Yɩɩ kʋ̀nɩ̀ ʋ lɩ̀à tə
16
1 Yɩzərayɛlə púlí tə mama zàn Elimə nə, ba va Sin kasɔɔ lanworu tə wa, kʋ nə wulə Elimə də Sinayi paan tə pwə́rə́ wa. Kʋ yɩn ba Ezwipətə naŋʋ cànɩ̀ bələ nii cànà dɩan fugə də bonu dɩɩn nə. 2 Ba mama dàń ŋʋŋwɩn, ba zɩgɩ Moyizə də Aron nə, kasɔɔ lanworu tə wa, 3 ba wʋ́: «Ba-Yígúrə́-Jə-Tiu yà nə gʋa nəba, Ezwipətə nə, kʋ yà kʋkwa. Tɩa lá, nə yà yɩ nə jə̀ə́ nàŋá nəkəni bɩan nə, nə ga də́ wodiu nə swí. Yá á mʋ̀ dàń lɩ nəba, á ja bà kasɔɔ lanworu kʋ tə wa, sə niən gʋ lalʋʋ kʋ tə mama.»4 Ba-Yígúrə́-Jə-Tiu ma swɩ̀n Moyizə con, ʋ wʋ́: «À wá pa wodiu nan yɩɩ nə, kʋ nà ndə dwà nə, kʋ pa aba. Lalʋʋ tə wá nan, ba pɛ̀, kʋ mɛ ba dɩɩn mama diŋə. À wá twá kʋ nətʋ nə, à ma mɩlɩ ba. À wá na, də ba nə wá zìlí à nii tə, nə à yə̀ə́ ba nə wá vɩ. 5 Bardʋ nii dɩɩn tə nə, ba nə fwa wodiu tə, ba nə pɛ̀ tə, kʋ wá doni dɩɩn mama nyiən tə, nɛɛ bələ.»
6 Moyizə də Aron dàń swɩ̀n Yɩzərayɛlə dwíí tə mama con, ba wʋ́: «Didəni kʋ tə nə, á wá lwarɩ də, kʋ yɩ Ba-Yígúrə́-Jə-Tiu nə pɩn á nan, á yá Ezwipətə lʋʋ nii tə. 7 Yá jɩjʋ nə, á wá na ʋ dun* tə, ʋ nə nì də, á ŋʋŋwɩn, á zɩgɩ ʋ nə tə yɩrɩ. Cɩ́gá, nə mʋ̀ nə yɩ bə̀rə́, á ma ŋʋŋwɩn, á zɩga nə nə?» 8 Moyizə swɩ̀n, ʋ wʋ́: «Ba-Yígúrə́-Jə-Tiu nì á ŋʋŋwɩan tə, yá ʋ wá pa aba nàŋʋ́, didəni kʋ tə tətə nə, də dipɛn, jɩjʋ nə, sə á də́, á sú. Cɩ́gá, nə mʋ̀ nə yɩ bə̀rə́? Kʋ yɩ Ba-Yígúrə́-Jə-Tiu nə nə, á ŋʋŋwɩn, á zɩga, kʋ tà nə mʋ̀.»
9 Kʋ kwa nə, Moyizə swɩ̀n Aron con, ʋ wʋ́: «Swɩ̀n Yɩzərayɛlə púlí tə mama con, sə ba bólí Ba-Yígúrə́-Jə-Tiu yáá con. Cɩ́gá, ʋ nì ba ŋʋŋwɩan tə.» 10 Máŋá tə wa, Aron nə wulə ʋ swɩ̀n Yɩzərayɛlə púlí tə mama con, ba viviri ba yáá, ba kə kasɔɔ lanworu tə con, də nə̀ń Ba-Yígúrə́-Jə-Tiu dun tə nə, tə wulə bakwan tə wa.
