Zaŋʋ 29

Nətʋ tə, ba nə túŋə́ Yɩɩ joŋwana

1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Nə̀ń kʋ tə, n nə wá fwa, n ma kúrí joŋwana, n tún vàn nə, n pa à mʋ̀ Yɩɩ cɩcɩ nə, sə ba tʋn Yɩɩ joŋwanɩ, ba pa nə. N wá ja nabɩa, də pabɩran bələ, tə yɩra nə zurə, tə ga cé. 2 N wá ja dipɛn mɩna mun, n ma fwa dipɛn, kʋ nə wà sabwarɩ ken, də gàtó, kʋ nə wà sabwarɩ ken, ba nə ywɛ́ də nʋga, də ŋʋ̀nán, tə nə wà sabwarɩ ken, ba nə gàrɩ̀ nʋga tə nə. 3 N wá kə tə kəpurə wa, n ja nabɩa tə, də pabɩran bələ tə, n súrí lá, n ja bà, n pa à mʋ̀ Ba-Yígúrə́-Jə-Tiu nə, Yɩɩ wúlú bwálɩ́ tə wa.

4 Kʋ kwa nə, n wá ja Aron də ʋ bɩ̀á tə, n bà, n zɩgɩ Yɩɩ jə́rə́ gansili tə mimii nə, n ga swɛ ba də nɩ́á. 5 N dàń wá tì Aron Yɩɩ joŋwana culu gànàn tə, n ma zʋ wá. Tə mʋ̀ nə yɩ, Yɩɩ joŋwana ganzwɩdarʋ tə, kʋ nə cúə́ kʋ yí napɩra, də Yɩɩ joŋwana yun tɩ̀án nəkwɩa culu gànʋ̀* tə də̀ń ganzwɩdarʋ tə, kʋ nə cúə́ kʋ yí nakoli, də Yɩɩ joŋwana yun tɩ̀án nəkwɩa culu gànʋ̀ tə. N wá vwa Yɩɩ joŋwana yun tɩ̀án nəkwɩa nyʋnɩ yuu lwaa pɩpaa* tə, Aron nyʋnɩ yuu, n ga vwa Yɩɩ joŋwana yun tɩ̀án nəkwɩa culu gànʋ̀ tə tàŋá gantwamɩna tə, ʋ tàŋá nə. 6 N wá baa yubarʋ tə, ʋ yuu nə, n ga vwa dun wonanʋ tə, kʋ nə yɩ Yɩɩ nyiən tə, yubarʋ tə nə. 7 N dàń wá tì dun nʋga* tə, n twɛ́n ʋ yuu wa, n ma tún wá vàn nə, n pa à mʋ̀ Yɩɩ cɩcɩ nə. 8 Kʋ kwa nə, n wá ja Aron bɩ̀á tə, n bà, n ga tì ba Yɩɩ joŋwana gànàn tə, n ma zʋ ba. 9 N wá vwa tàŋá gantwamɩna, Aron də ʋ bɩ̀á tə lìù mama tàŋá nə, n ga pú yupuu ba lìù mama yuu nə. Mə nətʋ nə, n wá tún Aron də ʋ bɩ̀á tə, sə ba tʋn Yɩɩ joŋwanɩ, ba pa nə. Yá à dàń pɩn nii, sə n pʋ́pʋ́nɩ́ n tún də, Yɩɩ joŋwanɩ tə nə wá ya Aron də ʋ dwíí tə tʋtʋŋɩ, máŋá də máŋá mama wuuu.

10 N wá ja nabɩa tə, n bà Yɩɩ jə́rə́ gansili tə mimii nə. N wá pa, Aron də ʋ bɩ̀á tə tún ba jɩ̀àn, ka yuu wa. 11 N wá gʋ ka, à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə mimii nə. 12 N wá lan jana tə də n jɩfʋa, n kə Yɩɩ joŋi bwálɩ́ tə nyʋran tə nə, n ga lwá tə gɩganɩ tə mama, Yɩɩ joŋi bwálɩ́ tə zɩlʋ tə yuu wa. 13 N wá lɩ naʋ tə waa wiən tə yɩra nʋga tə mama, də cɩɩn tə dəkuu tə, də tanpɩrɩbɩa bələ tə, də tə yɩra nʋga tə, n sʋ̀rɩ́ Yɩɩ joŋi bwálɩ́ tə yuu wa. 14 Yá á dàń wá tì nabɩa tə nàŋʋ́ tə, də ka tànʋ̀ tə, də ka waa bàń tə, á ja nan kwa con, á yá dəkuu bwálɩ́ tə, á sʋ̀rɩ́ lá. Kʋ yɩ cʋna kwɩan joŋi.

