Tʋ̀tʋ̀nà tə sinti Yɩɩ wúlú gansili tə tʋ̀tʋ̀nán tə
36
1 Bɛsalɛlə də Oholɩabə də lɩ̀à tə mama, ba nə jə jɩɩn tʋ̀tʋ̀nán yənu, Ba-Yígúrə́-Jə-Tiu nə pɩn ba wʋbʋŋa də yənu, sə ba ma tʋn Yɩɩ wúlú bwálɩ́ tə tʋ̀tʋ̀nán tə mama, dàń zàn, ba wulə ba tʋŋa, kʋ twá ndə nətʋ tə mama nə, Ba-Yígúrə́-Jə-Tiu nə pɩn nii, sə ba tʋn.2 Moyizə bon Bɛsalɛlə, də Oholɩabə, də lɩ̀à tə mama, ba nə jə jɩɩn tʋ̀tʋ̀nán yənu, Ba-Yígúrə́-Jə-Tiu nə ken wʋbʋŋa ba bɩcanɩ wa, ba ga sɛ̀, sə ba tʋn tʋ̀tʋ̀nán tə, də pùə́ nədʋ. 3 Yá ʋ dàń tì zìlə́ wiən tə mama, Yɩzərayɛlə dwíí tə nə pɩn, sə ba ma tʋn Yɩɩ wúlú bwálɩ́ tə tʋ̀tʋ̀nán tə, ʋ pa ba. Yá jɩjʋ mama, lɩ̀à tə, tə yàá ja zìlə́ wiən, ba twi, ba pɩn Moyizə nə. 4 Yá lɩ̀à tə mama, ba nə jə jɩɩn tʋ̀tʋ̀nán yənu, ba yà nə wulə ba tʋŋa Yɩɩ wúlú bwálɩ́ tə tʋ̀tʋ̀nán tə, zàn nədʋ nədʋ, ba yá ba tʋ̀tʋ̀nán tə, 5 ba ga bà, ba swɩ̀n Moyizə con ba wʋ́: «Lalʋʋ tə pɩn zìlə́ wiən tə, tə bʋ́rɩ́ tʋtʋŋɩ tə, Ba-Yígúrə́-Jə-Tiu nə pɩn nii, sə nə tʋn.» 6 Yá Moyizə dàń pɩn nii, sə ba bòrì, ba swɩ̀n lalʋʋ tə con, ba dəkuu bwálɩ́ tə wa, ʋ wʋ́: «Lìù mama, kʋ nə yɩ bɛɛ, nə à yə̀ə́ kan, kʋ́ʋ̀ dàn ká tanɩ zìlə́ won, Yɩɩ wúlú bwálɩ́ tə tʋ̀tʋ̀nán tə yɩrɩ.» Mə kʋ twá nətʋ, lalʋʋ tə ma yá zìlə́ wiən tə pɩʋn nə. 7 Zìlə́ wiən tə yà bʋ́rɩ́ tʋ̀tʋ̀nán tə mama, tə nə mɛ, sə tə tʋn.
Yɩɩ wúlú gansili tə fwaŋʋ yoo
8 Lɩ̀à tə mama, ba nə jə jɩɩn tʋ̀tʋ̀nán yənu, ba yà nə tʋŋa tʋ̀tʋ̀nán tə, jɩn gantwɛn tapwələ fugə, ba ma fwa Yɩɩ wúlú gansili tə. Tapwələ tə yɩ ba sʋa də ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́. Ba yà sʋa Yɩɩ sàń wonəŋə nyɩnyɩga, ba tún tapwələ tə yɩra. 9 Tapoli nədʋ mama danɩ yà yɩ jɩvaŋa sapʋa də nana, kʋ wanɩ ga yɩ jɩvaŋa banɩa. Tapwələ tə mama danɩ, də tə wanɩ yà mɛ duən. 10 Ba nyan tapwələ bonu, ba təni duən nii nə, ba ga nyan bonu tə duən də, ba təni duən nii nə. 11 Ba jɩn bɔɔ nəlinu, ba ma sʋ lárán, ba kə təntən tapwələ bonu tə, talɩkwa tapoli tə nii nə. Ba ken lárán təntə duən, tapwələ bonu tə duən tə də, təntən tapoli tə nii nə. 12 Ba ken lárán finu, təntən tapwələ bonu tə, talɩkwa tapoli tə nii nə. Ba ga kə lárán finu duən, tapwələ bonu tə duən tə də, təntən tapoli tə nii nə. Yá tapwələ dəkurən bələ tə lárán tə dàń tʋa, tə zən duən. 13 Ba fwa sɩ́án gwalɩ finu, ba ma vwa tapwələ dəkurən bələ tə, ba goli duən nə. Yá gansili tə mama dàń jìgə̀ won nədʋ.
