Ba-Yígúrə́-Jə-Tiu swɩ̀n fugə nii càn tə yoo: Tə mʋ̀ nə yɩ bɩkwɩna tɩan
11
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «À wá pa talɩkwa càn tʋ Farawon*, də Ezwipətə tɩ̀án yuu wa. Kʋ kwa nə, ʋ wá yá aba, sə á nan yəbə, á vìí. Kʋ kʋ́ʋ̀ tà ʋ wá yá aba, sə á vìí á tɩ tɩ̀àn nə. Kʋ dàń yɩ ʋ tətə nə wá dɩŋa aba, ʋ lɩ yəbə, mɩ́ámɩ́án. 2 Swɩ̀n Yɩzərayɛlə dwíí tə con, sə bɛɛ mama lòrì ʋ jəndon Ezwipətə tɩ̀án bɛɛ con, sə kan də mama lòrì ʋ jəndon Ezwipətə tɩ̀án kan con, wárʋ́ wiən, də sɩ́án wiən.» 3 Ba-Yígúrə́-Jə-Tiu yà pɩn Yɩzərayɛlə dwíí tə na yuywaŋʋ, Ezwipətə tɩ̀án tə yáá con. Yá kʋ tə nə dwən, Farawon tʋ̀tʋ̀nán yun tɩ̀án tə, də Ezwipətə tɩ̀án tə dàń yà zìlí Moyizə zənzən, Ezwipətə lʋʋ nii tə wa.4 Moyizə swɩ̀n Farawon con, ʋ wʋ́: «Nəŋə kʋ tə Ba-Yígúrə́-Jə-Tiu nə swɩ̀n. Máŋá tə wa tɩa nə kwɩn, ka tara ka mɛ duən, à wá bà Ezwipətə wa. 5 Yá təntən bɩ̀á tə mama wá tɩ, Ezwipətə lʋʋ nii tə wa. Kʋ nə zɩgɩ Farawon, ʋ nə jə̀ə́ ʋ padaʋ tə yuu, bikwɩa tə nə, kʋ cú kʋ yí tʋtʋnbʋa tə, ʋ nə wulə nʋŋʋ yuu, bikwɩa tə, də vàná tə təntən bɩ̀á tə mama. 6 Kʋ wá ya bubwiə nəfarʋ, Ezwipətə lʋʋ nii tə mama wa, ka yiri nə wà dí yáá ka ya lá mɩ́ámɩ́án, ka yiri ma kʋ́ʋ̀ bá pìí ka ya lá də, mɩ́ámɩ́án. 7 Yá Yɩzərayɛlə dwíí tə mʋ̀ mama con, kukurə də tətə bá wuwe lìù, nə à yə̀ə́ vànɩ́. Mə kʋ wá twá nətʋ, á ma lwarɩ də, à mʋ̀ Ba-Yígúrə́-Jə-Tiu kəni pwɩa Ezwipətə tɩ̀án, də Yɩzərayɛlə dwíí tə pwə́rə́ wa.» 8 Moyizə tə swɩ̀n, ʋ súrí lá, ʋ wʋ́: «N tʋ̀tʋ̀nán yun tɩ̀án tə mama dàń wá bà, ba tʋ ba nadwana yuu, à yáá con, ba ga swɩ̀n, ba wʋ́: “Á vìrə́, n mʋ̀ də n dwíí lɩ̀à tə mama, ba nə wulə n kwa.” Yá kʋ kwa nə, à dàń wá vìí.» Moyizə nan Farawon con, ʋ vìí də lɩŋa nəfarʋ.
9 Ba-Yígúrə́-Jə-Tiu swɩ̀n Moyizə con, ʋ wʋ́: «Farawon bá cʋgʋ á sʋgʋ. Yá kʋ wá pa, à tʋn à dɩ̀àn mɩmɩnan kapʋpʋ, Ezwipətə lʋʋ nii tə wa.» 10 Moyizə də Aron tʋn tə mʋ̀ dɩ̀àn mɩmɩnan təntə mama, Farawon yáá con. Yá Ba-Yígúrə́-Jə-Tiu pɩn Farawon jì zɩbanənyiən, kʋ pa ʋ vɩ, sə ʋ yá Yɩzərayɛlə dwíí tə, ʋ pa ba nan ʋ lʋʋ nii tə wa, ba vìí.