15 Kʋ kwa nə, n wá ja pabɩʋ tə don, n pa, Aron də ʋ bɩ̀á tə tún ba jɩ̀àn kʋ yuu wa. 16 N wá gʋ kʋ, n lòní kʋ jana tə, n ma tà Yɩɩ joŋi bwálɩ́ tə səpunə tə, n kɩkarɩ. 17 N wá ca pabɩʋ tə, n ga sɩ̀n kʋ waa wiən tə, də kʋ nɛɛ tə, n kə kʋ nandɛɛ tə, də kʋ yuu tə con. 18 N wá sʋ̀rɩ́ pabɩʋ tə mama, Yɩɩ joŋi bwálɩ́ tə yuu wa. Kʋ yɩ joŋi, ba nə wá sʋ̀rɩ́* ba pa à mʋ̀ Ba-Yígúrə́-Jə-Tiu nə, yá kʋ lwán ga ywán, tə pa nə.

19 Kʋ kwa nə, n wá ja bələ nii pabɩʋ tə. Aron də ʋ bɩ̀á tə wá tún ba jɩ̀àn, kʋ yuu wa. 20 N wá gʋ pabɩʋ tə, n lòní kʋ jana tə, n kə Aron də ʋ bɩ̀á tə jɩzən zɩɩn, də ba jɩzən jɩfʋnbɩʋ, də ba jɩzən nafʋnbɩʋ nə. Yá n dàń wá lwá jana tə gɩganɩ tə, n ma tà Yɩɩ joŋi bwálɩ́ tə səpunə tə, n kɩkarɩ. 21 N wá fwa jana Yɩɩ joŋi bwálɩ́ tə yuu wa, n súrí dun nʋga tə nə, n mɩ́n n kə Aron, də ʋ gànàn tə nə. N wá mɩ́n tə, n kə ʋ bɩ̀á tə də, də ba gànàn tə nə. Kʋ nətʋ dàń wá pa, Aron də ʋ gànàn tə, də ʋ bɩ̀á tə də ba gànàn tə ya à mʋ̀ Yɩɩ cɩcɩ nyiən. 22 N wá lɩ pabɩʋ tə nanʋga tə, də kʋ dəbili tə, də kʋ waa wiən tə yɩra nʋga tə, də kʋ cɩɩn tə dəkuu tə, də kʋ tanpɩrɩbɩa bələ tə, də tə yɩra nʋga tə, də kʋ jɩzən ciin tə. Cɩ́gá, mə pabɩʋ təntə nə, n ma lɩ ba, n tún, sə ba ya à mʋ̀ Yɩɩ joŋwana. 23 N wá lɩ dipɛn kukulu nədʋ, də gàtó bìú nədʋ, ba nə ywɛ́ də nʋga, də ŋʋ̀nʋ́ bìú nədʋ, dipɛn tə kʋ nə wà sabwarɩ ken kəpurə tə wa, ka nə wulə à mʋ̀ Ba-Yígúrə́-Jə-Tiu yáá con. 24 N wá kə tə mama Aron də ʋ bɩ̀á tə jɩ̀àn wa. Yá n dàń wá pa, ba yɩyarɩ tə, à mʋ̀ Ba-Yígúrə́-Jə-Tiu yáá con, sə kʋ bɩrɩ də, tə yɩ ba pɩn nə. 25 Kʋ kwa nə, n wá jon tə ba jɩ̀àn wa, n tún vànɩ́ tə nàŋʋ́ tə yuu wa, n sʋ̀rɩ́ Yɩɩ joŋi bwálɩ́ tə yuu wa. Kʋ yɩ joŋi ba nə wá sʋ̀rɩ́, ba pa à mʋ̀ Ba-Yígúrə́-Jə-Tiu nə, kʋ lwán ga ywán, tə pa nə. 26 Pabɩʋ tə, n nə ma tún Aron, sə ʋ ya à mʋ̀ Yɩɩ joŋwanʋ tə, n wá lɩ kʋ nyʋnɩ tə, n yɩyarɩ à mʋ̀ Ba-Yígúrə́-Jə-Tiu yáá con, sə kʋ bɩrɩ də, kʋ yɩ n pɩn nə. Kʋ kwa nə, vànɩ́ tə bwálɩ́ təntə dàń wá ya n mʋ̀ tori.

