Yɩɩ joŋi bwálɩ́ tə, ba nə wá ma sʋ̀rɩ́ jwəŋə vàná tə fwaŋʋ yoo
38
1 Bɛsalɛlə jɩn sɩnjʋna dàʋ̀, ʋ ma fwa Yɩɩ joŋi bwálɩ́, ba nə wá ma sʋ̀rɩ́ jwəŋə vàná tə. Kʋ danɩ də kʋ wanɩ yà mɛ duən. Kʋ danɩ də kʋ wanɩ yà yɩ jɩvaŋa bonu bonu. Kʋ yuu tɩa zɩgʋ yà yɩ jɩvaŋa batwa. 2 Ʋ fwa cələn, ndə nyʋran nə, ʋ kə kʋ nigwancɩan banɩa tə yuu wa. Kʋ nyʋran tə də kʋ mɛ yà marɩ duən nə, tə jì won nədʋ. Yá ʋ dàń mwàlɩ̀ kʋ mama də cɩnɩan. 3 Ʋ fwa kʋ tʋtʋnzɩla tə mama də cɩnɩan. Tə mʋ̀ nə yɩ kʋ tʋntʋnan zwɩɩn tə, də kʋ pɛlə tə, də kʋ nagwalan tə, də kʋ danyunzɩan tə, də kʋ wiən tə, ba nə ma tùŋə̀ mən tə. 4 Yá ʋ dàń jɩn cɩnɩan, ʋ ma fwa wogɩganʋ, ʋ dɩ, ʋ garɩ Yɩɩ joŋi bwálɩ́ tə wa, kʋ twá duən kʋ cú, kʋ mɛ Yɩɩ joŋi bwálɩ́ tə yuu tɩa zɩgʋ tə titəŋi wa. 5 Ʋ fwa valɩ banɩa, yá ʋ ken vala cɩnɩan wogɩganʋ tə nigwancɩan banɩa tə nədʋ mama nə, sə ba tɩrɩ dɛɛ nədaran tə wa. 6 Ʋ sárɩ́ sɩnjʋna dɛɛ nədaran bələ, ʋ ja cɩnɩan, ʋ mwàlɩ̀ tə. 7 Ʋ tɩrɩ dɛɛ tə valɩ tə wa, tə nə wulə Yɩɩ joŋi bwálɩ́ tə səpunə bələ tə nə, sə ba ma zɩn kʋ. Ʋ fwa Yɩɩ joŋi bwálɩ́ təntə, də dapɩparan, kʋ waa ga jə woru.Yɩɩ joŋwana nɩ́á kwarɩ tə fwaŋʋ yoo
8 Bɛsalɛlə jɩn cɩnɩan, ʋ ma fwa kwarɩ, də kʋ də̀ń zɩlʋ. Kana tə, ba yà nə kwɛn Yɩɩ jə́rə́ gansili tə mimii tə yáá tə, nə pɩn wá cɩnɩan zəŋi, ʋ ma fwa kwarɩ tə.
Yɩɩ wúlú gansili tə dəwoo fwaŋʋ yoo
9 Bɛsalɛlə fwa Yɩɩ wúlú gansili tə dəwoo tə. Ganbʋa gaŋoni tə nə dà nə, ʋ ma sʋ dəwoo tə tapwələ tə. Dəwoo tə jɩgwiə saparʋ səpuni tə yuu, tapwələ tə yà tɩɩn tə va jɩvaŋa bíí. 10 Tə yà jə cɩnɩan ywəŋə sapʋa, də tə də̀ń cɩnɩan zɩlan sapʋa. Ywəŋə tə gwalɩ tə, də tə dagaran nəmɩnɩ tə yà yɩ wárʋ́ nə, ba ma fwa tə. 11 Dəwoo tə jɩzən saparʋ səpuni tə də yuu, tapwələ tə yà tɩɩn tə va jɩvaŋa bíí. Tə yà jə cɩnɩan ywəŋə sapʋa, də tə də̀ń cɩnɩan zɩlan sapʋa. Ywəŋə tə gwalɩ tə, də tə dagaran nəmɩnɩ tə yà yɩ wárʋ́ nə, ba ma fwa tə. 12 Dəwoo tə wanɩ səpuni tə yuu, kʋ nə daa yɩɩ yizwɩa con, tapwələ tə yà tɩɩn tə va jɩvaŋa finu. Tə yà jə ywəŋə fugə, də tə də̀ń zɩlan fugə. Ywəŋə tə gwalɩ tə, də tə dagaran nəmɩnɩ tə yà yɩ wárʋ́ nə, ba ma fwa tə. 13 Dəwoo tə səpuni tə nə daa yɩɩ yipɩan con, wanɩ yà yɩ jɩvaŋa finu. 14 Kʋ nə mɛ dəwoo tə mimii tə nə, yɩɩ yipɩan con səpuni tə vàn don yà jə tapwələ, tə nə tɩɩn tə va jɩvaŋa fugə də bonu. Tə yà jə ywəŋə batwa, də tə də̀ń zɩlan batwa. 15 Yá vàn tə don tə də yà jə tapwələ, tə nə tɩɩn tə va jɩvaŋa fugə də bonu. Tə də yà jə ywəŋə batwa, də tə də̀ń zɩlan batwa. 