Zaŋʋ 30

Kwìə̀ tə Yɩɩ nə pɩn, ʋ joŋi bwálɩ́ tə, ba nə wá ma sʋ̀rɩ́ wusinə tə, fwaŋʋ yoo wa

1 Ba-Yígúrə́-Jə-Tiu swɩ̀n Moyizə con, ʋ wʋ́: «Á wá ja sɩnjʋna dàʋ̀, á ma fwa Yɩɩ joŋi bwálɩ́, á nə wá sʋ̀rɩ́ wusinə kʋ yuu wa. 2 Kʋ danɩ də kʋ wanɩ mɛ, sə tə mɛ duən. Kʋ danɩ də kʋ wanɩ wá ya jɩvaŋɩ yii nədʋ nədʋ. Kʋ yuu tɩa zɩgʋ wá ya jɩvaŋa bələ. Á wá fwa kʋ, á lɩ cələn, ndə nyʋran nə, kʋ yuu con nigwancɩan tə wa, tə marɩ kʋ yɩra, tə də kʋ mɛ ya won nədʋ. 3 Á wá ja sɩ́án tə nə ba durən jə, á ma mwàlɩ̀ kʋ yuu tə, də kʋ waa tə, də kʋ kwa tə, də kʋ nyʋran tə mama. Á wá ja sɩ́án, á ma fwa kiru kʋ yuu wa, á ja kɩkarɩ kʋ nii tə mama. 4 Á wá fwa sɩ́án valɩ bələ bələ, á kə Yɩɩ joŋi bwálɩ́ tə, ba nə wá ma sʋ̀rɩ́ wusinə tə, səpunə bələ tə nə, kʋ nii kiru tə də̀ń con, sə ba tɩrɩ dɛɛ nədaran tə wa, ba ma zɩn kʋ. 5 Á dàń wá sárɩ́ sɩnjʋna dɛɛ nədaran bələ, á ja sɩ́án, á mwàlɩ̀ tə. 6 Á wá tún Yɩɩ joŋi bwálɩ́ təntə, patasɩn tə yáá con, kʋ nə kwálɩ́ Yɩɩ nimarʋ dansɩa* daka tə, də ka nipuə tə, ba nə ma boŋə cʋna kwɩan bwálɩ́* tə nə, ka nə púə́ Yɩɩ nimarʋ dansɩa wiən tə nii nə. Mə bwálɩ́ təntə wa nə, à wá jəri mʋ́. 7 Jɩjʋ mama, máŋá tə wa Aron nə wá kwɛn tʋntʋnɩ tə, ʋ wá sʋ̀rɩ́ wusinə, Yɩɩ joŋi bwálɩ́ təntə yuu wa. 8 Yá Aron tə wá sʋ̀rɩ́ wusinə tə, didəni mama, máŋá tə wa, ʋ nə wá sʋ̀rɩ́ tʋntʋnɩ tə. Kʋ yɩ wusinə, á dwíə́ tə mama, á nə wá kə lʋʋ wa nə mɛ, sə ba də ba sʋ̀rɩ́, à mʋ̀ Ba-Yígúrə́-Jə-Tiu yáá con, máŋá də máŋá mama wuuu. 9 Á wà mɛ, sə á sʋ̀rɩ́ wusinə nəkaʋ, nə à yə̀ə́ joŋi vànɩ́ tə, ba nə sʋ̀rɩ́*, ba pɩn à mʋ̀ Yɩɩ nə, nə à yə̀ə́ vàrʋ́ càlɩ̀, Yɩɩ joŋi bwálɩ́ təntə yuu wa. Á wà mɛ, sə á twɛ́n wonɩa kʋ yuu wa də mama. 10 Naa nədʋ, bɩnɩ mama, Aron wá kə cʋna kwɩan joŋi tə jana tə, Yɩɩ joŋi bwálɩ́ tə, ba nə wá ma sʋ̀rɩ́ wusinə tə, nyʋran tə nə. Ʋ wá fwa kʋ nətʋ, ʋ ma kwɛn lalʋʋ tə cʋna, Yɩɩ joŋi bwálɩ́ tə, ba nə wá ma sʋ̀rɩ́ wusinə tə yuu wa, ʋ lɩ. Á dwíə́ tə mama wa, á nə wá kə lʋʋ wa, kʋ nətʋ tə mɛ, sə kʋ tʋn naa nədʋ, bɩnɩ mama, máŋá də máŋá mama wuuu. Yɩɩ joŋi bwálɩ́ təntə mɛ, sə kʋ ya à mʋ̀ Ba-Yígúrə́-Jə-Tiu cɩcɩ nyiən.»