14 Bɛsalɛlə də ʋ tʋ̀tʋ̀nà tə sʋa bʋ̀nɩ̀ bɔɔ tapwələ fugə də nədʋ, ba ma piri Yɩɩ wúlú gansili tə yuu nə. 15 Bʋ̀nɩ̀ bɔɔ tapoli nədʋ mama danɩ yà yɩ jɩvaŋa fɩtwa, kʋ wanɩ ga yɩ jɩvaŋa banɩa. Tapwələ fugə də nədʋ tə mama danɩ, də tə wanɩ yà mɛ duən. 16 Ba nyan tapwələ bonu, ba təni duən nii nə, ba ga nyan bardʋ tə duən tə də, ba təni duən nii nə. 17 Ba ken lárán finu, tapwələ bonu tə, talɩkwa tapoli tə nii nə. Ba ga kə lárán finu duən, tapwələ bardʋ tə də, təntən tapoli tə nii nə. 18 Ba fwa cɩnɩan gwalɩ finu, ba ma ja tapwələ dəkurən bələ tə níə́ tə, ba kə duən nə, yá gansili tə mama dàń jìgə̀ won nədʋ. 19 Ba nɩŋɩ pabɩran tànàn, ba li sɩnʋ wa, ba ma fwa tapoli, ba pú bʋ̀nɩ̀ bɔɔ tapoli tə yuu nə. Ba dàń ga ja mʋʋ wa won don tànʋ̀, ba ma fwa tapoli, ba pú pabɩran tànàn tapoli tə yuu nə.
20 Bɛsalɛlə də ʋ tʋ̀tʋ̀nà tə sárɩ́ sɩnjʋna dapɩparan, ba cwɛn, sə tə kwé tapwələ tə. 21 Dapɩpaʋ nədʋ mama danɩ yà yɩ jɩvaŋa fugə, kʋ wanɩ ga yɩ jɩvaŋɩ yii nədʋ də faan. 22 Gansili tə dapɩpaʋ mama tɩa con nii yà jə cələn bələ, tə nə wulə duən səpuni nə. Mə nətʋ nə, ba fwa Yɩɩ wúlú gansili tə dapɩparan tə mama. 23 Ba jɩn dapɩparan sapʋa, ba ma fwa gansili tə jɩgwiə saparʋ səpuni tə. 24 Ba ga ja wárʋ́, ba ma fwa zɩlan sapwɩlə, ba kə dapɩparan sapʋa tə də̀ń nə. Dapɩpaʋ mama də̀ń dàń yà jə zɩlan bələ, dapɩpaʋ tə cələn bələ tə nə zwɩ lá. 25 Gansili tə jɩzən saparʋ səpuni tə də yɩ dapɩparan sapʋa nə, ba ma fwa kʋ, 26 də tə də̀ń zɩlan sapwɩlə, ba nə fwa də wárʋ́. Dapɩpaʋ mama də̀ń yà jə zɩlan bələ. 27 Ba jɩn dapɩparan bardʋ, ba ma sun gansili tə də̀ń tə, yɩɩ yizwɩa con. 28 Ba fwa dapɩparan bələ, ba kə gansili tə də̀ń con nigwancɩan tə wa. 29 Tə yà zɩgɩ tɩa con, tə marɩ duən nə, tə dɩ̀ tə nan valɩ wa, tə nə vwə tə, tə marɩ duən nə, gansili tə yuu con. Mə nətʋ nə, ba fwa dapɩparan bələ tə nə wulə gansili tə nigwancɩan bələ tə wa. 30 Gansili tə də̀ń con dapɩparan tə mama dàń yɩn nana, də tə də̀ń zɩlan fugə də bardʋ, ba nə fwa də wárʋ́. Dapɩpaʋ mama də̀ń yà jə zɩlan bələ. 31 Ba sárɩ́ sɩnjʋna dagaran bonu, ba ma ja gansili tə səpuni tə don dapɩparan tə, ba kə duən nə. 32 Ba jɩn dagaran bonu duən, ba ma ja səpuni tə don də dapɩparan tə, ba kə duən nə. Ba ga ja dagaran bonu duən də, ba ma ja gansili tə də̀ń con dapɩparan tə, ba kə duən nə, yɩɩ yizwɩa con. 33 Ba fwa titəŋi dagarʋ, ba kə dapɩparan tə titəŋi wa. Kʋ zɩgɩ gansili tə nii don nə, kʋ pórí dapɩparan tə səpunə nə, kʋ cʋ̀rɩ̀ kʋ nan nii tə don nə. 34 Ba mwàlɩ̀ dapɩparan tə, də dagaran tə mama də sɩ́án. Ba ga ja sɩ́án, ba ma fwa valɩ tə, dagaran tə nə zwɩ tə wa.
Yɩɩ wúlú gansili tə patasɩn tə, də kʋ mimii nii gànʋ̀ tə fwaŋʋ yoo
35 Bɛsalɛlə də ʋ tʋ̀tʋ̀nà tə jɩn ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, ba ma sʋ patasɩn. Ba ga sʋ Yɩɩ sàń wonəŋə nyɩnyɩga, ba tún kʋ yɩra. 36 Ba sárɩ́ sɩnjʋna ywəŋə banɩa, ba mwàlɩ̀ tə yɩra də sɩ́án. Ba zɩgɩ ywəŋə təntə, də̀ń zɩlan banɩa yuu wa, ba nə fwa də wárʋ́. Ba fwa sɩ́án gwalɩ, ba kə ywəŋə tə yɩra, sə ba ma goli patasɩn tə. 37 Ba jɩn ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, ba ma sʋ patasɩn, ba kə gansili tə mimii nə. Kʋ yɩn lìù tə nə nàŋà gànàn tʋtʋŋɩ. 38 Ba fwa gansili tə mimii nii gànʋ̀ tə ywəŋə bonu, də tə yuu kirən, də kʋ dagaran nəmɩnɩ, də kʋ gwalɩ. Ba mwàlɩ̀ tə mama yɩra də sɩ́án, ba ga nyɩan cɩnɩan, ba ma fwa zɩlan bonu, ba kə ywəŋə tə də̀ń nə.