Kwìə̀ tə Ba-Yígúrə́-Jə-Tiu nə pɩn, ʋ wúlú gansili tə pwiu yoo wa
40
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Təntən cànà tə təntən dɩɩn tə nə, n wá pa, ba pú Yɩɩ wúlú gansili tə, kʋ nə yɩ Yɩɩ jə́rə́ bwálɩ́, ba zɩgɩ. 3 N wá tún Yɩɩ nimarʋ dansɩa daka tə, Yɩɩ wúlú gansili tə wa, n ga kə patasɩn tə nə pwɛ̀ gansili tə wa tə, n ma kwálɩ́ daka tə nə. 4 N wá ja dipɛn tabɩlʋ tə, də kʋ yuu dipɛn tə, n zʋ n tún, ndə kʋ nə mɛ nətʋ. N wá ja canzɩlʋ tə, n zʋ n tún, n ga sʋ̀rɩ́ kʋ tʋntʋnɩ tə. 5 Yɩɩ joŋi bwálɩ́ tə, ba nə fwa də sɩ́án tə nə ba durən jə, sə ba ma sʋ̀rɩ́ wusinə tə, n wá tún kʋ, Yɩɩ nimarʋ dansɩa daka tə yáá con, n ga kə Yɩɩ wúlú gansili tə mimii nii gànʋ̀ tə. 6 N wá tún Yɩɩ joŋi bwálɩ́ tə, ba nə ma sʋ̀rɩ́ jwəŋə vàná tə, Yɩɩ wúlú gansili tə, kʋ nə yɩ Yɩɩ wúlú bwálɩ́, mimii tə yáá. 7 N wá tún nɩ́á kwarɩ tə, Yɩɩ wúlú gansili tə, də Yɩɩ joŋi bwálɩ́ tə pwə́rə́ wa, n kə nɩ́á kʋ wa. 8 N wá kə dəwoo tə tapwələ tə, n ma kɩkarɩ Yɩɩ wúlú gansili tə mama, n ga kə dəwoo tə mimii nii gànʋ̀ tə.9 Yá n dàń wá tì dun nʋga* tə, n kə Yɩɩ wúlú gansili tə, də kʋ wa zɩla tə mama yɩra, n ma tún tə vàn nə, n pa nə. Yá Yɩɩ wúlú gansili tə dàń wá ya à mʋ̀ Yɩɩ nyiən. 10 N wá kə dun nʋga tə, Yɩɩ joŋi bwálɩ́ tə, ba nə ma sʋ̀rɩ́ jwəŋə vàná tə, də kʋ tʋtʋnzɩla tə mama yɩra, n ma tún tə vàn nə, n pa nə. Yá Yɩɩ joŋi bwálɩ́ tə dàń wá ya à mʋ̀ Yɩɩ cɩcɩ nyiən. 11 N wá kə dun nʋga tə, nɩ́á kwarɩ tə, də kʋ də̀ń zɩlʋ tə yɩra, n ma tún kʋ vàn nə, n pa à mʋ̀ Yɩɩ nə. 12 N wá ja Aron də ʋ bɩ̀á tə, n bà, n zɩgɩ Yɩɩ jə́rə́ gansili tə mimii nə, n ga swɛ ba də nɩ́á. 13 N dàń wá tì Aron Yɩɩ joŋwana culu gànàn tə, n ma zʋ wá. N wá twɛ́n dun nʋga tə, ʋ yuu wa, n ma tún wá vàn nə, sə ʋ tʋn Yɩɩ joŋwanɩ, ʋ pa nə. 14 Kʋ kwa nə, n wá ja Aron bɩ̀á tə, n bà, n ga tì ba Yɩɩ joŋwana gànàn tə, n ma zʋ ba. 15 N wá twɛ́n dun nʋga tə, ba yuu wa, ndə n nə twɛ́n ka, ba nyɩna yuu wa nətʋ. Yá ba dàń wá tʋn joŋwanɩ, ba pa nə. Dun nʋga təntə, n nə wá twɛ́n ba yuu wa, wá pa, ba də ba dwíí tə mama, ba nə wá kə lʋʋ wa, ya à joŋwana, máŋá də máŋá mama wuuu.
16 Moyizə tʋn yoo mama, kʋ twá ndə nətʋ tə nə, Ba-Yígúrə́-Jə-Tiu yà nə pɩn wá nii, sə ʋ tʋn.
Moyizə pɩn, ba pú Yɩɩ wúlú gansili tə, ba zɩgɩ
17 Bələ nii bɩnɩ tə təntən cànà tə təntən dɩɩn nə, ba púə́ Yɩɩ wúlú gansili tə, ba zɩgɩ. 18 Moyizə pɩn, tʋ̀tʋ̀nà tə pú Yɩɩ wúlú gansili tə, ba zɩgɩ. Ʋ pɩn, ba zɩgɩ kʋ ywəŋə də̀ń zɩlan tə, ba cwɛn ywəŋə tə, zɩlan tə wa, ba tún kʋ dapɩparan tə, ba ga pàlɩ́ kʋ dagaran tə. 19 Ba larɩ gantwɛn tapwələ tə, gansili tə yuu wa, ba ga larɩ tànàn tapwələ tə, ba ma pú kʋ yuu nə, ndə Ba-Yígúrə́-Jə-Tiu yà nə pɩn nii Moyizə nə, sə ʋ tʋn nətʋ.
