Zaŋʋ 12

Pakə* cànà tə də̀ń laŋʋ

1 Ba-Yígúrə́-Jə-Tiu swɩ̀n Moyizə də Aron con, Ezwipətə lʋʋ nii tə wa, ʋ wʋ́: 2 «Cànà ka tə nətən wá ya cànɩ̀ tə wa təntən cànà, á mʋ̀ con nə. Ka mʋ̀ nə wá ya bɩnɩ cànɩ̀ tə təntən cànà, á mʋ̀ con nə. 3 Á swɩ̀án Yɩzərayɛlə púlí tə mama con də, cànà ka tə dɩan fugə dɩɩn nə, sàń mama, nə à yə̀ə́ dìə̀ mama lɩ̀à mɛ, sə ba pɩ̀à vanmɩna. 4 Də lɩ̀à nə ba dáá dìə̀ wa, kʋ pa ba wàrɩ̀ vanmɩna ba də́ ba zwɛ̀, ba də ba jənduən wàá duən nə ba keni, ba tì vanmɩna, kʋ twá ba dánɩ́ nə mɛ nətʋ. Á wá tara vanmɩna tə nàŋʋ́ tə, kʋ mɛ nətʋ tə, lìù mama nə wàá ʋ də́. 5 Ka mɛ, sə ka ya bɩnɩ nədʋ vanmɩna, ka yɩra nə zurə, ka ga cé. Kʋ wàá pəbiə, nə à yə̀ə́ bʋbiə kʋ yanɩ. 6 Á wá ywàń ka yuu, kʋ ja va cànà ka tə dɩan fugə də banɩa dɩɩn tə. Yɩzərayɛlə púlí tə dìə̀ mama wa, á wá gʋ ka, kʋ dɩɩn təntə didənbibirə nə. 7 Dìì tə, á nə wá də́ nàŋʋ́ tə, tə wa, á wá lòní vanmɩna tə jana tə, á kə dìì təntə mimii səpunə dàràn bələ tə, də mimii yuu dàʋ̀ tə nə. 8 Kʋ tɩtɩn təntə tətə nə, á wá wà ka mən wa, á də́ də dipɛn, kʋ nə wà sabwarɩ ken, də davʋran tə nə cà. 9 Á dànà ká də́ ka nàŋʋ́ tə, də kʋ wà zəni bɩ. Á dànà ká sàn kʋ də nɩ́á də. Kʋ dàń nə yɩ, á mɛ, sə á wà ka nàŋʋ́ tə, də ka yuu tə, də ka nɛɛ tə, də ka waa wiən tə mama, mən wa. 10 Á wà mɛ, sə á yá ka won mama, á pa tɩa pʋrɩ ka dà kʋ nə. Tɩa nə pʋrɩ də ka won ga lá, á mɛ sə á sʋ̀rɩ́ kʋ. 11 Á nəŋə nətʋ tə, á nə mɛ, sə á də́ wodiu təntə. Á wá vwa voru á tàŋá nə, á kə natʋra á nɛɛ nə, á tì á daduu, á ja á jɩɩn wa, á ga də́ lala. Kʋ yɩ Ba-Yígúrə́-Jə-Tiu Pakə cànà. 12 Kʋ tɩtɩn təntə nə, à wá jírí Ezwipətə lʋʋ nii tə wa, à gʋ ba təntən bɩ̀á tə mama, kʋ nə zɩgɩ ləzoni tə nə, kʋ cú kʋ yí vàná tə. Yá à wá pa Ezwipətə tɩ̀án woŋwanan tə mama jì tʋtʋ. Cɩ́gá, à mʋ̀ nə yɩ Ba-Yígúrə́-Jə-Tiu. 13 Yá jana tə, á nə wá kə dìì tə yuu wa, á nə wulə tə wa, wá ya mɩmɩnʋ, tə pa aba. Máŋá tə, à nə wá bà, sə à cʋ̀gʋ̀ Ezwipətə tɩ̀án tə, à wá na jana tə, à dìì tə yuu wa, à ga twá á yuu con, à lɛ, à bá cʋ̀gʋ̀ aba.

14 Kʋ dɩɩn təntə wá ya dɩɩn, á nə mɛ, sə á lìí kʋ yoo. Kʋ yɩ yoo, à nə pɩn aba nii kʋ yuu wa, máŋá də máŋá mama wuuu, sə á mʋ̀ də á dwíə́ tə mama, á nə wá kə lʋʋ wa, də́ kʋ cànà, á ma pa dun à mʋ̀ Ba-Yígúrə́-Jə-Tiu nə, máŋá də máŋá mama wuuu.

