Á zìlə́ labwana
23
1 Ba-Yígúrə́-Jə-Tiu tə swɩ̀n, ʋ súrí lá, ʋ wʋ́: «Á wà mɛ, sə á swɩ̀n yoo tə nə yɩ kʋ̀nkʋ̀n, á pa kʋ sú tɩa mama. Á wà mɛ, sə á kʋna kʋ̀nkʋ̀n, á ma san lìù nə, ʋ nə ba cɩ́gá jə. 2 Á wà mɛ, sə á kə á nii lɩ̀à kwa, ba nə dáá yɩrɩ, á ma tʋn yolwan. Á nə yɩ dansɩa lɩ̀à, á wà mɛ, sə á kə á nii lɩ̀à kwa, ba nə dáá yɩrɩ, á ma bʋ̀rɩ̀ kʋ̀nkʋ̀n bʋra. 3 Á wà mɛ, sə á bʋ̀rɩ̀ á pa zʋrʋ nə, də ʋ nə ba cɩ́gá jə.4 Á dʋŋʋ naʋ, nə à yə̀ə́ ʋ bɩ̀nà nə jɛ́n, á nə nɩ tə, sə á ja, á pa wá. 5 Á nə nɩ á dʋŋʋ bɩ̀nà, də ka tʋa də ka tàŋá zɩla, á wà mɛ, sə á twá ka yɩra, á lɛ. Á yà nə ba á dʋŋʋ tə swə də, á mɛ, sə á san wá, á zɩ̀n ʋ bɩ̀nà tə mʋ̀.
6 Á wà mɛ, sə á bʋ̀rɩ̀ á wa zʋra tə bʋra, á pa ka ja ba, ba nə yɩ zʋra yɩrɩ. 7 Á cɩa á tɩ̀àn nə də kʋ̀nkʋ̀n yoo mama. Á dànà ká pa ba gʋ lìù tə, ʋ nə wà yoo cʋ̀gʋ̀, də lìù tə, ʋ nə jə cɩ́gá. Cɩ́gá, à bá jələ wʋlʋnyiən, ndə cɩ́gá tíú nə. 8 Á wà mɛ, sə á jon vwiŋə. Cɩ́gá, vwiŋə yàá dwá lɩ̀à tə tətə, ba yɩ́á nə na nɩ́á də̀ń, kʋ pa ba bʋ̀rɩ̀ kʋ̀nkʋ̀n, ba pa lɩ̀à tə nə, ba nə jə cɩ́gá.
9 Á wà mɛ, sə á fɩfɩn vərə tə, ba nə twá ba jə̀ə́ á con. Á yə̀ə́ kʋ tə nə yɩ vee yojanʋ, á də tətə nə yɩn vərə, á twá á jə̀ń Ezwipətə lʋʋ nii wa yɩrɩ.»
Nii tə Yɩɩ nə pɩn sìə́ bɩna, də sìə́ dɩan yuu wa
10 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Bɩna bardʋ, á wá dù á kárɩ́, á ca tə wiən. 11 Yá barpɛ nii bɩnɩ tə nə, á mɛ, sə á yá á kárɩ́ tə, á pa tə sìí, á wà mɛ, sə á vàrà tə. Á wa lɩ̀à tə nə yɩ zʋra, wá pɩ̀à ba nii wodiu kárɩ́ təntə wa, yá ganaŋa də wá də́ tə gɩganɩ. Á mɛ, sə á yá á divɛn tɩ̀án kárɩ́ tə, də á olivə* tɩ̀án kárɩ́ tə də nətʋ.
12 Á wá tì dɩan bardʋ, á ma tʋn á tʋ̀tʋ̀nán. Yá barpɛ nii dɩɩn tə yɩ sìə́ dɩɩn, á wà mɛ, sə á tʋn. Kʋ wá pa á nɩan, də á bɩnɛ sìí. Yá á tʋtʋnbɩa tə, də vərə tə nə twá ba jə̀ə́ á con, də wá mà vʋʋ.
13 Á zìlə́ kʋ tə mama nii, à nə swɩ̀n á con. Á dànà ká bon, á kə yɩa duən nə. Á dànà ká pa, ba nì tə yɩrɩ də tətə, á nii wa.
14 Bɩnɩ mama, á wá də́ cànɩ̀ batwa, á ma pa nə dun. 15 Təntən nə, á wá də́ Dipɛn tə nə wà sabwarɩ ken* cànà tə, mɩna bɩʋ cànà wa. Mə ka diŋə máŋá nə, à nə lɩ à tún. Á wá də́ dipɛn, kʋ nə wà sabwarɩ ken, dɩan barpɛ, ndə à nə pɩn aba nii, sə á tʋn kʋ nətʋ. Cɩ́gá, mɩna bɩʋ cànà wa nə, á nan Ezwipətə lʋʋ nii tə wa. Yá á lìù mama wà mɛ sə ʋ bà à yáá con, də jɩkʋrɩkɛ.
16 Kʋ kwa nə, á wá də́ Wodidʋn cànà*, máŋá tə wa, á nə wá lɩ wiən tə, á nə dùə̀ á kárɩ́ wa, təntən bɩ̀á. Kʋ kwa nə, á dàń wá də́ Woceri cànà*, bɩnɩ tə yígúrə́ wa, máŋá tə wa, á nə wá tʋn á kárɩ́ wiən mama, á kə dìə̀, á zwɛ̀. 17 Bɩnɩ mama, á lalʋʋ tə wa bara tə mama wá bà à mʋ̀ Yuu-Tiu Ba-Yígúrə́-Jə-Tiu yáá con, nɛɛ batwa.
