Ezwipətə tɩ̀án nan ba dɩŋɩ Yɩzərayɛlə dwíí tə kwa
14
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Swɩ̀n Yɩzərayɛlə dwíí tə con, sə ba pìí ba bà, ba kə ba dəkuu bwálɩ́ Pi-Hahirɔtə yáá con, Migədolə də mʋʋ tə pwə́rə́ wa. Mə bwálɩ́ təntə wa nə, á wá kə á dəkuu bwálɩ́, Baalə-Sefon yáá con, mʋʋ tə nii nə. 3 Farawon wá bʋ́n də, á yɩ á jɛ́n lʋʋ nii tə wa, á twá kasɔɔ lanworu tə wa, á ywaŋa. Kʋ jìgə̀ ndə bandiə nə, kʋ pa aba. 4 À wá pa Farawon jì zɩbanənyiən, sə kʋ pa ʋ nan, ʋ dɩŋa á kwa. Yá à dàń wá də́ dɩ̀àn Farawon də ʋ kwatara tə mama yuu wa, à ma bɩrɩ à dun tə. Yá Ezwipətə tɩ̀án dàń wá lwarɩ də, à mʋ̀ nə yɩ Ba-Yígúrə́-Jə-Tiu.» Yɩzərayɛlə dwíí tə zìlí sʋgʋ təntə nii.5 Lɩ̀à twi ba swɩ̀n Farawon con, də Yɩzərayɛlə dwíí tə dəri, ba vìí. Farawon də ʋ tʋ̀tʋ̀nán yun tɩ̀án tə pubʋŋa pìí ka lwàń Yɩzərayɛlə dwíí tə yuu wa. Ba swɩ̀n ba wʋ́: «Bɛ̀ɛ̀ yoo nə, nə tʋn nətən? Nə yá Yɩzərayɛlə dwíí tə, nə pa ba vìí, yá ba kʋ́ʋ̀ bá tʋn, ba pa nəba!» 6 Farawon pɩn, ba tanɩ ʋ kwatara səsen kòrù, ʋ ga lɩ ʋ kwatara, ʋ kə ʋ kwa. 7 Ʋ kúrí kwatara səsen kòrə̀n nəzəŋə biəyardʋ, Ezwipətə lʋʋ nii kwatara səsen kòrə̀n tə mama wa. Bara batwa yà nə jə̀ə́ səsen kòrù mama yuu wa. 8 Ba-Yígúrə́-Jə-Tiu pɩn Ezwipətə pɩ̀ʋ́ Farawon jì zɩbanənyiən, kʋ pa ʋ nan, ʋ dɩŋɩ Yɩzərayɛlə dwíí tə kwa, ba nə nan Ezwipətə wa, ndə lɩ̀à nə, ba nə tɩ ba tɩ̀àn. 9 Ezwipətə tɩ̀án tə dɩŋɩ ba kwa, də ba səsen tə mama, də Farawon səsen kòrə̀n tə, də ʋ səsədɩra tə, də ʋ kwatara tə. Ba dɩŋɩ Yɩzərayɛlə dwíí tə, ba ja mʋʋ tə nii nə, Pi-Hahirɔtə nə, Baalə-Sefon yáá con.
