Sìə́ dɩɩn tə yuu wa yìə̀n
35
1 Moyizə ken Yɩzərayɛlə púlí tə mama duən yáá, ʋ swɩ̀n ba con, ʋ wʋ́: «Á nəŋə kʋ tə, Ba-Yígúrə́-Jə-Tiu nə pɩn nii, sə kʋ tʋn. 2 Á jə dɩan bardʋ, dapanɩ wa, sə á ma tʋn á tʋ̀tʋ̀nán. Yá barpɛ nii dɩɩn tə wá ya Ba-Yígúrə́-Jə-Tiu cɩcɩ nyiən. Kʋ wá ya sìə́ dɩɩn nəfarʋ, á ma pa dun Ba-Yígúrə́-Jə-Tiu nə. Lìù tə mama, ʋ nə tʋn sìə́ dɩɩn tə nə, ʋ mɛ, sə ba gʋ wá. 3 Bwálɩ́ tə mama, á nə wulə, á wà mɛ, sə á sʋ̀rɩ́ mən də tətə, sìə́ dɩɩn tə nə.»YƖƖ WULU GANSILI TƏ FWAŊƲ TANƲ YOO
Zìlə́ wiən tə, lalʋʋ tə nə mɛ, sə ba pa, sə ba ma fwa Yɩɩ wúlú gansili tə
4 Moyizə swɩ̀n Yɩzərayɛlə púlí tə mama con, ʋ wʋ́: «Á nəŋə kʋ tə, Ba-Yígúrə́-Jə-Tiu nə pɩn nii, sə kʋ tʋn. 5 Á lɩ́á zìlə́ wiən á titəŋi wa, á pa Ba-Yígúrə́-Jə-Tiu nə. Lìù tə mama, ʋ nə yɩ bɩcapon tíú, wá pa zìlə́ won Ba-Yígúrə́-Jə-Tiu nə. Á nəŋə zìlə́ wiən tə, á nə wàá á pɩn. Kʋ yɩ sɩ́án, də wárʋ́, də cɩnɩan, 6 də bɔɔ nəlinu, də nəsɩan, də sɩ̀sɩ́nʋ́, də ganbʋa, də bʋ̀nɩ̀ bɔɔ, 7 də pabɩran tànàn, ba nə nɩŋɩ, ba li sɩnʋ wa, də mʋʋ wa won don tànʋ̀, ba nə nɩŋɩ, də sɩnjʋna dɛɛ, 8 də nʋga, ba nə wá ma sʋ̀rɩ́ tʋntʋnɩ tə, də wusinə, ba nə wá ma fwa dun nʋga* tə, də wusinə tə, ba nə sʋ̀rɩ́, 9 də kapan cɩ́nán cɩcɩlan nəsɩnan, də kapan cɩ́nán cɩcɩlan duən, tə nə jə funə, sə ba ma nàn Yɩɩ joŋwana yun tɩ̀án nəkwɩa culu gànʋ̀* tə, də ʋ nyʋnɩ yuu lwaa pɩpaa* tə.»
