22
1 Ba-Yígúrə́-Jə-Tiu tə swɩ̀n, ʋ súrí lá, ʋ wʋ́: «Ba nə jɩn ŋwɩ̀àn, də ʋ wulə ʋ ŋwɩ̀n tɩtɩn nə, ba nə mà wá, ba gʋ, ʋ tɩan tə wa ba cʋna jə. 2 Yá yoo tə nə yɩ kʋ tʋn, də tɩa pʋrɩ, lagʋrɩ cʋna wulə lɩ̀à tə yuu wa, ba nə gʋa wá. Ŋwɩ̀àn mɛ, sə ʋ ŋwɩ́n won tə, ʋ nə ŋʋan. Ʋ nə ba won mama jə, sə ʋ ma ŋwɩ́n, ʋ mɛ, sə ba yoli wá, ba ma ŋwɩ́n won tə, ʋ nə ŋʋan tə. 3 Ba nə nɩ vànɩ́ tə, ʋ nə ŋʋan tə, ʋ con, də ʋ tə wà kʋ gwɩ, kʋ nə yɩ naʋ, nə à yə̀ə́ bɩ̀nà, nə à yə̀ə́ vanmɩna, ba wá jon vànɩ́ tə, ba tə ga pa, ʋ ŋwɩ́n vànɩ́ don, ʋ súrí kʋ nə.4 Lìù nə yá ʋ vàná, ʋ pa tə də́ ʋ don kárá, nə à yə̀ə́ ʋ don divɛn tɩ̀án kárá, vàná tə tíú mɛ, sə ʋ ja ʋ kárá wiən tə nə bɩga zəni, nə à yə̀ə́ ʋ divɛn tɩ̀án lənə tə nə bɩga zəni, ʋ ma ŋwɩ́n kárá tə, vàná tə nə dí.
5 Lìù nə sʋ̀rɩ́ mən casʋran tuni nə, tə nə kɛ̀ń tə də́ lìù don kárá mɩna, ʋ nə guni ʋ tún, nə à yə̀ə́ tə nə bɩga, tə zɩga yɩɩ nə, nə à yə̀ə́ tə nə wulə tə zaŋa, lìù tə nə sʋ̀rɩ́ mən tə mɛ, sə ʋ ŋwɩ́n mɩna tə, mən tə nə dí. 6 Lìù nə pɩn səbiu, nə à yə̀ə́ won don mama ʋ jəndon nə, sə ʋ ywàń kʋ yuu, ba nə ŋʋan kʋ ʋ jəndon tə dìə̀ wa, ba nə jɩn ŋwɩ̀àn tə, ba mɛ, sə ba pa ʋ ŋwɩ́n won tə, ʋ nə ŋʋan tə, nɛɛ bələ. 7 Ba nə wà ŋwɩ̀àn tə jɩn, dìə̀ tə tíú mɛ, sə ʋ bà à mʋ̀ Yɩɩ yáá con, ʋ bɩrɩ də, ʋ mʋ̀ nə wà ʋ don tə wiən tə dí.
8 Vaŋʋ nə wulə naʋ, nə à yə̀ə́ bɩ̀nà, nə à yə̀ə́ vanmɩna, nə à yə̀ə́ gànʋ̀, nə à yə̀ə́ won yiri don mama jɩ́ʋ́n wa, lɩ̀à bələ tə, vaŋʋ tə nə wulə ba pwə́rə́ wa, mɛ sə ba ja yoo tə, ba bà à mʋ̀ Yɩɩ yáá con. À mʋ̀ Yɩɩ wá bɩrɩ lìù tə nə ba cɩ́gá jə, yá lìù təntə wá ŋwɩ́n won tə, nɛɛ bələ, ʋ pa kʋ tíú nə.
9 Bɛɛ nə pɩn bɩ̀nà, nə à yə̀ə́ naʋ, nə à yə̀ə́ vanmɩna, nə à yə̀ə́ vànɩ́ yiri don mama, ʋ jəndon nə, sə ʋ ywàń kʋ yuu, kʋ nə tɩga, nə à yə̀ə́ kʋ nandɔɔ nə kɛ́n, nə à yə̀ə́ ba nə ŋʋan kʋ, də lìù mama wà kʋ nɩ, 10 ba lɩ̀à bələ tə mɛ, sə ba bà à mʋ̀ Ba-Yígúrə́-Jə-Tiu yáá con, ba swɩ̀n kʋ sʋgʋ tə. Lìù tə nə ywàń vànɩ́ tə yuu, wá dù də, kʋ tà ʋ mʋ̀ nə dí ʋ don tə vànɩ́ tə. Vànɩ́ tə tíú mɛ, sə ʋ sɛ̀ durə təntə, yá lìù tə nə ywàń vànɩ́ tə yuu, kʋ́ʋ̀ wà mɛ, sə ʋ ŋwɩ́n kʋ. 11 Yá vànɩ́ tə dàń nə yɩ ba ŋʋan kʋ ʋ con, ʋ mɛ sə ʋ ŋwɩ́n kʋ, ʋ pa kʋ tíú nə. 12 Vànɩ́ tə kʋ́ʋ̀ nə yɩ wojandiu nə jɩn, ʋ mɛ, sə ʋ bɩrɩ kʋ mumunə, kʋ tíú nə. Yá ʋ kʋ́ʋ̀ bá ŋwɩ́n vànɩ́ təntə, wojandiu tə nə jɩn.
