Kwɩ̀ə̀ tə Yɩɩ nə pɩn, ʋ joŋwana gànàn yoo wa
28
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «N mʋ̀ Moyizə, lɩ n nubiu Aron, də ʋ bɩ̀á tə, Yɩzərayɛlə dwíí tə wa, n kə n yɩra, sə ba ya à joŋwana, ba tʋn, ba pa nə. Ʋ bɩ̀á tə nə yɩ Nadabə, də Abihu, də Eleyazarə, də Yɩtamarə. 2 Á wá sʋ Yɩɩ joŋwana culu gànàn, tə nə jə fɩra də dun, á pa Aron nə. 3 Kʋ mʋ̀ yɩrɩ, n wá swɩ̀n lɩ̀à tə mama con, ba nə jə jɩɩn tʋ̀tʋ̀nán yənu, ba mʋ̀ lɩ̀à tə waa nə, à ken wʋbʋŋa, sə ba sʋ Aron gànàn tə. Yá gànàn təntə nə, ʋ wá zʋ, máŋá tə wa, à nə wá lɩ wá, à tún vàn nə, sə ʋ tʋn Yɩɩ joŋwanɩ, ʋ pa nə. 4 Nə̀ń gànàn tə, ba nə mɛ, sə ba sʋ. Kʋ yɩ Yɩɩ joŋwana ganzwɩdarʋ, kʋ nə cúə́ kʋ yí napɩra, ba ga nàn kʋ, də Yɩɩ joŋwana ganzwɩdarʋ, kʋ nə cúə́ kʋ yí nakoli, də Yɩɩ joŋwana yun tɩ̀án nəkwɩa culu gànʋ̀*, də ʋ nyʋnɩ yuu lwaa pɩpaa*, də Yɩɩ joŋwana yubarʋ, də Yɩɩ joŋwana tàŋá gantwamɩna. Ba wá sʋ culu gànàn təntə, ba pa n nubiu Aron, də ʋ bɩ̀á tə nə, sə ba zʋ, ba ma tʋn Yɩɩ joŋwanɩ, ba pa nə.5 Sɩ́án gaŋoni, də bɔɔ nəlinu, də nəsɩan, də sɩ̀sɩ́nʋ́, də ganbʋa, nə gantwan sʋra tə wá ma sʋ tə.»
Yɩɩ joŋwana yun tɩ̀án nəkwɩa culu gànʋ̀ tə
6 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, nə ba mɛ, sə ba ma sʋ Yɩɩ joŋwana yun tɩ̀án nəkwɩa culu gànʋ̀ tə, ba ga zuri ba yɩra, ba nàn kʋ də sɩ́án gaŋoni. Kʋ mɛ, sə kʋ ya lìù tə nə nàŋà gànàn tʋtʋŋɩ. 7 Kʋ wá ja vaparan yuu lárán bələ, sə kʋ wànɩ́ kʋ vwa, ndə gànzwɩgwala nə. 8 Zɩla tə, ba nə ma sʋ Yɩɩ joŋwana yun tɩ̀án nəkwɩa culu gànʋ̀ tə, mə tə mʋ̀ nə, ba wá ma sʋ kʋ tàŋá gantwamɩna tə də. Tə mʋ̀ nə yɩ ganbʋa gaŋoni tə nə dà, də sɩ́án gaŋoni, də bɔɔ nəlinu, də nəsɩan, də sɩ̀sɩ́nʋ́. Tàŋá gantwamɩna tə, də Yɩɩ joŋwana culu gànʋ̀ tə mɛ, sə tə marɩ duən nə, tə ya gànʋ̀ nədʋ. 9 N wá tì kapan cɩ́nán cɩcɩlan nəsɩnan bələ, n bɩ̀rɩ̀ Yɩzərayɛlə dwíə́ tə yɩra, n tún tə yuu wa. 10 N wá bɩ̀rɩ̀ yɩra bardʋ, n tún kapan cɩ́nʋ́ cɩcɩlʋ nəsɩan don yuu wa, n ga bɩ̀rɩ̀ yɩra bardʋ tə duən tə, n tún bələ nii kapan cɩ́nʋ́ cɩcɩlʋ nəsɩan tə də yuu wa. N wá pʋ́pʋ́nɩ́ ba yɩra tə, kʋ twá ba nə lɩrɩ ba, ba dan duən nə nətʋ. 11 N wá bɩ̀rɩ̀ Yɩzərayɛlə dwíə́ tə yɩra tə, n tún kapan cɩ́nán cɩcɩlan nəsɩnan bələ tə yuu wa, ndə ba nə bɩ̀rɩ̀ jɩtuŋu nətʋ. Kʋ kwa nə, n wá kə tə, sɩ́án zɩlan wa. 12 N wá kə kapan cɩ́nán cɩcɩlan nəsɩnan bələ tə, Yɩɩ joŋwana yun tɩ̀án nəkwɩa culu gànʋ̀ tə, vaparan yuu lárán tə nə, ndə Yɩzərayɛlə dwíə́ tə mɩmɩnʋ nə. Aron dàń wá zʋ gànʋ̀ təntə, də Yɩzərayɛlə dwíə́ tə yɩra tə, kʋ vaparan yuu lárán bələ tə yuu wa, ʋ ja ya à mʋ̀ Ba-Yígúrə́-Jə-Tiu yáá con, ndə mɩmɩnʋ nə, kʋ pa à bʋ́n á yoo, máŋá mama wuuu. 13 N wá fwa sɩ́án zɩlan, 14 n ga ja sɩ́án tə nə ba durən jə, n ma fwa banzala bii bələ, ndə ŋoni nə, ba nə pini, n kə zɩlan tə yɩra.»
