Zaŋʋ 26

Kwìə̀ tə Yɩɩ nə pɩn, ʋ wúlú gansili tə fwaŋʋ yoo wa

1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Á wá ja ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, á ma sʋ gantwɛn tapwələ fugə. Mə tapwələ təntə nə, á wá ma fwa á wúlú gansili tə. Á wá sʋ Yɩɩ sàń wonəŋə* nyɩnyɩga, á tún tə yɩra. 2 Tapoli nədʋ mama danɩ mɛ, sə kʋ ya jɩvaŋa sapʋa də nana, sə kʋ wanɩ ga ya jɩvaŋa banɩa. Tapwələ tə mama danɩ, də tə wanɩ mɛ, sə tə mɛ duən. 3 Á wá dí yáá á nyan tapwələ bonu, á təni duən nii nə. Kʋ kwa nə, á wá nyan bonu tə duən tə də, á təni duən nii nə. 4 Á wá ja bɔɔ nəlinu, á ma sʋ lárán, á kə təntən tapwələ bonu tə, talɩkwa tapoli tə nii nə. Á wá kə lárán təntə duən, tapwələ bonu tə duən tə də, təntən tapoli tə nii nə. 5 Á wá kə lárán finu, təntən tapwələ bonu tə, talɩkwa tapoli tə nii nə. Á ga kə lárán finu duən, tapwələ bonu tə duən tə də, təntən tapoli tə nii nə. Tapwələ dəkurən bələ tə lárán tə mɛ, sə tə tʋ, tə zən duən. 6 Á wá fwa sɩ́án gwalɩ finu, á ma vwa tapwələ dəkurən bələ tə, á goli duən nə, sə gansili tə mama ya won nədʋ.

7 Kʋ kwa nə, á wá sʋ bʋ̀nɩ̀ bɔɔ tapwələ fugə də nədʋ, á ma piri Yɩɩ wúlú gansili tə yuu nə. 8 Bʋ̀nɩ̀ bɔɔ tapoli nədʋ mama danɩ mɛ, sə kʋ ya jɩvaŋa fɩtwa, sə kʋ wanɩ ga ya jɩvaŋa banɩa. Tapwələ fugə də nədʋ tə mama danɩ, də tə wanɩ mɛ, sə tə mɛ duən. 9 Á wá dí yáá á nyan tapwələ bonu, á təni duən nii nə. Kʋ kwa nə, á wá nyan bardʋ tə duən tə də, á təni duən nii nə. Á wá pa bardʋ nii tapoli tə cú, kʋ ziri gansili tə yáá con. 10 Á wá kə lárán finu, tapwələ bonu tə, talɩkwa tapoli tə nii nə. Á ga kə lárán finu duən, tapwələ bardʋ tə, təntən tapoli tə nii nə. 11 Á wá fwa cɩnɩan gwalɩ finu, á kukuli tapwələ dəkurən bələ tə níə́ lárán tə, gwalɩ tə nə, sə tə ja gansili tə mama, tə kə duən nə, sə kʋ ya won nədʋ. 12 Tapwələ tə mɛ, sə tə piri gansili tə yuu nə, sə tapoli faan lɛ kʋ tʋ, kʋ pú gansili tə kwa con. 13 Tapwələ tə mɛ, sə tə piri gansili tə yuu nə, sə jɩvaŋɩ yii nədʋ nədʋ ga lɛ, tə tʋ kʋ danɩ səpunə bələ tə yuu wa, sə tə pú kʋ mama nə zəni.

14 Kʋ kwa nə, á wá nɩŋa pabɩran tànàn, á li sɩnʋ wa, á ma fwa tapoli, á pú bʋ̀nɩ̀ bɔɔ tapoli tə yuu nə. Á tə wá ja mʋʋ wa won don tànʋ̀, á ma fwa tapoli, á pú pabɩran tànàn tapoli tə yuu nə.