11 Ba-Yígúrə́-Jə-Tiu swɩ̀n Moyizə con, ʋ wʋ́: 12 «À nì Yɩzərayɛlə dwíí tə ŋʋŋwɩan tə. Swɩ̀n ba con də, didəni nii nə, ba wá də́ nàŋʋ́, yá jɩjʋ nə, ba wá də́ dipɛn, ba sú. Ba dàń wá lwarɩ də, à mʋ̀ Ba-Yígúrə́-Jə-Tiu nə yɩ ba Yɩɩ.»
13 Kʋ didəni tə tətə nə, lwí twi, tə kun Yɩzərayɛlə dwíí tə dəkuu bwálɩ́ tə nə. Yá jɩjʋ nə, nyʋ̀nʋ̀ vwə, kʋ kɩkarɩ ba dəkuu bwálɩ́ tə. 14 Máŋá tə, nyʋ̀nʋ̀ təntə nə warɩ, kʋ yá won, ndə baasɩ nəpon nə, tɩa tə yuu, kasɔɔ lanworu tə wa. 15 Yɩzərayɛlə dwíí tə ywàń kʋ, ba ga bwe duən, ba wʋ́: «Kʋ tə yɩ bɛ̀ɛ̀ won?» Cɩ́gá, ba yà yəri won tə, kʋ nə yɩ. Yá Moyizə dàń swɩ̀n ba con, ʋ wʋ́: «Kʋ yɩ wodiu, Ba-Yígúrə́-Jə-Tiu nə pɩn aba, sə á də́. 16 Á nəŋə kʋ tə, Ba-Yígúrə́-Jə-Tiu nə pɩn nii, sə kʋ tʋn. Á lìù mama pɛ̀ tə, kʋ mɛ ʋ diŋə. Lìù mama pɛ̀ litərə bələ. Lɩ̀à tə nii, ba nə wulə gansili nədʋ wa, mə litərə nii nə, ba nə mɛ sə ba pɛ̀.» 17 Yá Yɩzərayɛlə dwíí tə tʋn kʋ nətʋ tə. Ba duən pɛ̀ zənzən, ba duən də ga pɛ̀ mancɩn. 18 Ba man tə də omɛrə, yá lìù tə, ʋ nyiən yà nə dáá zənzən, tə yà ba ʋ diŋə dwə. Lìù tə də, ʋ nyiən yà nə yɩ mancɩn, tə yà wà ʋ diŋə mùrì. Lìù mama yà pɛ̀, kʋ mɛ ʋ diŋə.
19 Moyizə swɩ̀n ba con, ʋ wʋ́: «Á lìù mama dàn ká tún wodiu təntə, ʋ pa tɩa pʋrɩ, ka dà kʋ nə.» 20 Yá lɩ̀à duən wà Moyizə con tan. Ba tún ba wodiu, ba pa tɩa pʋrɩ, ka dà kʋ nə, yá kʋ pʋa, kʋ jì zʋnzʋran. Moyizə lɩŋa zàn lɩ̀à təntə yuu wa. 21 Jɩjʋ mama, lìù mama yàá pɛ̀, kʋ mɛ ʋ diŋə. Yá máŋá tə, yɩcaʋ bárɩ́ nə mà kʋ, kʋ yàá nyɩan.
