Moyizə sə̀ kapana pɩpɛɛ bələ duən
34
1 Ba-Yígúrə́-Jə-Tiu swɩ̀n Moyizə con, ʋ wʋ́: «Sa kapana pɩpɛɛ bələ, ndə təntən nyiən tə nə, sə à pìí à pʋ́pʋ́nɩ́ yìə̀n tə, tə yà nə wulə təntən nyiən tə yuu wa, n nə lwa tə, tə də yuu wa. 2 Kə n sírí də tɩa pʋrɩ. Jwɩan jɩjʋ fuən fuən, n wá dɩ̀ Sinayi paan tə yupara wa, n zɩgɩ lá, à yáá con. 3 Lìù mama wà mɛ, sə ʋ twá n nə, ʋ dɩ̀. Lìù don mama wà mɛ, sə ʋ pa, ba na wá, paan tə yuu bwálɩ́ mama wa. Vanmɩna, nə à yə̀ə́ vanfarʋ nədʋ tətə wà mɛ, sə kʋ bólí paan tə yɩra.»4 Moyizə sə̀ kapana pɩpɛɛ bələ, ndə təntən nyiən tə nə. Ʋ zàn jɩjʋ fuən fuən, ʋ tì kapana pɩpɛɛ bələ tə, ʋ ja dɩ̀ Sinayi paan tə yuu, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.
5 Yá Ba-Yígúrə́-Jə-Tiu yɩn bakwan wa, ʋ cú, ʋ zɩga lá də Moyizə, ʋ ga bòrì ʋ tətə yɩrɩ “Ba-Yígúrə́-Jə-Tiu” tə. 6 Ba-Yígúrə́-Jə-Tiu twá Moyizə yáá con, ʋ ga bòrì, ʋ wʋ́:
«À mʋ̀ nə yɩ Ba-Yígúrə́-Jə-Tiu!
À mʋ̀ nə yɩ Ba-Yígúrə́-Jə-Tiu!
À yɩ Yɩɩ tə, à nə dəri lɩ̀à yinəgə,
à ga tʋŋa pubwanʋ lɩ̀à yɩra.
À lɩŋa ba lala zaŋa.
À yɩ wʋywanyiən,
à ga twá cɩ́gá nə, ndə kʋ nə mɛ nətʋ.
7 À tʋŋa wʋywaŋʋ* ləzoni yɩra,
kʋ va kʋ yí ba dwíí tə dəkurən mʋ̀rʋ̀ nii nyiən.
À sɛ̀ lwɩa,
à yá yolwan, də cʋna, də lwanɩ, à pɩn tə kɛ̀ń.
Yá à dàń nə ba yolwafwanʋ jələ ndə lìù nə, ʋ nə wà yoo cʋ̀gʋ̀.
À ŋwɩ́n nyɩna-ba cʋna ŋwɩ́rán ba bɩ̀á, də ba nɩ̀án yɩra,
kʋ va kʋ yí ba dwíí tə dəkurən batwa, də banɩa nii nyiən.»
8 Moyizə bɩbarɩ ʋ tʋ tɩa, ʋ nadwana yuu, ʋ pa dun Yɩɩ nə. 9 Ʋ swɩ̀n, ʋ wʋ́: «Yuu-Tiu, də à cɩ́gá nə nɩ yuywaŋʋ* n yáá con, à lòrì, sə n tətə kwé nəba, n ja va. Də lalʋʋ kʋ tə zɩɩn ba nə̀ń tə mɛ, à lòrì, sə n kwɛn nə cʋna tə, də nə lwanɩ tə, n lɩ, nə də mʋ́ pwə́rə́ wa, n ga ja nəba, n ma fwa n lɩ̀à.»
Ba-Yígúrə́-Jə-Tiu pìí ʋ bwin ʋ nimarʋ tə, də Yɩzərayɛlə dwíí tə
10 Ba-Yígúrə́-Jə-Tiu swɩ̀n ʋ wʋ́: «À tətə wá tún nimarʋ də aba. À wá tʋn yomɩlan n lalʋʋ tə mama yɩ́á yuu. Tə wá ya yomɩlan, tə yiri nə wà dí yáá tə tʋn bwálɩ́ mama wa, nə à yə̀ə́ dwíí mama wa, tɩa yuu mama wa. Yá tʋ̀tʋ̀nán tə, à nə wá tʋn, dàń wá pa lalʋʋ tə mama, ba nə kɩkarɩ mʋ́, na à mʋ̀ Ba-Yígúrə́-Jə-Tiu dɩ̀àn nə dáá nətʋ. Kʋ mʋ̀ dɩ̀àn mɩmɩnʋ təntə yɩ, à wá twá də mʋ́, à ma tʋn kʋ, à pa kʋ nii sú.
