Yɩɩ tún nimarʋ də Yɩzərayɛlə dwíí tə
24
1 Yɩɩ yà swɩ̀n Moyizə con, ʋ wʋ́: «N mʋ̀ də Aron, də Nadabə, də Abihu, də Yɩzərayɛlə dwíí nəkwɩna sapwɩtwa də fugə dɩa à con. Á wá zɩgɩ yiŋʋnɩ, á tʋ á nadwana yuu, à yáá con. 2 Moyizə cɩcɩ nə wá bólí à mʋ̀ Ba-Yígúrə́-Jə-Tiu yɩra. Ba duən tə wà mɛ, sə ba bólí à yɩra, yá lalʋʋ tə wà mɛ, sə ba twá á nə, ba dɩ̀.» 3 Moyizə twi ʋ swɩ̀n Ba-Yígúrə́-Jə-Tiu sʋ̀ràn tə mama, də kʋ tə mama Ba-Yígúrə́-Jə-Tiu nə pɩn nii kʋ yuu wa, sə kʋ tʋn, ʋ bɩrɩ lalʋʋ tə nə. Lalʋʋ tə mama le də kori nədʋ, ba wʋ́: «Nə wá tʋn kʋ tə mama Ba-Yígúrə́-Jə-Tiu nə swɩ̀n, nə pa kʋ nii sú.» 4 Moyizə pʋ́pʋ́nɩ́ Ba-Yígúrə́-Jə-Tiu sʋ̀ràn tə mama. Kʋ tɩpʋrɩ nə, ʋ zàn jɩjʋ fuən fuən, ʋ lwà Yɩɩ joŋi bwálɩ́ paan tə də̀ń nə, ʋ ga zɩ̀n culu kapana* fugə bələ, ʋ zɩgɩ yɩɩ nə, Yɩzərayɛlə dwíə́ fugə bələ tə yɩrɩ. 5 Ʋ tʋn Yɩzərayɛlə dwíí balandʋra, ʋ pa ba va, ba fwa jwəŋə ba nə sʋ̀rɩ́*, ba ga gʋ nabɩran, ba ma fwa nimarʋ jwəŋə, ba pa Ba-Yígúrə́-Jə-Tiu nə. 6 Moyizə tì jana tə faan, ʋ lwá nagwalan wa, ʋ ga tì tə faan tə don, ʋ lwá Yɩɩ joŋi bwálɩ́ tə yuu wa. 7 Kʋ kwa nə, ʋ tì Yɩɩ nimarʋ sagɩ tə, ʋ kàrɩ̀ ʋ bɩrɩ lalʋʋ tə nə. Yá ba swɩ̀n, ba wʋ́: «Nə wá tʋn kʋ tə mama, Ba-Yígúrə́-Jə-Tiu nə swɩ̀n, nə pa kʋ nii sú, nə ga wá zìlí ʋ nii.» 8 Moyizə tì jana tə, ʋ mɩ́n ʋ kə lalʋʋ tə yɩra, ʋ ga swɩ̀n, ʋ wʋ́: «Á nəŋə nimarʋ jana tə, Ba-Yígúrə́-Jə-Tiu nə twá sʋ̀ràn tə tə mama nə, ʋ ma tún də aba.»9 Kʋ kwa nə, Moyizə, də Aron, də Nadabə, də Abihu, də Yɩzərayɛlə dwíí nəkwɩna sapwɩtwa də fugə dɩ̀gà paan tə yuu wa. 10 Ba nɩ Yɩzərayɛlə dwíí Yɩɩ tə. Ʋ yà zɩga gárɩ́ yuu, kʋ nə yɩ ndə kapan cɩ́nʋ́ cɩcɩlʋ nə, kʋ nə tùŋə̀ mən bʋla, ndə lanworu tə nə, durən nə tə̀lə́ kʋ wa. 11 Yɩɩ wà yolwan tʋn, Yɩzərayɛlə dwíí yáá tɩ̀án tə yɩra. Ba nɩ Yɩɩ, yá kʋ kwa nə, ba dí, ba ga nyʋn.
12 Ba-Yígúrə́-Jə-Tiu swɩ̀n Moyizə con, ʋ wʋ́: «Dɩ à con paan tə yuu wa, n zɩgɩ lá. À wá pa mʋ́ kapana pɩpɛɛ, à nə pʋ́pʋ́nɩ́ à nii yìə̀n tə, də kʋ tə à nə pɩn nii, sə á twá kʋ nə, tə yuu wa. N wá ja tə, n ma kàrɩ̀ Yɩzərayɛlə dwíí tə.» 13 Moyizə də ʋ tʋtʋnʋ Zozuwe zàn, ba dɩ̀ Yɩɩ paan tə yuu wa. 14 Ʋ swɩ̀n nəkwɩna tə con, ʋ wʋ́: «Á dàná nəba yəbə, də nə pìrí nə bɩ̀àn á con. Aron də Urə wá ya də aba. Lìù nə jə yoo, ʋ pɩ̀à sə ʋ kwɛn, sə ʋ va ʋ yí ba.» 15 Moyizə dɩ̀gà paan tə yuu, yá bakwan ga pú ka mama nə. 16 Ba-Yígúrə́-Jə-Tiu dun tə yɩn Sinayi paan tə yuu wa, yá bakwan tə púə́ paan tə nə, dɩan bardʋ. Barpɛ nii dɩɩn tə nə, Ba-Yígúrə́-Jə-Tiu zɩgɩ bakwan tə wa, ʋ bon Moyizə. 17 Yɩzərayɛlə dwíí tə yáá con, Ba-Yígúrə́-Jə-Tiu dun tə yà yɩ ndə mənvwə nə, ka nə kwé paan tə yuu wa. 18 Yá Moyizə dàń zʋa bakwan tə wa, ʋ dɩ̀ paan tə yuu wa. Ʋ yɩn paan tə yuu wa, tɩpʋra sapwɩlə də tɩtɩan sapwɩlə.