YƖƖ JƏRƏ BWALƖ TƏ FWAŊƲ TANA
Kʋ tə Yɩzərayɛlə dwíí tə nə mɛ, sə ba pa
25
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Swɩ̀n Yɩzərayɛlə dwíí tə con, sə ba pa nə zìlə́ wiən. Lìù tə mama, ʋ nə pɩn tə, də pùə́ nədʋ, sə n jon. 3 Nə̀ń zìlə́ wiən tə, n nə wá jon ba con. Kʋ yɩ sɩ́án, də wárʋ́, də cɩnɩan, 4 də bɔɔ nəlinu, də nəsɩan, də sɩ̀sɩ́nʋ́, də ganbʋa, də bʋ̀nɩ̀ bɔɔ, 5 də pabɩran tànàn, ba nə nɩŋɩ, ba li sɩnʋ wa, də mʋʋ wa won don tànʋ̀, ba nə nɩŋɩ, də sɩnjʋna dɛɛ, 6 də nʋga, ba nə wá ma sʋ̀rɩ́ tʋntʋnɩ tə, də wusinə, ba nə wá ma fwa dun nʋga* tə, də wusinə tə, ba nə sʋrɩ, 7 də kapan cɩ́nán cɩcɩlan nəsɩnan, də kapan cɩ́nán cɩcɩlan duən, tə nə jə funə, sə ba ma nàn Yɩɩ joŋwana yun tɩ̀án nəkwɩa culu gànʋ̀* tə, də ʋ nyʋnɩ yuu lwaa pɩpaa* tə. 8 Pa sə Yɩzərayɛlə dwíí tə fwa Yɩɩ wúlú bwálɩ́, ba pa nə, yá à dàń wá ya ba titəŋi wa. 9 À wá bɩrɩ mʋ́ Yɩɩ wúlú gansili təntə, də kʋ wa zɩla tə mama. Yá á dàń mɛ, sə á fwa kʋ, sə kʋ ya kʋ tə, à nə wá bɩrɩ mʋ́ tə nyɩnyɩga.»Kwìə̀ tə Yɩɩ nə pɩn, ʋ nimarʋ culu daka tə fwaŋʋ yoo wa
10 Ba-Yígúrə́-Jə-Tiu tə swɩ̀n Moyizə con, ʋ súrí lá, ʋ wʋ́: «Á wá ja sɩnjʋna dàʋ̀, á ma fwa daka. Ka danɩ wá ya jɩvaŋa bələ də faan, ka wanɩ ga ya jɩvaŋɩ yii də faan. Ka yuu tɩa zɩgʋ də wá ya jɩvaŋɩ yii də faan. 11 Á wá mwàlɩ̀ ka waa tə, də ka kwa tə mɛ, də sɩ́án tə nə ba durən jə, á ga ja sɩ́án tə, á ma fwa kiru, á kɩkarɩ ka nii tə mama. 12 Á wá fwa sɩ́án valɩ banɩa, á kə daka tə nigwancɩan banɩa tə nə. Á wá kə valɩ bələ ka səpuni tə don nə, á ga kə bələ tə duən də, ka səpuni tə don də nə. 13 Yá á dàń wá sárɩ́ sɩnjʋna dɛɛ nədaran bələ, á ja sɩ́án, á mwàlɩ̀ tə. 14 Á wá tɩrɩ dɛɛ təntə daka tə səpunə valɩ tə wa, á ma zɩn ka. 15 Dɛɛ təntə mɛ, sə tə ya daka tə valɩ tə wa wuuu, tə wà mɛ, sə tə nan lá. 16 N wá kə à nimarʋ tə dansɩa won tə, à nə wá pʋ́pʋ́nɩ́, à pa mʋ́, daka təntə wa. 17 Á wá ja sɩ́án tə nə ba durən jə, á ma fwa daka tə nipuə, sə ka ya cʋna kwɩan bwálɩ́*. Ka danɩ wá ya jɩvaŋa bələ də faan, ka wanɩ ga ya jɩvaŋɩ yii də faan. 18 Á wá ja sɩ́án, á ma lù Yɩɩ sàń wonəŋə* nyɩnyɩga bələ, á zɩgɩ cʋna kwɩan bwálɩ́ tə wanɩ səpunə bələ tə nə. 19 Yɩɩ sàń wonəŋu tə don wá zɩgɩ cʋna kwɩan bwálɩ́ tə wanɩ səpuni tə don nə, kʋ don də ga zɩgɩ wanɩ səpuni tə don də nə. Á wá pa Yɩɩ sàń wonəŋə nyɩnyɩga tə, də cʋna kwɩan bwálɩ́ tə wanɩ səpunə bələ tə marɩ duən nə, tə ya won nədʋ. 20 Yɩɩ sàń wonəŋə nyɩnyɩga tə mɛ, sə tə zɩgɩ, tə yáá zən duən, tə ga zɩ̀n tə vànà yɩɩ nə, tə ma kwálɩ́ cʋna kwɩan bwálɩ́ tə yuu nə. Tə yáá mɛ, sə ka te tɩa, cʋna kwɩan bwálɩ́ tə con. 21 N wá kə à nimarʋ dansɩa won tə, à nə wá pʋ́pʋ́nɩ́ à pa mʋ́, daka tə wa, n ja ka nipuə tə, ba nə ma boŋə cʋna kwɩan bwálɩ́, n ma pú. 22 Mə cʋna kwɩan bwálɩ́ tə yuu con nə, à wá bɩrɩ à tɩ̀àn mʋ́, Yɩɩ sàń wonəŋə nyɩnyɩga bələ tə pwə́rə́ wa, tə nə zɩga ka yuu wa. Yá à dàń wá bɩrɩ mʋ́ yìə̀n tə mama, n nə mɛ, sə n swɩ̀n Yɩzərayɛlə dwíí tə con, sə ba twá tə nə.»
