Sʋ̀ràn fugə tə, Yɩɩ nə pɩn nii tə yuu wa
20
1 Yɩɩ dàń swɩ̀n sʋ̀ràn tə tə mama, ʋ wʋ́:2 «À mʋ̀ nə yɩ Ba-Yígúrə́-Jə-Tiu, á Yɩɩ tə, à nə lɩ aba, yongaʋ tə wa, Ezwipətə lʋʋ nii tə wa.
3 N wà mɛ sə n ja yɩa duən, n súrí à nə.
4 N wà mɛ sə n fwa woŋwanan, tə nə yɩ wiən tə nə wulə lanworu wa nyɩnyɩga, nə à yə̀ə́ wiən tə nə wulə tɩa yuu wa nyɩnyɩga, nə à yə̀ə́ wiən tə nə wulə nɩ́á wa, tɩa də̀ń, nyɩnyɩga. 5 N wà mɛ sə n tʋ n nadwana yuu, tə yáá con, n pa tə dun*, yá n wà mɛ sə n tʋn n pa tə. Cɩ́gá, à mʋ̀ Ba-Yígúrə́-Jə-Tiu, n tíú Yɩɩ yɩ Yɩɩ tə à nə jə badoli. À yàá ŋwɩ́n nyɩna-ba tə nə dʋŋa nə cʋna ŋwɩ́rán ba bɩ̀á yɩra, kʋ va kʋ yí ba dwíí tə dəkurən batwa də banɩa nii nyiən. 6 Yá à yàá tʋn wʋywaŋʋ* lɩ̀à tə yɩra ba nə swə nə, ba ga twá à yìə̀n tə nə, à nə pɩn nii tə yuu wa, kʋ va kʋ yí ba dwíí tə dəkurən mʋ̀rʋ̀ nii nyiən.
7 N wà mɛ sə n bon à mʋ̀ Ba-Yígúrə́-Jə-Tiu, n tíú Yɩɩ yɩrɩ tə vɛɛ. Cɩ́gá, à mʋ̀ Ba-Yígúrə́-Jə-Tiu wá jələ lìù tə nə boŋə à yɩrɩ tə vɛɛ, ndə cʋna lìù nə.
8 Lìí sìə́ dɩɩn tə yoo, sə n pa kʋ ya à mʋ̀ cɩcɩ nyiən. 9 N jə dɩan bardʋ dapanɩ wa, sə n ma tʋn n tʋ̀tʋ̀nán mama. 10 Yá barpɛ nii dɩɩn tə yɩ à mʋ̀ Ba-Yígúrə́-Jə-Tiu, n tíú Yɩɩ sìə́ dɩɩn. N wà mɛ sə n tʋn won mama kʋ dɩɩn nə. Kʋ nə yɩ n tətə, nə à yə̀ə́ n bìú, nə à yə̀ə́ n bʋ̀á, nə à yə̀ə́ n tʋtʋnbiu, nə à yə̀ə́ n tʋtʋnbʋa, nə à yə̀ə́ n vàná, nə à yə̀ə́ vee tə nə twá ʋ jə̀ə́ n con. 11 Cɩ́gá, dɩan bardʋ nə, à mʋ̀ Ba-Yígúrə́-Jə-Tiu tì, à ma fwa lanworu, də tɩa, də mʋʋ, də wiən tə mama, tə nə wulə tə wa. Yá barpɛ nii dɩɩn tə nə, à sìí. Kʋ mʋ̀ nə pɩn, à mʋ̀ Ba-Yígúrə́-Jə-Tiu ma fwa zəni, sìə́ dɩɩn tə yuu wa, à ga lɩ kʋ, à tún, sə kʋ ya à cɩcɩ nyiən.
12 Zìlí n nyɩna də n nuu, sə kʋ pa n mɩɩ ya danɩ lʋʋ nii tə wa, à mʋ̀ Ba-Yígúrə́-Jə-Tiu, n tíú Yɩɩ nə pɩn mʋ́.
13 N wà mɛ sə n gʋ lìù.
14 N wà mɛ sə n cwàrɩ̀.
15 N wà mɛ sə n ŋʋ.
16 N wà mɛ sə n kʋna kʋ̀nkʋ̀n, n kə n don nii nə.
17 N wà mɛ sə n pa n yii zʋ n jəndon dìə̀. N wà mɛ sə n pɩ̀à n jəndon kan. N wà mɛ sə n pa n yii zʋ ʋ tʋtʋnbiu, nə à yə̀ə́ ʋ tʋtʋnbʋa, nə à yə̀ə́ ʋ naʋ, nə à yə̀ə́ ʋ bɩ̀nà, nə à yə̀ə́ won tə mama, kʋ nə yɩ n jəndon tə nə tɩ.»
18 Lalʋʋ tə mama yà nə̀ń dwà bagʋ tə, də nabwanʋ tə kori, ba ga na dwà pɩpɩlʋ tə, də paan tə, bakwan tə nə súə́ ka yuu. Yogwarʋ təntə pɩn lalʋʋ tə vɩvaga, ba ga va ba zɩga yiŋʋnɩ. 19 Ba swɩ̀n Moyizə con, ba wʋ́: «N tətə swɩ̀n nə con, nə wá cʋgʋ. Yá Yɩɩ mʋ̀ dàn ká swɩ̀n nə con, kʋ nə tà nətʋ, nə wá tɩ.» 20 Moyizə le ba, ʋ wʋ́: «Á dànà ká pa fən ja aba. Cɩ́gá, Yɩɩ yɩ ʋ twi, sə ʋ dídə́n aba, sə kʋ pa, á dəri ʋ fən, á dàn ká tʋn cʋna.» 21 Lalʋʋ tə yà zɩga yiŋʋnɩ, yá Moyizə mʋ̀ ga va, ʋ bólí bakwan nəfarʋ tə yɩra, Yɩɩ nə wulə kʋ wa.
Nii tə Yɩɩ nə pɩn, ʋ joŋi bwálɩ́ tə yɩrɩ
22 Ba-Yígúrə́-Jə-Tiu swɩ̀n Moyizə con, sə ʋ swɩ̀n yìə̀n tə tə, Yɩzərayɛlə dwíí tə con, ʋ wʋ́: «Á nɩ də à zɩgɩ lanworu wa, à swɩ̀n á con. 23 Á wà mɛ, sə á ja səbiu, nə à yə̀ə́ sɩ́án, á ma fwa yɩa duən, á súrí à nə. Á dànà ka fwa kʋ də mama. 24 Á mɛ, sə á lwà joŋi bwálɩ́ də tɩran, á pa nə. Á wá ja á vanmɩnɩ, də á vanfaran, á ma fwa jwəŋə, ba nə sʋ̀rɩ́*, də nimarʋ jwəŋə*, kʋ yuu wa, á pa nə. Yá bwálɩ́ tə mama, à nə wá bɩrɩ, sə á bʋ́n à yoo, à wá bà lá, à fwa zəni á yɩra. 25 Á nə pɩ̀à, sə á lwà kapana joŋi bwálɩ́, á pa nə, á dànà ká lwà kʋ də kapana, ba nə sárɩ́. Cɩ́gá, á nə sárɩ́ kapana də á tʋtʋnzɩlɩ, á kʋ́ʋ̀ wàrɩ̀ tə, á ma fwa won, á pɩn nə. 26 Á wà mɛ, sə á fwa nacanɩ, á ja dɩ̀ à joŋi bwálɩ́ tə yuu wa, sə ba dàn ká na lìù tə, ʋ nə dɩ̀ lá tə cavɩra.»