Nana nii càn tə yɩ jə̀rə̀n
10
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Vəli Farawon* con. Cɩ́gá, à mʋ̀ nə pɩn, ʋ də ʋ tʋ̀tʋ̀nán yun tɩ̀án tə jì zɩbanənyɩna, sə à ma tʋn à dɩ̀àn mɩmɩnan ba titəŋi wa. 2 Yá kʋ wá twá nətʋ, n də ma man kʋ tə, à nə tʋn Ezwipətə tɩ̀án yɩra, də nətʋ tə, à nə tʋn à dɩ̀àn mɩmɩnan ba con, n bɩrɩ n bɩ̀á də n nɩ̀án nə. Yá á dàń wá lwarɩ də, à mʋ̀ nə yɩ Ba-Yígúrə́-Jə-Tiu.» 3 Moyizə də Aron vəli ba yí Farawon, ba swɩ̀n ʋ con, ba wʋ́: « Nə̀ń kʋ tə Ba-Yígúrə́-Jə-Tiu , ʋ nə yɩ Ebərə-ba Yɩɩ, nə swɩ̀n. Ʋ bwe sə ʋ jə́n, nɛɛ bagalɩ nə, n tə wá vɩ, sə n mun n tɩ̀àn ʋ yáá con? Ʋ wʋ́ yá ʋ lɩ̀à tə, sə ba va, ba tʋn ba pa wá. 4 Ʋ wʋ́ n nə vɩga, sə n yá ʋ lɩ̀à tə, n pa ba vìí, jwɩan nə, ʋ wá pa jə̀rə̀n bà n lʋʋ nii tə wa. 5 Tə wá pú tɩa tə yuu nə, kʋ pa lìù kʋ́ʋ̀ bá wànɩ́ ʋ na ka. Tə wá də́ wiən tə gɩganɩ tə, dwakafɩna tə nə cʋ̀gʋ̀, tə ga lá. Tə wá də́ tɩ̀án tə mama, tə naŋa gaʋ wa. 6 Tə wá zʋ, tə sú n də n tʋ̀tʋ̀nán yun tɩ̀án tə, də Ezwipətə tɩ̀án tə mama dìì. Kʋ wá ya yoo tə, n nyɩna-ba, də n nɩbara-ba nə wà kʋ yiri nɩ, kʋ nə zɩgɩ máŋá tə mama, ba nə yɩn lʋʋ nii kʋ tə wa, kʋ ja bà kʋ yí kʋ dɩɩn tə.» Yá Moyizə dàń nan Farawon con, ʋ vìí.7 Farawon tʋ̀tʋ̀nán yun tɩ̀án tə swɩ̀n ʋ con, ba wʋ́: «Nɛɛ bagalɩ nə, bɛɛ wa tə wá pa càn yí nəba? Yá lɩ̀à təntə, sə ba va, ba tʋn ba pa Ba-Yígúrə́-Jə-Tiu nə, ʋ nə yɩ ba Yɩɩ. N ba na də, Ezwipətə wulə kʋ cʋ̀gà naaa?» 8 Ba dàń pɩn Moyizə də Aron pìí ba bà Farawon con. Ʋ swɩ̀n ba con, ʋ wʋ́: «Á wàá á vəli, á tʋŋa á pɩn Ba-Yígúrə́-Jə-Tiu nə, ʋ nə yɩ á Yɩɩ. Yá bə̀rə́ nə wá va?» 9 Moyizə ma le, ʋ wʋ́: «Nə wá ja nə ləzwəndʋn də nə bazʋnan, nə bara də nə kana, nə vanmɩnɩ də nə vanfaran, nə ja kə lá, nə vìí. Cɩ́gá, kʋ yɩ cànà, nə mɛ sə nə də́, nə ma pa dun Ba-Yígúrə́-Jə-Tiu nə.» 10 Yá Farawon le ba, ʋ wʋ́: «Ba-Yígúrə́-Jə-Tiu wá ya də aba, máŋá tə, à nə wá yá aba, sə á vìí, á mʋ̀ də á bɩ̀á! Á tətə na də, á yɩ pubʋnlwan tɩ̀án! 11 Kʋ nətʋ wàrɩ̀! Á mʋ̀ bara tə cɩcɩ vələ, á tʋn á pa Ba-Yígúrə́-Jə-Tiu nə. Cɩ́gá, mə kʋ mʋ̀ nə á pɩ̀à.» Yá ba dàń dɩŋɩ Moyizə də Aron, ba lɩ Farawon yáá con.
12 Ba-Yígúrə́-Jə-Tiu swɩ̀n Moyizə con, ʋ wʋ́: «Zɩ̀n n jɩɩn, n te Ezwipətə lʋʋ nii tə con, sə jə̀rə̀n tə bà, tə pú kʋ nə. Tə wá də́ tɩa tə yuu garan tə mama, də won tə mama, dwakafɩna tə nə cʋ̀gʋ̀, tə ga lá.» 13 Moyizə zɩ̀n ʋ daduu tə, ʋ te Ezwipətə lʋʋ nii tə con. Yá Ba-Yígúrə́-Jə-Tiu pɩn vʋʋ nan yɩɩ yipɩan con, kʋ fuli lʋʋ nii tə wa, kʋ dɩɩn təntə yɩcaʋ tə, də kʋ tɩtɩn tə mama wa. Yá kʋ tɩpʋrɩ jɩjʋ nə, də vʋʋ tə ja jə̀rə̀n tə, kʋ bà. 14 Jə̀rə̀n tə zʋa, tə pú Ezwipətə lʋʋ nii tə mama nə. Tə yà dáá zənzən, tə ja lɛ tɩa nə. Tə dánɩ́ tə yiri yà wà dí yáá kʋ ya lá mɩ́ámɩ́án, kʋ yiri ma kʋ́ʋ̀ bá ya lá, kʋ kwa də nə. 15 Tə púə́ lʋʋ nii tə mama nə, kʋ pa tɩa tə jì yikunu. Tə dí tɩa tə yuu garan tə mama, də tɩ̀án tə bɩ̀á tə mama, dwakafɩna tə nə cʋ̀gʋ̀, tə ga lá. Vʋʋ nədʋ tətə wà tɩ̀án tə yuu wa gɛ, gaʋ də mama wà kárɩ́ tə wa gɛ, Ezwipətə lʋʋ nii tə mama wa.