15 Á wá də́ dipɛn, kʋ nə wà sabwarɩ ken, dɩan barpɛ. Kʋ nə zɩgɩ dɩan barpɛ tə təntən dɩɩn tə nə, á mɛ, sə á pa sabwarɩ mama jɛ́n, á dìì wa. Cɩ́gá, dɩan barpɛ təntə wa, lìù tə mama, ʋ nə dí dipɛn, kʋ nə ken sabwarɩ, ʋ mɛ, sə ba lɩ wá, Yɩzərayɛlə lɩ̀à dwíí wa. 16 Təntən dɩɩn tə, də barpɛ nii dɩɩn tə nə, á wá kun duən nə, á pa nə dun. Á wà mɛ, sə á tʋn tʋtʋŋɩ mama, kʋ dɩan təntə wa. Á dàń nə wàá wodiu mʋ̀, á fwa, á pɩn á lìù mama nə. 17 Á mɛ, sə á də́ cànà təntə, ba nə də́ də dipɛn, kʋ nə wà sabwarɩ ken. Cɩ́gá, mə kʋ dɩɩn təntə nə nə, à pɩn á nan Ezwipətə lʋʋ nii tə wa, ndə kwatara púlə́ nə. Kʋ yɩ yoo, à nə pɩn aba nii kʋ yuu wa, máŋá də máŋá mama wuuu, sə á mʋ̀ də á dwíə́ tə mama, á nə wá kə lʋʋ wa, də́ cànà, kʋ dɩɩn təntə yɩrɩ, máŋá də máŋá mama wuuu. 18 Kʋ nə zɩgɩ təntən cànà tə dɩan fugə də banɩa dɩɩn tə didəni nə, á mɛ, sə á də́ dipɛn, kʋ nə wà sabwarɩ ken, kʋ va kʋ yí ka dɩan sapʋa də nədʋ dɩɩn tə didəni nə. 19 Dɩan barpɛ tə wa, sabwarɩ wà mɛ, sə kʋ ya á dìì wa mɩ́ámɩ́án. Cɩ́gá, lìù tə mama, ʋ nə dí dipɛn, kʋ nə ken sabwarɩ, ʋ mɛ, sə ba lɩ wá, Yɩzərayɛlə lɩ̀à dwíí wa, də ʋ nə swə ʋ yɩ vee, nə à yə̀ə́ Yɩzərayɛlə dwíí tə wa lìù. 20 Á wà mɛ, sə á də́ wodiu, kʋ nə ken sabwarɩ mɩ́ámɩ́án. Bwálá tə mama wa, á nə wá ya, á mɛ, sə á də́ dipɛn, kʋ nə wà sabwarɩ ken.»

21 Moyizə bon Yɩzərayɛlə dwíí nəkwɩna tə mama, ʋ swɩ̀n ba con, ʋ wʋ́: «Á vələ, á ja vanmɩna, á gʋ, á də á dìə̀ lɩ̀à ma fwa Pakə cànà tə. 22 Á wá lòní ka jana tə, á kə nagwalʋ wa. Kʋ kwa nə, á wá kɛ́n yɩzɔpə vʋran, á li tə wa, á lɩ, á ma tà á dìə̀ tə mimii yuu con dàʋ̀ tə, də ka mimii səpunə dàràn bələ tə. Á lìù mama wà mɛ, sə ʋ zàn ʋ dìə̀ wa, ʋ nan kàrá, də tɩa nə wà pʋrɩ. 23 Ba-Yígúrə́-Jə-Tiu wá jírí Ezwipətə lʋʋ nii tə wa, ʋ gʋ Ezwipətə tɩ̀án tə. Yá ʋ dàń nə nɩ jana tə, á dìì tə mimien yuu con dàʋ̀ tə, də mimien səpunə dàràn bələ tə yɩra, ʋ wá twá á dìì tə yuu con, ʋ kɛ̀ń. Ʋ bá pa tɩan malɩka tə zʋ, ka gʋ aba. 24 Á mɛ, sə á tʋn kʋ yoo təntə. Kʋ yɩ yoo, Ba-Yígúrə́-Jə-Tiu nə pɩn nii kʋ yuu wa, á mʋ̀ də á bɩ̀á nə, máŋá də máŋá mama wuuu. 25 Máŋá tə, á nə zʋa lʋʋ nii tə wa, Ba-Yígúrə́-Jə-Tiu nə kàn nii, də ʋ wá pa aba, á mɛ, sə á də á tʋŋa kʋ yoo təntə. 26 Yá á bɩ̀á nə bwe aba, sə ba jə́n, kʋ də̀ń nə yɩ bɛ̀? 27 Á wá le ba də, kʋ yɩ Pakə cànà joŋi, kʋ nə pɩn dun Ba-Yígúrə́-Jə-Tiu nə. Cɩ́gá, máŋá tə wa, nə dwíí tə yà nə wulə Ezwipətə nə, Ba-Yígúrə́-Jə-Tiu gʋa Ezwipətə tɩ̀án, ʋ ga twá nə mʋ̀ dìì tə yuu con, ʋ kɛ̀ń, ʋ wà lìù tə wa gwɩ.»