18 Á wà mɛ, sə á súrí won mama, kʋ nə ken sabwarɩ, vànɩ́ tə nə, á nə pɩ̀à, á ma fwa joŋi, á pa nə. Á wà mɛ sə á yá, á pa tɩa pʋrɩ, ka dà à joŋi vànɩ́ tə jana tə nə. 19 Á mɛ, sə á ja á kárɩ́ wiən tə təntən bɩ̀á, á bà à mʋ̀ Ba-Yígúrə́-Jə-Tiu, à nə yɩ á Yɩɩ, dìə̀ tə wa. Á wà mɛ sə á sàn bʋbiə, ka nuu yɩlɩ nɩ́á waa.»
Yɩɩ kàn nii, ʋ pa Yɩzərayɛlə dwíí tə nə, Kanaan lʋʋ nii tə yuu wa
20 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «À wá tʋn malɩka, sə ka ya á yáá, ka ywàń á yuu, cwəŋə wa, ka ja aba ka yí bwálɩ́ tə, à nə tanɩ, à tún á nə. 21 Á cʋga ka nə zəni, á ga zìlí ka nii. Á dànà ká cʋ̀gʋ̀ ka pùə́ nə. Ka ba cʋna swə. Á nə tʋn cʋna, ka wá kə aba càn wa. Cɩ́gá, à mʋ̀ yɩrɩ nə ka wulə. 22 Yá á dàń nə zìlí ka nii zəni, á ga tʋn kʋ tə mama, à nə wá swɩ̀n á con, à wá ya á dʋŋa dʋŋʋ, à ga wá zɩgɩ lɩ̀à tə nə, ba nə zɩga á nə. 23 À malɩka tə wá ya á yáá, ka ja aba, ka va lʋʋ nii tə wa, Amɔrə dwíí tə, də Ɛtə dwíí tə, də Perizi dwíí tə, də Kanaan tɩ̀án tə, də Evi dwíí tə, də Yebusə tɩ̀án tə, nə wulə kʋ wa. Yá à wá cʋ̀gʋ̀ dwíə́ təntə, à pa ba jɛ́n tɩa yuu wa.
24 Á wà mɛ, sə á tʋ, ba yɩa tə yáá con, á pa tə dun*, á ga wà mɛ, sə á tʋn, á pa tə. Á wà mɛ, sə á twá á tʋn ba yofwamɩnan tə. Á mɛ, sə á mà ba woŋwanan tə, á cʋ̀gʋ̀, á ga yigu ba culu kapana tə, ba nə cwɛn, á dɩ á lwa. 25 Á mɛ, sə á tʋn, á pa à mʋ̀ Ba-Yígúrə́-Jə-Tiu cɩcɩ nə, à nə yɩ á Yɩɩ. Yá à wá fwa zəni á yɩra, à ga pa aba wodiu də nɩ́á. À ga wá cɩ yayɩran yáá nə, tə dàn ká ja aba. 26 Kan bá càrɩ̀ pùə́, á lʋʋ nii tə wa, kadɩŋʋ də ga bá ya lá. À wá pa aba mɩdarɩ lʋʋ wa.
27 À wá pa, à fən ja dwíə́ tə mama, á yáá con. À wá pa dwíə́ tə mama, á nə wá va ba con, vɩvaga, á yáá con. Yá à wá pa, á dʋŋa tə mama dəri, á yáá con. 28 À wá tʋn kələnlwəzwənən, sə tə ya á yáá, tə dɩŋa Evi dwíí tə, də Kanaan tɩ̀án tə, də Ɛtə dwíí tə, tə kə yiŋʋnɩ də aba. 29 À bá dɩŋa ba, à kə yiŋʋnɩ də aba, bɩnɩ nədʋ cɩcɩ wa. À nə dɩŋɩ ba mama bɩnɩ nədʋ wa, lʋʋ nii tə wá jì galən, yá ganaŋa tə wá pùlì zənzən, tə wʋwalɩ aba. 30 À wá dɩŋɩ ba mancɩn mancɩn, à kə yiŋʋnɩ də aba, kʋ va kʋ yí máŋá tə, á nə wá pùlì zənzən, á tɩnɩ lʋʋ nii tə.
31 À wá pa á lʋʋ nii tə sɩswɩan zɩgɩ Mɩncanɩ mʋʋ tə nə, tə va tə yí Filisi lʋʋ nii mʋʋ tə. Tə wá zɩgɩ Sinayi kasɔɔ lanworu tə nə, tə va tə yí Əfəratə mʋnaa tə. Cɩ́gá, à wá kə lʋʋ nii tə tɩ̀án, á jɩɩn wa, yá á dàń wá dɩŋa ba, á lɩ, á yáá con. 32 Á wà mɛ, sə á tún nimarʋ də ba, nə à yə̀ə́ də ba yɩa tə. 33 Ba wà mɛ, sə ba ya á lʋʋ nii tə wa. Kʋ nə tà nətʋ, ba wá ya ndə nyalɩ nə, ba ja aba, ba pa, á tʋn cʋna, á zɩgɩ à nə, də á nə pɩn dun ba yɩa tə nə.»