16 Farawon pɩn ba bon Moyizə də Aron lala, ʋ ga swɩ̀n ba con, ʋ wʋ́: «À tʋn cʋna, à zɩgɩ Ba-Yígúrə́-Jə-Tiu nə, ʋ nə yɩ á Yɩɩ, də á tətə nə. 17 À dàń kəni yìə́n á nə, naa ka tə də nə, à cʋna tə yɩrɩ. Á lòrə́ Ba-Yígúrə́-Jə-Tiu, ʋ nə yɩ á Yɩɩ, sə ʋ pa tɩan yobɩbɩlʋ kʋ tə nan kwa, kʋ yá nə.» 18 Moyizə nan Farawon con, ʋ vìí, yá ʋ ga lòrì Ba-Yígúrə́-Jə-Tiu. 19 Ba-Yígúrə́-Jə-Tiu pɩn vʋʋ nan yɩɩ yizwɩa con, kʋ fuli də dɩ̀àn zənzən. Yá kʋ dàń pɛ̀ jə̀rə̀n tə, kʋ ja va, kʋ lwá Mɩncanɩ mʋʋ tə wa. Jə̀rù nədʋ tətə wà Ezwipətə lʋʋ nii tə wa gɛ.
20 Ba-Yígúrə́-Jə-Tiu kʋ́ʋ̀ pɩn Farawon zɩbaniu tə kwɛn kʋ súrí, yá ʋ kʋ́ʋ̀ vɩga, sə ʋ yá Yɩzərayɛlə dwíí tə, ʋ pa ba vìí.
Nʋgʋ nii càn tə yɩ yikunu
21 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Zɩ̀n n jɩɩn, n te yɩɩ nə, sə yikunu bərən, lìù nə wàá kʋ yɩra ʋ dwen, pú Ezwipətə lʋʋ nii tə nə.» 22 Moyizə zɩ̀n ʋ jɩɩn, ʋ te yɩɩ nə, yá yikunu bərən dàń púə́ Ezwipətə lʋʋ nii tə mama nə, dɩan batwa. 23 Tə dɩan batwa təntə mama, lɩ̀à tə yà ba duən na. Yá lìù mama yà kʋ́ʋ̀ wàrɩ̀ ʋ bwálɩ́ nə, ʋ zaŋa ʋ naŋa. Yá poni yà wulə bwálɩ́ tə nə, Yɩzərayɛlə dwíí tə mʋ̀ nə wulə.
24 Farawon* bon Moyizə, ʋ swɩ̀n ʋ con, ʋ wʋ́: «Á vələ, á tʋn á pa Ba-Yígúrə́-Jə-Tiu nə. Á dìə̀ lɩ̀à wàá á nə, ba twá ba vəli. Á dàń nə wá yá á vanmɩnɩ, də á vanfaran tə mʋ̀ yəbə.» 25 Yá Moyizə le, ʋ wʋ́: «Kʋ wàrɩ̀! N mʋ̀ nə wá pa nəba vàná, sə nə ma fwa nimarʋ jwəŋə, də jwəŋə ba nə sʋ̀rɩ́, nə pa Ba-Yígúrə́-Jə-Tiu nə, ʋ nə yɩ nə Yɩɩ naaa? 26 Nə wá ja nə vàná tə də mama nə vìí. Vànɩ́ napaŋɩ nədʋ də tətə bá mɛn yəbə. Cɩ́gá, mə tə mʋ̀ wa nə, nə wá ja nə ma fwa jwəŋə, nə pa Ba-Yígúrə́-Jə-Tiu nə, ʋ nə yɩ nə Yɩɩ. Yá kʋ nə tà nə yí lá, nə tə yəri vàná tə, nə nə mɛ, sə nə ma fwa jwəŋə tə, nə pa Ba-Yígúrə́-Jə-Tiu nə.»
27 Ba-Yígúrə́-Jə-Tiu pɩn Farawon zɩbaniu tə kwɛn kʋ súrí, kʋ pa ʋ vɩ, sə ʋ yá Yɩzərayɛlə dwíí tə, ʋ pa ba vìí. 28 Ʋ swɩ̀n Moyizə con, ʋ wʋ́: «Nan à dìə̀ wa! Cɩ̀ n tɩ̀àn nə, à ba pɩ̀à, sə à pìí à na mʋ́, à yáá con. Cɩ́gá, dɩɩn tə, à nə pìí à na mʋ́, à yáá con, à wá gʋ mʋ́.» 29 Moyizə le, ʋ wʋ́: «N swɩ̀n cɩ́gá! N cɩ́gá kʋ́ʋ̀ bá pìí n na nə, n yáá con.»