Sɩ́án nabiə tə yoo
32
1 Yɩzərayɛlə lalʋʋ tə nɩ də Moyizə dán paan tə yuu wa, ʋ ba pìí ʋ cwi. Yá ba dàń vəli ba kun duən nə, Aron con, ba wʋ́: «Zàn n fwa yɩɩ n pa nəba, sə kʋ ya nə yáá, kʋ ja nəba kʋ va. Cɩ́gá, ʋ mʋ̀ Moyizə təntə, ʋ nə pɩn nə nan Ezwipətə lʋʋ nii tə wa, nə yəri yoo tə nə yí ʋ mʋ̀ bɛɛ təntə.» 2 Aron ma le ba, ʋ wʋ́: «Á lɩa sɩ́án zɩnkwana tə, tə nə wulə á kana tə, də á bɩ̀á tə zɩan nə, á ja bà, á pa nə.» 3 Yá lalʋʋ tə mama dàń lɩ sɩ́án zɩnkwana tə, tə yà nə wulə ba zɩan nə, ba ja bà, ba pa Aron nə. 4 Ʋ jon sɩ́án tə ba jɩ̀àn wa, ʋ nyɩan ʋ ma fwa sɩ́án nabiə. Ba dàń swɩ̀n ba wʋ́: «Yɩzərayɛlə dwíí lɩ̀à-ba, á nəŋə á yɩɩ tə, kʋ nə pɩn á nan Ezwipətə lʋʋ nii tə wa.» 5 Máŋá tə, Aron nə nɩ kʋ nətʋ tə, ʋ lwə̀ joŋi bwálɩ́ sɩ́án nabiə tə yáá con, ʋ ga bòrì, ʋ wʋ́: «Jwɩan nə, nə wá də́ cànà, nə ma pa dun Ba-Yígúrə́-Jə-Tiu nə!» 6 Kʋ tɩpʋrɩ nə, ba zàn jɩjʋ fuən fuən, ba fwa jwəŋə ba sʋ̀rɩ́*, ba ga fwa nimarʋ jwəŋə*. Lalʋʋ tə jə̀ń ba də́, ba ga nyʋn. Yá kʋ kwa nə, ba dàń zàn, ba wulə ba sɛ.7 Ba-Yígúrə́-Jə-Tiu ma swɩ̀n Moyizə con, ʋ wʋ́: «Vəli n cú. Cɩ́gá, n lɩ̀à tə n nə pɩn ba nan Ezwipətə lʋʋ nii tə wa, zʋa cʋna wa. 8 Ba wà dán, ba ma dʋgʋ cwəŋə tə, à nə tún, à pa ba, sə ba twá ka nə. Ba nyɩan lugu, ba ma fwa nabiə. Ba tʋa ka yáá con, ba pa ka dun, ba ga fwa jwəŋə, ba pa ka. Yá ba dàń swɩ̀n, ba wʋ́: “Yɩzərayɛlə dwíí lɩ̀à-ba, á nəŋə á yɩɩ tə, kʋ nə pɩn á nan Ezwipətə lʋʋ nii tə wa.” »
9 Yá Ba-Yígúrə́-Jə-Tiu dàń swɩ̀n Moyizə con, ʋ wʋ́: «À na də lalʋʋ kʋ tə yɩ lɩ̀à tə, ba zɩɩn nə ba nə̀ń. 10 Sɩ́ʋ́n nə, n dàń yá, n cʋgʋ à nə. À lɩŋa wá zàn ba yuu wa, à ga cʋ̀gʋ̀ ba mɩ́ámɩ́án, à pa ba jɛ́n tɩa yuu wa. Yá à dàń wá pa n mʋ̀ jì dwíí nəfarʋ nɩbɛɛ.»
