Yɩzərayɛlə dwíí tə dɩga gwaran, ba ma siən Yɩɩ
15
1 Moyizə də Yɩzərayɛlə dwíí tə dɩga gwaran tə tə, ba ma siən Ba-Yígúrə́-Jə-Tiu, ba wʋ́:«À wá nun,
à ma bʋ Ba-Yígúrə́-Jə-Tiu nə.
Cɩ́gá, ʋ tʋn dɩ̀àn nəfarʋ.
Ʋ zɩn səsen də tə səsədɩra,
ʋ dɩlɩ mʋʋ tə wa.
2 Ba-Yígúrə́-Jə-Tiu nə yɩ à dɩ̀àn,
ʋ mʋ̀ nə nə, à nuŋə tə bwɩ̀.
Ʋ mʋ̀ nə yɩn à jonu.
Ʋ yɩ à tíú Yɩɩ,
à wá siən wá.
Ʋ yɩ à nyɩna-ba Yɩɩ,
à wá bʋ ʋ nə.
3 Ʋ yɩrɩ nə yɩ Ba-Yígúrə́-Jə-Tiu.
Ba-Yígúrə́-Jə-Tiu yɩ kwatarʋ.
4 Ʋ buburi Farawon səsen kòrə̀n tə,
də ʋ kwatara tə, mʋʋ tə wa.
Mɩncanɩ mʋʋ tə dí Farawon kwatara babɩran tə.
5 Ba cúə́ nɩ́á də̀ń, ndə kapan nə.
Naluŋə púə́ ba yuu nə.
6 Ba-Yígúrə́-Jə-Tiu, n jɩzən tə jə dɩ̀àn nəfarʋ.
Ba-Yígúrə́-Jə-Tiu, n jɩzən tə tɩtaga dʋŋʋ tə.
7 N ja n pàrɩ̀ tə dun nəfarʋ tə,
n ma də́ dɩ̀àn n dʋŋa yuu wa.
N yàá fwi n lɩŋa ba yuu wa,
n pa tə də́ ba,
ndə mən nə də́ gaʋ nətʋ.
8 N mɩɩ vʋʋ dɩ̀àn pɩn,
nɩ́á pwɛ̀ duən wa, tə yá cwəŋə.
Navoo tə zàn kʋ zɩga, ndə kàŋʋ́ nə.
Nacilə tə cili, tə tígə́ mʋʋ tə də̀ń nə.
9 Dʋŋʋ tə yà swɩ̀n ʋ waa con, ʋ wʋ́:
“À jɩɩn wá zʋ ba.
À wá dɩŋa ba, à ja,
à cʋ̀rɩ́ à kwatara sɩ̀ʋ́, à ma gʋ ba,
à ga pɛ̀ ba jɩjə wiən tə,
à pa tə yí à fɩra.”
10 N fwi vʋʋ,
mʋʋ tə ga pú ba yuu nə.
Ba cúə́ naluŋə də̀ń, ndə lugu nə.
11 Yɩa tə mama wa,
Wàà nə yɩ ndə n nə, Ba-Yígúrə́-Jə-Tiu?
Wàà nə yɩ ndə n nə,
ʋ nə yɩ parɩ, ʋ ga jə dun,
ʋ dɩ̀àn nə ba kamandon jə,
ʋ nə mɛ də bʋra,
ʋ ga tʋŋa yomɩlan?
12 N te n jɩzən tə,
yá tɩa tə liri nə dʋŋa tə.
13 Kʋ twá də n wʋywaŋʋ* tə,
n ma kə lalʋʋ kʋ tə,
n nə jon, cwəŋə nə.
Kʋ twá də n dɩ̀àn tə,
n ma kəni ba cwəŋə nə,
n ja vələ bwálɩ́ tə nə,
n mʋ̀ Yɩɩ nə wulə.
14 Dwíə́ nəkaran* tə nì kʋ,
yá ba manwarɩ ba vɩvaga.
Fən pɩn Filisi tɩ̀án wulə pucʋnɩ wa.
15 Fən zʋa Edomə pɛ̀gá tə.
Mʋabə pàbɩ̀á tə yɩ ba vɩvaga.
Kanaan lʋʋ lɩ̀à tə mama jɩ̀àn gwarɩ.
16 Bɩcapuri də fən nə wá yí ba.
N vàn dɩ̀àn pɩn ba jì ndə kapana nə,
ba wàrɩ̀ ba nii ba súrí,
ba wàrɩ̀ ba naa ba zɩ̀n,
n mʋ̀ Ba-Yígúrə́-Jə-Tiu lalʋʋ tə,
ba nə kɛ̀ń, yáá con.
