Pakə* cànà tə yuu wa yìə̀n duən
13
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Lɩ Yɩzərayɛlə dwíí tə wa bikwɩa mama, n kə vàn nə, n pa à cɩcɩ nə. Cárɩ́ bìú mama, Yɩzərayɛlə dwíí tə, nə à yə̀ə́ vàná tə nə wá lɩrɩ, yɩ à mʋ̀ nə tɩ.»Dipɛn tə, kʋ nə wà sabwarɩ ken cànà
3 Moyizə swɩ̀n lalʋʋ tə con, ʋ wʋ́: «Á lie á tɩ̀àn dɩɩn kʋ tə yoo, á nə nan yongaʋ tə wa, Ezwipətə nə. Cɩ́gá, kʋ twá də Ba-Yígúrə́-Jə-Tiu jɩɩn dɩ̀àn, ʋ ma lɩ aba lá nə. Kʋ mʋ̀ yɩrɩ, á wà mɛ, sə á də́ dipɛn, kʋ nə jə sabwarɩ. 4 Mə zə̀n nə, á nan Ezwipətə lʋʋ nii tə wa, á vìrí, Abibəa cànà wa. 5 Máŋá tə, Ba-Yígúrə́-Jə-Tiu nə wá pa á zʋ Kanaan tɩ̀án tə, də Ɛtə dwíí tə, də Amɔrə dwíí tə, də Evi dwíí tə, də Yebusə tɩ̀án lʋʋ nii tə wa, á mɛ, sə á də́ cànà, bɩnɩ mama, Abibə cànà ka tə tətə wa, á ma lìí kʋ yoo təntə. Ba-Yígúrə́-Jə-Tiu kàn nii á nɩbara-ba con, də ʋ wá pa aba kʋ lʋʋ nii təntə. Kʋ yɩ lʋʋ nii tə, nayɩla də tʋ̀ràn nə súə́ lá, tə pàlɩ̀. 6 Á wá də́ dipɛn, kʋ nə wà sabwarɩ ken, dɩan barpɛ. Barpɛ nii dɩɩn tə nə, á wá də́ cànà, á ma pa dun Ba-Yígúrə́-Jə-Tiu nə. 7 Dɩan barpɛ tə wa, á wá də́ dipɛn, kʋ nə wà sabwarɩ ken. Dipɛn kʋ nə ken sabwarɩ, nə à yə̀ə́ sabwarɩ tətə wà mɛ, sə tə ya á lʋʋ nii tə mama wa.
8 Kʋ dɩɩn tə nə, á wá man cànà tə də̀ń, á bɩrɩ á bɩ̀á nə. Á wá swɩ̀n ba con də, nə tʋŋa kʋ nətʋ tə, kʋ tə yɩrɩ, Ba-Yígúrə́-Jə-Tiu nə fwa, ʋ pa nəba, máŋá tə wa, nə nə nan Ezwipətə. 9 Cànà təntə wá ya ndə mɩmɩnʋ nə, á jɩɩn nə, nə à yə̀ə́ ndə won nə, á nə marɩ á tílí nə, á yɩ́á pwə́rə́ wa, kʋ lìí aba, sə kʋ pa Ba-Yígúrə́-Jə-Tiu nii sʋ̀ràn tə ya á nii wa. Cɩ́gá, kʋ yɩ kʋ twá də Ba-Yígúrə́-Jə-Tiu jɩɩn dɩ̀àn, ʋ ma lɩ aba Ezwipətə wa. 10 Á dàń mɛ, sə á tʋn kʋ yoo təntə, Ba-Yígúrə́-Jə-Tiu nə pɩn nii kʋ yuu wa, bɩnɩ mama, də kʋ máŋá nə yí.