27 N wá pa nii də, nyʋnɩ tə, n nə yɩyarɩ à mʋ̀ Ba-Yígúrə́-Jə-Tiu yáá con, də ciin tə, n nə lɩ, n tún vàn nə, mɛ sə ba lɩ tə, pabɩʋ tə nàŋʋ́ tə wa, ba nə ma tún Aron, də ʋ bɩ̀á tə, sə ba ya à mʋ̀ Yɩɩ joŋwana tə. Á wá tún vànɩ́ tə bwálá təntə vàn nə, á pa nə. 28 Vànɩ́ tə bwálá təntə yɩ ba wá lɩ, Yɩzərayɛlə dwíí tə jwəŋə wiən tə wa. Cɩ́gá, tə yɩ Yɩzərayɛlə dwíí tə mɛ, sə ba lɩ ba nimarʋ jwəŋə wiən tə wa, ba pa à mʋ̀ Ba-Yígúrə́-Jə-Tiu nə. Yá à dàń pɩn nii, sə n pʋ́pʋ́nɩ́ n tún də, vànɩ́ tə bwálá təntə wá ya Aron də ʋ dwíí tə tori, máŋá də máŋá mama wuuu.

29 Aron tɩan kwa nə, ʋ bɩ̀á tə nə mɛ, sə ba zʋ ʋ Yɩɩ joŋwana gànàn tə. Ba wá zʋ tə, dɩɩn tə nə, ba nə wá twɛ́n dun nʋga ba yuu wa, ba ma tún ba, Yɩɩ joŋwanɩ tə wa. 30 Aron bɩ̀á tə wa bìú tə, ʋ nə wá ya Yɩɩ joŋwanʋ Aron yuu nə tə, wá zʋ Yɩɩ joŋwana gànàn təntə, dɩan barpɛ. Yá bìú təntə dàń nə wá zʋ Yɩɩ jə́rə́ gansili tə wa, ʋ tʋn Yɩɩ joŋwanɩ tʋtʋŋɩ tə, kwa con dibiu tə nə yɩ Yɩɩ nyiən* tə wa.

31 N wá tì pabɩʋ tə, n nə ma tún Yɩɩ joŋwana tə, n pa ba sàn kʋ nàŋʋ́ tə bwálɩ́ wa, kʋ nə yɩ parɩ. 32 Aron də ʋ bɩ̀á tə wá də́ nàŋʋ́ təntə, də kəpurə tə wa dipɛn tə, Yɩɩ jə́rə́ gansili tə mimii tə yáá. 33 Ba cɩcɩ nə wá də́ wodiu təntə. Kʋ yɩ ba cʋna kwɩan joŋi wiən. Joŋi wiən təntə nə, ba ma tún ba, sə ba ya à mʋ̀ Yɩɩ joŋwana. Lìù don mama wà mɛ, sə ʋ twá ʋ də́ tə. Cɩ́gá, tə yɩ Yɩɩ culu wiən. 34 Tɩa nə pʋrɩ ka dà nàŋʋ́ tə, nə à yə̀ə́ dipɛn tə nə, n nə ma fwa joŋi tə, n ma tún Yɩɩ joŋwana tə, n mɛ, sə n sʋ̀rɩ́ tə gɩganɩ tə. Tə kʋ́ʋ̀ wà mɛ, sə ba də́ tə. Cɩ́gá, tə yɩ Yɩɩ culu wiən.