20 Moyizə tì Yɩɩ nimarʋ dansɩa won tə, ʋ kə Yɩɩ nimarʋ culu daka tə wa, ʋ ja ka nipuə tə, ba nə ma boŋə cʋna kwɩan bwálɩ́, ʋ ma pú. Ʋ ken dɛɛ nədaran tə, ba nə wá ma zɩn daka tə, ka yɩra. 21 Yá ʋ dàń pɩn, ba tì daka tə, ba ja zʋ, ba tún Yɩɩ wúlú gansili tə wa. Ʋ ken patasɩn tə nə pwɛ̀ gansili tə waa tə, ʋ ma kwálɩ́ Yɩɩ nimarʋ dansɩa daka tə nə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.
22 Moyizə pɩn, ba tún Yɩɩ dipɛn tabɩlʋ tə, Yɩɩ jə́rə́ gansili tə wa, gansili tə jɩzən saparʋ səpuni tə con, patasɩn tə nə pwɛ̀ gansili tə waa tə, kwa con dibiu tə wa. 23 Yá ʋ dàń tún dipɛn kʋ yuu wa, ndə kʋ nə mɛ nətʋ, ʋ pa Ba-Yígúrə́-Jə-Tiu nə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.
24 Moyizə pɩn, ba tún canzɩlʋ tə, tabɩlʋ tə yáá con, Yɩɩ jə́rə́ gansili tə wa, gansili tə jɩgwiə saparʋ səpuni tə con. 25 Yá ʋ dàń sʋ̀rɩ́ tʋntʋnɩ tə Ba-Yígúrə́-Jə-Tiu yáá con, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.
26 Moyizə pɩn, ba tún Yɩɩ joŋi bwálɩ́ tə, ba nə fwa də sɩ́án, patasɩn tə nə pwɛ̀ gansili tə waa tə, yáá con. 27 Yá ʋ dàń pɩn, ba sʋ̀rɩ́ wusinə kʋ yuu wa, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.
28 Moyizə ken Yɩɩ wúlú gansili tə mimii nii gànʋ̀ tə, 29 ʋ ga pa, ba tún Yɩɩ joŋi bwálɩ́ tə, ba nə ma sʋ̀rɩ́ jwəŋə vàná tə, Yɩɩ wúlú gansili tə, kʋ nə yɩ Yɩɩ wúlú bwálɩ́, mimii tə yáá. Yá ʋ dàń fwa vànɩ́ joŋi, də vàrʋ́ càlɩ̀ joŋi, ʋ sʋ̀rɩ́ kʋ yuu wa, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.
30 Moyizə pɩn, ba tún nɩ́á kwarɩ tə, Yɩɩ jə́rə́ gansili tə, də Yɩɩ joŋi bwálɩ́ tə pwə́rə́ wa. Ʋ pɩn, ba kə nɩ́á kʋ wa, sə Yɩɩ joŋwana tə ma sɩ̀n ba yɩra durən. 31 Moyizə, də Aron, də Aron bɩ̀á tə dàń yà sɩ̀n ba jɩ̀àn, də ba nɛɛ, də nɩ́á təntə. 32 Máŋá mama, ba nə zwɩ gansili tə wa, nə à yə̀ə́ ba nə pɩ̀à, ba yí Yɩɩ joŋi bwálɩ́ tə yɩra, ba yàá dí yáá, ba sɩ̀n ba yɩra durən, ndə Ba-Yígúrə́-Jə-Tiu yà nə pɩn nii Moyizə nə, sə ba tʋn nətʋ.
33 Moyizə pɩn, ba fwa dəwoo tə, ba ma kɩkarɩ Yɩɩ wúlú gansili tə, də Yɩɩ joŋi bwálɩ́ tə. Yá ʋ dàń ken mimii nii gànʋ̀, dəwoo tə mimii nə. Mə kʋ twá nətʋ, Moyizə ma tʋn tʋ̀tʋ̀nán tə, ʋ zwɛ̀.
Ba-Yígúrə́-Jə-Tiu dun tə súə́ ʋ gansili tə
34 Bakwan tə dàń twi, kʋ pú Yɩɩ jə́rə́ gansili tə nə, yá Ba-Yígúrə́-Jə-Tiu dun tə dàń súə́ ʋ wúlú gansili tə. 35 Moyizə yà wàrɩ̀ Yɩɩ jə́rə́ gansili tə wa ʋ zwɩ, bakwan tə yà nə púə́ kʋ yuu nə yɩrɩ. Yá Ba-Yígúrə́-Jə-Tiu dun tə də yà súə́ ʋ wúlú gansili tə.
36 Kʋ nə mɛ kʋ máŋá təntə wa, bakwan tə nə zaŋa Yɩɩ wúlú gansili tə yuu con mama, Yɩzərayɛlə dwíí tə də yàá zàn, ba zʋ cwəŋə. Mə kʋ yɩn nətʋ, ba cwəŋə tə vəli tə mama wa. 37 Bakwan tə nə wà zàn, ba də yàá ba zaŋa. Ba yàá dàn, kʋ ja va dɩɩn tə, kʋ nə wá zàn.
38 Cɩ́gá, Ba-Yígúrə́-Jə-Tiu bakwan tə yà wulə ʋ wúlú gansili tə yuu wa, yɩcaʋ wa. Yá tɩtɩn nə, mən yàá wulə bakwan tə wa, Yɩzərayɛlə dwíí tə mama yɩ́á yuu. Mə kʋ yɩn nətʋ, ba cwəŋə tə vəli tə mama wa.