Nii tə Yɩɩ nə pɩn ywə́ŋə́ yuu wa
21
1 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Nə̀ń yìə̀n tə, n nə mɛ, sə n bɩrɩ Yɩzərayɛlə dwíí tə nə. 2 Á wa lìù nə yə̀ yoŋu, yoŋu tə nə yɩ Ebərə, ʋ wá tʋn ywə́n tʋ̀tʋ̀nán tə bɩna bardʋ. Yá barpɛ nii bɩnɩ tə nə, ʋ mɛ sə ʋ tɩnɩ ʋ tɩ̀àn, ʋ ga ba won mama ŋwɩ́n. 3 Də ʋ yà nə ba kan jə, máŋá tə wa, ʋ nə jìgə̀ yoŋu tə, ʋ cɩcɩ nə wá tɩnɩ ʋ tɩ̀àn. Də ʋ yà nə jə kan, də ʋ tə wà yoŋu jì, kʋ máŋá tə wa, ʋ də ʋ kan tə mɛ nə wá tɩnɩ ba tɩ̀àn. 4 Kʋ nə yɩ, ʋ yuu tíú tə nə swe kan, ʋ pa wá, yoŋu tə də kan tə nə lɩrɩ bibara, nə à yə̀ə́ bikana, kan tə də bɩ̀á tə wá ya yuu tíú tə nyiən, yá yoŋu tə cɩcɩ ga tɩnɩ ʋ tɩ̀àn. 5 Yá yoŋu tə dàń nə swɩ̀n, ʋ wʋ́: “À swə à yuu tíú tə, də à kan tə, də à bɩ̀á tə, à ba pɩ̀à, sə à tɩnɩ à tɩ̀àn”, 6 ʋ yuu tíú tə wá ja wá, ʋ bà Yɩɩ yáá cona. Kʋ kwa nə, ʋ wá pa, ʋ zɩgɩ mimii bòrùb yɩra, nə à yə̀ə́ kʋ səpuni dàʋ̀ yɩra, ʋ ga pórí yoŋu tə zɩɩn də líú. Yá ʋ dàń wá ya ʋ yuu tíú tə yoŋu, máŋá mama wuuu.7 Bɛɛ nə yoli ʋ bʋ̀á, sə ʋ ya yoŋu, bʋ̀á tə bá pìí, ʋ tɩnɩ ʋ tɩ̀àn, ndə yonbara tə nə. 8 Ywə́n kan tə nə ba ʋ yuu tíú tə, ʋ nə yə̀ wá, sə ʋ ma fwa ʋ kan, fɩra nə twá, yuu tíú tə mɛ, sə ʋ yá, ʋ pa yonkan tə lɩ̀à yə̀ wá, ba jon. Yá ʋ dàń nə ba cwəŋə jə, sə ʋ yoli wá dwíí nəkaʋ yuu wa. Kʋ nətʋ tə wà mɛ. 9 Bʋ̀á tə nə yɩ, bɛɛ tə yə̀, ʋ pa ʋ bìú nə, sə ʋ bìú tə ma fwa ʋ kan, bɛɛ tə mɛ, sə ʋ ja wá, ndə ʋ nə mɛ, sə ʋ ja ʋ bʋ̀á nətʋ. 10 Yuu tíú tə nə tì kan don, ʋ wà mɛ, sə ʋ mun yonkan tə nii wodiu, nə à yə̀ə́ ʋ yɩra gànàn, nə à yə̀ə́ ʋ də wá sapaa. 11 Yuu tíú tə nə ba yìə̀n batwa təntə tʋŋa, ʋ pɩn wá, yonkan tə jə cwəŋə, sə ʋ nan, ʋ tɩnɩ ʋ tɩ̀àn, ʋ ga ba darsɩ mama ŋwɩ́n.»