11 Yá Moyizə lòrì Ba-Yígúrə́-Jə-Tiu, ʋ nə yɩ ʋ Yɩɩ, ʋ wʋ́: «Ba-Yígúrə́-Jə-Tiu, bɛ̀ɛ̀ nə pɩn, n ma pɩ̀à, n pa n lɩŋa zàn n lɩ̀à tə yuu wa, kʋ nə twá də n wanʋ, də n dɩ̀àn nəfarʋ tə, n ma lɩ ba, Ezwipətə lʋʋ nii tə wa? 12 N nə tʋn kʋ nətʋ tə, Ezwipətə tɩ̀án wá swɩ̀n də, kʋ yɩ n lɩ ba, n ja nan, sə n tʋn wʋlʋŋʋ ba yɩra, n ga gʋ ba pɛɛn tə wa, n pa ba jɛ́n tɩa yuu wa. À lòrì mʋ́, dàn ká pa n lɩŋa zàn. Lwàń n pubʋŋa, n ga yá yolwan tə, n yà nə pɩ̀à, sə n tʋn n lɩ̀à tə yɩra. 13 Bʋ́n n tʋ̀tʋ̀nà Abərahamə, də Yɩzakə, də Zwakɔbə yoo. N tətə nə dùə̀ də n tɩ̀àn, n swɩ̀n də, n wá pa ba dwíí pùlì, ndə kacɩlacɛɛ nə, lanworu tə wa. N swɩ̀n də, n wá pa lʋʋ nii kʋ tə, n nə swɩ̀n kʋ yoo, ba dwíí nə, sə kʋ ya ba mʋ̀ nyiən, máŋá mama wuuu.» 14 Ba-Yígúrə́-Jə-Tiu dàń lwàń ʋ pubʋŋa, ʋ ga yá yolwan tə, ʋ yà nə pɩ̀à, sə ʋ tʋn ʋ lɩ̀à tə yɩra.
15 Moyizə pìí ʋ nan paan tə yuu ʋ cú, də Yɩɩ nimarʋ dansɩa kapana pɩpɛɛ bələ tə, ʋ jɩɩn wa. Yɩɩ nii yìə̀n tə yà pʋ́pʋ́nɩ́ kapana pɩpɛɛ təntə nədʋ mama yɛ́ɛ́ bələ tə yuu wa. 16 Kapana pɩpɛɛ tə yà yɩ Yɩɩ jɩɩn tʋtʋŋɩ. Tə yuu pʋ́pʋ́ná tə də ga yɩ Yɩɩ jɩɩn pʋ́pʋ́ná. 17 Zozuwe nì lalʋʋ tə kori, də ba mà cə̀rí. Ʋ ma swɩ̀n Moyizə con, ʋ wʋ́: «Kʋ̀ʋ̀ zizigu wulə lalʋʋ tə dəkuu bwálɩ́ tə wa.» 18 Yá Moyizə swɩ̀n, ʋ wʋ́:
«Ɔn ɔn! Kʋ tà lɩ̀à tə nə dí dɩ̀àn gwaran zizigu,
kʋ ma tà lɩ̀à tə, dʋŋa nə dí dɩ̀àn ba yuu wa gwaran zizigu.
À mʋ̀ yɩ pupwən gwaran zizigu à nə̀ń.» 19 Yá Moyizə dàń nə twi, ʋ bwə́lə́ lalʋʋ tə dəkuu bwálɩ́ tə, ʋ nɩ sɩ́án nabiə tə, ʋ ga na Yɩzərayɛlə dwíí tə, də ba wulə ba sɛ. Ʋ lɩŋa nyɩ́n tə zàn, ʋ ga dɩ kapana pɩpɛɛ tə, tə yà nə wulə ʋ jɩɩn, ʋ lwa, paan tə dəkuu nə. 20 Ʋ jon sɩ́án nabiə tə, ba yà nə fwa, ʋ sʋ̀rɩ́ mən wa. Ʋ gà ka mama ka jì mun, ʋ lwá nɩ́á wa, ʋ pa Yɩzərayɛlə dwíí tə nyʋn.
21 Yá Moyizə dàń bwe Aron, ʋ wʋ́: «Bɛ̀ɛ̀ nə lalʋʋ kʋ tə ma fwa mʋ́, n ma van cʋna nəfarʋ kʋ tə nyandon, n kə ba yuu wa nətən?» 22 Aron le, ʋ wʋ́: «À nyánʋ́, à lòrì mʋ́, dàn ká pa n lɩŋa zàn! N tətə yə̀ə́ lalʋʋ kʋ tə nyɩa. N yə̀ə́ də, ba swə ka tʋn cʋna. 23 Ba mʋ̀ nə swɩ̀n à con, ba wʋ́: “Fwa yɩɩ n pa nəba, sə kʋ ya nə yáá, kʋ ja nəba kʋ va. Cɩ́gá, Moyizə təntə, ʋ nə pɩn nə nan Ezwipətə lʋʋ nii tə wa, nə yəri yoo tə nə yí ʋ mʋ̀ bɛɛ təntə.” 24 À ma swɩ̀n ba con, à wʋ́, ba lɩ̀à tə, ba nə jə sɩ́án, lɩa tə ba ja bà. Ba ma lɩ tə, ba pa nə. À jon tə, à nyɩan mən wa, yá tə jìgə̀ nabiə ka tə.»