Yɩɩ joŋwana yun tɩ̀án nəkwɩa nyʋnɩ yuu lwaa pɩpaa* tə
15 Ba-Yígúrə́-Jə-Tiu tə swɩ̀n Moyizə con, ʋ súrí lá, ʋ wʋ́: «N dàń wá pa gantwan sʋrʋ sʋ Yɩɩ joŋwana yun tɩ̀án nəkwɩa nyʋnɩ yuu lwaa pɩpaa, ba nə wá ma bʋ̀rɩ̀ bʋra. Zɩla tə, ba nə ma sʋ Yɩɩ joŋwana yun tɩ̀án nəkwɩa culu gànʋ̀ tə, mə tə mʋ̀ nə, ba wá ma sʋ ʋ nyʋnɩ yuu lwaa pɩpaa tə də. Tə mʋ̀ nə yɩ ganbʋa gaŋoni tə nə dà, də sɩ́án gaŋoni, də bɔɔ nəlinu, də nəsɩan, də sɩ̀sɩ́nʋ́. 16 Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə wá ja səpunə banɩa, tə nə mɛ duən, də nigwancɩan banɩa, tə wɩ̀ʋ́ nə mɛ duən. Səpuni mama danɩ wá ya jɩfʋngalʋ nədʋ. 17 Ba wá nàn kʋ, də kapana tə nə jə funə, zanɛɛ banɩa. Təntən zanaa tə yuu wa, n wá marɩ kapan cɩ́nʋ́ cɩcɩlʋ nəsɩan mui, də kapan cɩ́nʋ́ cɩcɩlʋ səmun, də kapan cɩ́nʋ́ cɩcɩlʋ yiyiru. 18 Bələ nii zanaa tə yuu wa, n wá marɩ kapan cɩ́nʋ́ cɩcɩlʋ sɩ̀sɩ́nʋ́, də kapan cɩ́nʋ́ cɩcɩlʋ bʋla, də kapan cɩ́nʋ́ cɩcɩlʋ don, ba nə boŋə dɩyaman. 19 Batwa nii zanaa tə yuu wa, n wá marɩ kapan cɩ́nʋ́ cɩcɩlʋ wuwilu, də kapan cɩ́nʋ́ cɩcɩlʋ pʋ̀pʋ̀nʋ̀, də kapan cɩ́nʋ́ cɩcɩlʋ nəlinu. 20 Banɩa nii zanaa tə yuu wa, n wá marɩ kapan cɩ́nʋ́ cɩcɩlʋ sagʋ nɩ́á pʋ̀pɔ́, də kapan cɩ́nʋ́ cɩcɩlʋ nəsɩan, də kapan cɩ́nʋ́ cɩcɩlʋ sagʋ nɩ́á. Kapan cɩ́nán cɩcɩlan təntə nədʋ mama wá ya sɩ́án zɩlʋ wa. 21 N wá bɩ̀rɩ̀ Zwakɔbə bɩ̀á tə nədʋ mama yɩrɩ, n pʋ́pʋ́nɩ́ n tún kapan nədʋ mama yuu wa, ndə ba nə bɩ̀rɩ̀ jɩtuŋu nətʋ. Kapana fugə də bələ tə wá ya Yɩzərayɛlə dwíə́ fugə də bələ tə mɩmɩnʋ. 22 N wá ja sɩ́án tə nə ba durən jə, n ma fwa banzala bii bələ, ndə ŋoni nə, ba nə pini, n kə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə nə. 23 N wá ja sɩ́án tə nə ba durən jə, n ma fwa valɩ bələ. N wá kə tə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə, baan con nigwancɩan bələ tə nə. 24 N dàń wá vwa sɩ́án banzala bii bələ tə, valɩ bələ tə nə, tə nə wulə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə nigwancɩan tə nə. 25 N wá vwa banzala bələ tə níə́ bələ tə duən tə, sɩ́án zɩlan bələ tə nə, tə nə wulə Yɩɩ joŋwana yun tɩ̀án nəkwɩa culu gànʋ̀ tə vaparan yuu lárán tə nə. Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə dàń wá ya yáá con. 26 N wá fwa sɩ́án valɩ bələ duən, n kə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə də̀ń con nigwancɩan bələ tə nə. N wá pa tə ya ka waa con yáá tə nə, ka nə daa Yɩɩ joŋwana yun tɩ̀án nəkwɩa culu gànʋ̀ tə nə. 27 N tə wá fwa sɩ́án valɩ bələ duən də, n kə Yɩɩ joŋwana yun tɩ̀án nəkwɩa culu gànʋ̀ tə vaparan yuu lárán bələ tə dəkurən nə. N wá pa tə ya Yɩɩ joŋwana yun tɩ̀án nəkwɩa culu gànʋ̀ tə yáá con, bwálɩ́ tə nə, ba nə sʋa kʋ vaparan yuu lárán tə, ba marɩ kʋ nə, kʋ tàŋá gantwamɩna tə yuu con. 28 N wá tɩrɩ ŋwənə nəlinu Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə valɩ tə wa, n ma vwa ka, n marɩ Yɩɩ joŋwana yun tɩ̀án nəkwɩa culu gànʋ̀ tə valɩ tə nə. Kʋ nətʋ wá pa, Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə marɩ Yɩɩ joŋwana yun tɩ̀án nəkwɩa culu gànʋ̀ tə nə, tàŋá gantwamɩna tə yuu con. Yá ka kʋ́ʋ̀ bá vin Yɩɩ joŋwana yun tɩ̀án nəkwɩa culu gànʋ̀ tə yuu wa. 29 Yá máŋá tə, Aron nə wá zʋ kwa con dibiu tə nə yɩ Yɩɩ nyiən* tə wa, Yɩzərayɛlə dwíə́ tə yɩra tə dàń wá ya ʋ nyʋnɩ yuu, Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə, ba nə ma bʋ̀rɩ̀ bʋra tə yuu wa. Kʋ nətʋ wá ya mɩmɩnʋ à mʋ̀ Ba-Yígúrə́-Jə-Tiu yáá con, kʋ pa à bʋ́n á yoo, máŋá mama wuuu. 30 N wá kə pwárʋ́ bɩ̀á tə, ba nə boŋə Urimə də Tumiməa, Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə, ba nə ma bʋ̀rɩ̀ bʋra tə wa. Yá tə dàń wá ya Aron nyʋnɩ yuu, máŋá tə, ʋ nə wá zʋ à mʋ̀ Ba-Yígúrə́-Jə-Tiu yáá con. Kʋ nətʋ wá pa, Aron zɩn wiən tə nə bʋ̀rɩ̀ Yɩzərayɛlə dwíə́ tə bʋra, ʋ nyʋnɩ yuu, máŋá mama wuuu, à mʋ̀ Ba-Yígúrə́-Jə-Tiu yáá con.»