Kwìə̀ tə Yɩɩ nə pɩn, ʋ dipɛn tabɩlʋ tə fwaŋʋ yoo wa
23 Ba-Yígúrə́-Jə-Tiu tə swɩ̀n Moyizə con, ʋ súrí lá, ʋ wʋ́: «Á wá ja sɩnjʋna dàʋ̀, á ma fwa tabɩlʋ, kʋ danɩ nə wá ya jɩvaŋa bələ, kʋ wanɩ ga ya jɩvaŋɩ yii nədʋ. Kʋ yuu tɩa zɩgʋ wá ya jɩvaŋɩ yii də faan. 24 Á wá mwàlɩ̀ kʋ, də sɩ́án tə nə ba durən jə, á ga ja sɩ́án tə, á ma fwa kiru kʋ yuu wa, á ja kɩkarɩ kʋ nii tə mama. 25 Á wá fwa kàŋʋ́, kʋ wanɩ nə yí jɩtalɩ, á kə kʋ nii tə nə, á ga ja sɩ́án tə, á ma fwa kiru, á kɩkarɩ kàŋʋ́ tə də. 26 Á wá fwa sɩ́án valɩ banɩa, á kə tabɩlʋ tə nigwancɩan banɩa tə nə, kʋ nɛɛ banɩa tə yuu con. 27 Valɩ tə wá ya tabɩlʋ tə kàŋʋ́ tə máŋá nə. Mə tə mʋ̀ wa nə, ba wá tɩrɩ dɛɛ, ba ma zɩn kʋ. 28 Á wá sárɩ́ sɩnjʋna dɛɛ nədaran bələ, á ja sɩ́án, á mwàlɩ̀ tə. Mə tə nə, ba wá ma zɩn tabɩlʋ tə. 29 Á wá ja sɩ́án tə nə ba durən jə, á ma fwa zwɩɩn, də wùrú zwɩɩn, də kwàrɩ́, də zʋbii, á nə wá ma twɛ́n divɛn jwəŋə, á pa nə. 30 N wá tún dipɛn tabɩlʋ tə yuu, n pa nə, sə tə ya à yáá con, máŋá mama wuuu.»
Kwìə̀ tə Yɩɩ nə pɩn, sɩ́án canzɩlʋ tə fwaŋʋ yoo wa
31 Ba-Yígúrə́-Jə-Tiu tə swɩ̀n Moyizə con, ʋ súrí lá, ʋ wʋ́: «Á wá ja sɩ́án tə nə ba durən jə, á ma lù canzɩlʋ. Kʋ də̀ń zɩlʋ tə, də kʋ dəkuu tə, də kʋ kinə tə, də kʋ kulən tə, də kʋ yɩra wiən tə nə nyən ndə pùnə́ nə, mama mɛ, sə tə marɩ duən nə, tə ya won nədʋ. 32 Pɩna bardʋ mɛ, sə tə tá tə nan canzɩlʋ tə dəkuu tə səpunə nə. pɩna batwa wá ya kʋ dəkuu tə vàn don nə, batwa duən də ga ya kʋ vàn tə don nə. 33 Kinə batwa, tə nə nyən ndə mʋlʋ bɩ̀á nə, də tə kulən, də tə wiən ndə pùnə́ nə, mɛ sə tə ya kʋ pɩna bardʋ tə, nədʋ mama yɩra. 34 Kinə banɩa, tə nə nyən ndə mʋlʋ bɩ̀á nə, də tə kulən, də tə wiən ndə pùnə́ nə, mɛ sə tə ya canzɩlʋ tə dəkuu tə tətə yɩra. 35 Kini nədʋ mɛ, sə kʋ ya canzɩlʋ tə dəkuu tə yɩra, təntən pɩna bələ tə də̀ń nə, kʋ marɩ tə duən nə. Kini nədʋ don də mɛ, sə kʋ ya dəkuu tə yɩra, bələ nii pɩna bələ tə də̀ń nə, kʋ marɩ tə duən nə. Kini nədʋ don də mɛ, sə kʋ ya dəkuu tə yɩra, batwa nii pɩna bələ tə də̀ń nə, kʋ marɩ tə duən nə. Mə pɩna bardʋ tə nə tá tə nan canzɩlʋ tə yɩra, wá ya nətʋ. 36 Canzɩlʋ tə kulən tə, də kʋ pɩna tə mɛ, sə tə marɩ duən nə, tə ya won nədʋ, ba nə lùə̀ də sɩ́án tə nə ba durən jə. 37 Á wá fwa tʋntʋnɩ barpɛ, á tún canzɩlʋ tə pɩna tə yuu wa, sə poni pɩ̀rɩ̀ kʋ yáá con. 38 Wiən tə nə kwɛn caŋoni tə níə́, də wiən tə nə kəni tʋntʋnan tə də mɛ, sə tə fwa də sɩ́án tə nə ba durən jə. 39 Sɩ́án tə nə ba durən jə, kilo fɩtwa nə, á wá ma fwa canzɩlʋ tə, də kʋ tʋtʋnzɩla tə mama.
40 Kə n yɩ́á lá, sə á fwa tə, á pa tə ya tə tə, à nə bɩrɩ mʋ́ paan tə yuu wa, nyɩnyɩga.»