Bonu nii càn tə yɩ vàná yayɩgʋ
9
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Vəli, n swɩ̀n Farawon* con də, à mʋ̀ Ba-Yígúrə́-Jə-Tiu, à nə yɩ Ebərə-ba Yɩɩ, nə swɩ̀n də, ʋ yá à lɩ̀à tə, sə ba va, ba tʋn ba pa nə. 2 Ʋ tə nə vɩga, sə ʋ yá ba, sə ba vìí, ʋ nə cɩ̀gà ba nə, 3 à mʋ̀ Ba-Yígúrə́-Jə-Tiu wá dɩ tɩan yayɩpwarʋ ʋ vàná tə nə, ba nə yɩ̀rɩ̀ kasɔɔ wa. À wá cʋ̀gʋ̀ səsen tə, də bɩnɛ tə, də nyʋgʋmɛ tə, də vanfaran tə, də vanmɩnɩ tə. 4 Yá à mʋ̀ Ba-Yígúrə́-Jə-Tiu wá kə pwɩa Yɩzərayɛlə dwíí vàná tə, də Ezwipətə tɩ̀án vàná tə pwə́rə́ wa. Yɩzərayɛlə dwíí tə mʋ̀ vànɩ́ mama bá tɩ.» 5 Ba-Yígúrə́-Jə-Tiu lɩ kʋ máŋá ʋ tún, ʋ ga swɩ̀n, ʋ wʋ́: «Jwɩan nə, à mʋ̀ Ba-Yígúrə́-Jə-Tiu wá tʋn kʋ yoo təntə, lʋʋ nii tə wa.»6 Kʋ tɩpʋrɩ nə, Ba-Yígúrə́-Jə-Tiu cɩ́gá tʋn kʋ yoo təntə. Ezwipətə tɩ̀án vàná tə mama tɩga, yá vànɩ́ mama wà tɩ, Yɩzərayɛlə dwíí vàná tə mʋ̀ wa. 7 Farawon tʋn lɩ̀à, sə ba ja ŋwɛn ba bà. Yá ʋ nì də, vànɩ́ mama wà tɩ, Yɩzərayɛlə dwíí vàná tə wa. Yá də kʋ mɛ, Farawon zɩbaniu tə kwɛn kʋ súrí, ʋ ga vɩ, sə ʋ yá Yɩzərayɛlə dwíí tə, ʋ pa ba vìí.
Bardʋ nii càn tə yɩ ŋʋna
8 Ba-Yígúrə́-Jə-Tiu kʋ́ʋ̀ swɩ̀n Moyizə də Aron con, ʋ wʋ́: «Á fwaga kúrí wa tʋnan, á sú á jɩ̀àn, sə Moyizə mɩ́n tə yɩɩ nə, Farawon* yáá con. 9 Tʋnan tə wá jì pùrú, Ezwipətə lʋʋ nii tə mama wa. Yá tə wá pa ŋʋna fwa lɩ̀à tə, də vàná tə yɩra, Ezwipətə lʋʋ nii tə mama wa, tə jì nʋran, tə nɩ́á pàlɩ̀. 10 Moyizə də Aron dàń fwa kúrí wa tʋnan, ba ja va, ba zɩga Farawon yáá con. Moyizə mɩ́n tʋnan tə yɩɩ nə, yá tə pɩn ŋʋna fwa lɩ̀à tə, də vàná tə yɩra, tə jì nʋran, tə nɩ́á pàlɩ̀. 11 Vʋra tə wà wànɩ́ ba bà Moyizə yáá con, ŋʋna tə yɩrɩ. Cɩ́gá, ŋʋna tə yà fwa vʋra tə də yɩra, ndə Ezwipətə tɩ̀án tə mama nə. 12 Yá Ba-Yígúrə́-Jə-Tiu pɩn Farawon jì zɩbanənyiən, kʋ pa ʋ vɩ, sə ʋ cʋgʋ Moyizə də Aron sʋgʋ, ndə Ba-Yígúrə́-Jə-Tiu nə dí yáá ʋ swɩ̀n kʋ Moyizə con nətʋ.
Barpɛ nii càn tə yɩ dwakafɩna
13 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Zàn jɩjʋ fuən fuən, n va n yí Farawon*. N wá swɩ̀n ʋ con də, à mʋ̀ Ba-Yígúrə́-Jə-Tiu, à nə yɩ Ebərə-ba Yɩɩ, nə swɩ̀n də, ʋ yá à lɩ̀à tə, sə ba va, ba tʋn ba pa nə. 14 Cɩ́gá, naa kʋ tə mʋ̀ nə, á wá pa càn yirə yirə yí ʋ tətə, də ʋ tʋ̀tʋ̀nán yun tɩ̀án tə, də ʋ lʋʋ lɩ̀à tə, sə ʋ ma lwarɩ də, à ba kamandon jə, tɩa yuu mama wa. 15 Də à yà nə te à jɩɩn, à dɩ tɩan yayɩpwarʋ ʋ də ʋ lʋʋ lɩ̀à tə nə, də sɩ́ʋ́n nə, ʋ yà nyʋan tɩa yuu wa. 16 Yá ʋ dàń nə yɩ à yá wá, à pa ʋ mɩɩ wulə lʋʋ, sə à pa ʋ na à dɩ̀àn tə. Kʋ dàń ga wá pa, ba swɩ̀n à yoo tɩa yuu mama wa. 17 Yá ʋ tə ga vɩ, sə ʋ yá à lɩ̀à tə, ʋ pa ba vìí. 18 Kʋ mʋ̀ yɩrɩ, jwɩan máŋá ka tə wa, à wá pa dwakafɩna nà də dɩ̀àn, Ezwipətə wa. Tə wá ya dwakafɩna, tə yiri nə wà dí yáá tə tʋ Ezwipətə wa, kʋ nə zɩgɩ Ezwipətə lʋʋ nii tə də̀ń laŋʋ, kʋ ba kʋ yí zə̀n. 19 Sɩ́ʋ́n nə, n vàná tə, də won tə mama, kʋ nə yɩ n mʋ̀ nyiən, kʋ ga wulə gaʋ con, n dàń pa, sə ba kə tə dìə̀. won tə mama, kʋ nə wá ya gaʋ con, kʋ nə yɩ ləzwənə, nə à yə̀ə́ vànɩ́, kʋ won tə nə wà dìə̀ zwɩ, dwakafɩna tə wá tʋ, tə mà kʋ, tə gʋ.»