Yɩɩ joŋwana culu gànàn duən
31 Ba-Yígúrə́-Jə-Tiu tə swɩ̀n, ʋ súrí lá, ʋ wʋ́: «N wá pa, ba ja bɔɔ nəlinu cɩcɩ, ba ma sʋ Yɩɩ joŋwana yun tɩ̀án nəkwɩa culu gànʋ̀ tə də̀ń ganzwɩdarʋ, kʋ nə cúə́ kʋ yí nakoli. 32 Kʋ bɩan bwálɩ́, yuu nə twá lá kʋ naŋa, wá ya kʋ titəŋi wa. N wá pa gantwan sʋrʋ sʋ kʋ bɩan tə, ʋ kɩkarɩ, sə kʋ ja dɩ̀àn, ndə tànʋ̀ gànʋ̀ nə, kʋ nə wàrɩ̀ kʋ kàrɩ́. 33 N wá pa, ba ja bɔɔ nəlinu, də nəsɩan, də sɩ̀sɩ́nʋ́, ba ma sʋ bùlə̀ nəmənbii, ba kə kʋ tɩa con nii tə nə, ba ja kɩkarɩ. Ba ga kə sɩ́án bùlə̀ nəmənbii, bɔɔ bùlə̀ tə pwə́rə́ wa, ba ja kɩkarɩ. 34 Sɩ́án bùlə̀ tə, də bɔɔ bùlə̀ tə wá sɛ́ duən wa, tə ja kɩkarɩ ganzwɩdarʋ tə tɩa con nii tə mama. 35 Aron mɛ, sə ʋ zʋ kʋ, ʋ ma tʋn Yɩɩ joŋwanɩ tʋtʋŋɩ tə. Lɩ̀à dàń wá nì bùlə̀ tə dwana, máŋá tə wa, Aron nə zwɩ à yáá con, kwa con dibiu tə nə yɩ Yɩɩ nyiən tə wa, də máŋá tə wa, ʋ nə pìrí ʋ naŋa lá. Yá kʋ nətʋ wá pa, ʋ bá tɩ.
36 N wá pa, ba ja sɩ́án tə nə ba durən jə, ba ma fwa wonanʋ pɩpaa. N wá bɩ̀rɩ̀ pʋ́pʋ́ná tə tə, n tún kʋ yuu wa, ndə ba nə bɩ̀rɩ̀ jɩtuŋu nətʋ: “Ba-Yígúrə́-Jə-Tiu cɩcɩ nyiən!” 37 N dàń wá ja ŋwənə nəlinu, n ma vwa kʋ, n marɩ Yɩɩ joŋwana yun tɩ̀án nəkwɩa yubarʋ tə yáá con. 38 Sɩ́án wonanʋ təntə wá ya Aron tílí nə. Kʋ nətʋ wá pa, ʋ zɩn Yɩzərayɛlə dwíí tə yolwana tə, ba nə tʋŋa ba zìlə́ wiən tə mama wa, ba nə pɩn nə. Kʋ wá ya ʋ tílí nə, máŋá mama wuuu, à mʋ̀ Ba-Yígúrə́-Jə-Tiu yáá con, yá à dàń wá sɛ̀, à jon ba zìlə́ wiən tə, ba nə pɩn nə.
39 Kʋ kwa nə, n wá pa, ba ja ganbʋa gaŋoni, ba ma sʋ Yɩɩ joŋwana ganzwɩdarʋ don, kʋ nə cúə́ kʋ yí napɩra, də yubarʋ, də tàŋá gantwamɩna ba nə nàn, n pa Aron nə. Tə wá ya lìù tə nə nàŋà gànàn tʋtʋŋɩ.
40 N wá pa, ba sʋ Yɩɩ joŋwana gànàn, də yubaran, də tàŋá gantwamɩnɩ, də yupurən, tə mama nə jə fɩra də dun, n pa Aron bɩ̀á tə nə. 41 N wá ja gànàn təntə, á ma zʋ n nubiu Aron, də ʋ bɩ̀á tə. N wá twɛ́n dun nʋga* ba yuu wa, n lɩ ba, n tún vàn nə, n pa à mʋ̀ Yɩɩ cɩcɩ nə, n ga pa ba nii, sə ba tʋn Yɩɩ joŋwanɩ, ba pa nə. 42 Pa sə ba sʋ ganbʋa namankukwi, ba pa ba, ba zʋ, ba ma sun ba cavɩra nə. Namankukwi təntə mɛ, sə tə zɩgɩ ba tàŋá nə, tə cú tə yí ba ciən. 43 Aron də ʋ bɩ̀á tə mɛ, sə ba zʋ namankukwi təntə, máŋá tə wa, ba nə zwɩ Yɩɩ jə́rə́ gansili tə wa, nə à yə̀ə́ máŋá tə wa, ba nə bɩ̀àn à joŋi bwálɩ́ tə nə, sə ba tʋn Yɩɩ joŋwanɩ tʋtʋŋɩ tə, kwa con dibiu tə nə yɩ Yɩɩ nyiən tə wa. Kʋ nətʋ wá pa, cʋna bá ya ba yuu wa, ba nə yɩ swələ yɩrɩ, yá ba bá tɩ. Kʋ yɩ yoo, à nə pɩn nii kʋ yuu wa, sə Aron də ʋ dwíí tə mama, ba nə wá ya lʋʋ wa, ʋ kwa nə, tʋn máŋá də máŋá mama wuuu.»