Nii tə Yɩɩ nə pɩn mà, də nʋran ka tún lɩ̀à yɩra yuu wa
12 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Lìù nə mà ʋ don, ʋ gʋ, ʋ mɛ, sə ba gʋ ʋ də. 13 Kʋ wàá də, lagʋrʋ tə tà ʋ sɩnɩ, ʋ gʋ ʋ don tə. Yá kʋ dàń nə yɩ à mʋ̀ Yɩɩ nə pɩn, kʋ twá də lagʋrʋ tə jɩɩn, ʋ don tə ma tɩ, à wá bɩrɩ bwálɩ́, sə lagʋrʋ tə dəri ʋ va, ʋ kwálɩ́ ʋ yuu lá. 14 Yá lìù nə sɩnɩ, ʋ tʋn swɩan, ʋ ma gʋ ʋ don, də ʋ nə swə, ʋ dəri ʋ va, ʋ kwálɩ́ ʋ yuu à joŋi bwálɩ́ tə də tətə nə, ʋ mɛ, sə ba van wá, ba lɩ lá, ba gʋ.
15 Lìù nə mà ʋ nyɩna, nə à yə̀ə́ ʋ nuu, ʋ mɛ, sə ba gʋ wá.
16 Lìù nə ŋʋan ləzwənə ʋ yoli, nə à yə̀ə́ ləzwənə tə nə wulə ŋwɩ̀àn tə con, ŋwɩ̀àn tə mɛ, sə ba gʋ wá.
17 Lìù nə zɩrɩ ʋ kə ʋ nyɩna, nə à yə̀ə́ ʋ nuu nə, ʋ mɛ, sə ba gʋ wá.
18 Lɩ̀à bələ nə dɩga jara, ba lìù don wàá ʋ don tə ʋ mà də cwàrɩ́, nə à yə̀ə́ ʋ dɩlɩ wá də kapan. Ʋ tə ba mà tə wàá ʋ ba tɩ, yá ʋ ga yɩ̀, ʋ pə̀ní tɩa. 19 Máŋá tə wa, ʋ nə twi ʋ bà, ʋ wàá ʋ zaŋa, ʋ vəli də daduu, kʋ yoo tə wá nan lìù tə nə mà wá, yuu wa. Lìù tə nə mà wá tə dàń nə mɛ, sə ʋ ŋwɩ́n yayɩŋʋ tə, ʋ nə cʋ̀gʋ̀ ʋ tʋ̀tʋ̀nán tə yɩrɩ, ʋ ga ywarɩ wá, ʋ kori ʋ na yazurə.
20 Lìù nə mà ʋ yonbɛɛ, nə à yə̀ə́ yonkan, yoŋu tə nə tɩga ʋ jɩɩn wa, yuu tíú tə mɛ, sə ba van ʋ zɩɩn nə. 21 Yá yoŋu tə nə fwa dɩɩn nədʋ, nə à yə̀ə́ dɩan bələ, ʋ ga zɩgɩ lá, ʋ tɩ, kʋ wà mɛ, sə ba van ʋ yuu tíú tə zɩɩn nə. Cɩ́gá, yoŋu tə yɩ, ʋ yə̀ də ʋ səbiu.
22 Bara nə jan, ba bwɩn kapuə, kʋ pa ʋ lɩra ʋ pùə́ tə, də ka máŋá wá yí, yolwan nə wà lá yɩn, kanbarɩ tə wá dɩ bwàń ba yuu, bʋra lɩ̀à ga bʋ̀rɩ̀, ba pa jarɩdɩra tə yoli bwàń tə. 23 Yá yolwan nə yí kapuə tə, kʋ mɛ, sə á pa, lìù nə lɩ ʋ don mɩɩ, sə á lɩ kʋ tíú də mɩɩ, á ma ŋwɩ́n. 24 Yii nə ŋwɩ́n yii, yeli nə ŋwɩ́n yeli, jɩɩn nə ŋwɩ́n jɩɩn, naa nə ŋwɩ́n naa. 25 Lìù nə sʋ̀rɩ́ ʋ don də mən, sə á sʋ̀rɩ́ kʋ tíú də, də mən, á ma ŋwɩ́n. Nʋʋ nə ŋwɩ́n nʋʋ, mà nə ŋwɩ́n mà.
