YƖƖ JOŊWANA CULU GANAN TƏ FWAŊƲ YOO
39
1 Bɛsalɛlə də ʋ tʋ̀tʋ̀nà tə jɩn bɔɔ nəlinu, də nəsɩan, də sɩ̀sɩ́nʋ́, ba ma sʋ Yɩɩ joŋwana dun gànàn tə. Mə tə nə ba wá zʋ, ba ma tʋn Yɩɩ tʋtʋŋɩ tə, Yɩɩ wúlú gansili tə kwa con dibiu tə wa, kʋ nə yɩ Yɩɩ nyiən. Yá ba sʋa Yɩɩ joŋwana culu gànàn, ba pa Aron nə, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.Yɩɩ joŋwana yun tɩ̀án nəkwɩa culu gànʋ̀ tə
2 Ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́ nə, Bɛsalɛlə də ʋ tʋ̀tʋ̀nà tə ma sʋ Yɩɩ joŋwana yun tɩ̀án nəkwɩa culu gànʋ̀ tə, ba ga nàn kʋ də sɩ́án gaŋoni. 3 Ba mà sɩ́án, ba pa tə jì pɩparan. Kʋ kwa nə, ba dɛrɩ tə, nəmɩnɩ nəmɩnɩ, ndə gaŋoni nə, ba dàń ga zuri ba yɩra, ba sʋ tə, ba guli bɔɔ nəlinu tə, də nəsɩan tə, də sɩ̀sɩ́nʋ́ tə, də ganbʋa gaŋoni tə wa. Kʋ yɩn lìù tə nə nàŋà gànàn tʋtʋŋɩ. 4 Ba nyan vaparan yuu lárán bələ, ba kə kʋ níə́ bələ tə nə, sə kʋ wànɩ́ kʋ vwa, ndə gànzwɩgwala nə. 5 Zɩla tə, ba nə ma sʋ Yɩɩ joŋwana yun tɩ̀án nəkwɩa culu gànʋ̀ tə, mə tə mʋ̀ nə, ba ma sʋ kʋ tàŋá gantwamɩna tə də. Kʋ yà yɩ ganbʋa gaŋoni tə nə dà, də sɩ́án gaŋoni, də bɔɔ nəlinu, də nəsɩan, də sɩ̀sɩ́nʋ́. Yɩɩ joŋwana yun tɩ̀án nəkwɩa culu gànʋ̀ tə, də kʋ tàŋá gantwamɩna tə mɛ yà marɩ duən nə. Tə yà yɩ won nədʋ, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ. 6 Ba tanɩ kapan cɩ́nán cɩcɩlan nəsɩnan bələ, ba kə sɩ́án zɩlan wa. Ba bɩ̀rɩ̀ Yɩzərayɛlə dwíə́ tə yɩra, ba tún tə yuu wa, ndə ba nə bɩ̀rɩ̀ jɩtuŋu nətʋ. 7 Yá ba dàń ken kapan cɩ́nán cɩcɩlan nəsɩnan bələ tə, Yɩɩ joŋwana yun tɩ̀án nəkwɩa culu gànʋ̀ tə vaparan yuu lárán tə nə, ndə Yɩzərayɛlə dwíə́ tə mɩmɩnʋ nə, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.
Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə
8 Lìù tə nə nàŋà gànàn, jɩn zɩla tə, ba nə ma sʋ Yɩɩ joŋwana yun tɩ̀án nəkwɩa culu gànʋ̀ tə, ʋ ma sʋ Yɩɩ joŋwana yun tɩ̀án nəkwɩa nyʋnɩ yuu lwaa pɩpaa. Kʋ yà yɩ ganbʋa gaŋoni tə nə dà, də sɩ́án gaŋoni, də bɔɔ nəlinu, də nəsɩan, də sɩ̀sɩ́nʋ́. 9 Ka yà jə səpunə banɩa, tə nə mɛ duən, də nigwancɩan banɩa, tə wɩ̀ʋ́ nə mɛ duən. Səpuni mama danɩ yà yɩ jɩfʋngalʋ nədʋ. 10 Ba nàn kʋ, də kapana tə nə jə funə, zanɛɛ banɩa. Təntən zanaa tə yuu wa, ba marɩ kapan cɩ́nʋ́ cɩcɩlʋ nəsɩan mui, də kapan cɩ́nʋ́ cɩcɩlʋ səmun, də kapan cɩ́nʋ́ cɩcɩlʋ yiyiru. 11 Bələ nii zanaa tə yuu wa, ba marɩ kapan cɩ́nʋ́ cɩcɩlʋ sɩ̀sɩ́nʋ́, də kapan cɩ́nʋ́ cɩcɩlʋ bʋla, də kapan cɩ́nʋ́ cɩcɩlʋ don, ba nə boŋə dɩyaman. 12 Batwa nii zanaa tə yuu wa, ba marɩ kapan cɩ́nʋ́ cɩcɩlʋ wuwilu, kapan cɩ́nʋ́ cɩcɩlʋ pʋ̀pʋ̀nʋ̀, də kapan cɩ́nʋ́ cɩcɩlʋ nəlinu. 13 Banɩa nii zanaa tə yuu wa, ba marɩ kapan cɩ́nʋ́ cɩcɩlʋ sagʋ nɩ́á pʋ̀pɔ́, də kapan cɩ́nʋ́ cɩcɩlʋ nəsɩan, də kapan cɩ́nʋ́ cɩcɩlʋ sagʋ nɩ́á. Ba yà ken kapan cɩ́nán cɩcɩlan təntə nədʋ mama sɩ́án zɩlʋ wa. 14 Ba yà bɩ̀rɩ̀ Yɩzərayɛlə dwíə́ tə nədʋ mama yɩrɩ, ba pʋ́pʋ́nɩ́ ba tún kapan nədʋ mama yuu wa, ndə ba nə bɩ̀rɩ̀ jɩtuŋu nətʋ. Kapan cɩ́nán cɩcɩlan fugə də bələ tə yà yɩ Yɩzərayɛlə dwíə́ fugə də bələ tə mɩmɩnʋ. 15 Ba jɩn sɩ́án tə nə ba durən jə, ba ma fwa banzala bii bələ, ndə ŋoni nə, ba nə pəni, ba kə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə nə. 16 Ba fwa sɩ́án zɩlan bələ, də sɩ́án valɩ bələ. Yá ba dàń ken sɩ́án valɩ tə, Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə, baan con nigwancɩan bələ tə nə. 17 Ba vwə sɩ́án banzala bii bələ tə, valɩ bələ tə nə, tə nə wulə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə nigwancɩan tə nə. 18 Ba vwə banzala bələ tə níə́ bələ tə duən, sɩ́án zɩlan bələ tə nə, tə nə wulə Yɩɩ joŋwana yun tɩ̀án nəkwɩa culu gànʋ̀ tə vaparan yuu lárán tə nə. Yá Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə dàń wulə yáá con. 19 Ba fwa sɩ́án valɩ bələ duən, ba kə Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə də̀ń con nigwancɩan bələ tə nə. Valɩ təntə yà wulə ka waa con yáá tə nə, ka nə daa Yɩɩ joŋwana yun tɩ̀án nəkwɩa culu gànʋ̀ tə nə. 20 Ba tə fwa sɩ́án valɩ bələ duən də, ba kə Yɩɩ joŋwana yun tɩ̀án nəkwɩa culu gànʋ̀ tə, vaparan yuu lárán bələ tə dəkurən nə. Valɩ təntə dàń yà wulə Yɩɩ joŋwana yun tɩ̀án nəkwɩa culu gànʋ̀ tə yáá con, bwálɩ́ tə nə, ba nə sʋa kʋ vaparan yuu lárán tə, ba marɩ kʋ nə, kʋ tàŋá gantwamɩna tə yuu con. 21 Ba tɩrɩ ŋwənə nəlinu, Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə valɩ tə wa, ba ma vwa ka, ba marɩ Yɩɩ joŋwana yun tɩ̀án nəkwɩa culu gànʋ̀ tə valɩ tə nə. Kʋ nətʋ dàń pɩn, Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə marɩ Yɩɩ joŋwana yun tɩ̀án nəkwɩa culu gànʋ̀ tə nə, tàŋá gantwamɩna tə yuu con. Yá ka yà kʋ́ʋ̀ wàrɩ̀ ka vin, Yɩɩ joŋwana yun tɩ̀án nəkwɩa culu gànʋ̀ tə yuu con. Kʋ yɩn ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.
