Zwetəro twi ʋ na Moyizə
18
1 Zwetəro, ʋ nə yɩ Madɩan dwíí tə joŋwanʋ, ʋ ga yɩ Moyizə tɩnbɛɛ, nì kʋ tə mama, Yɩɩ nə tʋn, ʋ pa Moyizə də Yɩzərayɛlə dwíí tə nə, ba nə yɩ ʋ mʋ̀ Yɩɩ lɩ̀à. Ʋ nì nətʋ tə, Yɩɩ nə pɩn Yɩzərayɛlə dwíí tə nan, Ezwipətə lʋʋ nii wa. 2 Zwetəro jɩn Moyizə kan Sefora, Moyizə yà nə yá, ʋ pa, ʋ pìí ʋ va ʋ con, 3 də Moyizə bɩ̀á bələ tə, ʋ kə lá, ʋ bà. Bìú tə don yɩrɩ nə Gɛrəswomə. Kʋ də̀ń nə yɩ “vee”. Cɩ́gá, Moyizə yà twá kʋ nətʋ nə, ʋ swɩ̀n, ʋ wʋ́: «À yɩ vee, à twá à jə̀ə́ lʋʋ nii don wa.» 4 Ʋ don tə yɩrɩ nə Eliyezɛrə. Kʋ də̀ń nə yɩ, “à Yɩɩ tə yɩ jonu”. Cɩ́gá, Moyizə yà twá kʋ nətʋ nə, ʋ swɩ̀n, ʋ wʋ́: «Yɩɩ tə, à nyɩna nə jʋnɩ tə nə jon nə, Farawon kwatara sɩ̀ʋ́ tə jɩɩn wa.»5 Zwetəro, də Moyizə bɩ̀á tə, də ʋ kan tə, twi Moyizə con, kasɔɔ lanworu tə wa, bwálɩ́ tə wa, ʋ yà nə wulə, Yɩɩ paan tə nii nə. 6 Ʋ tʋn, ʋ kə Moyizə nə, ʋ wʋ́: «À mʋ̀, n tɩnbɛɛ Zwetəro nə ja n kan tə, də n bɩ̀á bələ tə, à bɩ̀àn, sə à na mʋ́.» 7 Moyizə nan, ʋ jəri ʋ tɩnbɛɛ tə, ʋ tʋ ʋ yáá yuu, ʋ pa wá dun, ʋ ga pùrì wá, ʋ kə ʋ nyʋnɩ nə. Ba bwe duən yazurə nə, ba ga zʋ Moyizə gansili də̀ń. 8 Moyizə man kʋ tə mama, Ba-Yígúrə́-Jə-Tiu nə tʋn Farawon, də Ezwipətə tɩ̀án yɩra, Yɩzərayɛlə dwíí tə yɩrɩ, ʋ bɩrɩ ʋ tɩnbɛɛ tə nə. Ʋ man càn tə də mama, tə nə yí ba cwəŋə wa, Ba-Yígúrə́-Jə-Tiu ga jon ba tə wa, ʋ bɩrɩ wá. 9 Zwetəro pùə́ poli, zəni tə mama yɩrɩ, Ba-Yígúrə́-Jə-Tiu nə tʋn Yɩzərayɛlə dwíí tə yɩra, ʋ ma jon ba, Ezwipətə tɩ̀án jɩɩn wa. 10 Yá Zwetəro swɩ̀n, ʋ wʋ́: «À bwɩ Ba-Yígúrə́-Jə-Tiu nə, ʋ nə jon aba, Ezwipətə tɩ̀án də Farawon jɩɩn wa yɩrɩ. Ʋ mʋ̀ nə jon lalʋʋ tə, Ezwipətə tɩ̀án dɩ̀àn tə jɩɩn wa. 11 Sɩ́ʋ́n nə, à dàń yə̀ə́ də, Ba-Yígúrə́-Jə-Tiu dɩ̀àn dwə yɩa tə mama. Ʋ bɩrɩ kʋ nətʋ tə, máŋá tə wa, Ezwipətə tɩ̀án tə nə fɩfɩn Yɩzərayɛlə dwíí tə.» 12 Zwetəro dàń ja joŋi, ba nə sʋ̀rɩ́, də jwəŋə duən, ʋ bà, ʋ pa ba fwa, ba pa Yɩɩ nə. Aron də Yɩzərayɛlə dwíí nəkwɩna tə mama twi, ba də Moyizə tɩnbɛɛ tə də́ wodiu tə, Yɩɩ yáá con.