26 Lìù nə mà ʋ yonbɛɛ, nə à yə̀ə́ ʋ yonkan yii, ʋ lá, ʋ mɛ, sə ʋ yá yoŋu tə, sə ʋ tɩnɩ ʋ tɩ̀àn, ʋ yii tə nə lá yɩrɩ. 27 Kʋ kʋ́ʋ̀ nə yɩ ʋ yonbɛɛ, nə à yə̀ə́ ʋ yonkan yeli nə, ʋ mà, ʋ kɛ́n, ʋ mɛ, sə ʋ yá yoŋu tə, sə ʋ tɩnɩ ʋ tɩ̀àn, ʋ yeli tə nə kɛ́n yɩrɩ.
28 Naʋ nə zuə bɛɛ, nə à yə̀ə́ kan, də kʋ nyʋran, kʋ gʋ, kʋ mɛ, sə ba dɩlɩ kʋ də kapana, ba gʋ. Kʋ wà mɛ, sə ba də́ kʋ nàŋʋ́. Yá kʋ bá ya naʋ tə tíú yuu yoo. 29 Yá naʋ tə yà nə dí yáá kʋ janɩ lɩ̀à, ba ga swɩ̀n kʋ tíú con, yá ʋ wà kʋ yuu ywàń, kʋ nə zuə bɛɛ, nə à yə̀ə́ kan, kʋ gʋ, kʋ mɛ, sə ba dɩlɩ naʋ tə də kapana, ba gʋ, ba ga gʋ kʋ tíú də. 30 Ba nə dɩga bwàń naʋ tə tíú yuu, sə ʋ yoli, ʋ ma jon ʋ mɩɩ tə, ʋ mɛ, sə ʋ pa won tə mama, ba nə wá swɩ̀n ʋ con, sə ʋ pa. 31 Naʋ tə nə zuə bibɛɛ, nə à yə̀ə́ bikan, kʋ gʋ, mə nətʋ nə, ba mɛ, sə ba tʋn kʋ tíú yɩra. 32 Naʋ tə nə zuə yonbɛɛ, nə à yə̀ə́ yonkan, kʋ gʋ, naʋ tə tíú mɛ, sə ʋ ŋwɩ́n wárʋ́ səbilurən* fɩtwa, ʋ pa yoŋu tə yuu tíú nə, ba ga dɩlɩ naʋ tə, ba gʋ.
33 Lìù nə kʋa nɩ́á gwàlʋ́, kʋ də̀ń nə lu, ʋ ga wà kʋ nii nə pwí, nə à yə̀ə́ ʋ súrí kʋ nii, ʋ dʋgʋ lá, naʋ, nə à yə̀ə́ bɩ̀nà nə tʋa kʋ wa, 34 nɩ́á gwàlʋ́ tə tíú mɛ, sə ʋ ŋwɩ́n vànɩ́ tə səbiu, ʋ pa vànɩ́ tə tíú nə, ʋ ga tì vantɩgʋ tə, ʋ ja. 35 Lìù naʋ nə zuə ʋ don naʋ, kʋ gʋ, ba lɩ̀à bələ tə mɛ, sə ba yoli naʋ tə nə nəŋə tə, ba tara kʋ səbiu. Ba mɛ, sə ba tara naʋ tə nə tɩga tə də. 36 Yá lɩ̀à yà nə yə̀ə́ naʋ tə yoo fuən, də kʋ zwe, kʋ tíú ga wà kʋ yuu ywàń, kʋ tíú mɛ, sə ʋ ja naniŋu, ʋ ma ŋwɩ́n natɩgʋ tə tíú, ʋ ga tì natɩgʋ tə, ʋ ja.»
Nii tə Yɩɩ nə pɩn vàná ŋwɩʋ yuu wa
37 Ba-Yígúrə́-Jə-Tiu kʋ́ʋ̀ swɩ̀n, ʋ súrí lá, ʋ wʋ́: «Lìù nə ŋʋan naʋ, nə à yə̀ə́ vanmɩna, ʋ nə gʋa vànɩ́ tə, nə à yə̀ə́ ʋ nə yoli kʋ, kʋ nə yɩ naʋ, ʋ mɛ, sə ʋ ŋwɩ́n kʋ tíú, də nɩan bonu. Yá kʋ nə yɩ vanmɩna, ʋ mɛ, sə ŋwɩ́n ka, də vanmɩnɩ banɩa.»