11 Á twá kʋ tə nə, à nə pɩn mʋ́ nii kʋ yuu wa, zə̀n kʋ tə, zəni. Yá à wá dɩŋa Amɔrə dwíí tə, də Kanaan tɩ̀án tə, də Ɛtə dwíí tə, də Perizi dwíí tə, də Evi dwíí tə, də Yebusə tɩ̀án tə, à lɩ, á yáá con. 12 Á cɩa á tɩ̀àn nə, á dànà ká tún nimarʋ də lɩ̀à tə, á nə vələ ba lʋʋ nii tə wa. Á nə tún nimarʋ də ba, ba wá jì ndə nyalɩ nə, á titəŋi wa. 13 Yá á dàń mɛ, sə á gwɛrɩ ba jwəŋə bwálá tə, á yigu ba culu kapana* tə, ba nə zɩ̀n ba zɩgɩ yɩɩ nə, á dɩ, á ga goŋə ba woŋwanʋ Aswera* dacəli tə, á dɩ.
14 Á wà mɛ, sə á tʋ á nadwana yuu, yɩɩ don yáá con, á pa kʋ dun. Cɩ́gá, à mʋ̀ Ba-Yígúrə́-Jə-Tiu yɩrɩ nə yɩ badoli tíú. À yɩ Yɩɩ tə, à nə jə badoli.
15 Á dànà ká tún nimarʋ də lʋʋ nii tə lɩ̀à tə. Á nə tún nimarʋ də ba, kʋ nətʋ wá pa, máŋá tə, ba nə wulə ba cwàrɩ̀*, ba ma pɩn dun ba woŋwanan tə nə, də ba fwa jwəŋə, ba pɩn tə, ba wá bon aba, yá á wá twá á də́ ba jwəŋə wiən tə. 16 Á nə swe ba bwɩ̀ɩ́, á pa á bɩ̀á nə, ba bwɩ̀ɩ́ tə nə wulə ba cwàrɩ̀, ba ma pɩn dun ba woŋwanan tə nə, ba wá pa, á bɩ̀á tə də twá ba tʋn kʋ.
17 Á wà mɛ, sə á nyɩan lugu, á ma fwa woŋwanʋ.
18 Á wá də́ dipɛn tə, kʋ nə wà sabwarɩ ken* cànà tə, mɩna bɩʋ cànà wa. Mə ka diŋə máŋá nə, à nə lɩ, à tún. Á wá də́ dipɛn, kʋ nə wà sabwarɩ ken, dɩan barpɛ, ndə à nə pɩn aba nii, sə á tʋn kʋ nətʋ. Cɩ́gá, mɩna bɩʋ cànà wa nə, á nan Ezwipətə lʋʋ nii tə wa.
19 Á cárɩ́ bìú mama yɩ à mʋ̀ nə tɩ. Á vàná tə də təntən bìú mama, kʋ nə yɩ nabiə, nə à yə̀ə́ pəbiə, nə à yə̀ə́ bʋbiə, yɩ à mʋ̀ nə tɩ. 20 Á wá ja pəbiə, nə à yə̀ə́ bʋbiə, á ma lárɩ́ bɩ̀nà təntən bìú mama yuu nə. Á nə wà ka yuu nə lárɩ́, á mɛ, sə á mà ka yuu, á lwa. Á mɛ, sə á yə̀ á cárɩ́ bìú də mama, á jon.
Á lìù mama wà mɛ, sə ʋ bà à yáá con, də jɩkʋrɩkɛ.
21 Á jə dɩan bardʋ, dapanɩ wa, sə á ma tʋn á tʋ̀tʋ̀nán. Yá barpɛ nii dɩɩn tə yɩ sìə́ dɩɩn, á mɛ, sə á sìí. Kʋ nə swə kʋ yɩ vanan, nə à yə̀ə́ woceri máŋá wa, á tə mɛ, sə á zìlí sìə́ dɩɩn tə.
22 Á wá də́ woceri* cànà, a dipɛn mɩna təntən bɩ̀á ganʋ máŋá wa. Yá bɩnɩ tə yígúrə́ wa, á wá də́ woceri cànà.
