Kwìə̀ tə Yɩɩ nə pɩn, ʋ joŋi bwálɩ́ tə, ba nə wá ma sʋ̀rɩ́ jwəŋə vàná tə, fwaŋʋ yoo wa
27
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Á wá ja sɩnjʋna dàʋ̀, á ma fwa Yɩɩ joŋi bwálɩ́. Kʋ danɩ də kʋ wanɩ mɛ, sə tə mɛ duən. Kʋ danɩ də kʋ wanɩ wá ya jɩvaŋa bonu bonu. Kʋ yuu tɩa zɩgʋ wá ya jɩvaŋa batwa. 2 Á wá fwa cələn, ndə nyʋran nə, á kə kʋ nigwancɩan banɩa tə yuu wa. Kʋ nyʋran tə mɛ, sə tə marɩ kʋ yɩra, tə də kʋ mɛ ya won nədʋ. Á wá mwàlɩ̀ kʋ mama də cɩnɩan. 3 Á wá fwa kʋ tʋtʋnzɩla tə mama də cɩnɩan. Tə mʋ̀ nə yɩ zwɩɩn tə, á nə wá lwá kʋ tʋntʋnan tə, á kə tə wa, də kʋ pɛlə-ba tə, də kʋ nagwalan tə, də kʋ danyunzɩan tə, də kʋ wiən tə, á nə wá ma tùn mən. 4 Á wá ja cɩnɩan, á ma fwa wogɩganʋ. Á wá fwa cɩnɩan valɩ banɩa. Á wá kə vala kʋ nigwancɩan banɩa tə nədʋ mama nə. 5 Á wá dɩ wogɩganʋ təntə, á garɩ Yɩɩ joŋi bwálɩ́ tə wa, kʋ twá duən kʋ cú, kʋ mɛ Yɩɩ joŋi bwálɩ́ tə yuu tɩa zɩgʋ tə titəŋi wa. 6 Á wá sárɩ́ sɩnjʋna dɛɛ nədaran bələ, á ja cɩnɩan, á mwàlɩ̀ tə. 7 Á wá tɩrɩ dɛɛ təntə valɩ tə wa, tə nə wulə Yɩɩ joŋi bwálɩ́ tə səpunə bələ tə nə, á ma zɩn kʋ. 8 Á wá fwa Yɩɩ joŋi bwálɩ́ təntə, də dapɩparan, á pa kʋ waa ja woru. Á mɛ, sə á fwa kʋ, ndə à nə bɩrɩ kʋ mʋ́ nətʋ, paan tə yuu wa.»Kwìə̀ tə Yɩɩ nə pɩn, ʋ wúlú gansili tə dəwoo fwaŋʋ yoo wa
9 Kʋ kwa nə, Ba-Yígúrə́-Jə-Tiu swɩ̀n Moyizə con, ʋ súrí lá, ʋ wʋ́: «Á wá fwa dəwoo, á ma kɩkarɩ à wúlú gansili tə. Ganbʋa gaŋoni tə nə dà nə, á wá ma sʋ tapwələ, á ma fwa dəwoo təntə. Dəwoo tə jɩgwiə saparʋ səpuni tə yuu, á wá tɩɩn tapwələ tə, tə va jɩvaŋa bíí. 10 Á wá ja wárʋ́ gwalɩ, də wárʋ́ dagaran nəmɩnɩ, á ma goli tə, cɩnɩan ywəŋə sapʋa nə, də tə də̀ń cɩnɩan zɩlan sapʋa. 11 Dəwoo tə jɩzən saparʋ səpuni tə də yuu, á wá tɩɩn tapwələ tə, á goli cɩnɩan ywəŋə sapʋa nə, də tə də̀ń cɩnɩan zɩlan sapʋa, tə va jɩvaŋa bíí. Wárʋ́ gwalɩ, də wárʋ́ dagaran nə, á wá ma goli tapwələ tə. 12 Dəwoo tə wanɩ səpuni tə yuu, kʋ nə daa yɩɩ yizwɩa con, á wá tɩɩn tapwələ tə, á goli ywəŋə fugə nə, də tə də̀ń zɩlan fugə, tə va jɩvaŋa finu. 13 Dəwoo tə səpuni tə nə daa yɩɩ yipɩan con, wanɩ wá ya jɩvaŋa finu. 14 Á wá zɩgɩ mimii tə vàn don nə, á tɩɩn tapwələ tə, á goli ywəŋə batwa nə, də tə də̀ń zɩlan batwa, tə va jɩvaŋa fugə də bonu. 15 Á ga zɩgɩ mimii tə vàn tə don də nə, á tɩɩn tapwələ tə, á goli ywəŋə batwa duən də nə, də tə də̀ń zɩlan batwa, tə va jɩvaŋa fugə də bonu. 16 Dəwoo tə mimii tə nii wá ja gànʋ̀, kʋ wanɩ nə yɩ jɩvaŋa sapʋa. Kʋ yɩ ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, nə gantwan sʋrʋ wá ma sʋ kʋ. Kʋ wá ya lìù tə nə nàŋà gànàn tʋtʋŋɩ. Á wá goli mimii nii gànʋ̀ təntə ywəŋə banɩa nə, də tə də̀ń zɩlan banɩa. 17 Ywəŋə tə mama, tə nə kɩkarɩ dəwoo tə, wá ja wárʋ́ dagaran nəmɩnɩ, də wárʋ́ gwalɩ, də cɩnɩan də̀ń zɩlan. 18 Dəwoo tə danɩ səpuni mama wá ya jɩvaŋa bíí, ka wanɩ səpuni mama ga ya jɩvaŋa finu. Ka ganbʋa tapwələ tə yuu tɩa zɩgʋ wá ya jɩvaŋa bonu. Ywəŋə tə də̀ń zɩlan tə yɩ, á wá fwa də cɩnɩan.
19 À wúlú gansili tə tʋtʋnzɩla tə mama, də kʋ párá tə mama, də kʋ dəwoo tə párá tə mama yɩ, á wá fwa də cɩnɩan.»
Kwìə̀ tə Yɩɩ nə pɩn, cànʋ́ nʋga tə yoo wa
20 Ba-Yígúrə́-Jə-Tiu swɩ̀n Moyizə con, ʋ súrí lá, ʋ wʋ́: «N mʋ̀ mɛ, sə n swɩ̀n Yɩzərayɛlə dwíí tə con, sə ba pa mʋ́ olivə bɩ̀á nʋga, ka nə ba durən jə, ba ga wà dí yáá ba ja ka, ba fwa won don. Nʋga təntə nə, á wá ma sʋ̀rɩ́ tʋntʋnɩ tə, máŋá mama. 21 Aron də ʋ bɩ̀á tə wá tún tʋntʋnɩ tə, Yɩɩ jə́rə́ gansili tə kwa con dìə̀ tə wa, patasɩn tə yáá con, kʋ nə kwálɩ́ Yɩɩ nimarʋ dansɩa* daka tə nə. Ba wá sʋ̀rɩ́ tə à mʋ̀ Ba-Yígúrə́-Jə-Tiu yáá con, didəni nii nə, sə tə ja lá, kʋ ja va jɩjʋ. Kʋ yɩ yoo, à nə pɩn nii kʋ yuu wa, máŋá də máŋá mama wuuu, sə Yɩzərayɛlə dwíə́ tə mama, ba nə wá kə lʋʋ wa, twá kʋ nə, máŋá də máŋá mama wuuu.»