Wiən tə də wiən tə, tʋ̀tʋ̀nà tə nə mɛ, sə ba fwa, Yɩɩ wúlú gansili tə wa
10 Moyizə tə swɩ̀n, ʋ súrí lá, ʋ wʋ́: «Á wa lɩ̀à tə mama, ba nə jə jɩɩn tʋ̀tʋ̀nán yənu, dàń wá bà, ba tʋn kʋ tə mama, Ba-Yígúrə́-Jə-Tiu nə pɩn nii, sə kʋ tʋn. 11 Kʋ mʋ̀ nə yɩ Yɩɩ wúlú bwálɩ́ tə, kʋ gansili tə, də kʋ yuu tapwələ tə, də kʋ gwalɩ tə, də kʋ səpunə dapɩparan tə, də kʋ dagaran tə, də kʋ ywəŋə tə, də tə də̀ń zɩlan tə. 12 Kʋ súrí Yɩɩ nimarʋ culu daka tə nə, də ka dɛɛ tə, ba nə ma zɩŋa ka, də ka nipuə tə, ba nə ma boŋə cʋna kwɩan bwálɩ́ tə, də patasɩn tə nə pwɛ̀ dìì bələ tə duən wa. 13 Kʋ súrí tabɩlʋ tə nə, də kʋ dɛɛ tə, ba nə ma zɩŋa kʋ, də kʋ tʋtʋnzɩla tə mama, də dipɛn tə, ba nə túŋə́, ba pɩn Yɩɩ nə. 14 Kʋ súrí canzɩlʋ tə nə, də kʋ tʋtʋnzɩla tə, də kʋ tʋntʋnɩ tə, də tʋntʋnɩ tə nʋga tə. 15 Kʋ súrí Yɩɩ joŋi bwálɩ́ tə, ba nə wá ma sʋ̀rɩ́ wusinə tə nə, də kʋ dɛɛ tə, ba nə ma zɩŋa kʋ, də dun nʋga tə, də wusinə tə, ba nə sʋ̀rɩ́, də Yɩɩ wúlú gansili tə mimii nii gànʋ̀ tə. 16 Kʋ súrí Yɩɩ joŋi bwálɩ́ tə, ba nə wá ma sʋ̀rɩ́ jwəŋə vàná tə nə, də kʋ waa cɩnɩan wogɩganʋ tə, də kʋ dɛɛ tə, ba nə ma zɩŋa kʋ, də kʋ tʋtʋnzɩla tə mama, də nɩ́á kwarɩ tə, də kʋ də̀ń zɩlʋ tə. 17 Kʋ súrí Yɩɩ wúlú gansili tə dəwoo tə tapwələ tə nə, də ka ywəŋə tə, də tə də̀ń zɩlan tə, də dəwoo tə mimii nii gànʋ̀ tə. 18 Kʋ súrí Yɩɩ wúlú gansili tə párá tə nə, də kʋ dəwoo tə párá tə, də tə ŋoni tə. 19 Kʋ súrí dun gànàn tə nə, Yɩɩ joŋwana tə nə wá zʋ, ba ma tʋn Yɩɩ tʋtʋŋɩ tə, kwa con dibiu tə nə yɩ Yɩɩ nyiən* tə wa, də Aron Yɩɩ joŋwana culu gànàn tə, də ʋ bɩ̀á tə Yɩɩ joŋwana gànàn tə, ba nə wá zʋ, ba ma tʋn Yɩɩ joŋwanɩ tə.»
Lalʋʋ tə pɩn zìlə́ wiən, sə ba ma fwa Yɩɩ wúlú gansili tə
20 Kʋ kwa nə, Yɩzərayɛlə púlí tə mama dàń zàn Moyizə yáá nə, ba vìí. 21 Yá lɩ̀à tə mama, ba nə yɩ bɩcapon, də pubʋnzəŋu tɩ̀án, dàń ja zìlə́ wiən, ba bà, ba pa Ba-Yígúrə́-Jə-Tiu nə, sə ba ma fwa Yɩɩ jə́rə́ gansili tə, də Yɩɩ joŋwana culu gànàn tə, də Yɩɩ tʋtʋŋɩ tə mama. 22 Bara tə də kana tə mama, ba nə yɩ bɩcapon tɩ̀án twi, ba pa sɩ́án wonanan yirə yirə. Ba duən pɩn sɩ́án zɩnkwana, ba duən sɩ́án jɩfɩla, ba duən sɩ́án valɩ, ba duən sɩ́án zànán. Ba yàá yɩyarɩ sɩ́án zìlə́ wiən tə, Ba-Yígúrə́-Jə-Tiu yáá con, ba ma bɩrɩ də, tə yɩ ba pɩn wá. 23 Lɩ̀à tə mama, ba yà nə jə bɔɔ nəlinu, nə à yə̀ə́ nəsɩan, nə à yə̀ə́ sɩ̀sɩ́nʋ́, nə à yə̀ə́ ganbʋa, nə à yə̀ə́ bʋ̀nɩ̀ bɔɔ, nə à yə̀ə́ pabɩran tànàn, ba nə nɩŋɩ, ba li sɩnʋ wa, nə à yə̀ə́ mʋʋ wa won don tànàn, ba nə nɩŋɩ, ba ja tə ba bà. 24 Lɩ̀à tə mama, ba yà nə tún wárʋ́, nə à yə̀ə́ cɩnɩan vàn nə, sə ba pa Ba-Yígúrə́-Jə-Tiu nə, ja tə ba bà. Lɩ̀à tə mama, ba yà nə jə sɩnjʋna dɛɛ, ba nə wàá tə, ba ma tʋŋa tʋ̀tʋ̀nán tə, ja tə ba bà. 25 Kana tə mama, ba nə jə jɩɩn tʋ̀tʋ̀nán yənu, ja bɔɔ nəlinu, də nəsɩan, də sɩ̀sɩ́nʋ́, də ganbʋa, ba nə vəri də ba jɩ̀àn, ba ja bà. 26 Kana tə mama, ba nə yɩ bɩcapon tɩ̀án, ba ga jə jɩɩn tʋ̀tʋ̀nán yənu, vəri bʋ̀nɩ̀ bɔɔ gaŋoni. 27 Lalʋʋ tə yáá tɩ̀án tə pɩn kapan cɩ́nán cɩcɩlan nəsɩnan, də kapan cɩ́nán cɩcɩlan duən, tə nə jə funə, sə ba ma nan Yɩɩ joŋwana yun tɩ̀án nəkwɩa culu gànʋ̀ tə, də ʋ nyʋnɩ yuu lwaa pɩpaa tə. 28 Ba pɩn nʋga, ba nə wá ma sʋ̀rɩ́ tʋntʋnɩ tə, də wusinə də nʋga, ba nə wá ma fwa dun nʋga* tə, də wusinə tə, ba nə sʋ̀rɩ́. 29 Yɩzərayɛlə dwíí tə wa, bara tə də kana tə mama, ba nə yɩ bɩcanpon tɩ̀án, sɛ̀ ba pa zìlə́ wiən tə, sə ba ma tʋn tʋ̀tʋ̀nán tə mama, Ba-Yígúrə́-Jə-Tiu nə twá də Moyizə, ʋ ma pa ba nii, sə ba tʋn.
Yɩɩ kúrí Bɛsalɛlə də Oholɩabə, sə ba tʋn tʋ̀tʋ̀nán tə
30 Moyizə swɩ̀n Yɩzərayɛlə dwíí tə con, ʋ wʋ́: «Á nəŋə, Ba-Yígúrə́-Jə-Tiu kúrí Uri bìú Bɛsalɛlə, ʋ nə yɩ Urə nàʋ́, Zwida dwíí tə wa. 31 Yɩɩ pɩn ʋ sú də ʋ Siŋu tə, yá kʋ dàń pɩn, ʋ jə wʋbʋŋa, də pubʋŋa, də yənu, sə ʋ ma tʋn jɩɩn tʋ̀tʋ̀nán yiri mama. 32 Ʋ jə jɩɩn tʋ̀tʋ̀nán fwaŋʋ pubʋŋɩ, ʋ ga jə sɩ́án, də wárʋ́, də cɩnɩan tʋtʋŋɩ yənu. 33 Ʋ yə̀ə́ ka sárɩ́ kapana tə nə jə funə, ka tún wiən yɩra, ʋ ma yə̀ə́ dɛɛ wiən də siu. Ʋ jə jɩɩn tʋ̀tʋ̀nán yiri mama yənu. 34 Yɩɩ tə pɩn yənu Bɛsalɛlə nə, sə ʋ ma bɩrɩ tʋ̀tʋ̀nán təntə lɩ̀à nə. Yɩɩ pɩn yənu təntə Oholɩabə də nə, ʋ nə yɩ Ahɩsamakə bìú, Dan dwíí tə wa. 35 Ʋ pɩn ba jɩɩn tʋ̀tʋ̀nán yənu, sə ba ma sárɩ́ wiən yiri mama, sə ba sʋ gantwɛn, ba nàn tə də bɔɔ nəlinu, də nəsɩan, də sɩ̀sɩ́nʋ́, də ganbʋa. Ba jə jɩɩn tʋ̀tʋ̀nán yiri mama yənu, də tə fwaŋʋ pubʋŋɩ.