Yɩɩ joŋwana culu gànàn duən
22 Bɛsalɛlə də ʋ tʋ̀tʋ̀nà tə jɩn bɔɔ nəlinu cɩcɩ, ba ma sʋ Yɩɩ joŋwana yun tɩ̀án nəkwɩa culu gànʋ̀ tə də̀ń ganzwɩdarʋ, kʋ nə cúə́ kʋ yí nakoli. Kʋ yɩn gantwan sʋrʋ tʋtʋŋɩ. 23 Ganzwɩdarʋ tə bɩan bwálɩ́, yuu nə twá lá kʋ naŋa, yà wulə kʋ titəŋi wa. Ba sʋa kʋ bɩan tə, ba kɩkarɩ, sə kʋ ja dɩ̀àn, ndə tànʋ̀ gànʋ̀ nə, kʋ nə wàrɩ̀ kʋ kàrɩ́. 24 Ba jɩn bɔɔ nəlinu, də nəsɩan, də sɩ̀sɩ́nʋ́, də ganbʋa gaŋoni tə nə dà, ba ma sʋ bùlə̀ nəmənbii, ba kə ganzwɩdarʋ tə tɩa con nii tə nə, ba ja kɩkarɩ. 25 Ba jɩn sɩ́án tə nə ba durən jə, ba ma fwa bùlə̀ nəmənbii, ba kə bɔɔ bùlə̀ tə pwə́rə́ wa, ba ja kɩkarɩ ganzwɩdarʋ tə, tɩa con nii tə mama. 26 Sɩ́án bùlə̀ tə, də bɔɔ bùlə̀ tə yà sɛ́ duən wa, tə ja kɩkarɩ ganzwɩdarʋ tə, tɩa con nii tə mama. Mə kʋ nə, Yɩɩ joŋwana yun tɩ̀án nəkwɩa tə zwɩ, ʋ ma tʋŋa Yɩɩ tʋtʋŋɩ tə, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.
27 Bɛsalɛlə də ʋ tʋ̀tʋ̀nà tə jɩn ganbʋa gaŋoni, ba ma sʋ Yɩɩ joŋwana ganzwɩdaran duən, tə nə cúə́ tə yí napɩra, ba pa Aron də ʋ bɩ̀á tə nə. Tə yɩn gantwan sʋrʋ tʋtʋŋɩ. 28 Ba sʋa ganbʋa yubarʋ, də ganbʋa yupurən, tə nə jə fɩra də dun, də ganbʋa namankukwi. 29 Ba jɩn ganbʋa gaŋoni tə nə dà, də bɔɔ nəlinu, də nəsɩan, də sɩ̀sɩ́nʋ́, ba ma sʋ tàŋá gantwamɩna, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.
30 Bɛsalɛlə də ʋ tʋ̀tʋ̀nà jɩn sɩ́án tə nə ba durən jə, ba ma lù dun wonanʋ pɩpaa. Ba bɩ̀rɩ̀ pʋ́pʋ́ná tə tə, ba tún kʋ yuu wa, ndə ba nə bɩ̀rɩ̀ jɩtuŋu nətʋ: “Ba-Yígúrə́-Jə-Tiu cɩcɩ nyiən!” 31 Ba ken ŋwənə nəlinu kʋ nə, sə ba ma vwa kʋ, ba marɩ Yɩɩ joŋwana yun tɩ̀án nəkwɩa yubarʋ tə yáá con, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.
Ba fwa Yɩɩ wúlú gansili tə, ba zwɛ̀
32 Mə kʋ twá nətʋ, ba ma tʋn Yɩɩ wúlú gansili tə, kʋ nə yɩ Yɩɩ jə́rə́ bwálɩ́, tʋ̀tʋ̀nán tə mama, ba zwɛ̀. Kʋ tə mama, Ba-Yígúrə́-Jə-Tiu yà nə pɩn nii Moyizə nə, sə Yɩzərayɛlə dwíí tə tʋn, ba twá kʋ nii nə, ba tʋn kʋ nətʋ.