Moyizə sʋ̀ràn təntə kwa nə, Yɩzərayɛlə lalʋʋ tə tʋa ba nadwana yuu, ba pa dun Ba-Yígúrə́-Jə-Tiu nə. 28 Yá ba dàń zàn ba va, ba tʋn kʋ tə mama, Ba-Yígúrə́-Jə-Tiu yà nə pɩn nii Moyizə də Aron nə, sə kʋ tʋn.

Fugə nii càn tə yɩ bikwɩa tɩan

29 Kʋ tɩtɩn kwɩ́ʋ́n nə, Ba-Yígúrə́-Jə-Tiu gʋa Ezwipətə tɩ̀án təntən bɩ̀á tə mama. Kʋ nə zɩgɩ Farawon*, ʋ nə jə̀ə́ ʋ padaʋ tə yuu, bikwɩa tə nə, kʋ cú kʋ yí yoŋu tə, ʋ nə wulə bandiə, bikwɩa tə nə, də vàná tə təntən bɩ̀á tə mama tɩga. 30 Farawon də ʋ tʋ̀tʋ̀nán yun tɩ̀án tə mama, də Ezwipətə tɩ̀án mama zàn kʋ tɩtɩn təntə nə, yá kʋ dàń yɩn bubwiə nəfarʋ, Ezwipətə lʋʋ nii tə wa. Cɩ́gá, dìə̀ yà tə̀lə́, lìù nə wà lá tɩ.

31 Kʋ tɩtɩn tə tətə nə, Farawon pɩn ba bon Moyizə də Aron, ʋ swɩ̀n ba con, ʋ wʋ́: «Á də Yɩzərayɛlə dwíí tə mɛ zaŋa á nan, á vìí, á ga yá à lʋʋ lɩ̀à tə. Á vələ, á tʋn á pa Ba-Yígúrə́-Jə-Tiu nə, ndə á nə swɩ̀n nətʋ. 32 Á jana á vanmɩnɩ tə, də á vanfaran tə də, á súrí lá, á ja vìí, ndə á nə swɩ̀n nətʋ. Á vìrə́, sə á ga lòrì á Yɩɩ tə, sə ʋ fwa zəni à də yɩra.» 33 Ezwipətə tɩ̀án yà bʋŋa də, ba mama wá tɩ, ba zwɛ̀. Yá ba dàń bɩbarɩ Yɩzərayɛlə dwíí tə də̀ń nə, sə ba nan lʋʋ nii tə wa lala, ba vìí.

34 Kʋ pɩn Yɩzərayɛlə dwíí tə tì ba dipɛn mun, ba nə bùə̀, tə ga tə wà zàn, ba zɩn. Ba ja ba gànàn, ba ma pipini wiən tə, ba nə bwi dipɛn mun tə wa tə, ba tì, ba zɩŋa ba pàrà wa.

35 Yɩzərayɛlə dwíí tə tʋn kʋ tə, Moyizə yà nə swɩ̀n. Ba lòrì wárʋ́ wiən, də sɩ́án wiən, də gànàn, Ezwipətə tɩ̀án tə con. 36 Ba-Yígúrə́-Jə-Tiu pɩn Ezwipətə tɩ̀án fwa pubwanʋ Yɩzərayɛlə dwíí tə yɩra. Ezwipətə tɩ̀án pɩn ba won tə mama, ba nə lòrì. Mə kʋ twá nətʋ, Yɩzərayɛlə dwíí tə ma jon Ezwipətə tɩ̀án jɩjə wiən tə mama.

