Yɩɩ nimarʋ culu daka* tə fwaŋʋ yoo
37
1 Bɛsalɛlə fwa Yɩɩ nimarʋ culu daka tə, də sɩnjʋna dàʋ̀. Ka danɩ yà yɩ jɩvaŋa bələ də faan, ka wanɩ ga yɩ jɩvaŋɩ yii nədʋ də faan. Ka yuu tɩa zɩgʋ də yɩ jɩvaŋɩ yii nədʋ də faan. 2 Ʋ mwàlɩ̀ ka waa tə, də ka kwa tə mɛ, də sɩ́án tə nə ba durən jə. Ʋ jɩn sɩ́án tə, ʋ ma fwa kiru, ʋ kɩkarɩ ka nii tə mama. 3 Ʋ fwa sɩ́án valɩ banɩa, ʋ kə daka tə nigwancɩan banɩa tə nə. Ʋ ken valɩ bələ ka səpuni don nə, ʋ ga kə bələ tə duən tə, ka səpuni tə don də nə. 4 Yá ʋ dàń sárɩ́ sɩnjʋna dɛɛ nədaran bələ, ʋ ja sɩ́án, ʋ mwàlɩ̀ tə. 5 Ʋ tɩrɩ dɛɛ təntə daka tə səpunə valɩ tə wa, sə ba ma zɩn ka. 6 Ʋ jɩn sɩ́án tə nə ba durən jə, ʋ ma fwa daka tə nipuə, ba nə ma boŋə cʋna kwɩan bwálɩ́*. Ka danɩ yà yɩ jɩvaŋa bələ də faan, ka wanɩ ga yɩ jɩvaŋɩ yii də faan. 7 Ʋ jɩn sɩ́án, ʋ ma lù Yɩɩ sàń wonəŋə* nyɩnyɩga bələ, ʋ zɩgɩ cʋna kwɩan bwálɩ́ tə wanɩ səpunə tə nə. 8 Ʋ zɩgɩ Yɩɩ sàń wonəŋu nyɩnyɩga tə don cʋna kwɩan bwálɩ́ tə wanɩ səpuni tə don nə, ʋ ga zɩgɩ kʋ don tə, wanɩ səpuni tə don tə nə. Ʋ fwa Yɩɩ sàń wonəŋə nyɩnyɩga tə, ʋ pa tə də cʋna kwɩan bwálɩ́ tə, səpunə bələ tə marɩ duən nə, tə jì won nədʋ. 9 Yɩɩ sàń wonəŋə nyɩnyɩga tə yà zɩga, tə yáá zən duən, tə ga zɩ̀n tə vànà yɩɩ nə, tə ma kwálɩ́ cʋna kwɩan bwálɩ́ tə yuu nə. Tə yáá yà te tɩa, cʋna kwɩan bwálɩ́ tə con.Yɩɩ dipɛn tabɩlʋ tə fwaŋʋ yoo
10 Bɛsalɛlə fwa sɩnjʋna dàʋ̀ tabɩlʋ, kʋ danɩ nə yɩ jɩvaŋa bələ, kʋ wanɩ ga yɩ jɩvaŋɩ yii nədʋ. Kʋ yuu tɩa zɩgʋ yà yɩ jɩvaŋɩ yii də faan. 11 Ʋ mwàlɩ̀ kʋ də sɩ́án tə nə ba durən jə, ʋ ga ja sɩ́án, ʋ ma fwa kiru kʋ yuu wa, ʋ ja kɩkarɩ kʋ nii tə mama. 12 Ʋ fwa kàŋʋ́, kʋ wanɩ nə yí jɩtalɩ, ʋ kə tabɩlʋ tə nii tə nə. Ʋ jɩn sɩ́án, ʋ ma fwa kiru, ʋ kɩkarɩ kàŋʋ́ tə də. 13 Ʋ fwa sɩ́án valɩ banɩa, ʋ kə tabɩlʋ tə nigwancɩan banɩa tə nə, kʋ nɛɛ banɩa tə yuu con. 14 Valɩ yà wulə tabɩlʋ tə kàŋʋ́ tə máŋá nə. Mə valɩ təntə wa nə, ba yàá tɩrɩ dɛɛ nədaran, ba ma zɩŋa tabɩlʋ tə. 15 Ʋ sárɩ́ sɩnjʋna dɛɛ nədaran bələ, ʋ ja sɩ́án, ʋ mwàlɩ̀ tə. Mə dɛɛ təntə nə, ba ma zɩŋa tabɩlʋ tə. 16 Ʋ jɩn sɩ́án tə nə ba durən jə, ʋ ma fwa tabɩlʋ tə yuu tʋtʋnzɩla tə. Tə mʋ̀ nə yɩ zwɩɩn, də wùrú zwɩɩn, də kwàrɩ́, də zʋbii, ba nə wá ma twɛ́n divɛn jwəŋə, ba pa Yɩɩ nə.