35 N wá tʋn yoo mama, kʋ twá ndə nətʋ tə mama nə, à nə pɩn mʋ́ nii, sə n tʋn Aron də ʋ bɩ̀á tə yɩra. N wá tì dɩan barpɛ, n ma tanɩ ba, n tún, sə ba ya à mʋ̀ Yɩɩ joŋwana.

36 Kʋ tə nə súrí lá, dɩɩn mama, n wá gʋ nabɩa, n ma fwa cʋna kwɩan joŋi. Mə kʋ wá twá nətʋ, n ma kwɛn cʋna, n lɩ Yɩɩ joŋi bwálɩ́ tə yuu wa. Yá n dàń wá twɛ́n dun nʋga kʋ yuu wa, n ma bɩrɩ də, kʋ yɩ Yɩɩ cɩcɩ nyiən. 37 N wá tì dɩan barpɛ, n ma kwɛn cʋna tə, n lɩ Yɩɩ joŋi bwálɩ́ tə yuu wa, sə kʋ ya à mʋ̀ Yɩɩ cɩcɩ nyiən. Kʋ kwa nə, Yɩɩ joŋi bwálɩ́ tə dàń wá jì à mʋ̀ Yɩɩ cɩcɩ nyiən. Yá won mama nə dwen kʋ yɩra, kʋ won təntə də wá jì à mʋ̀ Yɩɩ nyiən.»

Kwìə̀ tə Yɩɩ nə pɩn, dɩɩn mama joŋi fwaŋʋ yoo wa

38 Ba-Yígúrə́-Jə-Tiu tə swɩ̀n, ʋ súrí lá, ʋ wʋ́: «Dɩɩn mama, pəbii bələ, tə nə jə bɩnɩ nədʋ nədʋ nə, á wá ma fwa joŋi, Yɩɩ joŋi bwálɩ́ tə yuu wa, máŋá mama wuuu. 39 Á wá ja pəbiə tə don, á ma fwa joŋi, jɩjʋ nə, á ga ja ka don tə, á fwa joŋi, didəni nii nə. 40-41 Á wá fwa mun kilo batwa, á ywɛ́ də olivə* tɩ̀án lənə nʋga, ka nə yɩ parɩ, litərə də faan, də divɛn litərə də faan, á súrí jɩjʋ pəbiə tə nə, á ma fwa joŋi tə. Mə nətʋ nə, á wá fwa, də didəni nii pəbiə tə də. Tə yɩ joŋi, á nə wá sʋ̀rɩ́, á pa à mʋ̀ Ba-Yígúrə́-Jə-Tiu nə, kʋ lwán ga ywán, tə pa nə. 42 Mə joŋi yiri təntə nə, á mʋ̀ də á dwíə́ tə mama, á nə wá kə lʋʋ wa, mɛ, sə á sʋ̀rɩ́, á pa nə, máŋá də máŋá mama wuuu. Yɩɩ jə́rə́ gansili tə mimii tə yáá nə, á mɛ, sə á fwa kʋ, à mʋ̀ Ba-Yígúrə́-Jə-Tiu yáá con. Mə bwálɩ́ təntə wa nə, à wá jəri aba, sə à swɩ̀n sʋ̀ràn n con. 43 Mə bwálɩ́ təntə wa nə, à wá jəri Yɩzərayɛlə dwíí tə, yá à dun tə dàń nə wá pa, kʋ ya parɩ. 44 À tún Yɩɩ jə́rə́ gansili tə, də Yɩɩ joŋi bwálɩ́ tə vàn nə, sə tə ya à mʋ̀ Yɩɩ cɩcɩ nyiən. Yá à ga wá tún Aron də ʋ bɩ̀á tə də vàn nə, sə ba tʋn Yɩɩ joŋwanɩ, ba pa nə. 45 À wá ya Yɩzərayɛlə dwíí tə titəŋi wa, à ga wá ya ba Yɩɩ. 46 Yá ba dàń wá lwarɩ də, à mʋ̀ nə yɩ Ba-Yígúrə́-Jə-Tiu, ba Yɩɩ tə, à nə pɩn ba nan, ba yá Ezwipətə lʋʋ nii tə, sə à ya ba titəŋi wa. À mʋ̀ nə yɩ Ba-Yígúrə́-Jə-Tiu, Yɩzərayɛlə dwíí tə Yɩɩ tə.»