15 Á wá sárɩ́ sɩnjʋna dapɩparan, á cwɛn, sə tə kwé tapwələ tə. 16 Dapɩpaʋ nədʋ mama danɩ mɛ, sə kʋ ya jɩvaŋa fugə, sə kʋ wanɩ ga ya jɩvaŋɩ yii də faan. 17 Gansili tə dapɩpaʋ mama tɩa con nii mɛ, sə kʋ ja cələn bələ, tə nə wulə duən səpuni nə. 18 Á wá ja dapɩparan sapʋa, á ma fwa gansili tə jɩgwiə saparʋ səpuni tə. 19 Á wá ja wárʋ́, á ma fwa zɩlan sapwɩlə, á kə dapɩparan sapʋa tə də̀ń nə. Dapɩpaʋ mama də̀ń mɛ, sə kʋ ja zɩlan bələ, dapɩpaʋ tə cələn bələ tə nə wá zʋ lá. 20 Gansili tə jɩzən saparʋ səpuni tə də yɩ dapɩparan sapʋa nə, á wá ma fwa kʋ, 21 də tə də̀ń zɩlan sapwɩlə, á nə wá fwa də wárʋ́. Dapɩpaʋ mama də̀ń wá ja zɩlan bələ. 22 Á wá ja dapɩparan bardʋ, á ma sun gansili tə də̀ń tə, yɩɩ yizwɩa con. 23 Á wá fwa dapɩparan bələ, á kə gansili tə də̀ń con nigwancɩan tə wa. 24 Tə mɛ, sə tə zɩgɩ tɩa con, tə marɩ duən nə, tə dɩ̀ tə nan valɩ wa, tə nə wá vwa tə, tə marɩ duən nə, gansili tə yuu con. Mə dapɩparan bələ tə nə wulə gansili tə nigwancɩan bələ tə wa mɛ, sə tə ya nətʋ. 25 Gansili tə də̀ń con dapɩparan tə mama dàń wá ya nana, də tə də̀ń zɩlan fugə də bardʋ, á nə wá fwa də wárʋ́. Dapɩpaʋ mama də̀ń mɛ, sə kʋ ja zɩlan bələ. 26 Á wá sárɩ́ sɩnjʋna dagaran bonu, á ma ja gansili tə səpuni tə don dapɩparan tə, á kə duən nə. 27 Á wá ja dagaran bonu duən, á ma ja səpuni tə don də dapɩparan tə, á kə duən nə. Dagaran bonu nə, á wá ma ja gansili tə də̀ń con dapɩparan tə də, á kə duən nə, yɩɩ yizwɩa con. 28 Titəŋi dagarʋ mɛ, sə kʋ mɛ dapɩparan tə titəŋi wa, kʋ zɩgɩ gansili tə nii don nə, kʋ pórí dapɩparan tə səpunə nə, kʋ cʋ̀rɩ̀ kʋ nan nii tə don nə. 29 Á wá mwàlɩ̀ dapɩparan tə, də dagaran tə mama də sɩ́án, á ga ja sɩ́án, á ma fwa valɩ tə, dagaran tə nə wá tɩrɩ tə wa.

30 Kʋ kwa nə, n dàń wá pa ba pú gansili tə, ba zɩgɩ, ndə nətʋ tə nə, à nə bɩrɩ mʋ́, paan tə yuu wa.

31 N wá pa gantwan sʋra ja ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́ ba ma sʋ patasɩn. Ba wá sʋ Yɩɩ sàń wonəŋə nyɩnyɩga, ba tún kʋ yɩra. 32 Á wá ja sɩ́án gwalɩ, á ma goli kʋ, sɩnjʋna ywəŋə banɩa nə, á nə wá mwàlɩ̀ tə yɩra də sɩ́án. Á wá zɩgɩ ywəŋə təntə, də̀ń zɩlan banɩa yuu wa, á nə wá fwa də wárʋ́. 33 N wá goli patasɩn tə, n pa kʋ ziri gwalɩ tə də̀ń con. Mə patasɩn təntə kwa con nə, n wá tún à nimarʋ dansɩa* daka tə. Patasɩn tə wá pwɛ̀ kwa con dibiu tə nə yɩ Yɩɩ nyiən* tə, də dìyáá tə nə yɩ Yɩɩ cɩcɩ nyiən* tə, duən nə.

34 N wá pú Yɩɩ nimarʋ dansɩa daka tə nipuə tə, ba nə ma boŋə cʋna kwɩan bwálɩ́* tə, ka nii nə, n tún Yɩɩ cɩcɩ dìyáá tə wa. 35 N wá tún tabɩlʋ tə, kwa con dìə̀ tə nə yɩ Yɩɩ nyiən tə wa, patasɩn tə yáá con, gansili tə jɩzən saparʋ yuu. N ga tún canzɩlʋ tə, tabɩlʋ tə yáá con, jɩgwiə saparʋ yuu.

36 N wá pa gantwan sʋrʋ ja ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, ʋ ma sʋ patasɩn, sə n kə gansili tə mimii nə. Kʋ wá ya lìù tə nə nàŋà gànàn tʋtʋŋɩ. 37 Á wá sárɩ́ sɩnjʋna ywəŋə bonu, á mwàlɩ̀ tə yɩra də sɩ́án, á ga kə sɩ́án gwalɩ tə nə, á ma goli gansili tə mimii nii gànʋ̀ tə. Á wá nyɩan cɩnɩan, á ma fwa ywəŋə tə də̀ń zɩlan bonu.»