Joŋwana 1

Yɩɩ joŋwana

tʋ̀tʋ̀nán yoo

KWIƏ TƏ YƖƖ NƏ PƖN, JWƏŊƏ FWAŊƲ YOO WA

Joŋi tə, ba nə sʋ̀rɩ́*

1 Ba-Yígúrə́-Jə-Tiu zɩgɩ Yɩɩ jə́rə́ gansili tə wa, ʋ bon Moyizə, ʋ swɩ̀n ʋ con, 2 sə ʋ pa kwìə̀ tə tə, Yɩzərayɛlə dwíí tə nə. Ʋ swɩ̀n, ʋ wʋ́: «Á wa lìù nə pɩ̀à, sə ʋ fwa joŋi, ʋ pa à mʋ̀ Ba-Yígúrə́-Jə-Tiu nə, kʋ tíú mɛ, sə ʋ ja vanfarʋ, nə à yə̀ə́ vanmɩna, ʋ ma fwa kʋ joŋi təntə. 3 Kʋ nə yɩ joŋi tə, ba nə sʋ̀rɩ́ nə, ʋ pɩ̀à, sə ʋ ja vanfarʋ, ʋ ma fwa, vànɩ́ tə mɛ, sə kʋ ya vanbɩa, kʋ yɩra nə zurə, kʋ ga cé. Ʋ mɛ, sə ʋ ja kʋ ʋ bà, ʋ zɩgɩ Yɩɩ jə́rə́ gansili tə mimii nə, sə à mʋ̀ Ba-Yígúrə́-Jə-Tiu sɛ̀, à jon kʋ. 4 Ʋ wá tún ʋ jɩɩn vànɩ́ tə yuu wa, ʋ nə pɩ̀à, ʋ ma fwa joŋi, ʋ sʋ̀rɩ́ tə, yá à mʋ̀ Ba-Yígúrə́-Jə-Tiu dàń wá sɛ̀ à jon kʋ, sə kʋ kwɛn ʋ cʋna tə. 5 Kʋ kwa nə, joŋi tə tíú dàń wá gʋ vànɩ́ tə, à mʋ̀ Ba-Yígúrə́-Jə-Tiu yáá con. Yá Aron bɩ̀á, Yɩɩ joŋwana tə, dàń wá ja kʋ jana tə, ba ma tà Yɩɩ joŋi bwálɩ́ tə yɩra tə, ba kɩkarɩ. Kʋ mʋ̀ Yɩɩ joŋi bwálɩ́ tə nə wulə Yɩɩ jə́rə́ gansili tə mimii tə nə. 6 Joŋi tə tíú wá pwànà vànɩ́ tə, ʋ ca. 7 Yɩɩ joŋwanʋ Aron bɩ̀á tə wá kə mən Yɩɩ joŋi bwálɩ́ tə yuu wa, ba ga dà dɛɛ mən tə yuu wa. 8 Aron bɩ̀á, Yɩɩ joŋwana tə, dàń wá tì vànɩ́ tə nandɛɛ tə, də kʋ yuu tə, də kʋ nʋga tə, ba pàlɩ́ dɛɛ tə yuu, Yɩɩ joŋi bwálɩ́ tə yuu wa. 9 Joŋi tə tíú wá sɩ̀n vànɩ́ lʋran tə, də kʋ nakoli tə, nɩ́á wa. Yá Yɩɩ joŋwanʋ tə don dàń wá sʋ̀rɩ́ tə mama, Yɩɩ joŋi bwálɩ́ tə yuu wa. Kʋ yɩ joŋi, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə.

10 Yá kʋ dàń nə yɩ vanmɩna joŋi nə, kʋ tíú pɩ̀à, sə ʋ fwa, ʋ sʋ̀rɩ́, kʋ nə yɩ pəbiə, nə à yə̀ə́ bʋbiə, kʋ yɩ vanbɩa, ka yɩra nə zurə, ka ga cé, nə ʋ mɛ, sə ʋ zɩgɩ. 11 Ʋ mɛ, sə ʋ gʋ ka, à mʋ̀ Ba-Yígúrə́-Jə-Tiu yáá con, Yɩɩ joŋi bwálɩ́ tə jɩgwiə saparʋ con. Yá Aron bɩ̀á, Yɩɩ joŋwana tə, dàń wá ja ka jana tə, ba ma tà Yɩɩ joŋi bwálɩ́ tə yɩra tə, ba kɩkarɩ. 12 Joŋi tə tíú wá ca vànɩ́ tə, ʋ súrí yuu tə, də nʋga tə nə. Yá Yɩɩ joŋwanʋ tə don dàń wá tún vànɩ́ tə nandɛɛ tə, dɛɛ tə yuu, tə nə wulə Yɩɩ joŋi bwálɩ́ tə mən tə wa, ʋ sʋ̀rɩ́. 13 Joŋi tə tíú wá sɩ̀n vànɩ́ tə lʋran tə, də kʋ nakoli tə, nɩ́á wa. Yɩɩ joŋwanʋ tə súrí tə, vànɩ́ tə nandɛɛ tə nə, ʋ bɩrɩ Yɩɩ nə, ʋ ga sʋ̀rɩ́ tə mama, Yɩɩ joŋi bwálɩ́ tə yuu wa. Kʋ yɩ joŋi, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə.

14 Kʋ nə kʋ́ʋ̀ yɩ zuŋə joŋi nə, lìù pɩ̀à, sə ʋ fwa, ʋ sʋ̀rɩ́, ʋ pa à mʋ̀ Ba-Yígúrə́-Jə-Tiu nə, kʋ yɩ gunpwənə, nə à yə̀ə́ nasara gunpwənə nə, ʋ mɛ, sə ʋ pa. 15 Yɩɩ joŋwanʋ tə don wá tún zuŋə tə, Yɩɩ joŋi bwálɩ́ tə yuu wa. Ʋ wá cʋ ka yuu tə, ʋ goŋə, ʋ sʋ̀rɩ́ Yɩɩ joŋi bwálɩ́ tə yuu wa, ʋ ga gàrɩ̀ ka jana tə, Yɩɩ joŋi bwálɩ́ tə wa. 16 Ʋ wá lɩ zuŋə tə fɩʋ tə, də ka kʋran tə, ʋ dʋgʋ Yɩɩ joŋi bwálɩ́ tə səpuni nə, yɩɩ yipɩan con, bwálɩ́ tə nə, ba nə lwɛ́ tʋntʋnan tə. 17 Yá ʋ dàń wá twá zuŋə tə vànà tə pwə́rə́ wa, ʋ kàrɩ́ ka. Ʋ dàń nə bá cɩrɩ ka duən wa, bələ. Yá Yɩɩ joŋwanʋ tə dàń wá sʋ̀rɩ́ zuŋə tə dɛɛ tə yuu, tə nə wulə mən tə wa, Yɩɩ joŋi bwálɩ́ tə yuu wa. Kʋ yɩ joŋi, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə.»