33 Ba jɩn Yɩɩ wúlú gansili tə, də kʋ zɩla tə mama, ba bà Moyizə con. Kʋ yà yɩ gansili tə, də kʋ gwalɩ tə, də kʋ səpunə dapɩparan tə, də kʋ dagaran tə, də kʋ ywəŋə tə, də kʋ ywəŋə də̀ń zɩlan tə.
34 Kʋ súrí kʋ yuu pabɩran tànàn tapoli tə nə, ba nə nɩŋɩ, ba li sɩnʋ wa, də mʋʋ wa won don tànʋ̀ tapoli, ba nə nɩŋɩ, də Yɩɩ wúlú bwálɩ́ tə waa titəŋi patasɩn tə.
35 Kʋ súrí Yɩɩ nimarʋ dansɩa daka tə nə, də ka dɛɛ nədaran tə, ba nə ma zɩŋa ka, də ka nipuə tə, ba nə ma boŋə cʋna kwɩan bwálɩ́.
36 Kʋ súrí tabɩlʋ tə, də kʋ tʋtʋnzɩla tə mama nə, də dipɛn tə, ba nə túŋə́, ba pɩn Yɩɩ nə.
37 Kʋ súrí canzɩlʋ tə nə, ba nə fwa də sɩ́án tə nə ba durən jə, də kʋ yuu tʋntʋnɩ tə nə tɩɩn duən nə, də kʋ tʋtʋnzɩla tə mama, də nʋga tə, ba nə ma sʋ̀rɩ́ tʋntʋnɩ tə.
38 Kʋ súrí Yɩɩ joŋi bwálɩ́ tə nə, ba nə fwa də sɩ́án, də dun nʋga* tə, də wusinə tə, ba nə sʋ̀rɩ́, də Yɩɩ wúlú gansili tə mimii nii gànʋ̀ tə.
39 Kʋ súrí Yɩɩ joŋi bwálɩ́ tə nə, ba nə fwa də cɩnɩan, də kʋ waa cɩnɩan wogɩganʋ tə, də kʋ dɛɛ nədaran tə, ba nə ma zɩŋa kʋ, də kʋ tʋtʋnzɩla tə mama,
də nɩ́á kwarɩ tə, də kʋ də̀ń zɩlʋ tə.
40 Kʋ súrí Yɩɩ wúlú gansili dəwoo tapwələ tə nə, də ka ywəŋə tə, də tə də̀ń zɩlan tə, də dəwoo tə mimii nii gànʋ̀ tə, də ka ŋoni tə, də ka párá tə,
də tʋtʋnzɩla tə mama, ba nə wá ma tʋn Yɩɩ wúlú gansili tə wa, kʋ nə yɩ Yɩɩ jə́rə́ bwálɩ́.
41 Kʋ súrí Yɩɩ joŋwana dun gànàn tə nə, ba nə wá zʋ, ba ma tʋn Yɩɩ wúlú gansili tə kwa con dibiu tə wa, kʋ nə yɩ Yɩɩ nyiən.
Gànàn təntə nə yɩ Yɩɩ joŋwanʋ Aron culu gànàn tə, də ʋ bɩ̀á tə joŋwana gànàn tə, ba nə wá zʋ, ba ma tʋn joŋwanɩ tʋtʋŋɩ tə.
42 Yɩzərayɛlə dwíí tə tʋn tʋ̀tʋ̀nán təntə mama, kʋ twá ndə nətʋ tə nə, Ba-Yígúrə́-Jə-Tiu yà nə pɩn nii Moyizə nə, sə ba tʋn. 43 Moyizə nɩ də, Yɩzərayɛlə dwíí tə tʋn tʋ̀tʋ̀nán tə mama, kʋ twá ndə nətʋ tə nə, Ba-Yígúrə́-Jə-Tiu yà nə pɩn wá nii, sə ba tʋn. Yá Moyizə dàń lòrì, sə Yɩɩ fwa zəni Yɩzərayɛlə dwíí tə yɩra.