11 Ba-Yígúrə́-Jə-Tiu dùə̀, də ʋ wá pa Kanaan tɩ̀án lʋʋ nii tə, á nɩbara-ba, də á tətə nə. Máŋá tə, ʋ nə pɩn á zʋ kʋ lʋʋ nii tə wa, ʋ nə pɩn kʋ aba, 12 á mɛ, sə á tì á cárɩ́ bìú mama, á pa Ba-Yígúrə́-Jə-Tiu nə. Á vàná tə də tətə təntən bibɛɛ mama yɩ Ba-Yígúrə́-Jə-Tiu nə tɩ. 13 Á wá ja pəbiə, nə à yə̀ə́ bʋbiə, á ma lárɩ́ bɩ̀nà bikwɩa mama yuu nə. Á nə wà ka yuu nə lárɩ́, á mɛ, sə á mà ka yuu á lwa. Á mɛ, sə á yə̀ á ləzwənə cárɩ́ bìú də mama, á jon, á dwíí tə wa. 14 Máŋá don wa, á bɩ̀á nə bwe aba, sə ba jə́n, kʋ də̀ń nə yɩ bɛ̀, á wá le ba də, kʋ yɩ kʋ twá də Ba-Yígúrə́-Jə-Tiu jɩɩn dɩ̀àn, ʋ ma lɩ nəba yongaʋ tə wa, Ezwipətə nə. 15 Farawon yà vɩga mɩ́ámɩ́án, sə ʋ yá nəba, ʋ pa nə vìí. Ba-Yígúrə́-Jə-Tiu dàń ma pa Ezwipətə tɩ̀án təntən bɩ̀á tə mama tɩ. Kʋ nə zɩgɩ ləzoni tə təntən bɩ̀á tə nə, kʋ cú kʋ yí vàná tə təntən bɩ̀á tə. Mə kʋ mʋ̀ nə pɩn, nə janɩ vàná tə təntən bìú mama, kʋ nə yɩ bɛɛ, nə ma fwa joŋi, nə pɩn Ba-Yígúrə́-Jə-Tiu nə, nə ga yə̀ nə tətə cárɩ́ bɩ̀á tə mʋ̀ mama, nə joŋə. 16 Kʋ nətʋ wá ya ndə mɩmɩnʋ nə, á jɩɩn nə, nə à yə̀ə́ ndə won nə, á nə marɩ á tílí nə, á yɩ́á pwə́rə́ wa. Cɩ́gá, kʋ twá də Ba-Yígúrə́-Jə-Tiu jɩɩn dɩ̀àn, ʋ ma lɩ nəba Ezwipətə wa.»
YƖZƏRAYƐLƏ DWII TƏ NAN EZWIPƏTƏ, BA VA BA YI SINAYI PAAN TƏ
Yɩɩ tətə wulə ʋ lɩ̀à tə yáá
17 Máŋá tə, Farawon nə yá Yɩzərayɛlə dwíí tə, ʋ pa ba vìí, Yɩɩ wà ba ja twá Filisi lʋʋ nii cwəŋə tə, yá ka mʋ̀ yà ga nə bwələ. Cɩ́gá, Yɩɩ yà yə̀ə́ də, Yɩzərayɛlə dwíí tə nə nɩ də, ba mɛ, sə ba ta kʋ̀ʋ̀, ba wá swɩ̀n də, ba yà nə yə̀ə́, yá ba wá pìí ba va Ezwipətə. 18 Kʋ mʋ̀ nə pɩn, Yɩɩ ma ja ba, ʋ bɩ́bárɩ́ ʋ twá kasɔɔ lanworu cwəŋə tə, ka nə vələ Mɩncanɩ mʋʋ tə con. Yɩzərayɛlə dwíí tə yà nan Ezwipətə lʋʋ nii tə wa, ba vìí, ndə kwatara púlə́ nə.
19 Moyizə yà tì Zʋzɛfə kurən tə, ʋ kə lá, ʋ ja vìí. Cɩ́gá, Zʋzɛfə yà swɩ̀n Yɩzərayɛlə dwíí tə con, də cɩ́gá mama, máŋá don wa, Yɩɩ wá bà, ʋ san ba. Yá ʋ dàń yà pɩn ba dù, də kʋ máŋá tə nə yí, ba wá kə lá, ba tì ʋ kurən tə, ba ja vìí.
20 Yɩzərayɛlə dwíí tə nan Sukotə, ba va ba kə ba dəkuu bwálɩ́ Etamə nə, kasɔɔ lanworu tə nii nə. 21 Ba-Yígúrə́-Jə-Tiu yàá wulə ba yáá, bakwan kùlì wa, ʋ ma bɩrɩ ba cwəŋə, yɩcaʋ wa. Yá tɩtɩn nə, ʋ yàá wulə mənvwə wa, ʋ ma pɩ̀rɩ̀ ba, də poni. Kʋ nətʋ tə dàń yà pɩn, ba wàá ba vəli yɩcaʋ də tɩtɩn. 22 Bakwan kùlì tə yà ba Yɩzərayɛlə dwíí tə yáá nə jɛ́n, yɩcaʋ wa. Yá mənvwə tə də yà ba ba yáá nə jɛ́n, tɩtɩn nə.