Canzɩlʋ tə fwaŋʋ yoo
17 Bɛsalɛlə jɩn sɩ́án tə nə ba durən jə, ʋ ma lù canzɩlʋ. Kʋ də̀ń zɩlʋ tə, də kʋ dəkuu tə, də kʋ kinə tə, də kʋ kulən tə, də kʋ yɩra wiən tə ndə pùnə́ nə, mama yà marɩ duən nə, tə jì won nədʋ. 18 Pɩna bardʋ yà tá tə nan canzɩlʋ tə dəkuu tə səpunə nə. Pɩna batwa yà wulə kʋ dəkuu tə vàn don nə, batwa duən də ga wulə kʋ vàn tə don nə. 19 Kinə batwa, tə nə nyən ndə mʋlʋ bɩ̀á nə, də tə kulən, də tə wiən ndə pùnə́ nə, yà wulə canzɩlʋ tə pɩna bardʋ tə, nədʋ mama yɩra. 20 Kinə banɩa, tə nə nyən ndə mʋlʋ bɩ̀á nə, də tə kulən, də tə wiən ndə pùnə́ nə, yà wulə canzɩlʋ tə dəkuu tə tətə yɩra. 21 Kini nədʋ yà wulə canzɩlʋ tə dəkuu tə yɩra, təntən pɩna bələ tə də̀ń nə, kʋ marɩ tə duən nə. Kini nədʋ don də yà wulə dəkuu tə yɩra, bələ nii pɩna bələ tə də̀ń nə, kʋ marɩ tə duən nə. Kini nədʋ don də ga wulə dəkuu tə yɩra, batwa nii pɩna bələ tə də̀ń nə, kʋ marɩ tə də duən nə. Mə pɩna bardʋ tə nə tá tə nan canzɩlʋ tə yɩra, yà yɩ nətʋ. 22 Canzɩlʋ tə kinə tə, də kʋ pɩna tə yà marɩ duən nə, tə jì won nədʋ, ba nə lùə̀ də sɩ́án tə nə ba durən jə. 23 Bɛsalɛlə jɩn sɩ́án tə nə ba durən jə, ʋ ma fwa canzɩlʋ tə tʋntʋnɩ barpɛ, də kʋ wiən tə nə kwɛn caŋoni níə́, də kʋ wiən tə nə kəni tʋntʋnan. 24 Sɩ́án tə nə ba durən jə, kilo fɩtwa nə, ʋ ma fwa canzɩlʋ tə, də kʋ tʋtʋnzɩla tə mama.
Yɩɩ joŋi bwálɩ́ tə, ba nə wá ma sʋ̀rɩ́ wusinə tə fwaŋʋ yoo
25 Bɛsalɛlə jɩn sɩnjʋna dàʋ̀, ʋ ma fwa Yɩɩ joŋi bwálɩ́, ba nə wá sʋ̀rɩ́ wusinə kʋ yuu wa. Kʋ danɩ də kʋ wanɩ yà mɛ duən. Kʋ danɩ də kʋ wanɩ yà yɩ jɩvaŋɩ yii nədʋ nədʋ. Kʋ yuu tɩa zɩgʋ yà yɩ jɩvaŋa bələ. Ʋ fwa kʋ, ʋ lɩ kʋ cələn, ndə nyʋran nə. Kʋ nyʋran tə də kʋ mɛ yà marɩ duən nə, tə jì won nədʋ. 26 Ʋ jɩn sɩ́án tə nə ba durən jə, ʋ ma mwàlɩ̀ kʋ yuu tə, də kʋ waa tə, də kʋ kwa tə, də kʋ nyʋran tə mama. Ʋ jɩn sɩ́án, ʋ ma fwa kiru kʋ yuu wa, ʋ ja kɩkarɩ kʋ nii tə mama. 27 Ʋ fwa sɩ́án valɩ bələ bələ, ʋ kə Yɩɩ joŋi bwálɩ́ tə, ba nə wá ma sʋ̀rɩ́ wusinə tə, səpunə bələ tə nə, kʋ nii kiru tə də̀ń con, sə ba tɩrɩ dɛɛ nədaran tə wa, ba ma zɩn kʋ. 28 Yá ʋ dàń sárɩ́ sɩnjʋna dɛɛ nədaran bələ, ʋ ja sɩ́án, ʋ mwàlɩ̀ tə.
29 Bɛsalɛlə pɩn lìù tə nə fwa tɩralɩ, fwa dun nʋga* tə, ka nə yɩ Yɩɩ cɩcɩ nyiən, də wusinə tə, ba nə sʋ̀rɩ́, ba pɩn Yɩɩ cɩcɩ nə, tə wa nə ba durən jə.