20 Ba-Yígúrə́-Jə-Tiu sʋgʋ tə fən zʋa Farawon tʋ̀tʋ̀nán yun tɩ̀án tə duən, kʋ pa ba kə ba tʋ̀tʋ̀nà, də ba vàná dìə̀ lala. 21 Yá ba tə mʋ̀, ba nə wà Ba-Yígúrə́-Jə-Tiu sʋgʋ tə jələ, yá ba tʋ̀tʋ̀nà də ba vàná gaʋ con. 22 Ba-Yígúrə́-Jə-Tiu swɩ̀n Moyizə con, ʋ wʋ́: «Zɩ̀n n jɩɩn, n te yɩɩ nə, sə dwakafɩna tʋ, tə mà lɩ̀à tə, də vàná tə, də kárɩ́ wa wiən tə mama, Ezwipətə lʋʋ nii tə mama wa.» 23 Moyizə zɩ̀n ʋ daduu tə, ʋ te yɩɩ nə. Yá Ba-Yígúrə́-Jə-Tiu dàń pɩn dwà baa, mən nan yɩɩ nə, tə cú, dwakafɩna ga lwɛ́ Ezwipətə lʋʋ nii tə wa. 24 Dwakafɩna tə də mən yà guli duən wa, tə ga twɩ də dɩ̀àn zənzən. Kʋ nə zɩgɩ máŋá tə mama, Ezwipətə nə yɩ lʋʋ nii, kʋ wulə, tə yiri yà tə wà kʋ wa twɩ də mama. 25 Dwakafɩna tə mà wiən tə mama, tə yà nə wulə gaʋ con, Ezwipətə lʋʋ nii tə mama wa. Tə mà ləzoni, də vàná, tə cʋ̀gʋ̀ kárɩ́ wa wiən tə mama, tə ga kɛ́n tɩ̀án tə mama. 26 Goswɛn nagwanaa tə cɩcɩ, Yɩzərayɛlə dwíí tə yà nə wulə ka wa, nə yɩn bwálɩ́, dwakafɩna tə nə wà lá twɩ.
27 Farawon pɩn ba bon Moyizə də Aron, ʋ ga swɩ̀n ba con, ʋ wʋ́: «Naa ka tə nə, à tʋn cʋna. Ba-Yígúrə́-Jə-Tiu nə yɩ cɩ́gá tíú. À mʋ̀ də à lʋʋ lɩ̀à tə nə cʋ̀gʋ̀. 28 Á lòrə́ Ba-Yígúrə́-Jə-Tiu, sə dwà bagʋ tə, də dwakafɩna tə cən tə zɩgɩ. À wá yá aba, sə á vìí, à kʋ́ʋ̀ bá cɩ á nə.» 29 Moyizə ma swɩ̀n ʋ con, ʋ wʋ́: «Máŋá tə, à nə vìrí, à nə nan tɩʋ tə nii nə, à wá zɩ̀n à jɩ̀àn, à te Ba-Yígúrə́-Jə-Tiu con. Yá dwà bagʋ tə, də dwakafɩna tə wá cən tə zɩgɩ, sə kʋ pa n lwarɩ də, tɩa tə yɩ Ba-Yígúrə́-Jə-Tiu nə tɩ. 30 À dàń nə yə̀ə́ də, n də n tʋ̀tʋ̀nán yun tɩ̀án tə, tə bá dəri Ba-Yígúrə́-Jə-Tiu, ʋ nə yɩ Yɩɩ, fən. 31 Dwakafɩna tə mà gunən tə, də dipɛn mɩna yiri don tə, tə cʋ̀gʋ̀. Cɩ́gá, kʋ máŋá tə wa, də dipɛn mɩna yiri don tə yà lɩrɩ, gunən tə ga jə pùnə́. 32 Yá dipɛn mɩna tə nə yàá bɩ talɩkwa tə mʋ̀, dwakafɩna tə wà tə mà, tə cʋ̀gʋ̀. 33 Moyizə nan Farawon con, ʋ vìí. Ʋ nə nan tɩʋ tə nii nə, máŋá tə wa, ʋ zɩ̀n ʋ jɩ̀àn, ʋ te Ba-Yígúrə́-Jə-Tiu con. Dwà bagʋ tə, də dwakafɩna tə cən tə zɩgɩ, yá dwà tə kʋ́ʋ̀ ba nɩ̀.