Lalʋʋ təntə, ba nə kɛ̀ń,
yɩ n mʋ̀ nə jon ba, n ja.
17 N wá ja n lɩ̀à tə, n va,
n kə paan tə yuu wa,
ka nə yɩ n mʋ̀ nə tɩ.
Bwálɩ́ təntə nə,
n mʋ̀ Ba-Yígúrə́-Jə-Tiu tanɩ,
sə n ya kʋ wa.
Kʋ yɩ n jə́rə́ bwálɩ́,
n tətə Yuu-Tiu nə tanɩ də n jɩ̀àn.
18 Ba-Yígúrə́-Jə-Tiu wá də́ pàrɩ̀,
máŋá mama wuuu, kʋ ba zwɛ̀.»
19 Cɩ́gá, Yɩzərayɛlə dwíí tə vəli tɩkʋrʋ yuu, mʋʋ tə titəŋi wa, ba nan. Farawon səsen tə, də ʋ səsen kòrə̀n tə, də ʋ səsədɩra tə də zʋa mʋʋ tə wa. Yá Ba-Yígúrə́-Jə-Tiu pɩn, mʋʋ tə nɩ́á tə pìí tə bà, tə pú ba yuu nə.
20 Yɩɩ nii sʋsʋnkan Miriyamə, ʋ nə yɩ Aron nakʋa, tì mənkwərə. Yá kana tə mama dàń nan, ba pú ʋ kwa, də mənkori, ba ma sɛ. 21 Miriyamə yà dɩ gwaran tə, ʋ pɩn ba, ʋ wʋ́:
«Á nuŋə á ma bʋ Ba-Yígúrə́-Jə-Tiu nə.
Cɩ́gá, ʋ tʋn dɩ̀àn nəfarʋ.
Ʋ zɩn səsen də tə səsədɩra,
ʋ dɩlɩ mʋʋ tə wa.»
Yɩzərayɛlə dwíí tə yí Mara buu tə
22 Moyizə pɩn Yɩzərayɛlə dwíí tə zàn Mɩncanɩ mʋʋ tə nii nə, ba te Swurə kasɔɔ lanworu tə con. Ba vəli kasɔɔ lanworu tə wa, dɩan batwa, də ba tə wà nɩ́á nɩ. 23 Ba vəli ba yí Maraa buu tə, yá ba wàrɩ̀ kʋ nɩ́á tə ba nywɩn, tə yà nə cà yɩrɩ. Kʋ mʋ̀ nə pɩn, ba dɩ buu tə yɩrɩ Mara. 24 Yɩzərayɛlə dwíí tə dàń ŋʋŋwɩn Moyizə yuu wa, ba wʋ́: «Bɛ̀ɛ̀ nə, nə wá nyʋn?» 25 Moyizə ma bubwi, ʋ kə Ba-Yígúrə́-Jə-Tiu nə. Ba-Yígúrə́-Jə-Tiu ma bɩrɩ wá tɩ̀ʋ́ don, ʋ pa ʋ kɛ́n kʋ dàʋ̀, ʋ dɩ nɩ́á tə wa, yá tə jìgə̀ nazəŋə. Mə bwálɩ́ təntə wa nə, Ba-Yígúrə́-Jə-Tiu pɩn nii Yɩzərayɛlə dwíí tə nə, yìə̀n yuu wa, ʋ ga tún coŋi, ʋ pa ba, sə ba twá tə nə. Mə bwálɩ́ təntə wa nə, ʋ mɩlɩ ba. 26 Ʋ swɩ̀n, ʋ wʋ́: «Cɩ́gá mama, á nə cʋga à mʋ̀ Ba-Yígúrə́-Jə-Tiu, à nə yɩ á Yɩɩ, sʋgʋ zəni, á tʋtʋnɛɛ nə tì cwəŋə, à yáá con, á nə zìlí à nii yìə̀n tə, á ga twá yìə̀n tə mama nə, à nə pɩn aba nii tə yuu wa, à bá dɩ yayɩran tə, à nə dɩga Ezwipətə tɩ̀án nə, nədʋ tətə á nə. Cɩ́gá, à mʋ̀ Ba-Yígúrə́-Jə-Tiu nə pɩn aba yazurə.»
27 Kʋ kwa nə, Yɩzərayɛlə dwíí tə vəli ba yí Elimə. Nabuliyɩa fugə də bələ, də kʋrɩ sapwɩtwa də fugə yà wulə lá nə. Ba ken ba dəkuu bwálɩ́, nɩ́á tə nii nə, ba sìí.