Yɩɩ pɩn nɩ́á nan pɩ̀ʋ̀ wa, sə ʋ lɩ̀à tə nyʋn
17
1 Yɩzərayɛlə púlí tə mama kʋ́ʋ̀ nan Sin kasɔɔ lanworu tə wa, ba vìí, ndə Ba-Yígúrə́-Jə-Tiu nə pɩn ba cwəŋə, sə ba tʋn nətʋ. Ba vəli də jəni, ba va ba kə ba dəkuu bwálɩ́ Refidimə nə. Yá nɩ́á yà tə̀lə́ lá, sə lalʋʋ tə nyʋn. 2 Ba dàń dɩga jara də Moyizə, ba wʋ́: «Pa nəba nɩ́á sə nə nyʋn!» Moyizə ma le ba, ʋ wʋ́: «Bɛ̀ɛ̀ nə pɩn, á dɩ jara də nə? Bɛ̀ɛ̀ nə pɩn, á də́də́ŋə́ Ba-Yígúrə́-Jə-Tiu?» 3 Nanyʋnɩ yà jə lalʋʋ tə zənzən, kʋ bwálɩ́ təntə wa. Ba ŋʋŋwɩn ba zɩgɩ Moyizə nə, ba wʋ́: «Bɛ̀ɛ̀ nə pɩn, n ma lɩ nəba Ezwipətə nə? Kʋ yɩ n pɩ̀à sə nanyʋnɩ gʋ nə də nə bɩ̀á tə, də nə vàná tə naaa?» 4 Moyizə bubwi ʋ kə Ba-Yígúrə́-Jə-Tiu nə, ʋ wʋ́: «Bɛ̀ɛ̀ nə à wá fwa, à pa lalʋʋ kʋ tə nə? Máŋá mancɩn wa, ba wá dɩlɩ nə də kapana!» 5 Ba-Yígúrə́-Jə-Tiu ma swɩ̀n Moyizə con, ʋ wʋ́: «Kɛ̀ń n ya lalʋʋ tə yáá, n ga ja Yɩzərayɛlə dwíí nəkwɩna tə duən, n ma kwé n tɩ̀àn. Tì n daduu tə də, n nə ma mà Nilə mʋnaa tə, n ja va. 6 À mʋ̀ wá zɩgɩ n yáá con yəbə, pɩ̀ʋ̀ tə yuu wa, Ɔrɛbə nə. N wá mà pɩ̀ʋ̀ tə, yá nɩ́á wá nan kʋ wa, sə lalʋʋ tə nyʋn.» Moyizə tʋn kʋ nətʋ tə, Yɩzərayɛlə dwíí nəkwɩna tə yáá con. 7 Yɩzərayɛlə dwíí tə dɩga jara, ba ga dídə́n Ba-Yígúrə́-Jə-Tiu, bwálɩ́ təntə nə. Ba swɩ̀n, ba wʋ́: «Ba-Yígúrə́-Jə-Tiu wulə nə titəŋi wa, nə à yə̀ə́ ʋ tə̀lə́?» Kʋ nətʋ tə pɩn, Moyizə dɩ kʋ bwálɩ́ tə yɩrɩ, Masa də Meriba. (Kʋ də̀ń nə yɩ “Də́də́ŋú” də “Jara”).Amalɛkə dwíí tə zɩ̀n kʋ̀ʋ̀ də Yɩzərayɛlə dwíí tə
8 Máŋá tə wa, Yɩzərayɛlə dwíí tə yà nə wulə Refidimə nə, Amalɛkə dwíí tə twi, ba ta kʋ̀ʋ̀ də ba. 9 Yá Moyizə dàń swɩ̀n Zozuwe con, ʋ wʋ́: «Kúrí bara, n ja nan, n ma ta Amalɛkə dwíí tə. Jwɩan nə, à wá zɩgɩ paan tə yupara wa, də Yɩɩ daduu tə, à jɩɩn wa.» 10 Zozuwe tʋn kʋ tə, Moyizə nə swɩ̀n ʋ con, sə ʋ ma ta Amalɛkə dwíí tə. Yá Moyizə, də Aron, də Urə dɩ̀gà paan tə yupara wa. 11 Máŋá tə, Moyizə nə zɩ̀n ʋ jɩɩn yɩɩ nə, Yɩzərayɛlə dwíí tə nə yàá də́ dɩ̀àn. Yá ʋ jɩɩn tə nə cúə́ tɩa, Amalɛkə dwíí tə nə yàá də́ dɩ̀àn. 12 Kʋ twi kʋ mɛ máŋá don wa, də Moyizə jɩ̀àn tə gwarɩ. Aron də Urə ma tì kapan, ba tún, ba pa wá, ʋ jə̀ə́ kʋ yuu. Ba dàń kwé Moyizə jɩ̀àn tə nə, ba ja zɩga, ʋ don wulə vàn tə don nə, ʋ don də wulə vàn tə don nə. Moyizə jɩ̀àn tə dàń te yɩɩ nə, yɩɩ kori kʋ zʋ. 13 Yá Zozuwe dàń ta Amalɛkə dwíí tə, ʋ də́, də kwatara sɩ̀ʋ́.
14 Ba-Yígúrə́-Jə-Tiu swɩ̀n Moyizə con, ʋ wʋ́: «Pʋ́pʋ́nɩ́ yìə̀n tə tə, n kə sagɩ wa, sə á wànɩ́ á lìí tə yoo. Swɩ̀n Zozuwe con, də à wá cʋ̀gʋ̀ Amalɛkə dwíí tə, à pa ba jɛ́n tɩa yuu wa, mɩ́ámɩ́án.