Mɩncanɩ mʋʋ tə bɩʋn
10 Farawon yà bwə́lə́ ba. Yɩzərayɛlə dwíí tə zɩ̀n ba yáá, də nə̀ń Ezwipətə tɩ̀án tə nə, ba dɩŋɩ ba kwa, ba bɩ̀àn. Fən zʋa Yɩzərayɛlə dwíí tə zənzən, ba ga bubwi, ba kə Ba-Yígúrə́-Jə-Tiu nə. 11 Ba swɩ̀n Moyizə con, ba wʋ́: «Kʋ yɩ libərə nə mùrì Ezwipətə wa, kʋ pa, n ja nəba, n bà, sə nə tɩ kasɔɔ lanworu tə wa naaa? Bɛ̀ɛ̀ nə, n lɩ nəba Ezwipətə nə, sə n ma fwa? 12 Kʋ tà kʋ mʋ̀ nə, nə swɩ̀n n con Ezwipətə nə naaa? Nə swɩ̀n, sə n yá nəba, sə nə tʋn nə pa Ezwipətə tɩ̀án nə. Cɩ́gá, nə yà nə tʋŋa nə pɩn Ezwipətə tɩ̀án nə, kʋ kʋkwa, nə nə wá tɩ kasɔɔ lanworu tə wa.» 13 Moyizə le lalʋʋ tə, ʋ wʋ́: «Á dànà ká pa fən ja aba. Á zɩga dɩ̀àn, yá á wá na nətʋ tə, Ba-Yígúrə́-Jə-Tiu nə wá jon aba, zə̀n kʋ tə. Cɩ́gá, Ezwipətə tɩ̀án tə, á nə na zə̀n kʋ tə, á kʋ́ʋ̀ bá pìí á na ba, mɩ́ámɩ́án. 14 Ba-Yígúrə́-Jə-Tiu nə wá ta, ʋ pa aba. Á mʋ̀ zɩga sənbwen, á cʋgʋ ʋ nə.»
15 Ba-Yígúrə́-Jə-Tiu swɩ̀n Moyizə con, ʋ wʋ́: «Bɛ̀ɛ̀ nə pɩn, n bubwi, n kəni à nə? Swɩ̀n Yɩzərayɛlə dwíí tə con, sə ba də ba vəli. 16 N mʋ̀ zɩ̀n n daduu tə, n te mʋʋ tə yuu con, n ma pwɛ̀ kʋ nɩ́á tə duən wa, n tún cwəŋə kʋ wa. Yá Yɩzərayɛlə dwíí tə wá va ka cwəŋə təntə wa, mʋʋ tə titəŋi wa, ba twá tɩkʋrʋ yuu, ba nan. 17 À mʋ̀ dàń wá pa Ezwipətə tɩ̀án tə jì zɩbanənyɩna, kʋ pa, ba pú Yɩzərayɛlə dwíí tə kwa, ba zʋ mʋʋ tə wa. Yá à wá də́ dɩ̀àn Farawon, də ʋ kwatara tə mama, də ʋ səsen kòrə̀n tə, də ʋ səsədɩra tə yuu wa, à ma bɩrɩ à dun tə. 18 Yá Ezwipətə tɩ̀án dàń wá lwarɩ də, à mʋ̀ nə yɩ Ba-Yígúrə́-Jə-Tiu, máŋá tə wa, à nə wá tʋn kʋ nətʋ tə.»
19 Yɩɩ malɩka* tə yà nə wulə Yɩzərayɛlə lɩ̀à púlí tə yáá, ka vəli, dàń pìí ka bà, ka wulə ba kwa. Yá bakwan kùlì tə də nan ba yáá con, kʋ bà kʋ wulə ba kwa con. 20 Kʋ vəli kʋ wulə Ezwipətə tɩ̀án tə, də Yɩzərayɛlə dwíí tə pwə́rə́ wa. Ezwipətə tɩ̀án tə vàn con, bakwan təntə yà yɩ yikunu. Yá Yɩzərayɛlə dwíí tə mʋ̀ vàn con, kʋ yà yɩ poni, kʋ pɩ̀rɩ̀ tɩtɩn tə. Ba púlə́ bələ tə wà duən yɩra yí, tɩtɩn tə mama wa.