23 Bɩnɩ mama, á lalʋʋ tə wa bara tə mama wá bà à mʋ̀ Yuu-Tiu Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ yáá con, nɛɛ batwa. 24 Cɩ́gá, à wá dɩŋa dwíə́ nəkaran* tə à lɩ, á yáá con, à ga jon ba lʋʋ níə́ tə, à pa aba, sə à lʋʋ nii tə walɩ. Yá lìù mama bá dídə́n sə ʋ twá máŋá tə wa, á nə wá bà à mʋ̀ Ba-Yígúrə́-Jə-Tiu, à nə yɩ á Yɩɩ, yáá con, nɛɛ batwa, bɩnɩ wa tə, ʋ ma jon á lʋʋ nii tə.
25 Á nə gʋa vànɩ́, á ma fwa à joŋi, á pa nə, á wá mɛ, sə á súrí dipɛn tə nə jə sabwarɩ, kʋ nə. Yá á wà mɛ sə á yá, á pa tɩa pʋrɩ, ka dà Pakə* cànà joŋi nàŋʋ́ tə nə.
26 Á mɛ, sə á ja á kárɩ́ wiən tə təntən bɩ̀á, á bà à mʋ̀ Ba-Yígúrə́-Jə-Tiu, à nə yɩ á Yɩɩ, dìə̀ tə wa. Á wà mɛ sə á sàn bʋbiə, ka nuu yɩlɩ nɩ́á wa.»
27 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Pʋ́pʋ́nɩ́ yìə̀n tə tə. Cɩ́gá, mə yìə̀n təntə yuu wa nə, à tún nimarʋ tə, kʋ nə wulə à də mʋ́, də Yɩzərayɛlə dwíí tə pwə́rə́ wa.» 28 Moyizə yɩn paan tə yuu wa, də Ba-Yígúrə́-Jə-Tiu, dɩan sapwɩlə, də tɩtɩan sapwɩlə. Ʋ yà ba wodiu də́, ʋ ga ba nɩ́á də nywɩn. Yá Ba-Yígúrə́-Jə-Tiu dàń pʋ́pʋ́nɩ́ ʋ nimarʋ sʋ̀ràn fugə tə, kapana pɩpɛɛ tə yuu wa.
Moyizə pìí ʋ bà lalʋʋ tə dəkuu bwálɩ́ tə wa
29 Moyizə pìí ʋ nan Sinayi paan tə yuu, ʋ cú, də Yɩɩ nimarʋ dansɩa kapana pɩpɛɛ bələ tə, ʋ jɩɩn wa. Kʋ máŋá tə wa, Moyizə yáá tə yà pɩpɩlɩ, ʋ də Ba-Yígúrə́-Jə-Tiu nə ve tə yɩrɩ. Yá ʋ tətə yà yəri, də ʋ yáá tə pɩpɩlɩ. 30 Aron də Yɩzərayɛlə dwíí tə mama nɩ də, Moyizə yáá tə pɩpɩlɩ. Yá fən dàń yà jə ba, sə ba yí ʋ yɩra. 31 Moyizə bon ba, yá Aron, də Yɩzərayɛlə púlí tə yáá tɩ̀án tə mama dàń twi, ba yí ʋ yɩra, yá ʋ dàń ve də ba. 32 Kʋ kwa nə, Yɩzərayɛlə dwíí tə mama dàń twi, ba yí Moyizə yɩra. Yá ʋ dàń tún Ba-Yígúrə́-Jə-Tiu nii yìə̀n tə mama, ʋ nə pɩn wá, Sinayi paan tə yuu, ʋ bɩrɩ ba. 33 Máŋá tə, Moyizə nə swɩ̀n lalʋʋ tə con, ʋ zwɛ̀, ʋ jɩn gànkɩkala, ʋ ma kwálɩ́ ʋ yáá nə. 34 Moyizə nə zwɩ Ba-Yígúrə́-Jə-Tiu yáá con, sə ʋ ve də wá, ʋ yàá lɩ gànkɩkala tə, ʋ yáá nə, kʋ va kʋ yí máŋá tə, ʋ nə pìí ʋ naŋa. Yá ʋ nə pìí ʋ nan, ʋ yàá swɩ̀n kʋ tə, Ba-Yígúrə́-Jə-Tiu nə pɩn wá nii, sə ʋ tʋn, ʋ bɩrɩ Yɩzərayɛlə dwíí tə nə. 35 Yɩzərayɛlə dwíí tə yàá ywàń Moyizə yáá tə, ba ga na də, ka pɩpɩlɩ. Yá Moyizə dàń yàá pìí ʋ ja gànkɩkala tə, ʋ ma kwálɩ́ ʋ yáá nə, kʋ va kʋ yí máŋá tə, ʋ nə wá pìí ʋ zʋ, ʋ ve də Ba-Yígúrə́-Jə-Tiu.