13 Kʋ tɩpʋrɩ nə, Moyizə nan ʋ jə̀ə́, sə ʋ bʋ̀rɩ̀ lalʋʋ tə yìə̀n bʋra. Yá lalʋʋ tə mama dàń zɩgɩ yɩɩ nə, ʋ yáá con wuuu, kʋ nə zɩgɩ jɩjʋ, kʋ va kʋ yí didəni. 14 Moyizə tɩnbɛɛ tə nɩ kʋ tə mama, ʋ nə tʋŋa, ʋ pɩn lalʋʋ tə nə, ʋ ga swɩ̀n, ʋ wʋ́: «Bɛ̀ɛ̀ nə n fwa, n pɩn lalʋʋ tə nə nətən? Bɛ̀ɛ̀ nə pɩn, n cɩcɩ ma tʋŋa tʋtʋŋɩ təntə, yá lalʋʋ tə mama zɩga yɩɩ nə, n yáá con, kʋ nə zɩgɩ jɩjʋ, kʋ ja va didəni?» 15 Moyizə le ʋ tɩnbɛɛ tə, ʋ wʋ́: «Kʋ yɩ lalʋʋ tə twi à con, ba pɩn à boŋə, à kəni Yɩɩ nə, à pɩn ba. 16 Yoo nə wulə ba pwə̀rə́ wa, ba yàá bà à con. Yá à mʋ̀ nə yàá zʋ ba pwə̀rə́ wa, à kwɛn kʋ yoo tə, à ga pa ba lwarɩ Yɩɩ nii tə, də yìə̀n tə, ʋ nə pɩn nii tə yuu wa.»
17 Moyizə tɩnbɛɛ tə swɩ̀n ʋ con, ʋ wʋ́: «Nətʋ tə n nə tʋŋa tə, ba ziən! 18 N tətə wá gwarɩ, yá lalʋʋ kʋ tə, kʋ nə wulə də mʋ́, də wá gwarɩ. Cɩ́gá, tʋtʋŋɩ tə dwə n jɩɩn zənzən. N cɩcɩ wàrɩ̀ kʋ, n tʋŋa. 19 Sɩ́ʋ́n nə, n dàń cʋgʋ à kori. À wá pa mʋ́ kwìə̀, yá Yɩɩ wá ya də mʋ́! N tətə jon lalʋʋ tə yuu nə, n ja ba yìə̀n tə, n va Yɩɩ yáá con, ba yuu yɩrɩ. 20 Bɩrɩ ba Yɩɩ nii tə, də yìə̀n tə, ʋ nə pɩn nii tə yuu wa. Bɩrɩ ba cwəŋə tə, ba nə mɛ, sə ba tì, də tʋtʋŋɩ tə, ba nə mɛ, sə ba tʋn. 21 N dàń wá ywàń lalʋʋ tə wa, n kúrí bara, ba nə jə dun, ba nə dəri Yɩɩ fən, ba nə yɩ cɩ́gá tɩ̀án, ba ga culi ka gɩgɩrɩ lɩ̀à wiən. Tún lɩ̀à təntə, sə ba duən ya lɩ̀à mʋ̀rʋ̀ yun tɩ̀án, ba duən, lɩ̀à bíí yun tɩ̀án, ba duən, lɩ̀à finu yun tɩ̀án, ba duən də, lɩ̀à fugə yun tɩ̀án. 22 Ba mʋ̀ nə wá bʋ̀rɩ̀ lalʋʋ tə yìə̀n bʋra, máŋá mama. Ba tətə wá bʋ̀rɩ̀ yobii tə mama bʋra, ba ga ja yìə̀n tə mama, tə nə dwə ba jɩɩn, ba bà n yáá con. Pwàrɩ̀ n yuu zɩlɩ tə, n ga, sə ba san mʋ́, ba zɩn. 23 N nə fwa kʋ nətʋ tə, də kʋ nə yɩ kʋ mʋ̀ yuu wa nə, Yɩɩ pɩn mʋ́ nii, n wá wànɩ́ n ja dɩ̀àn, yá lalʋʋ tə mama wá va ba yí, də sìə́.»
24 Moyizə cʋgʋ ʋ tɩnbɛɛ tə kori, ʋ ga tʋn kʋ tə mama, ʋ nə swɩ̀n ʋ con. 25 Ʋ kúrí bara, ba nə jə dun, Yɩzərayɛlə dwíí tə mama wa, ʋ tún, sə ba ya lalʋʋ tə yun tɩ̀án. Ba duən yɩ lɩ̀à mʋ̀rʋ̀ yun tɩ̀án, ba duən, lɩ̀à bíí yun tɩ̀án, ba duən, lɩ̀à finu yun tɩ̀án, ba duən də, lɩ̀à fugə yun tɩ̀án. 26 Ba yà bʋ̀rɩ̀ lalʋʋ tə yìə̀n bʋra, máŋá mama. Ba yà janɩ yìə̀n tə nə dwə ba jɩɩn, ba twi Moyizə yáá con, ba tətə ga bʋ̀rɩ̀ yobii tə mama bʋra.
27 Kʋ kwa nə, Moyizə pɩn cwəŋə ʋ tɩnbɛɛ tə nə, ʋ pìí ʋ va ʋ lʋʋ nii wa.