon nə. 27 Ba-Yígúrə́-Jə-Tiu fwa kʋ tə, Moyizə nə lòrì. Ʋ pɩn nanjwɩ tə vìí tə yá Farawon, də ʋ tʋ̀tʋ̀nà tə, də ʋ lʋʋ lɩ̀à tə. Nanjʋa nədʋ tətə wà gɛ. 28 Yá kʋ máŋá təntə də wa, Farawon zɩbaniu tə kʋ́ʋ̀ kwɛn kʋ súrí, ʋ ga vɩ, sə ʋ yá Yɩzərayɛlə dwíí tə, ʋ pa ba vìí.