YƖƖ TUN NIMARƲ DƏ YƖZƏRAYƐLƏ DWII TƏ
Yɩɩ wulə ʋ tanɩ Yɩzərayɛlə dwíí tə, sə ʋ pa ba ʋ nimarʋ tə
19
1-2 Yɩzərayɛlə dwíí tə zàn Refidimə nə, ba va Sinayi kasɔɔ lanworu tə wa. Dɩɩn tə, ba nə yí Sinayi kasɔɔ lanworu tə wa, də ba nə nan Ezwipətə nə, kʋ jə cànɩ̀ batwa. Ba ken ba dəkuu bwálɩ́ kasɔɔ lanworu tə wa, Sinayi paan tə nii nə.3 Moyizə dɩ̀gà paan tə yuu, sə ʋ jəri Yɩɩ. Yá Ba-Yígúrə́-Jə-Tiu dàń bon wa, ʋ swɩ̀n ʋ con, ʋ wʋ́: «Nə̀ń kʋ tə, n nə wá swɩ̀n Yɩzərayɛlə dwíí tə con, ba nə yɩ Zwakɔbə dwíí tə. 4 Á tətə nɩ kʋ tə, à nə tʋn Ezwipətə tɩ̀án yɩra. Á yɩ à tì aba, ndə zənpuu nə tì kʋ bɩ̀á, kʋ vànà yuu wa nətʋ, à ja bà à con yəbə. 5 Sɩ́ʋ́n nə, á nə cʋgʋ à kori, á ga twá à nimarʋ tə nə, á wá ya à mʋ̀ tətə lɩ̀à, à nə ba á yoo sɛ̀, dwíə́ tə mama wa. Cɩ́gá, tɩa tə mama yɩ à mʋ̀ nə tɩ. 6 Á mʋ̀ dàń wá ya à joŋwana payuu, á ga wá ya dwíí tə, á nə yɩ à mʋ̀ Yɩɩ cɩcɩ nyiən. Mə sʋ̀ràn təntə nə, n wá swɩ̀n Yɩzərayɛlə dwíí tə con.»
7 Moyizə twi ʋ bon Yɩzərayɛlə dwíí nəkwɩna tə, ʋ tún sʋ̀ràn təntə mama, ʋ bɩrɩ ba, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ. 8 Lalʋʋ tə mama ken nii nədʋ, ba le, ba wʋ́: «Nə wá tʋn kʋ tə mama, Ba-Yígúrə́-Jə-Tiu nə swɩ̀n.» Moyizə ma pìí ʋ ja lalʋʋ tə sʋ̀ràn tə, ʋ va ʋ swɩ̀n Ba-Yígúrə́-Jə-Tiu con. 9 Yá Ba-Yígúrə́-Jə-Tiu dàń swɩ̀n Moyizə con, ʋ wʋ́: «À wá ya bakwan lələru wa, à bà n con, sə lalʋʋ tə wànɩ́ ba nì, máŋá tə wa, à nə swɩ̀n də mʋ́. Yá ba dàń wá pa cɩ́gá n də nə, máŋá mama.» Moyizə bwɛ́, ʋ swɩ̀n lalʋʋ tə sʋ̀ràn tə, Ba-Yígúrə́-Jə-Tiu con.
10 Ba-Yígúrə́-Jə-Tiu swɩ̀n Moyizə con, ʋ wʋ́: «Vəli lalʋʋ tə con, n pa ba kwɛn ba tɩ̀àn, ba lɩ durən yìə̀n wa, zə̀n də jwɩan mama, sə ba ga sɩ̀n ba gànàn. 11 Ba kənə ba sírí, ba ma dàn batwa nii dɩɩn tə. Cɩ́gá, batwa nii dɩɩn tə nə, à mʋ̀ Ba-Yígúrə́-Jə-Tiu wá cú Sinayi paan tə yuu, lalʋʋ tə mama yɩ́á yuu. 12 N wá kə sɩswɩan, n ja kɩkarɩ paan tə, n pa lalʋʋ tə nə, n ga swɩ̀n ba con, sə ba dàn ká dɩ̀ paan tə yuu, ba dàn ká dwen ka yɩra də tətə. Lìù tə mama, ʋ nə dwen paan tə yɩra, ʋ mɛ, sə ba gʋ wá. 13 Kʋ mʋ̀ lìù təntə, ba wà mɛ, sə ba dwen ʋ yɩra, də jɩɩn. Ʋ yɩ ba mɛ, sə ba dɩlɩ də kapana, nə à yə̀ə́ ba ta wá, də cɩan, ba gʋ. Kʋ nə yɩ vànɩ́, kʋ wà mɛ, sə kʋ ya lʋʋ wa. Kʋ kʋ́ʋ̀ nə yɩ ləzwənə də, ʋ wà mɛ, sə ʋ ya lʋʋ wa. Kʋ yɩ máŋá tə cɩcɩ wa, ba nə nì pabɩʋ nyʋn nabwanʋ tə kori nə, ba wa lɩ̀à duən wá dɩ̀ paan tə yuu wa.»