25 Moyizə nɩ də, Aron yá lalʋʋ tə, ʋ pa ba zʋ tʋtʋnkʋkwɩnan wa, kʋ pa ba pwɛ́ ba dʋŋa yáá con. 26 Moyizə dàń vəli, ʋ zɩgɩ ba dəkuu bwálɩ́ tə mimii nə, ʋ ga bòrì, ʋ wʋ́: «Lɩ̀à tə, ba nə yɩ Ba-Yígúrə́-Jə-Tiu kwa lɩ̀à, bɩ̀án à con!» Yá Levi dwíí lɩ̀à tə mama dàń vəli, ba kun duən nə, ba kɩkarɩ Moyizə. 27 Ʋ swɩ̀n ba con, ʋ wʋ́: «Á nəŋə kʋ tə, Ba-Yígúrə́-Jə-Tiu, ʋ nə yɩ Yɩzərayɛlə dwíí tə Yɩɩ, nə swɩ̀n. Á lìù mama tì ʋ kwatara sɩ̀ʋ́, ʋ kə ʋ ciceri nə, á ga nan, á jírí á dəkuu bwálɩ́ tə wa, á twá mimien tə mama nə, də á bwɛ́. Á lìù mama wá gʋ ʋ nubiu, nə à yə̀ə́ ʋ dabɛɛ, nə à yə̀ə́ ʋ dwíí tíú.» 28 Levi dwíí tə sɛ̀, ba tʋn kʋ tə, Moyizə nə pɩn nii, sə ba tʋn. Yá kʋ dɩɩn tə nə, ba gʋa lɩ̀à lalʋʋ tə wa, ba yí ndə lɩ̀à mʋ̀rʋ̀ batwa nə. 29 Yá Moyizə dàń swɩ̀n, ʋ wʋ́: «Á pɩn á tɩ̀àn Ba-Yígúrə́-Jə-Tiu nə, zə̀n kʋ tə. Cɩ́gá, á lìù mama sɛ̀ ʋ gʋ, kʋ nə swə kʋ yɩ ʋ bìú, nə à yə̀ə́ ʋ nubiu də tətə. Yá kʋ nətʋ tə pɩn, Ba-Yígúrə́-Jə-Tiu fwa zəni á yɩra, zə̀n kʋ tə.»
Moyizə lwɛ̀ Yɩɩ nə, Yɩzərayɛlə dwíí tə yuu yɩrɩ
30 Kʋ tɩpʋrɩ nə, Moyizə swɩ̀n lalʋʋ tə con, ʋ wʋ́: «Á tʋn cʋna nəfarʋ. Yá sɩ́ʋ́n nə, à wá pìí à dɩ̀ Ba-Yígúrə́-Jə-Tiu con, paan tə yuu wa. Kʋ wàá də, à wá wànɩ́ à na á cʋna tə kwɩan, ʋ con.» 31 Moyizə pìí ʋ va Ba-Yígúrə́-Jə-Tiu con, ʋ swɩ̀n, ʋ wʋ́: «Aaa! Yuu-Tiu, lalʋʋ kʋ tə tʋn cʋna nəfarʋ. Ba fwa sɩ́án yɩɩ, ba pa ba tɩ̀àn nə. 32 Yá à dàń lwɛ̀ n nə, sɩ́ʋ́n nə, sə n yá ba cʋna tə, n pa tə zwɛ̀. Kʋ nə tà nətʋ, à lòrì mʋ́, sə n púpùgú à yɩrɩ, n lɩ n sagɩ tə wa, n nə pʋ́pʋ́nɩ́ n lɩ̀à tə yɩra.» 33 Ba-Yígúrə́-Jə-Tiu swɩ̀n Moyizə con, ʋ wʋ́: «Kʋ yɩ lìù tə, ʋ nə tʋn cʋna tə, ʋ zɩgɩ à nə, yɩrɩ nə, à wá púpùgú, à lɩ, à sagɩ tə wa. 34 Sɩ́ʋ́n nə, n dàń vəli, n ja lalʋʋ tə, n va bwálɩ́ tə, à nə bɩrɩ mʋ́. À malɩka tə wá ya n yáá. Yá dɩɩn tə nə, à nə wá bà ba con, à wá van ba zɩɩn nə, ba cʋna tə yɩrɩ, ba nə tʋn.» 35 Yá Ba-Yígúrə́-Jə-Tiu dàń ken càn lalʋʋ tə nə, ba nə pɩn Aron fwa sɩ́án nabiə tə, ʋ pa ba yɩrɩ.