Yɩzərayɛlə dwíí tə zàn Ezwipətə lʋʋ nii wa, ba vìrí

37 Yɩzərayɛlə dwíí tə dàń zɩgɩ Raməsɛsə tɩʋ tə nə, ba nan ba vələ Sukotə. Ba yà yɩ ndə bara mʋ̀rʋ̀ biəyardʋ nə, ba nə wàá kʋ̀ʋ̀ ba tɛ. kana, də bìsɩ́ná, də bazʋnan nii ba lá də́. 38 Lɩ̀à kapʋpʋ duən də nan, ba twá ba nə. Yɩzərayɛlə dwíí tə yà jə vanmɩnɩ də vanfaran kapʋpʋ. 39 Ba ja dipɛn mun tə, ba nə bùə̀, tə ga wà zàn, ba nə ja kə lá ba nan Ezwipətə tə, ba ma fwa gàtó, kʋ nə wà sabwarɩ ken. Cɩ́gá, ba yɩ ba dɩŋɩ, ba lɩ Ezwipətə wa, kʋ pa, ba wà wànɩ́ ba na máŋá, sə ba ma fwa wodiu, ba kə ba yuu.

40 Yɩzərayɛlə dwíí tə fwa bɩna biənɩa də fɩtwa, Ezwipətə lʋʋ nii tə wa. 41 Ba bɩna biənɩa də fɩtwa bɩnɩ tə talɩkwa dɩɩn tə tətə nə nə, Ba-Yígúrə́-Jə-Tiu lɩ̀à tə mama nan Ezwipətə lʋʋ nii tə wa, ndə kwatara púlə́ nə.

42 Kʋ tɩtɩn tə nə, Ba-Yígúrə́-Jə-Tiu wà dwɛ̀, ʋ nə lɩ ba Ezwipətə lʋʋ nii tə wa yɩrɩ. Kʋ mʋ̀ nə pɩn, Yɩzərayɛlə dwíí tə, də ba dwíə́ tə mama, ba nə wá kə lʋʋ wa, wà mɛ, sə ba dwɛ̀ kʋ tɩtɩn təntə nə, máŋá də máŋá mama wuuu, sə ba ma pa dun Ba-Yígúrə́-Jə-Tiu.

43 Ba-Yígúrə́-Jə-Tiu swɩ̀n Moyizə də Aron con, ʋ wʋ́: «Nəŋə yìə̀n tə, à nə pɩn nii tə yuu wa, Pakə* cànà tə yɩrɩ. Vee mama wà mɛ, sə ʋ twá ʋ də́ ka. 44 Yá yonbɛɛ mama, ba nə yə̀ də səbiu, wàá ka, ʋ twá ʋ də́, də ba nə goŋi wa. 45 Vee tə, ʋ nə wulə á con, máŋá mancɩn wa, də tʋtʋnʋ tə, ʋ nə tʋŋa ʋ joŋə ŋwɩ́rán, wà mɛ, sə ba twá ba də́ ka. 46 Nàŋʋ́ tə yɩ kʋ də́ dìə̀ nədʋ wa, kʋ wà mɛ, sə á ja kʋ, á nan kàrá wa. Á wà mɛ, sə á kɛ́n vànɩ́ tə kuu nədʋ mama. 47 Yɩzərayɛlə púlí tə mama mɛ, sə ba də́ Pakə cànà tə. 48 Də vee nə twá ʋ jə̀ə́ á con, ʋ ga pɩ̀à, sə ʋ twá ʋ də́ Pakə cànà tə, ʋ ma pa dun Ba-Yígúrə́-Jə-Tiu nə, ʋ mɛ, sə ʋ dí yáá ʋ pa, ba goŋə ʋ də ʋ dìə̀ bara tə mama. Kʋ kwa nə, ʋ dàń wàá Pakə cànà tə, ʋ twá ʋ də́, ndə Yɩzərayɛlə dwíí lìù nə. Yá pəntanʋ tíú mʋ̀ mama wà mɛ, sə ʋ twá ʋ də́ ka. 49 Yìə̀n təntə, à nə pɩn nii tə yuu wa, yɩ tə wulə Yɩzərayɛlə dwíí tə, də vərə tə də mama yɩrɩ, ba nə twá ba jə̀ə́ á con.» 50 Yɩzərayɛlə dwíí tə mama tʋn, kʋ twá ndə nətʋ tətə nə, Ba-Yígúrə́-Jə-Tiu yà nə pɩn nii Moyizə də Aron nə, sə kʋ tʋn. 51 Kʋ dɩɩn təntə tətə nə, Ba-Yígúrə́-Jə-Tiu pɩn Yɩzərayɛlə dwíí tə nan Ezwipətə lʋʋ nii tə wa, ndə kwatara púlə́ nə.