22 Bardʋ nii dɩɩn tə nə, ba pɛ̀ wodiu tə dəkurən bələ. Ba pɛ̀ litərə nana, lìù mama. Yɩzərayɛlə púlí tə yáá tɩ̀án tə mama twi, ba tún ba nii, ba bɩrɩ Moyizə nə. 23 Yá ʋ swɩ̀n ba con, ʋ wʋ́: «Mə kʋ mʋ̀ nə Ba-Yígúrə́-Jə-Tiu yà swɩ̀n. Jwɩan yɩ sìə́ dɩɩn nəfarʋ. Kʋ yɩ Ba-Yígúrə́-Jə-Tiu dɩɩn. Á sàŋà kʋ tə, á nə pɩ̀à, sə á sàn, á ga wùrì kʋ tə, á nə pɩ̀à, sə á wùrì. Yá kʋ tə mama nə wá ga tə, á túŋə́ kʋ vàn nə, də tɩa pʋrɩ.» 24 Ba tún wodiu gɩganɩ tə, tɩa pʋrɩ, ka dà kʋ nə, ndə Moyizə nə pɩn nii, sə ba tʋn nətʋ, yá kʋ mʋ̀ wà pwɩ, zʋnzʋran də ga wà kʋ wa yɩn. 25 Moyizə swɩ̀n, ʋ wʋ́: «Á díə́ wodiu təntə zə̀n. Cɩ́gá, zə̀n kʋ tə yɩ sìə́ dɩɩn, kʋ nə pɩn dun Ba-Yígúrə́-Jə-Tiu nə. Zə̀n kʋ tə, á kʋ́ʋ̀ bá na wodiu tə, kàrá wa, á pɛ̀. 26 Á wá pɛ̀ wodiu tə, dɩan bardʋ. Yá barpɛ nii dɩɩn tə yɩ sìə́ dɩɩn. Wodiu tə bá ya lá.»
27 Barpɛ nii dɩɩn tə nə, lalʋʋ tə wa lɩ̀à duən nan, sə ba pɛ̀ wodiu tə, yá ba wà kʋ nɩ. 28 Ba-Yígúrə́-Jə-Tiu dàń ma swɩ̀n Moyizə con, ʋ wʋ́: «Á tə wá vɩ, sə á twá yìə̀n tə nə, à nə pɩn aba nii, sə á tʋn, kʋ dán kʋ mɛ nətə? 29 Á ywàŋá! À mʋ̀ Ba-Yígúrə́-Jə-Tiu pɩn aba sìə́ dɩɩn tə. Kʋ mʋ̀ nə pɩn, bardʋ nii dɩɩn tə nə, à pɩn aba dɩan bələ wodiu. Á lìù mama mɛn bwálɩ́ tə wa, ʋ nə wulə. Lìù mama dàn ká zàn ʋ bwálɩ́ wa, ʋ nan, barpɛ nii dɩɩn tə nə.» 30 Yá Yɩzərayɛlə dwíí tə dàń zìlí barpɛ nii dɩɩn tə, kʋ nə yɩ sìə́ dɩɩn.
31 Yɩzərayɛlə dwíí tə dɩga wodiu təntə yɩrɩ manə. Kʋ yà yɩ ndə baasɩ nəpon nə, kʋ ga ywàń, ndə tʋ̀ràn ŋʋ̀nán nə. 32 Moyizə swɩ̀n, ʋ wʋ́: «Á Nəŋə kʋ tə Ba-Yígúrə́-Jə-Tiu nə pɩn nii, sə á tʋn. Á lɩa manə tə, á kə zʋŋa wa, á tún á dwíə́ tə mama yɩrɩ, á nə wá kə lʋʋ wa. Kʋ nətʋ wá pa, ba də na wodiu tə, ʋ nə ma kʋ̀nɩ̀ aba, kasɔɔ lanworu tə wa, máŋá tə wa, ʋ nə pɩn á nan, á yá Ezwipətə lʋʋ nii tə.» 33 Moyizə swɩ̀n Aron con, ʋ wʋ́: «Tì kwàrá, n man manə, n kə ka wa, n tún Ba-Yígúrə́-Jə-Tiu yáá con, sə kʋ ya lá, á dwíə́ tə mama yɩrɩ, á nə wá kə lʋʋ wa.» 34 Aron twá Ba-Yígúrə́-Jə-Tiu nii tə nə, ʋ nə pɩn Moyizə nə. Ʋ tún manə tə, Yɩɩ nimarʋ dansɩa* won tə yáá con, sə kʋ ya lá, máŋá mama.