14 Moyizə nan paan tə yuu, ʋ cú lalʋʋ tə con. Ʋ pɩn ba kwɛn ba tɩ̀àn, ba lɩ durən yìə̀n wa, ba ga sɩ̀n ba gànàn. 15 Ʋ swɩ̀n ba con, ʋ wʋ́: «Á kənə á sírí, dɩan batwa nii nə. Á dànà ká pə̀ń kan nə, kʋ dɩan təntə wa, mɩ́ámɩ́án.»
16 Batwa nii dɩɩn tə jɩjʋ nə, dwà bagʋ, də dwà pɩpɩlʋ, də bakwan nəfarʋ yɩn paan tə yuu wa, ba ga nì nabwanʋ kori nəfarʋ. Yá lɩ̀à tə mama nə wulə dəkuu bwálɩ́ tə wa, dàń wulə ba vɩvaga. 17 Moyizə pɩn lalʋʋ tə nan, ba dəkuu bwálɩ́ tə nə, sə ba jəri Yɩɩ. Yá ba dàń vəli, ba zɩga paan tə də̀ń nə. 18 Ba-Yígúrə́-Jə-Tiu yɩn mən wa, ʋ bà ʋ cú Sinayi paan tə yuu wa. Yá paan tə yuu mama dàń yà yɩ bakwan. Bakwan təntə yà zaŋa, ndə mən nəfarʋ ŋwɩn nə, paan tə mama ga vuvugə də dɩ̀àn. 19 Nabwanʋ tə kori dàń yà kwɛn kʋ súrí. Moyizə yà swɩ̀n, yá Yɩɩ ga le wá, də kori nəfarʋ, ndə dwà bagʋ nə. 20 Mə nətʋ nə, Ba-Yígúrə́-Jə-Tiu cúə́ Sinayi paan tə yupara wa. Ʋ zɩgɩ lá nə, ʋ bon Moyizə, yá Moyizə dɩ̀gà paan tə yuu wa.
21 Ba-Yígúrə́-Jə-Tiu swɩ̀n Moyizə con, ʋ wʋ́: «Cú, n dù suu lalʋʋ tə nii nə, ba dànà ká sɩnɩ ba bɩbarɩ, ba dɩ̀ à con, sə ba ma ywàń nə. Kʋ nə tà nətʋ, ba lɩ̀à kapʋpʋ wá tɩ. 22 Joŋwana tə tətə, ba nə wàá à yɩra ba bólí, mɛ sə ba dí yáá ba kwɛn ba tɩ̀àn, ba lɩ durən yìə̀n wa. Kʋ nə tà nətʋ, à wá cʋ̀gʋ̀ ba wa lɩ̀à.» 23 Moyizə swɩ̀n Ba-Yígúrə́-Jə-Tiu con, ʋ wʋ́: «Lalʋʋ tə wàrɩ̀ Sinayi paan tə yuu ba dɩ̀. Cɩ́gá, n tətə nə pɩn, nə kə sɩswɩan, nə ja kɩkarɩ paan tə, sə ka ya culu won.» 24 Ba-Yígúrə́-Jə-Tiu ma swɩ̀n ʋ con, ʋ wʋ́: «Pìí n cú, n ja Aron, n ja dɩ̀. Yá joŋwana tə, də lalʋʋ tə mʋ̀ dànà ká sɩnɩ ba bɩbarɩ, ba dɩ̀ à con. Kʋ nə tà nətʋ, à wá cʋ̀gʋ̀ ba wa lɩ̀à.» 25 Yá Moyizə dàń cúə́, ʋ swɩ̀n lalʋʋ tə con.