Yɩɩ wúlú bwálɩ́ tə lanpoo yoo

11 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 12 «Máŋá tə, á nə gàlɩ̀ Yɩzərayɛlə dwíí tə, ba lìù mama mɛ, sə ʋ ŋwɩ́n ʋ tətə mɩɩ tə yuu ywàŋʋ́ lanpoo, ʋ pa à mʋ̀ Ba-Yígúrə́-Jə-Tiu nə. Kʋ nətʋ wá pa, càn bá yí ba, galʋ tə máŋá wa. 13 Nə̀ń kʋ tə, lìù tə mama, ba nə wá gàlà, nə mɛ, sə ʋ pa. Ʋ mɛ, sə ʋ pa səbilugu faan. Kʋ nə twá Yɩɩ wúlú bwálɩ́ tə səkəri bìú tə, kʋ dun yí sibipwənə bələ. Lanpoo təntə yɩ ba wá ŋwɩ́n, ba pa à mʋ̀ Ba-Yígúrə́-Jə-Tiu nə. 14 Lɩ̀à tə mama, ba nə jə bɩna sapʋa, kʋ dàń ja dɩ̀, mɛ, sə ba gàlà ba, ba ga ŋwɩ́n lanpoo təntə, ba pa à mʋ̀ Ba-Yígúrə́-Jə-Tiu nə. 15 Jɩjə tíú bá ŋwɩ́n ʋ mɩɩ tə yuu ywàŋʋ́ lanpoo tə, kʋ doni səbilugu faan, ʋ pa Ba-Yígúrə́-Jə-Tiu nə. Zʋrʋ də ma bá ŋwɩ́n, kʋ mùrì səbilugu faan. 16 N wá jon mɩɩ yuu ywàŋʋ́ səbiu tə, Yɩzərayɛlə dwíí tə con, á ma tʋn Yɩɩ jə́rə́ gansili tə tʋ̀tʋ̀nán tə. Mɩɩ yuu ywàŋʋ́ kwənə təntə wá ya mɩmɩnʋ, à mʋ̀ Ba-Yígúrə́-Jə-Tiu yáá con, kʋ pa à bʋ́n Yɩzərayɛlə dwíí tə yuu ywàŋʋ́ yoo.»

Kwìə̀ tə Yɩɩ nə pɩn, ʋ joŋwana nɩ́á kwarɩ tə fwaŋʋ yoo wa

17 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 18 «Á wá ja cɩnɩan, á ma fwa kwarɩ, də kʋ də̀ń zɩlʋ, á zɩgɩ Yɩɩ jə́rə́ gansili tə, də Yɩɩ joŋi bwálɩ́ tə pwə́rə́ wa. Á wá kə nɩ́á kʋ wa, sə à joŋwana tə ma sɩ̀n ba yɩra durən. 19 Nɩ́á təntə nə, Aron də ʋ bɩ̀á tə wá də ba ma sɩ̀n ba jɩ̀àn də ba nɛɛ. 20 Máŋá tə wa, ba nə pɩ̀à, ba zʋ Yɩɩ jə́rə́ gansili tə wa, ba mɛ, sə ba dí yáá ba swɛ ba yɩra də nɩ́á təntə, sə ba dàn ká tɩ. Ba nə kʋ́ʋ̀ pɩ̀à, ba yí à joŋi bwálɩ́ tə yɩra, ba tʋn, ba ga sʋ̀rɩ́ jwəŋə, ba pa à mʋ̀ Ba-Yígúrə́-Jə-Tiu nə, 21 ba mɛ, sə ba dí yáá ba sɩ̀n ba jɩ̀àn də ba nɛɛ, sə ba dàn ká tɩ. Kʋ yɩ yoo, à nə pɩn nii kʋ yuu wa, máŋá də máŋá mama wuuu, sə Aron də ʋ dwíí tə mama, ʋ nə wá kə lʋʋ wa tʋn, máŋá də máŋá mama wuuu.»