16 Tapwələ tə mama, ba nə ma fwa dəwoo tə, yà yɩ ganbʋa gaŋoni tə nə dà, nə ba ma sʋ tə. 17 Ywəŋə tə də̀ń zɩlan tə yà yɩ cɩnɩan nə, ba ma fwa tə. Yá ywəŋə tə gwalɩ tə, də tə dagaran nəmɩnɩ tə yà yɩ wárʋ́ nə, ba ma fwa tə. Ywəŋə tə yuu kirən tə yà yɩ wárʋ́ nə, ba ma mwàlɩ̀ tə. Dəwoo tə ywəŋə tə mama yà yɩ wárʋ́ dagaran nəmɩnɩ nə garɩ tə, tə kə duən nə. 18 Dəwoo tə mimii gànʋ̀ tə yɩn lìù tə nə nàŋà gànàn tʋtʋŋɩ. Kʋ yà yɩ ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, nə ba ma sʋ kʋ. Kʋ danɩ yà yɩ jɩvaŋa sapʋa, kʋ yuu tɩa zɩgʋ ga yɩ jɩvaŋa bonu, ndə dəwoo tə tapwələ tə wanɩ tə nə. 19 Mimii tə ywəŋə banɩa tə, də tə də̀ń zɩlan banɩa tə yà yɩ cɩnɩan nə, ba ma fwa tə. Yá gwalɩ tə, də dagaran nəmɩnɩ tə yà yɩ wárʋ́ nə, ba ma fwa tə. Ywəŋə tə yuu kirən tə yà yɩ wárʋ́ nə, ba ma mwàlɩ̀ tə. 20 Yɩɩ wúlú gansili tə párá tə mama, də kʋ dəwoo tə párá tə mama, yà yɩ cɩnɩan nə, ba ma fwa tə.
Sɩ́án tə, də wárʋ́ tə, də cɩnɩan tə, ba nə ma fwa Yɩɩ wúlú gansili tə jəlu
21 Nə̀ń zɩla tə, ba nə ma fwa Yɩɩ wúlú gansili tə, Yɩɩ nimarʋ dansɩa won tə nə wulə lá, dánɩ́ nə mɛ nətʋ. Moyizə nə pɩn nii, sə Levi dwíí tə jələ tə. Yá Yɩɩ joŋwanʋ Aron bìú Yɩtamarə dàń nə yɩn Levi dwíí tə yáá, ba ma tʋn kʋ tʋtʋŋɩ təntə. 22 Uri bìú Bɛsalɛlə, ʋ nə yɩ Urə nàʋ́, Zwida dwíí tə wa, tʋn kʋ tə mama, Ba-Yígúrə́-Jə-Tiu yà nə pɩn nii Moyizə nə, sə kʋ tʋn. 23 Ahɩsamakə bìú Oholɩabə, ʋ nə yɩ Dan dwíí tə wa lìù, nə san Bɛsalɛlə nə. Oholɩabə yà yɩ wosəru. Ʋ yà jə jɩɩn tʋ̀tʋ̀nán fwaŋʋ pubʋŋɩ, ʋ ga yɩ lìù tə, ʋ nə ja bɔɔ nəlinu, də nəsɩan, də sɩ̀sɩ́nʋ́, də ganbʋa, ʋ ma nàŋà gantwɛn.
24 Sɩ́án tə mama, ba nə ma fwa Yɩɩ wúlú gansili tə kwa con dibiu tə nə yɩ Yɩɩ nyiən* tə, yɩn kilo 1 000, də cɩra-cɩra, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 25 Wárʋ́ tə mama, Yɩzərayɛlə púlí tə wa lɩ̀à tə, ba nə gàlɩ̀, nə pɩn, yɩn kilo 3440 də cɩra-cɩra, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 26 Bara tə mama, ba nə gàlɩ̀, ba nə jə bɩna sapʋa, kʋ dàń ja dɩ̀, yɩn lɩ̀à 603550. Yá kʋ dàń fwa ndə, bara təntə lìù mama pɩn wárʋ́, tə kwənə nə yí səbilugu faan, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 27 Wárʋ́ kilo 3420 nə, ba ma fwa Yɩɩ wúlú bwálɩ́ tə ywəŋə tə də̀ń zɩlan tə, də patasɩn tə ywəŋə tə də̀ń zɩlan tə. Yá ywəŋə də̀ń zɩlan bíí nə, ba ja wárʋ́ kilo 3420 tə, ba ma fwa. Yoŋi də̀ń zɩlʋ mama tì wárʋ́ kilo 34 də cɩra-cɩra. 28 Wárʋ́ kilo 20 tə nə ga tə nə, ba ma fwa ywəŋə tə gwalɩ tə, də tə dagaran nəmɩnɩ tə, ba ga ma mwàlɩ̀ ywəŋə tə yuu kirən tə.
29 Cɩnɩan tə mama, lalʋʋ tə nə pɩn yɩn kilo 2421 də cɩra-cɩra. 30 Cɩnɩan təntə nə, ba ma fwa Yɩɩ jə́rə́ gansili tə mimii ywəŋə tə də̀ń zɩlan tə, də Yɩɩ joŋi bwálɩ́ tə, də kʋ waa wogɩganʋ tə, də kʋ tʋtʋnzɩla tə mama. 31 Kʋ súrí dəwoo tə ywəŋə də̀ń zɩlan tə nə, də ka mimii ywəŋə də̀ń zɩlan tə, də ka párá tə mama, də Yɩɩ wúlú gansili tə párá tə mama.