Yɩɩ pɩn nii Moyizə nə, sə ba zàn, ba zʋ cwəŋə
33
1 Ba-Yígúrə́-Jə-Tiu swɩ̀n Moyizə con, ʋ wʋ́: «Zàn á dəkuu bwálɩ́ kʋ tə wa, n ja lalʋʋ tə, n nə pɩn ba nan Ezwipətə lʋʋ nii tə wa, sə á va lʋʋ nii tə wa, à nə dùə̀ də, à wá pa Abərahamə, də Yɩzakə, də Zwakɔbə dwíí tə nə. 2 À wá tʋn malɩka, sə ka ya á yáá. Yá à wá dɩŋa Kanaan tɩ̀án tə, də Amɔrə dwíí tə, də Ɛtə dwíí tə, də Perizi dwíí tə, də Evi dwíí tə, də Yebusə tɩ̀án tə, à lɩ, á yáá con. 3 Á vələ lʋʋ nii tə wa, nayɩla də tʋ̀ràn nə súə́ lá, tə pàlɩ̀. Yá à mʋ̀ tətə dàń nə bá kwé aba, à ja va. À nə kwé aba, kʋ wàá də, à wá cʋ̀gʋ̀ aba mɩ́ámɩ́án cwəŋə wa, á nə yɩ zɩbanənyɩna tə yɩrɩ.»4 Máŋá tə, lalʋʋ tə nə nì Ba-Yígúrə́-Jə-Tiu sʋ̀ràn təntə, tə nə dà tə pa ba, ba pwìí cʋ̀gʋ̀ zənzən, yá ba lìù mama kʋ́ʋ̀ ba wonanan ʋ yɩra nə keni. 5 Ba-Yígúrə́-Jə-Tiu swɩ̀n Moyizə con, ʋ wʋ́: «Swɩ̀n Yɩzərayɛlə dwíí tə con, də ba yɩ dwíí tə, ba zɩɩn nə ba nə̀ń. À nə kwé ba mancɩn tətə, à wá cʋ̀gʋ̀ ba mɩ́ámɩ́án, à pa ba jɛ́n tɩa yuu. Sɩ́ʋ́n nə, ba dàń lɩa ba yɩra wonanan tə, yá à wá na kʋ tə, à nə wá fwa ba.» 6 Yá kʋ nə mɛ Ɔrɛbə paan tə máŋá nə, Yɩzərayɛlə dwíí tə kʋ́ʋ̀ wà wonanan ba yɩra nə ken.
Yɩɩ jə́rə́ gansili tə yoo
7 Máŋá mama, ba nə ken ba dəkuu bwálɩ́, Moyizə yàá tì gansili tə, ʋ ja nan ʋ pú ba dəkuu bwálɩ́ tə kwa con, kʋ ga ŋʋ́ná də ba dəkuu bwálɩ́ tə. Ʋ dɩga kʋ yɩrɩ, Yɩɩ jə́rə́ gansili. Yá lìù mama nə pɩ̀à, sə ʋ bon ʋ kə Ba-Yígúrə́-Jə-Tiu nə, kʋ tíú yàá nan, ʋ va Yɩɩ jə́rə́ gansili tə con, kʋ nə wulə ba dəkuu bwálɩ́ tə kwa con. 8 Máŋá tə, Moyizə nə naŋa, ʋ vələ Yɩɩ jə́rə́ gansili tə con, lalʋʋ tə mama yàá zàn. Ba lìù mama yàá zɩga, ʋ gansili mimii nə, ba ga ywàŋá Moyizə, ʋ kori ʋ va ʋ zʋ Yɩɩ jə́rə́ gansili tə wa. 9 Máŋá tə, Moyizə yàá nə zʋa Yɩɩ jə́rə́ gansili tə wa, bakwan kùlì tə yàá cú, kʋ zɩga gansili tə mimii tə wa, yá Ba-Yígúrə́-Jə-Tiu ga swɩ̀n də Moyizə. 10 Lalʋʋ tə mama yàá na bakwan kùlì tə, kʋ zɩga gansili tə mimii tə wa. Yá ba mama dàń yàá zàn, ba tʋ ba nadwana yuu, ba lìù mama, ʋ gansili mimii nə. 11 Ba-Yígúrə́-Jə-Tiu yàá swɩ̀n də Moyizə, pwənə pwənə, ndə lìù nə ve də ʋ dabɛɛ nətʋ. Kʋ kwa nə, Moyizə yàá pìí ʋ bà ba dəkuu bwálɩ́ tə wa, yá ʋ tʋtʋnʋ Zozuwe mʋ̀, ʋ yà nə yɩ balandʋrʋ, ʋ ga yɩ Nun bìú, yà ba Yɩɩ jə́rə́ gansili tə wa naŋa də mama.
