Tʋ̀tʋ̀nà tə nə wá fwa Yɩɩ wúlú bwálɩ́ tə
31
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Nə̀ń, à kúrí Uri bìú Bɛsalɛlə, ʋ nə yɩ Urə nàʋ́, Zwida dwíí tə wa. 3 À pɩn, ʋ sú də à Siŋu* tə. Yá kʋ dàń pɩn, ʋ jə wʋbʋŋa, də pubʋŋa, də yənu, sə ʋ ma tʋn jɩɩn tʋ̀tʋ̀nán yiri mama. 4 Ʋ jə jɩɩn tʋ̀tʋ̀nán fwaŋʋ pubʋŋɩ, ʋ ga jə sɩ́án, də wárʋ́, də cɩnɩan, tʋtʋŋɩ yənu. 5 Ʋ yə̀ə́ ka sárɩ́ kapana tə nə jə funə, ka tún wiən yɩra, ʋ ma yə̀ə́ dɛɛ wiən də siu. Ʋ jə jɩɩn tʋ̀tʋ̀nán yiri mama yənu. 6 À pɩn wá Oholɩabə, ʋ nə yɩ Ahɩsamakə bìú, Dan dwíí tə wa, sə ʋ san wá. Yá tʋ̀tʋ̀nà tə duən tə də mama, ba nə jə jɩɩn tʋ̀tʋ̀nán yənu, à ken wʋbʋŋa ba bɩcanɩ wa, sə ba mama san duən nə, ba tʋn kʋ tə mama, à nə pɩn mʋ́ nii kʋ yuu wa. 7 Yɩɩ jə́rə́ gansili* tə, də Yɩɩ nimarʋ culu daka* tə, də ka nipuə tə, ba nə ma boŋə cʋna kwɩan bwálɩ́* tə, də Yɩɩ jə́rə́ gansili tə tʋtʋnzɩla tə mama, 8 də tabɩlʋ tə, də kʋ tʋtʋnzɩla tə, də sɩ́án canzɩlʋ tə, də kʋ tʋtʋnzɩla tə mama, də Yɩɩ joŋi bwálɩ́ tə, ba nə wá ma sʋ̀rɩ́ wusinə tə, 9 də Yɩɩ joŋi bwálɩ́ tə, ba nə wá ma sʋ̀rɩ́ jwəŋə, ba pa nə, də kʋ tʋtʋnzɩla tə mama, də nɩ́á kwarɩ tə, də kʋ də̀ń zɩlʋ tə, 10 də dun gànàn tə, də Yɩɩ joŋwanʋ Aron culu gànàn tə, də ʋ bɩ̀á tə joŋwanɩ gànàn tə, 11 də dun nʋga* tə, də wusinə tə ba nə sʋ̀rɩ́, Yɩɩ wúlú bwálɩ́ tə wa. Ba wá fwa wiən təntə mama, kʋ twá ndə à nə pɩn mʋ́ nii tə yuu wa nətʋ.»Sìə́ dɩɩn tə ka zìlí yoo
12 Ba-Yígúrə́-Jə-Tiu swɩ̀n Moyizə con, ʋ wʋ́: 13 «N mʋ̀, swɩ̀ń Yɩzərayɛlə dwíí tə con, sə ba zìlí à sìə́ dɩan tə. Cɩ́gá, sìə́ dɩɩn tə wá ya mɩmɩnʋ, à də aba pwə́rə́ wa, á dwíə́ tə mama wa, á nə wá kə lʋʋ wa, máŋá də máŋá mama wuuu. Kʋ mʋ̀ nə wá bɩrɩ də, à mʋ̀ Ba-Yígúrə́-Jə-Tiu nə pɩn, á jì à mʋ̀ Yɩɩ lɩ̀à. 14 Á mɛ, sə á zìlí sìə́ dɩɩn tə. Cɩ́gá, dɩɩn təntə mɛ, sə kʋ ya culu dɩɩn, kʋ pa aba. Lìù tə, ʋ nə cʋ̀gʋ̀ kʋ culu təntə, ʋ mɛ, sə ba gʋ wá. Lìù tə mama, ʋ nə tʋn tʋtʋŋɩ sìə́ dɩɩn tə nə, ʋ mɛ, sə ba lɩ wá, Yɩzərayɛlə lɩ̀à dwíí wa. 15 Á jə dɩan bardʋ, dapanɩ wa, sə á ma tʋn á tʋ̀tʋ̀nán. Yá barpɛ nii dɩɩn tə mʋ̀ wá ya sìə́ dɩɩn nəfarʋ, kʋ nə yɩ à mʋ̀ Ba-Yígúrə́-Jə-Tiu cɩcɩ nyiən. Lìù tə mama, ʋ nə tʋn sìə́ dɩɩn tə nə, ʋ mɛ, sə ba gʋ wá. 16 Yɩzərayɛlə dwíí tə mɛ, sə ba zìlí sìə́ dɩɩn tə, ba twá kʋ nə, ba dwíə́ tə mama wa, ba nə wá kə lʋʋ wa, máŋá də máŋá mama wuuu. Kʋ yɩ nimarʋ, kʋ wulə máŋá də máŋá mama wuuu. 17 Kʋ wá ya mɩmɩnʋ, à mʋ̀ də Yɩzərayɛlə dwíí tə pwə́rə́ wa, máŋá də máŋá mama wuuu. Cɩ́gá, dɩan bardʋ nə, à mʋ̀ Ba-Yígúrə́-Jə-Tiu tì, à ma fwa lanworu də tɩa. Yá barpɛ nii dɩɩn tə nə, à yá à tʋ̀tʋ̀nán tə, à ga sìí.»
18 Máŋá tə, Ba-Yígúrə́-Jə-Tiu nə swɩ̀n Moyizə con, Sinayi paan tə yuu wa, ʋ zwɛ̀, ʋ pɩn kapana pɩpɛɛ bələ Moyizə nə. Yɩɩ yà pʋ́pʋ́nɩ́ ʋ nii yìə̀n tə, ʋ tún kapana pɩpɛɛ təntə yuu wa, də ʋ jɩɩn.