Kwìə̀ tə Yɩɩ nə pɩn, dun nʋga* tə fwaŋʋ, də ka tʋtʋŋɩ yoo wa

22 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 23 «N mʋ̀ Moyizə wá pɩ̀à wusinə, tə lwán nə ywán zənzən. Tə mʋ̀ nə yɩ təən mala, tə nə pàlɩ̀, kilo bonu, də sinamomə tɩ̀ʋ́ daboru, kʋ lwán nə ywán, kilo bələ də faan, də gaʋ yiri don, kʋ lwán nə ywán, kilo bələ də faan, 24 də loriye tɩ̀ʋ́ vʋran, kilo bonu. Tə dun tə mɛ, sə kʋ twá də Yɩɩ wúlú bwálɩ́ tə səkəri bɩ̀á tə. N wá súrí olivə nʋga litərə bardʋ, wusinə tə nə. 25 Yá n dàń wá pa tə mama lìù nə, ʋ nə fwa tɩralɩ, sə ʋ kə tə duən nə, ʋ ma fwa dun nʋga*, ka nə yɩ Yɩɩ nyiən. Mə nʋga təntə nə, ba wá ma tún lɩ̀à, də wiən vàn nə, ba pa à mʋ̀ Yɩɩ nə.

26 N wá kə dun nʋga tə Yɩɩ jə́rə́ gansili tə yɩra, də Yɩɩ nimarʋ dansɩa daka tə yɩra, 27 də Yɩɩ dipɛn tabɩlʋ tə, də kʋ tʋtʋnzɩla tə mama yɩra, də canzɩlʋ tə, də kʋ tʋtʋnzɩla tə yɩra, də Yɩɩ joŋi bwálɩ́ tə, ba nə wá ma sʋ̀rɩ́ wusinə tə yɩra, 28 də Yɩɩ joŋi bwálɩ́ tə, ba nə wá ma sʋ̀rɩ́ jwəŋə vàná tə, də kʋ tʋtʋnzɩla tə mama yɩra, də Yɩɩ joŋwana nɩ́á kwarɩ tə, də kʋ də̀ń zɩlʋ tə yɩra. 29 N wá tún wiən təntə vàn nə, n pa nə, yá tə dàń wá ya à cɩcɩ nyiən. Won mama nə dwen tə yɩra, kʋ də wá jì à mʋ̀ nyiən. 30 N wá twɛ́n dun nʋga tə Aron də ʋ bɩ̀á tə yuu wa, n ma tún ba vàn nə, sə ba tʋn Yɩɩ joŋwanɩ, ba pa nə.

31 N wá swɩ̀n Yɩzərayɛlə dwíí tə con, də dun nʋga təntə wá ya à mʋ̀ Yɩɩ cɩcɩ nyiən, á dwíə́ tə mama wa, á nə wá kə lʋʋ wa, máŋá də máŋá mama wuuu. 32 Á wà mɛ, sə á ja nʋga təntə, á tùrì á yɩra. Á wà mɛ, sə á ja wiən tə, ba nə ma fwa ka tə, á ma fwa ka yiri də. Nʋga təntə yɩ à mʋ̀ Yɩɩ cɩcɩ nyiən, yá á mɛ, sə á jələ ka, ndə culu won nə. 33 Lìù don mama nə fwa nʋga təntə yiri, nə à yə̀ə́ ʋ nə ken ka lìù yɩra, ʋ nə tà Yɩɩ joŋwanʋ, á mɛ, sə á lɩ wá, Yɩzərayɛlə lɩ̀à dwíí wa.»

34 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Pɩa cɩnba dabii, tə lwán nə ywán. Tə mʋ̀ nə yɩ sətorakəsə tɩ̀ʋ́ mala, də jijorən pʋran, də galəbanomə tɩ̀ʋ́ mala. N wá pɩ̀à wusinə tə nə ba durən jə, tə dánɩ́ ga mɛ də cɩnba dabii tə, n súrí tə nə. 35 N wá pa tə lìù nə, ʋ nə fwa tɩralɩ, sə ʋ ma fwa wusinə tə, ba nə sʋ̀rɩ́. Ʋ wá kə nakuən tə wa. Tə wá ya Yɩɩ cɩcɩ nyiən, yá durən wà mɛ, sə tə ya tə wa. 36 N wá lɩ tə wa, n gà, n pa tə jì mun, n tún Yɩɩ nimarʋ dansɩa daka tə yáá con, Yɩɩ jə́rə́ gansili tə wa, bwálɩ́ tə nə, à nə wá jəri mʋ́. Á mɛ, sə á jələ tə, ndə culu won nə. 37 Wusinə təntə, n nə wá fwa, lìù don mama wà mɛ, sə ʋ fwa tə yiri, ʋ tətə tɩ̀àn yɩrɩ. Á mɛ, sə á jələ tə, də tə yɩ à mʋ̀ Ba-Yígúrə́-Jə-Tiu cɩcɩ nyiən. 38 Lìù tə mama, ʋ nə fwa wusinə təntə yiri, sə ʋ də ma nì tə lwán, á mɛ, sə á lɩ wá, Yɩzərayɛlə lɩ̀à dwíí wa.»