21 Moyizə dàń zɩ̀n ʋ jɩɩn, ʋ te mʋʋ tə yuu con. Yá Ba-Yígúrə́-Jə-Tiu pɩn yɩɩ yipɩan con vʋʋa nəfarʋ fwi mʋʋ tə nɩ́á tə, kʋ lɩ, tɩtɩn tə mama wa. Ʋ pɩn nɩ́á tə pwɛ̀ duən wa, tə yá cwəŋə nəkʋrʋ, mʋʋ tə wa. 22 Yá Yɩzərayɛlə dwíí tə dàń zʋa, ba va tɩkʋrʋ yuu, mʋʋ tə titəŋi wa. Nɩ́á tə dàń yà yɩ ndə bírə́ nə, ba jɩzən də ba jɩgwiə yuu. 23 Ezwipətə tɩ̀án tə púə́ ba kwa. Farawon səsen tə mama, də ʋ səsen kòrə̀n tə, də ʋ səsədɩra tə púə́ Yɩzərayɛlə dwíí tə kwa, ba tì nɩ́á tə pwə́rə́ wa cwəŋə tə, ba zʋ mʋʋ tə titəŋi wa. 24 Tɩbɩlakʋnʋ wa, Ba-Yígúrə́-Jə-Tiu twá mənvwə də bakwan kuli tə wa, ʋ ywàń Ezwipətə tɩ̀án kwatara púlí tə, ʋ ga gugurə ba. 25 Ʋ pɩn ba səsen kòrə̀n tə nɛɛ cən, tə wàrɩ̀ tə vəli. Ezwipətə tɩ̀án tə dàń bubwi, ba wʋ́: «Nə dərə Yɩzərayɛlə dwíí tə yáá nə. Cɩ́gá, kʋ yɩ Ba-Yígúrə́-Jə-Tiu nə wulə ʋ tɛ nəba, ʋ pɩn ba.» 26 Ba-Yígúrə́-Jə-Tiu swɩ̀n Moyizə con, ʋ wʋ́: «Te n jɩɩn mʋʋ tə yuu con, sə nɩ́á tə pìí tə bà, tə pú Ezwipətə tɩ̀án tə, də ba səsen kòrə̀n tə, də ba səsədɩra tə yuu nə.» 27 Moyizə te ʋ jɩɩn mʋʋ tə yuu con. Máŋá tə, tɩa nə bwə́lə́ pʋrʋ, nɩ́á tə pìí tə bà, tə bwálɩ́ nə. Tə nə pìí tə bɩ̀àn tə bwálɩ́ nə máŋá tə wa, Ezwipətə tɩ̀án tə gʋa tɩa, ba dəri, sə ba jɛ́n tə yáá nə. Yá Ba-Yígúrə́-Jə-Tiu pɩn nɩ́á tə də́ ba, mʋʋ tə titəŋi wa. 28 Nɩ́á tə pìí tə bà, tə pú səsen kòrə̀n tə, də səsədɩra tə, də Farawon kwatara tə mama yuu nə, ba yà nə púə́ Yɩzərayɛlə dwíí tə kwa, ba zʋ mʋʋ tə wa. Ba ladʋa tətə wà gɛ. 29 Yá Yɩzərayɛlə dwíí tə mʋ̀ vəli tɩkʋrʋ yuu, mʋʋ tə titəŋi wa. Nɩ́á tə dàń yà ga yɩ ndə bírə́ nə, ba jɩzən də ba jɩgwiə yuu. 30 Kʋ dɩɩn tə nə, Ba-Yígúrə́-Jə-Tiu jon Yɩzərayɛlə dwíí tə, Ezwipətə tɩ̀án jɩɩn wa. Yá Yɩzərayɛlə dwíí tə nɩ Ezwipətə tɩ̀án tə, ba tɩga ba tígə́ mʋʋ tə nii nə. 31 Yɩzərayɛlə dwíí tə nɩ Ba-Yígúrə́-Jə-Tiu jɩɩn dɩ̀àn tə, ʋ nə tʋn, ʋ zɩgɩ Ezwipətə tɩ̀án tə nə. Yá ba dàń dəri Ba-Yígúrə́-Jə-Tiu fən. Ba ken ba waa Ba-Yígúrə́-Jə-Tiu nə, ba ga pa cɩ́gá ʋ tʋtʋnʋ Moyizə nə.