Yɩɩ də Moyizə ve
12 Moyizə swɩ̀n Ba-Yígúrə́-Jə-Tiu con, ʋ wʋ́: «Yuu-Tiu, n mʋ́ nə swɩ̀n à con, sə à ja lalʋʋ kʋ tə, à va. Yá n dàń nə wà lìù tə bɩrɩ, n nə wá pa, sə ʋ kwé nə. Yá n mʋ̀ ga nə swɩ̀n də, n yə̀ə́ nə zəni, də à yɩrɩ mɛ, n ga swɩ̀n də, à nɩ yuywaŋʋ*, n yáá con. 13 Sɩ́ʋ́n nə, də à cɩ́gá nə nɩ yuywaŋʋ, n yáá con, à lòrì mʋ́, sə n pa à lwarɩ n fɩra tə. Yá kʋ nətʋ dàń wá pa, à cɩ́gá yəni mʋ́, à ga na yuywaŋʋ, n yáá con. Lìí n tɩ̀àn, də lalʋʋ kʋ tə yɩ n mʋ̀ lɩ̀à.»
14 Ba-Yígúrə́-Jə-Tiu le wá, ʋ wʋ́: «À tətə nə wá kwé mʋ́, à ga wá pa mʋ́ sìə́.»
15 Moyizə kʋ́ʋ̀ swɩ̀n Ba-Yígúrə́-Jə-Tiu con, ʋ wʋ́: «Də n tətə nə bá kwé nəba, dàn ká pa, nə nan bwálɩ́ kʋ tə wa, nə vìí. 16 Bɛ̀ɛ̀ nə wá bɩrɩ də, à mʋ̀ də n lɩ̀à tə nɩ yuywaŋʋ, n yáá con? Kʋ tà n nə wá ya də à mʋ̀, də n lɩ̀à tə, n ga sóní nəba, n doni dwíə́ tə duən tə mama, tə nə wulə tɩa yuu wa, naaa?»
17 Ba-Yígúrə́-Jə-Tiu le wá, ʋ wʋ́: «À wá tʋn kʋ yoo təntə də, n nə swɩ̀n, à pa kʋ nii sú. Cɩ́gá, n nɩ yuywaŋʋ, à yáá con, à ga yə̀ə́ mʋ́ zəni, də n yɩrɩ mɛ.»
18 Yá Moyizə kʋ́ʋ̀ swɩ̀n, ʋ wʋ́: «À lòrì sə n pa, à na n dun tə!» 19 Ba-Yígúrə́-Jə-Tiu ma le, ʋ wʋ́: «À wá pa, à wʋywaŋʋ tə mama twá n yáá con, kʋ kɛ̀ń, à ga bòrì à yɩrɩ “Ba-Yígúrə́-Jə-Tiu” tə, n yáá con. À tʋŋa pubwanʋ lìù tə yɩra, à nə swə, sə à tʋn pubwanʋ, à ga dəri lìù tə yinəgə, à nə swə, sə à dəri ʋ yinəgə.» 20 Ʋ tə swɩ̀n, ʋ wʋ́: «N wàrɩ̀ à yáá n nɩ. Cɩ́gá, ləzwənə wàrɩ̀ nə ʋ nɩ, ʋ mɩɩ ga yanɩ lʋʋ.»
21 Ba-Yígúrə́-Jə-Tiu tə swɩ̀n, ʋ súrí lá, ʋ wʋ́: «Nə̀ń bwálɩ́ nə, à səpuni nə. Zɩgɩ lá, pɩ̀ʋ̀ tə yuu wa. 22 Máŋá tə, à dàń nə twi, à kɛ̀ń də à dun tə, à wá kə mʋ́ pɩ̀ʋ̀ tə kòlú wa, à ga kwálɩ́ n nə, də à jɩɩn, à kori à kɛ̀ń mɩ́ámɩ́án. 23 Kʋ kwa nə, à wá kʋ̀rɩ́ à jɩɩn tə, à kə à con, yá n dàń wá na à kwa. Lìù wàrɩ̀ à yáá mʋ̀, ʋ nɩ.»