13 Lìù nə jɩŋɩ ʋ don vànɩ́, kʋ nandɔɔ nə kɛ́n, nə à yə̀ə́ kʋ nə tɩga, də kʋ tíú tə̀lə́, lìù tə nə jɩŋɩ vànɩ́ tə mɛ, sə ʋ ŋwɩ́n kʋ, ʋ pa kʋ tíú nə. 14 Yá yoo nətʋ nə yí vànɩ́ tə, də kʋ tíú wulə, lìù tə nə jɩŋɩ vànɩ́ tə wà mɛ, sə ʋ ŋwɩ́n kʋ. Vànɩ́ tə yà nə yɩ lìù tə jon, ʋ ga ŋwɩ́n kʋ yuu nə, vànɩ́ tə yuu ŋwɩ́rán tə cɩcɩ nə, ʋ wá pa kʋ tíú nə.»
Nii tə Yɩɩ nə pɩn, ʋ mʋ̀ Yɩɩ ka zìlí, də ləzwənə ka zìlí yuu wa
15 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Bɛɛ nə dí nanʋan kacɩɩn con, ʋ tə nə yəri bɛɛ, ʋ ga ba bwàlʋ́ də jə, bɛɛ təntə nə pə̀ń wá, ʋ mɛ, sə ʋ pa bʋ̀á tə kwa wiən, ʋ ga tì wá, ʋ ma fwa ʋ kan. 16 Bʋ̀á tə nyɩna nə vɩga, sə ʋ pa ʋ bʋ̀á tə, bɛɛ tə nə, bɛɛ tə mɛ, sə ʋ tə ŋwɩ́n kwənə tə, ba nə ma swə kacɩɩn tə nə yəri bɛɛ, ʋ pa bʋ̀á tə nyɩna nə.
17 Á wà mɛ, sə á yá kacɩrʋ, á pa ʋ ya lʋʋ wa.
18 Lìù tə mama, ʋ nə pə̀ń vànɩ́, ʋ mɛ, sə ba gʋ wá.
19 Lìù tə, ʋ nə fwa jwəŋə, ʋ pa yɩa duən nə, də kʋ nə tà à mʋ̀ Ba-Yígúrə́-Jə-Tiu cɩcɩ nə, ʋ mɛ, sə ba cʋ̀gʋ̀ wá mɩ́ámɩ́án*.
20 Á dànà ká fɩfɩn vee tə, ʋ nə twá ʋ jə̀ə́ á con. Á dànà ká kalɩ wá, á pa ʋ tʋn, ʋ pa aba tʋtʋ. Cɩ́gá, á də yɩn vərə, á twá á jə̀ń Ezwipətə lʋʋ nii wa.
21 Á dànà ká fɩfɩn kadənu, nə à yə̀ə́ bitarʋ. 22 Á nə fɩfɩn ba, ba nə bubwi ba kə à nə, cɩ́gá mama, à wá nì ba bubwiə tə. 23 Yá à lɩŋa wá zàn, à ga pa á tɩ kʋ̀ʋ̀ wa. Yá á də kana tə dàń wá jì kadənə, á bɩ̀á tə də ga jì bitara.
24 Á nə pɩn səbiu jɩŋɩ, á mʋ̀ à lɩ̀à tə wa lìù nə, ʋ nə yɩ yinənyiən, ʋ wulə də aba, á wà mɛ, sə á fwa wá, ndə lɩ̀à tə duən tə, ba jɩŋa nə wulə lɩ̀à yuu, nə yàá fwa nətʋ. Á wà mɛ, sə á pa ʋ ŋwɩ́n kʋ, də kʋ yuu nywarɩ.
25 Á nə jon lìù gànʋ̀ á tún talɩma, á ga pa wá won, á mɛ, sə á pìí, á pa gànʋ̀ tə, kʋ tíú nə, də yɩɩ tə wà zwɩ. 26 Cɩ́gá, kʋ wàá də, kʋ mʋ̀ cɩcɩ nə yɩ ʋ gànsàrá. Ʋ nə wà kʋ nɩ, bɛ̀ɛ̀ nə, ʋ wá piri? Ʋ nə bubwi ʋ kə à nə, à wá nì, à nə yɩ pubwanʋ tíú tə yɩrɩ.
27 Á wà mɛ, sə á twɩn à mʋ̀ Yɩɩ, á ga wà mɛ, sə á zɩrɩ á kə á lʋʋ lɩ̀à tə yáá tíú nə.
28 Á dànà ká cɩ̀ á nʋga tə, də á divɛn tə nə, á nə mɛ, sə á pa nə. Á mɛ, sə á pa nə, á bɩ̀á tə wa, cárɩ́ bɩ̀á tə. 29 Mə nətʋ nə, á mɛ, sə á tʋn á vanfaran tə, də á vanmɩnɩ tə də wa. Vànɩ́ təntən bìú mɛ, sə kʋ ya də kʋ nuu, dɩan barpɛ. Yá nana nii dɩɩn tə nə, á mɛ, sə á ja kʋ, á ma fwa joŋi, á pa nə.
30 Á mɛ, sə á ya à mʋ̀ Yɩɩ cɩcɩ lɩ̀à. Á wà mɛ, sə á də́ vànɩ́, wojandirən nə gʋa, tə də́ tə ga. Á mɛ, sə á dɩlɩ kʋ kukuri nə.»